27th MAY 2024 - (Ethnic language program-Matupi) by The Matupi Times

📌 (ချင်း တိုင်းရင်းသား - Matupi ) ထုတ်လွှင့်မှု အစီအစဥ် ၂၀၂၄ မေလ ( ၂၇ ) ရက်နေ့ ရပြည်တွင်းသတင်းများ

📌📌 ၁။ တွန်းဇံမြို့ကို CNF/CNA ဦးဆောင်သောချင်းပူးပေါင်းတပ်က ဆက်လက်ထိန်းချုပ်၊ စစ်ကောင်စီတပ်ဖွဲ့ဝင် ၄၀ ခန့်ဖမ်းဆီးခံရပြီး ၊ လက်နက်အများအပြာသိမ်းဆည်းရမိ

 

The Matupi Times မေလ ၂၄ ၊ ၂၀၂၄

စစ်ကောင်စီကပြန်လည်ရယူဖို့အကြိမ်ကြိမ်ကြိုးစားနေတဲ့ ချင်းပြည်နယ်မြောက်ပိုင်းက တွန်းဇံမြို့ကို CNF/CNA ဦးဆောင်သောချင်းပူးပေါင်းတပ်က သိမ်းပိုက်ထိန်းချုပ်ထားပြီး စစ်ကောင်စီတပ်ဖွဲ့ဝင် (၄၀)ခန့်ဖမ်းဆီးခံရကာ လက်နက်အများအပြား သိမ်းဆည်းရမိခဲ့တယ်လို့သိရပါတယ်။

တွန်းဇံကိုမြိုကို CNF/CNA ဦးဆောင်သောချင်းပူးပေါင်းတပ်ကပြီးခဲ့တဲ့ မေလ ၂၁ ရက်ကသိမ်းပိုက်ထားပေမယ့် စစ်ကောင်စီကလေကြောင်းဖြင့် တိုက်ခိုက်မှုအကြိမ်ကြိမ်ပြုလုပ်ခဲ့သည့်အပြင် စစ်အင်အားဖြည့်တင်းမှုပြုလုပ်ကာ ပြန်လည်ထိန်းချုပ်ဖို့ကြိုးစားခဲ့တာကြောင် မေလ ၂၃ ရက်နေ့ထိ ထိတိုက်ပွဲပြင်းထန်ခဲ့ပါတယ်။

 

တွန်းဇံမြို့သိမ်းတိုက်ပွဲတွင် စစ်ခုံရုံးကနေ ထောင်တစ်သက်တစ်ကျွန်းနဲ့ နှစ်ရှည်ထောင်ဒဏ်တွေ ချမှတ်ထားတဲ့ CDM မူလတန်းပြဆရာမ မ၀ုန်ဟွဲကိမ်၊ ထောင်ခုနစ်နှစ် ချမှတ်ခံထားရတဲ့ မ၀ုန်ဟွဲကိမ်ရဲ့ဖခင်နဲ့ ပုဒ်မ ၅၀၅-က နဲ့ ဖမ်းဆီးခံထားရတဲ့ ဖိုင်တူရွာသား အမျိုးသားတစ်ဦး တို့ကိုမေလ ၂၂ ရက်နေ့မှာကယ်ထုတ်နိုင်ခဲ့ပါတယ်။

 

ဆက်လက်၍ တိုက်ပွဲတွင် စစ်ကောင်စီတပ်ကုန်းစခန်းမှ မြန်မာငွေကျပ် သိန်းသုံးထောင်ကျော်ကိုလည်းသိမ်းဆည်း ရမိခဲ့တယ်လို့ဒေသခံသတင်းတွေထံကသိရပါတယ်။

 

တွန်းဇံမြို့ကို အလုံးစုံ သိမ်းပိုက်ပြီး ( မေ ၂၃) ညနေပိုင်းတွင် တွန်းဇံတမြို့လုံးက စစ်ကောင်စီတပ်ဖွဲ့ဝင်တွေအားလုံး ကင်းစင်သွားကြောင်းသိရပြီး ကျန်ရှိနေသည့် စစ်ကောင်စီတပ်သားများသည် တီးတိန်မြို့ဘက်သို့ ဆုတ်ခွာသွားကြောင်း သိရပါတယ်။

တွန်းဇံမြို့သိမ်းတိုက်ပွဲသည် CNA အပါအဝင် CDFs ချင်း ကာကွယ်ရေးတပ်ဖွဲ့ ၁၄ ဖွဲ့ခန့်ပါဝင်ပြီး မြို့သိမ်းစစ် ဆင်ရေး တိုက်ပွဲများ အတွင်း စစ်ကောင်စီဘက်က ၂၀ကျော် သေဆုံးမှုရှိသလို ချင်းပူးပေါင်းတပ်ဖွဲ့ဘက်ကလည်း တော်လှန် ရေးရဲဘော်အချို့ ကျဆုံးထိခိုက်ခဲ့ကြောင်းသိရသည်။

