1st JUN 2024 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၄ ဇွန်လ ( ၁ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ စစ်ကောင်စီ ခရိုင်ရုံးကို CDF မတူပီ တပ်မဟာ ၂ က သိမ်းယူ ထိန်းချုပ်ထား

 

ချင်းပြည်၊ မတူပီမြို့ပေါ်ရှိ စစ်ကောင်စီတပ်စွဲထားတဲ့ ခရိုင်ရုံးကို CDF မတူပီ တပ်မဟာ ၂ ဝကောက်တပ်ရင်းက သိမ်းယူပြီး ထိန်းချုပ်လိုက်နိုင်ကြောင်း သတင်းထုတ်ပြန်ပါတယ်။

မေလ ၃၀ရက်နေ့ မနက်ပိုင်းမှာ အပြီးသိမ်းပိုက်နိုင်တာဖြစ်တယ်လို့ ထုတ်ပြန်ချက်မှာ ဖော်ပြပါတယ်။

ခရိုင်ရုံးမှာ တပ်စွဲထားတဲ့ စစ်ကောင်စီတပ်ဖွဲ့ဝင်တွေဟာ ဖနိုင်ကျေးရွာဘက် ထွက်ပြေးခဲ့နေတာကြောင့် CDF မတူပီ၊ တပ်မဟာ ၂ က လိုက်လံရှင်းလ၊င်းနေတယ်လို့လည်း ထုတ်ပြန်ထားပါတယ်။

မေလ ၃၀ရက် မနက်ပိုင်းမှာ ဖြစ်ပွားတဲ့ မတူပီမြို့ တိုက်ပွဲမှာ စစ်ကောင်စီဘက် ထိခိုက်သေဆုံးမှု အတိအကျမသိရပေမယ့် တော်လှန်ရေးတပ်ဖွဲ့ဝင်တဦး မြေမြှုပ်မိုင်းနင်းမိပြီး ဒဏ်ရာရရှိထားတယ်လို့ ဆိုပါတယ်။

ချင်းပြည် တောင်ပိုင်း၊ မြောက်ပိုင်းရှိ မြို့တွေနဲ့ ထိစပ်နေတဲ့ မတူပီမြို့မှာ စစ်ကောင်စီ ခြေလျင်တပ်ရင်း အမှတ် ၁၄၀၊ ခြေမြန်တပ်ရင်း အမှတ် ၃၀၄ နဲ့ စစ်ဗျုဟာတခု အခြေစိုက်ထားပါတယ်။

========================

 

📌📌 ၂။ ဒိုင်ရ်ပြည်သူ့ညီလာခံကျင်းပ၊ Daai (ဒိုင်ရ်) ဒေသန္တရကောင်စီ အတည်ပြုဖွဲ့စည်း

 

မင်းတပ်၊ မတူပီ၊ ကန်ပက်လက်၊ ပလက်ဝ လေးမြို့နယ်ရှိ ဒိုင်ရ်ဒေသ ပြန်လည်ပေါင်းစည်းနိုင်ရေး ပထမအကြိမ်ဒိုင်ရ်ပြည်သူ့ညီလာခံမှာ အတည်ပြုခဲ့တယ်လို့ ဒိုင်ရ်ဒေသန္တရကောင်စီ (Daai Regional Council) က ၂၀၂၄ မေလ ၂၉ရက်နေ့က ထုတ်ပြန်ပါတယ်။

၂၀၂၄ခုနှစ် မေလ ၁၆ရက်နေ့နှင့်၁၇ရက် နှစ်ရက်တာပြုလုပ်တဲ့ အစည်းအဝေးမှာ လေးမြို့နယ်မှာရှိနေတဲ့ ကာကွယ်ရေးတပ်ဖွဲ့တွေ စုပေါင်းပြီး ချင်းလဲန်းကာကွယ်ရေးတပ်ဖွဲ့ (ဒိုင်ရ်)အဖြစ် တည်ဆောက်သွားမယ်လို့လည်း ပြောပါတယ်။

