15th JUN 2024 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၄ ဇွန်လ ( ၁၅ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ မတူပီမြို့နယ်၊အမ်ဆွေးရွာကို စစ်ကောင်စီမှ လေကြောင်းတိုက်ခိုက်ပြီး လူနေအိမ် (၃)လုံးပျက်စီး

 

ချင်းပြည်နယ် မတူပီမြို့နယ်၊ အမ်ဆွေးကျေးရွာကို စစ်ကောင်စီတပ်က ဇွန်လ ၁၀ရက် နံနက်ပိုင်းက လေကြောင်းဖြင့် ဗုံးကြဲတိုက်ခိုက်တာကြောင့် လူနေအိမ် (၃)လုံး ပျက်စီးပြီး၊ အများပြည်သူထိခိုက်မှုမရှိဟု မြေပြင်သတင်းရင်းမြစ်မှ သိရပါတယ်။

မတူပီမြို့နယ်အတွင်း တိုက်ပွဲဖြစ်ပွားခြင်းမရှိဘဲ စစ်ကောင်စီက အခုလို ဗုံးကြဲတိုက်ခိုက်လာတာဖြစ်ပါတယ်။

“တိုက်ပွဲတော့ မရှိသေးပါဘူး။ တိုက်ပွဲမရှိပေမယ့် မြို့ပေါ်မှာရှိတဲ့ ပြည်သူတချို့တွေက စစ်ဘေးရှောင်လို့နော်။ စကစဘက်က ပြင်ဆင်မှုတွေ လုပ်တာဖြစ်နိုင်တယ်။ အဲဒါကြောင့် တိုက်ပွဲမရှိဘဲနဲ့ ဗုံးကြဲတာပါ”လို့ မျက်မြင်နီးစပ်သူတွေက ဆိုပါတယ်။

မတူပီမြို့နယ်တွင် တိုက်ပွဲများဖြစ်လာနိုင်တဲ့ သတင်းထွက်ပေါ်နေတာကြောင့် မတူပီမြို့ခံအချို့ ပြီးခဲ့သည့် ရက်ပိုင်းများကတည်းက မြို့ကို စွန့်ခွာစစ်ရှောင်နေကြတယ်လို့ သိရပါတယ်။

ပြီးခဲ့သည့် မေလကုန်ပိုင်းကလည်း တီးတိန်မြို့နယ်မှာ တော်လှန်ရေးတပ်များက မြို့ရှိ စစ်ကောင်စီတပ်ကို တိုက်ခိုက်မယ်လို့ သတင်းများ ထွက်ပေါ်ခဲ့ပြီးနောက် စစ်ကောင်စီက တိုက်ပွဲမဖြစ်ဘဲ တီးတိန်မြို့နယ်ရှိ ကျေးရွာအချို့ကိုလေကြောင်း တိုက်ခိုက်ခဲ့ပါတယ်။

 

========================

 

📌📌 ၂။ ကန်ပက်လက်မြို့နယ် လေကြောင်းတိုက်ခိုက်ခံရ၊ အရပ်သား အသက်ဆုံးရှုံးမှုရှိ

 

ချင်း - မကွေးနယ်စပ် ကန်ပက်လက်မြို့နယ်တစ်နေရာကို စစ်ကောင်စီလေတပ်က ဗုံးကျဲတိုက်ခိုက်တာကြောင့် အသက်ဆုံးရှုံးသူတွေရှိတယ်လို့ ဒေသခံတွေက ပြောပါတယ်။

ဇွန်လ ၁၁ရက် မွန်းလွဲ ၁၂ မိနစ် ၃၀ ကျော်မှာ တံတားဦးလေတပ်တက် ဂျက်ဖိုက်တာက လေကြောင်းတိုက်ခိုက်တာဖြစ်ပြီး အမျိုးသား တစ်ဦးသေဆုံးတယ်လို့ ကန်ပက်လက်မြို့နယ် ဒေသခံတစ်ဦးက ပြောပါတယ်။