 

========================

 

📌📌 ၂။ Maraland Defense Force ၏အခြေခံစစ်သင်တန်း အမှတ်စဉ် (၂) သင်တန်းဆင်းပွဲကျင်းပ

 

The Matupi Times မေလ ၂၀ ၊ ၂၀၂၄

မရာနယ်မြေအုပ်ချုပ်ရေးကောင်စီ၊ မရာလဲန်းကာကွယ်ရေးတပ်ဖွဲ့မှ ပြုလုပ်သည့် အထူးအခြေခံစစ်သင်တန်း အမှတ်စဉ် (၂) သင်တန်းဆင်းပွဲအခမ်းအနားကို ၂၀၂၄ ခုနှစ်၊ မေလ ၁၇ ရက်နေ့တွင် မရာနယ်မြေ တစ်နေရာ၌ အောင်မြင်စွာ ပြုလုပ်ကျင်းပခဲ့တယ်လိုိ့သိရပါတယ်။

 

 

အဆိုပါသင်တန်းတွင် သင်တန်းဆရာအဖြစ် ရက္ခိုင်အမျိုးသားအဖွဲ့ချုပ်၊ အာရက္ခတပ်တော်မှသင်တန်းဆရာများမှ တာဝန်ယူဆောင်ရွက်ပေးခဲ့တယ်လို့သိရပါတယ်။

သင်တန်းဆင်းပွဲသို့ မဟာမိတ် အာရက္ခတပ်တော်မှ အရာရှိ၊ အရာခံများ အကြပ်စစ်သည်များနှင့် အနောက်မရာမှ အထူးဖိတ်ကြားထားသူများ၊ တိုက်နယ်ကိုယ်စားလှယ်များ၊ ကောင်စီဝင်များနှင့် ရပ်မိရပ်ဖများအားလုံးတက်ရောက်ခဲ့ကြတယ်လို့ သတင်းထုတ်ပြန်ပါတယ်။

 

========================

 

📌📌 ၃။ CDF-Kanpalet၏ခွင့်ပြုချက်မရှိဘဲ တပ်စခန်းချခြင်း နှင့် စစ်ရေးလှုပ်ရှားခြင်းမပြုရန်သတိပေး

 

The Matupi Times မေလ ၂၁ ၊ ၂၀၂၄

ကန်ပက်လက်မြို့နယ်အတွင်းတွင် Chinland Defense Force - Kanpetlet ၏ခွင့်ပြုချက်မရှိဘဲ မည့်သည့်တော်လှန်ရေးလက်နက်ကိုင်တပ်ဖွဲ့မှ လူထုစည်းရုံးလှုံ့ဆော်ခြင်းများ ၊ တပ်စခန်းချနေထိုင်ခြင်းများ နှင့်စစ်ရေးလှုပ်ရှားခြင်းများ မပြုလုပ်ကြဖို့ ဒီကနေ့မေလ ၂၁ ရက်နေ့မှာသတိပေးချက်ထုတ်ပြန်ပါတယ်။

 

လိုက်နာဆောင်ရွက်ခြင်းမရှိဘဲ တော်လှန်ရေးလက်နက်ကိုင်တပ်ဖွဲ့အချင်းချင်းကြား ပြဿနာများ၊ သွေးထွက်သံယိုများ ဖြစ်ပေါ်လာပါက ဖောက်ဖျက်သောအဖွဲ့အစည်းနှင့် လူပုဂ္ဂိုလ်ကသာတာဝန်ယူ၊တာဝန်ခံရမည်ဖြစ်ကြောင်း ထုတ်ပြန်ကြေငြာပါတယ်။

 

========================

 

📌📌 ၄။ CDF-Matupi တပ်မဟာ(၁) တီထွင်သည့် Rocket (MR1) စမ်းသပ်မှုအောင်မြင်

 

The Matupi Times မေလ ၂၂၊ ၂၀၂၄

Chinland Defense Force - Matupi (Brigade 1) ၏ ကိုယ်ပိုင် ထုတ်လုပ်သော Matupi Rocket (MR1) စမ်းသပ်မှုအောင်မြင်ကြောင်း ရုပ်သံဖိုင်ကို မေလ ၂၂ ရက်နေ့ညပိုင်းမှာ သတင်းထုတ်ပြန်လိုက်ပါတယ္။

၎င်း MR1 သည် လေမိုင် ၁၀ မိုင်ခန့် အကွာအဝေးသို့ လှမ်းပစ်နိုင်ပြီး အရေအတွက် ရာချီ ထုတ်လုပ်နိုင်ရန် တပ်မဟာ ၁ အနေဖြင့် ပြင်ဆင်လျှက်ရှိတယ်လို့ဆိုပါတယ်။

 

========================

 

📌📌 ၅။ မရာဒေသတော်လှန်ရေးတပ်ဖွဲ့များဖြစ်သည့် MDF/MTC နှင့် CDF-MARA တို့နှစ်ဖက်သဘောတူညီမှုရရှိ