စစ်အာဏာရှင်ကျဆုံးရေး၊ ဖက်ဒရယ်ဒီမိုကရေစီရရှိရေးအတွက် ရည်မှန်းချက်တူညီတဲ့ တော်လှန်ရေးအင်အားစုတွေနဲ့ တို၊က်ပွဲဝင်ပြီး ချင်းအမျိုးသားစည်းလုံးညီညွတ်ရေး၊ ချင်းပြည်တည်ထောင်ရေးမှာ လက်တွဲပူးပေါင်းသွားမယ်လို့ (Daai Regional Council)က ထုတ်ပြန်ပါတယ်။

 

========================

 

📌📌 ၃။ တီးတိန်စစ်ဆင်ရေးမှာ ‘ချင်းညီနောင်’ ဖိတ်ခေါ်ပါက ပါဝင်တိုက်ခိုက်မယ်လို့ CNA ပြော

 

ချင်းပြည်၊ တီးတိန်မြို့သိမ်းတိုက်ပွဲ ဖော်ဆောင်မှုအတွင်း စစ်ဆင်ရေးဆောင်နေတဲ့ ကာကွယ်ရေးတပ်ဖွဲ့တွေက ဖိတ်ခေါ်ရင် ပူးပေါင်း ပါဝင်တိုက်ခိုက်ဖို့ အသင့်ရှိနေကြောင်း ချင်းအမျိုးသားတပ်မတော် (CNA)ပြောခွင့်ရ ဆလိုင်းထက်နီက ပြောပါတယ်။

"အတတ်နိုင်ဆုံး စစ်ကောင်စီ ကင်းစင်ရေး ပူးပေါင်းလုပ်ချင်ပါတယ်။ အသင့်အနေအထားပါ။ အခုလည်း အဲဒီအနီးတဝိုက်မှာ ကျနော်တို့ အားလုံးရှိနေပါတယ်" လို့ (CNA) ပြောခွင့်ရက ပြောဆိုကြောင်း People’s Springက မေ ၂၉ရက်နေ့က ရေးသားပါတယ်။

တီးတိန်မြို့အထိုင် စစ်ကောင်စီတပ်ကို မေလ ၂၆ ရက် ညပိုင်းမှာ ‘ချင်းညီနောင်’ စစ်ဆင်ရေးအဖြစ် (PDF - Zoland)၊ ချင်းအမျိုးသားကာကွယ်ရေးတပ်ဖွဲ့ (CNDF) တို့က တိုက်ခိုက်ခဲ့တာဖြစ်ပြီး စစ်ကောင်စီအထိုင်ချစခန်းနှစ်ခု (Macro နှင့် နတလ) ကို သိမ်းယူခဲ့ပါတယ်။

စစ်ကောင်စီ လက်အောက်ခံ ရဲတပ်ဖွဲ့ဝင် ၉ ဦးနဲ့ လက်နက်ခဲယမ်း သိမ်းဆည်းထားကြောင်းလည်း PDF – Zoland က သတင်းထုတ်ပြန်ပါတယ်။

စစ်ကောင်စီရဲ့ လေကြောင်းဗုံးကျဲတာအပြင် မြို့ပေါ်နေအိမ်တွေကို မီးရှို့ဖျက်ဆီးပြီး ပြန်လည်ခုခံနေတာကြောင့် အိမ်ခြေ ၃၀ ထက်မနည်း မီးလောင်ပျက်စီးနိုင်တယ်လို့ တီးတိန်ဘက်ကလာတဲ့ သတင်းတွေမှာ ဖော်ပြပါတယ်။

တီးတိန်ဟာ စစ်ကောင်စီခန့် ယခုချင်းပြည်နယ်ဝန်ကြီးရဲ့ ဇာတိမြို့ဖြစ်ပြီး အဲဒီမှာ အမှတ် ၂၆၉ စစ်ကောင်စီ ခြေလျင်တပ်ရင်း အထိုင်ချထားပါတယ်။

#RadioNUGLocalNews

#SpringRevolution