06 JUL 2024 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၄ ဇူလိုင်လ ( ၆ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ မတူပီစစ်ကောင်စီတပ်စခန်းအားလုံး ‘ချင်းညီနောင်’ က ထိန်းချုပ်၊ နမခ အခြေချစစ်ဗျူဟာ တွေထဲက ပထမဆုံးသိမ်းတဲ့ ဗျူဟာ ဖြစ်လာ။

 

စစ်ကောင်စီ ခြေလျင်တပ်ရင်း၊ ခြေမြန်တပ်ရင်းနဲ့ အခြေချ စစ်ဗျူဟာစခန်းတွေရှိတဲ့ မတူပီမြို့ကို အပြည့်အဝ ထိန်းချုပ်လိုက်နိုင်ပြီလို့ ‘ချင်းညီနောင်’က ကြေညာလာပါတယ်။

မတူပီမြို့ကို ၂၀၂၄ ဇွန်လ ၉ ရက်အစောပိုင်းမှာ မဟာမိတ် (အာရက္ခရတပ်တော်၊ ယောအာမီ) တွေနဲ့အတူ ‘ချင်းညီနောင်’ စစ်ဆင်ရေးအဖြစ် တိုက်ခိုက်တာပါ။ ၁၉ ရက်အကြာ ဇွန်လ ၁၇ ရက်မှာ စစ်ကောင်စီ ခြေမြန်တပ်ရင်း အမှတ် ၃၀၄ ကို စတင်သိမ်းပိုက်ခဲ့ပါတယ်။

ဇွန် ၂၉ရက်မှာတော့ စစ်ကောင်စီ ခြေလျင်တပ်ရင်း အမှတ် ၁၄၀ နဲ့ ဗျုဟာကုန်းက ထပ်မံသိမ်းပိုက်လိုက်ပြီလို့ ‘ချင်းညီနောင်’ က ဆိုပါတယ်။

၂၀၂၃ ဒီဇင်ဘာနှောင်းပိုင်းမှာ စတင်ဖွဲ့စည်းတည်ထောင်တဲ့ ‘ချင်းညီနောင်’ မှာ ချင်းအမျိုးသားကောင်စီ (မင်းတပ်)၊ ချင်းအမျိုးသားအဖွဲ့ချုပ် (CNO)၊ ဇိုမီးဖက်ဒရယ်အစည်းအရုံး (ZFU)၊ ချင်းကာကွယ်ရေးတပ် (ကန်ပက်လက်)၊ ချင်းလဲန်းကာကွယ်ရေးတပ် (မတူပီ) တပ်မဟာ (၁) နဲ့ မရာနယ်မြေအုပ်ချုပ်ရေးကောင်စီ (MTC) စတဲ့အဖွဲ့ ၆ ဖွဲ့ ပါဝင်ပါတယ်။

မတူပီစစ်ဆင်ရေးကာလ ၁ လနီးပါးအတွင်း ချင်းလဲန်းကောင်စီနဲ့ ချင်းညီနောင်အဖွဲ့နှစ်ခုကြား ထိပ်တိုက်ရင်ဆိုင် ပစ်ခတ်မှုအထိရှိခဲ့ပြီး နှစ်ဖက်ရဲဘော်တွေ အသက်ဆုံးရှုံးခဲ့ပါသေးတယ်။

မတူပီမြို့ စစ်ကောင်စီတပ်စခန်းအားလုံး ‘ချင်းညီနောင်’ က ထိန်းချုပ်လိုက်နိုင်ကြောင်း ထုတ်ပြန်လာတာကြောင့် စစ်ကိုင်းတိုင်း၊ မုံရွာအခြေစိုက် အနောက်‌မြောက်တိုင်း စစ်ဌာနချုပ်လက်အောက် အခြေချစစ်ဗျူဟာတွေထဲကပထမဆုံးသိမ်းတဲ့ အခြေချစစ်ဗျူဟာ ဖြစ်လာပါတယ်။

ချင်းပြည်နယ်မှာ စစ်ကောင်စီ အခြေချ စစ်ဗျူဟာ (၂) ခု ရှိပြီး တစ်ခုက ချင်းပြည် မြို့တော် ဟားခါးမှာ ရှိတာဖြစ်ပါတယ်။

 

========================

 

📌📌 ၂။ မတူပီမြို့သိမ်း စစ်ဆင်ရေးအတွင်း စစ်ကောင်စီစွပ်စွဲဖမ်းဆီးတဲ့ လူ ၁၃ဦး လွတ်မြောက်လာ။

 

ချင်းညီနောင်နဲ့ မဟာမိတ်တပ်ဖွဲ့က ဖော်ဆောင်‌တဲ့ မတူပီမြို့သိမ်းတိုက်ပွဲအတွင်း စွပ်စွဲဖမ်းဆီးခံရသူ အကျဉ်းသား ၁၃ ဦး လွတ်မြောက်လာတယ်လို့ ချင်းလဲန်းကာကွယ်ရေးတပ်ဖွဲ့ မတူပီ - တပ်မဟာ-၁ က ထုတ်ပြန်ပါတယ်။

လွတ်မြောက်လာသူတွေဟာ အမျိုးသား ၁၂ ဦးနဲ့ အမျိုးသမီး ၁ ဦးဖြစ်ပြီး ခရစ်ယာန်ဓမ္မဆရာနဲ့ CDM ဝန်ထမ်းတချို့ ပါဝင်ပါတယ်။