 

The Matupi Times မေလ ၂၄၊ ၂၀၂၄

ချင်းပြည်နယ္၊ မရာဒေသလက်နက်ကိုင်တော်လှန်ရေးတပ်ဖွဲ့များဖြစ်သည့် MDF/MTC နှင့် CDF တို့အကြား နှစ်ဖက်သဘောတူညီရရှိခဲ့ပြီဖြစ်ကြောင်းသိရပါတယ်။

ချင်းပြည်နယ် ၊ မရာဒေသ လက်နက်ကိုင်အဖွဲ့ နှစ်ဖွဲ့ဖြစ်တဲ့ Maraland Territorial Council/ Maraland Defense Force ( MTC/MDF ) နဲ့ Interim Maraland Council/Chinland Defense Force-Mara ( IMC/CDF-Mara ) တို့သည် မီဇိုရမ်ပြည်နယ်၊ ဆိုင်းဟားခရိုင်၊ ဇောင်းလိန်ရွာ၌ ၂၀၂၄ ခုနှစ်၊ မေလ ၂၂ မှ ၂၃ ရက်နေ့ထိ (၂)ရက်အကြာ တွေ့ဆုံဆွေးနွေးခဲ့ကြပြီးနောက် အခုလိုသဘောတူညီရရှိခဲ့တာပါ။

"ကျွန်တော်တို့ (၂)ဖွဲ့ပေါင်းပြီးတော့ ရှေ့ဆက်လုပ်ဆောင်ရမယ့် မူဝါဒအသစ်တွေပြန်လည်ရေးဆွဲမယ်၊ မရာဒေသတည်ငြိမ်အေးချမ်းအောင်အတူတူလုပ်ဆောင်သွားမယ် ပြီးတော့ ချင်းပြည်နယ်အတွင်းက ကျန်ရှိနေသေးတဲ့

စစ်ကောင်စီတပ်ဖွဲ့တွေကိုလည်း ချင်းတော်လှန်ရေးတပ်ဖွဲ့တွေနဲ့အတူပူးပေါင်းပြီး ဆက်လက်တိုက်ပွဲဝင်သွားမှာပါ။ " လို့ CDF-Mara တာဝန်ရှိသူတစ်ဦးက Matupi Times ကိုပြောပါတယ်။

CDF-Mara နဲ့ MDF တို့ဟာ နှစ်ဘက်သဘောထားကွဲလွဲမှုတွေကြောင့် မရာဒေသအတွင်းမှာနှစ်ဖက်ထိတွေ့တိုက်ပွဲတွေဖြစ်ပွားခဲ့ပြီး နှစ်ဘက်ထိခိုက်ကျဆုံးမှုတွေရှိခဲ့ပါတယ္။ အဆိုပါအစည်းအဝေးသို့ MDF/MTC နှင့် CDF နှစ်ဘက်အဖွဲ့အစည်းမှ တာဝန်ရှိသူ (၇)ဦးစိီအသီးသီးတက်ရောက်ခဲ့ကြတယ်လို့သိရပါတယ်။

 

========================

 

📌📌 ၆။ ချင်းပြည် (Chinland)အစိုးရမှ ဂန့်ဂေါ-ရေဇွာ လမ်းပိုင်းပြုပြင်မှုလုပ်ငန်း ဆက်လက်ဆောင်ရွက်

 

The Matupi TImes မေလ ၂၄ ၊ ၂၀၂၄

ချင်းပြည်(Chinland)အစိုးရ နှင့် ဒေသန္တရအစိုးရတို့ ပူးပေါင်းပြီး ဂန့်ဂေါ-ရေဇွာ ပြည်ထောင်စုလမ်းမကြီးအား ပြုပြင်မှုလုပ်ငန်းကို ဆက်လက်ဆောင်ရွက်နေတယ်လို့ သိရပါတယ်။

အဆိုပါလမ်းပိုင်းသည် ဇိုတုန်ဒေသ၊မတူပီမြို့၊လောက်တူဒေသ၊မရာဒေသ၊ဆဲင်ထန်ဒေသနှင့် ဇိုဖေဒေသရှိ မိဘပြည်သူများ၏ ကုန်စည်စီးဆင်းရေး ဝန်ဆောင်မှုအတွက်အဓိက အသုံးပြုနေရသော လမ်းပိုင်းဖြစ်ပြီး ချင်းပြည် (Chinland) အစိုးရ၏လမ်းညွန်ချက် ပံ့ပိုးကူညီမှုနှင့်အတူ ၊မဟာမိတ်များ၏ အကူအညီများဖြင့် ၂၀၂၄ ခုနှစ် ၊ မေလ ၁ ရက်နေ့မှ စတင်ဆောင်ရွက်ခဲ့တာဖြစ်ပါတယ်။

#RadioNUGLocalNews

#SpringRevolution