“စစ်ရှောင်တွေ ထမင်းစားနေတုန်း ချတာ၊ အိမ်လည်း အများကြီးထိတယ်လို့ တဆင့်ကြားတယ်၊ တခြားရွာကနေ စစ်ဘေးလာရှောင်သူ နှစ်ယောက်ပွဲချင်းပြီးဆုံးတာလိုမျိုး ပုံစံတဲ့။” လို့ ဆိုပါတယ်။

အခုလို ချင်း - မကွေးနယ်စပ် ကန်ပက်လက်မြို့နယ် တနေရာတိုက်ခိုက်ခံရမှုအတွင်း ထိခိုက်ဆုံးရှုံးမှုအသေးစိပ်ကို ဆက်သွယ်ရေး အခြေအနေကြောင့် အတိအကျ မသိရပါဘူး။

ဇွန်လ ၁၀ရက်က မတူပီမြို့နယ်တစ်နေရာ လေကြောင်းတိုက်ခိုက်ခံရသလို မင်းတပ်မြို့နယ်ရှိ အရပ်သားနေထိုင်ရာကျေးရွာတွေမှာလည်း ဒီရက်ပိုင်းလေကြောင်းတိုက်ခိုက်ခံရမှုတွေ ဆက်တိုက်ရှိနေပါတယ်။

 

========================

 

📌📌 ၃။ တီးတိန်မှာ တော်လှန်ရေးတပ်ဖွဲ့ဝင် ၅ ဦး တိုက်ပွဲကျ

 

ချင်းပြည်၊ တီးတိန်မြို့တွင်း ချင်းညီနောင်စစ်ဆင်ရေးမှာ တော်လှန်ရေးတပ်ဖွဲ့ဝင် ၅ ဦး ကျဆုံးကြောင်း PDF – Zoland က သတင်းထုတ်ပြန်ပါတယ်။

ဇွန်လ ၁၂ ရက်နေ့ မနက်ပိုင်း တီးတိန်းမြို့အနီး နှစ်ဖက်ပစ်ခတ်မှုဖြစ်ပွားခဲ့ပြီး PDF – Zoland တပ်ဖွဲ့ဝင် ၄ ဦးနဲ့ CNDF တပ်ဖွဲ့ဝင် ၁ ဦးတို့ တိုက်ပွဲကျတာလို့ သိရပါတယ်။

တပ်ဖွဲ့ဝင်တွေရဲ့ လက်နက်တချို့ပါ ဆုံးရှုံးလိုက်ရတယ်လို့ သိရပါတယ်။ တီးတိန်မြို့မှာ ချင်းညီနောင်စစ်ဆင်ရေးအဖြစ် PDF – Zoland နဲ့ CNDF တို့က မေလစတုတ္ထအပတ်ထဲ စတင်တိုက်ခိုက်ခဲ့ပြီး စစ်ကောင်စီတပ်ဖွဲ့ဝင် ၉ ဦး အရှင်ဖမ်းဆီးတာနဲ့ လက်နက်တချို့ သိမ်းဆည်းတာ ရှိခဲ့ပါတယ်။

ခလရ ၂၆၉ တပ်ရင်းစခန်းနဲ့ စစ်ကောင်စီလက်အောက်ခံ ရဲစခန်းကုန်း ရှိနေဆဲဖြစ်တဲ့ တီးတိန်မြို့မှာ ရက် ၂၀ ဝန်းကျင်ကြာလာတဲ့အထိ ထိတွေ့ပစ်ခတ်မှုတွေ ရှိနေဆဲပါ။

စစ်ကောင်စီလေကြောင်း၊ လက်နက်ကြီးကျည်တွေကြောင့် မြို့ပေါ်ရပ်ကွက်ရှိ အဆောက်အုံပေါင်း ၄၀ နီးပါး ပျက်စီးခဲ့ပြီး ရပ်ကွက်တချို့မှာ ထိခိုက်ပျက်စီးမှုတွေ စုံစမ်းနေဆဲလို့ တီးတိန်မြို့နယ် ပြည်သူ့အုပ်ချုပ်ရေးအဖွဲ့က ဇွန်လ ၆ ရက်နေ့ သတင်းထုတ်ပြန်ပါတယ်။

#RadioNUGLocalNews

#SpringRevolution