ကျန်ရှိနေသေးတဲ့ အကျဉ်းသားတွေကိုလည်း ဆက်လက် ရှာဖွေနေဆဲလို့ ချင်းလဲန်းကာကွယ်ရေးတပ်ဖွဲ့ မတူပီ - တပ်မဟာ ၁ က ဆိုပါတယ်။

မတူပီမြို့ကို ၂၀၂၄ ဇွန်လ ၉ ရက်အစောပိုင်းမှာ ချင်းညီနောင်စစ်ဆင်ရေးအဖြစ် မဟာမိတ် (အာရက္ခရတပ်တော်၊ ယောကာကွယ်ရေးတပ်၊ ယောအာမီ) တွေနဲ့အတူ မြို့သိမ်းတိုက်ပွဲဖော်ဆောင်ခဲ့တာပါ။

စစ်ကောင်စီ ခြေလျင်တပ်ရင်း၊ ခြေမြန်တပ်ရင်းနဲ့ စစ်ဗျူဟာစခန်းတွေရှိတဲ့ မတူပီမြို့ကို အပြည့်အဝ ထိန်းချုပ်လိုက်နိုင်ပြီလို့ ‘ချင်းညီနောင်’ က ဇွန်လ ၂၉ ရက်နေ့ ကြေညာပါတယ်။

 

========================

 

📌📌 ၃။ “၁၀၂၇ စစ်ဆင်ရေး အပိုင်း(၂)” နဲ့အတူ စစ်ကောင်စီစခန်း ၈ ခု သိမ်းပိုက်ထားကြောင်း PDF – MDY ထုတ်ပြန်။

 

“၁၀၂၇ စစ်ဆင်ရေး အပိုင်း (၂)” နဲ့အတူ နောင်ချို၊ မိုးကုတ်၊ ကျောက်မဲနဲ့ မတ္တရာမြို့နယ်တွေမှာ စစ်ဆင်ရေး ဖော်ဆောင်လျက်ရှိတယ်လို့ ပြည်သူ့ကာကွယ်ရေးတပ်မတော် - မန္တလေးက ထုတ်ပြန်ပါတယ်။

ပြည်သူ့ကာကွယ်ရေးတပ်မတော် - မန္တလေး အနေနဲ့ မတ္တရာမြို့နယ်အတွင်းရှိ (၁၀၁၄) လေကြောင်းရန်ကာကွယ်ရေး အင်ကြင်းမြိုင်တပ်စခန်း၊ ဆည်တော်တပ်စခန်း၊ ပန်းသလဲတောင်တပ်စခန်း၊ ရေစိုတောင်တပ်စခန်း၊ နေကျော်တောင်တပ်စခန်း၊ ရွှေပုထိုးတပ်စခန်း၊ ကျောက်ခလုတ်တပ်စခန်းနဲ့ မြေနီတောင်တပ်စခန်းတွေကို အပြီးသတ်သိမ်းပိုက်ရရှိပြီလို့ ထုတ်ပြန်ချက်မှာ ဖော်ပြပါတယ်။

ဖမ်းဆီးရမိစစ်သုံ့ပန်းနဲ့ လက်နက်ချအညံ့ခံသူ (၆၄) ဦးအပါအဝင် တပ်မိသားစုဝင် (၁၁၇) ဦးကို ကောင်းကောင်းမွန်မွန် ထိန်းသိမ်းထားပြီး လက်နက်မျိုးစုံ (၁၂၅) လက်နဲ့ ဆက်စပ်ခဲယ၊မ်းအများအပြား သိမ်းဆည်းရရှိတယ်လို့လည်း ပြည်သူ့ကာကွယ်ရေးတပ်မတော် - မန္တလေးက ဆိုပါတယ်။

၂၀၂၃ အောက်တိုဘာ ၂၇ ရက်နေ့ စတင်ခဲ့တဲ့ မြောက်ပိုင်းညီနောင်သုံးဖွဲ့ရဲ့ ရှမ်းမြောက်စစ်ဆင်ရေးဟာ ၂၀၂၄ ဇန်နဝါရီမှာ တရုတ်နိုင်ငံရဲ့ ကြားဝင်မှုနဲ့ ဟိုင်ဂင်အပစ်ရပ်သဘောတူညီချက် ရခဲ့ကြပေမယ့် ၅ လဝန်းကျင်အကြာ ၂၀၂၄ ဇွန် ၂၅ ရက်နေ့မှာ TNLA တအာင်းတပ်နဲ့  တကျော့ပြန်တိုက်ပွဲ စတင်ဖြစ်ပွားခဲ့ပြီး လက်ရှိမှာ နှစ်ဖက်တိုက်ပွဲဧရိယာပိုကျယ်ပြန့်လာတဲ့ အနေအထားဖြစ်ပါတယ်။

MDY_PDF ဟာ အမျိုးသားညီညွတ်ေရးအစိုးရ NUG ၊ ကာကွယ်ရေးဝန်ကြီးဌာ MOD ရဲ့ တိုက်ရိုက် အမိန့်ပေး ကွပ်ကဲမှုအောက်မှာ စုဖွဲ့ထားတဲ့ PDF ဖြစ်ပါတယ်။ PSLF/TNLA နဲ့ မဟာမိတ်ဖွဲ့ထားပြီး  တအာင်း(ပလောင်)  နယ်မြေမှာ ကနဦး အခြေပြုလှုပ်ရှားလျက် ရှိနေတာဖြစ်ပါတယ် ။

#RadioNUGLocalNews

#SpringRevolution