17 AUG 2024 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၄ သြဂုတ်လ ( ၁၇ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ ကန်ပက်လက်မှာ လေကြောင်းတိုက်ခိုက်ခံရ၊ အမျိုးသမီးနဲ့ ကလေးတစ်ဦး သေဆုံး၊ ထိခိုက်မှုများပြား။

 

ချင်းပြည်၊ ကန်ပက်လက်မြို့နယ် ဆတ်ချောက်ကျေးရွာကို စစ်ကောင်စီလေတပ်က ဩဂုတ်လ ၁၃ရက်၊နေ့လယ်က ဗုံးကျဲတိုက်ခိုက်သွားတယ်လို့ မြို့နယ်ပြည်သူ့အုပ်ချုပ်ရေးအဖွဲ့က ထုတ်ပြန်ပါတယ်။

အသက် ၄၂ အရွယ်ရှိ အမျိုးသမီး တစ်ဦး၊ အသက် ၃ နှစ်အရွယ် ကလေးငယ် (ကျား) တစ်ဦး သေဆုံးခဲ့ပြီး အသက် ၆ လနဲ့ ၁၂ နှစ်အရွယ်ကလေး ၂ ဦးအပါအဝင် ၄ ဦး ပြင်းထန် ဒဏ်ရာရတယ်လို့ ဆိုပါတယ်။

ကျေးရွာစာသင်ကျောင်းကို ဦးတည်တိုက်ခိုက်ဖို့ ရည်ရွယ်တာဖြစ်ပြီး ပစ်မှတ်လွဲချော်မှုကြောင့် လူနေအိမ် ၆ လုံးပျက်စီး သွားတယ်လို့ သိရပါတယ်။

ပြီးခဲ့တဲ့ ဇွန်လ ၁၁ ရက်နေ့ကလည်း ကန်ပက်လက်မြို့နယ်၊ ချင်းလက်မွန်ကျေးရွာ စာသင်ကျောင်းကို စစ်ကောင်စီလေတပ်က တိုက်ခိုက်လို့ အသက် ၇၈ နှစ်အရွယ် အမျိုးသမီးတစ်ဦး သေဆုံးပြီး ၄ ဦး ဒဏ်ရာ ရခဲ့ပါသေးတယ်။

စစ်ကောင်စီလေတပ်က ချင်းပြည်အတွင်းရှိ မြို့နယ်တိုင်းကို လေကြောင်းတိုက်ခိုက်မှု ဆက်တိုက်လုပ်တာလာကြောင့် ပြည်သူတွေအနေနဲ့ အထူးသတိထားဖို့ အရေးပေါ်လိုအပ်နေတာပါ။

 

========================

 

📌📌 ၂။ မင်းတပ်မှာ သားအမိနှစ်ဦး လက်နက်ကြီးကျည်ထိမှန်၊ မိခင်ဖြစ်သူ သေဆုံး၊ သမီးငယ် လက်ပြတ်။

 

မင်းတပ်မြို့ပေါ်၊ အရှေ့ပြင်ရပ်ကွက်၊ ဘန်ကလိုအနီးရှိ ဥယျာဉ်ခြံထဲမှာ လက်နက်ကြီးကျည်ကျကွဲလို့ ဒေသခံအမျိုးသမီးတစ်ဦး သေဆုံးပြီး သမီးဖြစ်သူ လက်နဲ့ ခေါင်းမှာ ပြင်းထန်ဒဏ်ရာရတယ်လို့ သိရပါတယ်။

ဩဂုတ် ၉ ရက်နေ့ မွန်းလွဲပိုင်းမှာ ခလရ ၂၇၄ တပ်ရင်းက ပစ်ခတ်တဲ့ လက်နက်ကြီးကျည်ကျတာလို့ သေဆုံးသူအမျိုးသမီးနဲ့ ဆွေမျိုးတော်စပ်သူက ပြောပါတယ်။

“သူတို့က စံမှာ စစ်ဘေးရှောင်နေကြတာ၊ ဘန်ကလိုနား ဥယျာဉ်မှာ ဝဥခင်းပြန်သွားကြည့်ရင်းနဲ့တဲ့၊ ကလေး လက်တစ်ဖက်ပြတ်တယ်။ မိခင်ကတော့ ပွဲချင်းပြီး ဆုံးတာ။” လို့ ဆိုပါတယ်။

ထိခိုက်ဒဏ်ရာရတဲ့ ကလေးကို ဖခင်ဖြစ်သူက ဆေးရုံသို့ပို့ဆောင်နေရပြီး ဇနီးသည်နာရေးကိုတောင် ကိုယ်တိုင်လုပ်ခွင့် မရလိုက်ရဘူးလို့ သိရပါတယ်။

ဩဂုတ် ၉ ရက်နေ့က စစ်ကောင်စီ လက်နက်ကြီးကျည်ကျကွဲလို့ သေဆုံးသူ အမျိုးသမီးဟာ အသက် ၃၃  နှစ်အရွယ် ဒေါ်လိန်းရှဲင်းဖြစ်ပြီး သမီးဖြစ်သူကတော့ အသက် ၆ နှစ်အရွယ်လို့ သိရပါတယ်။

မင်းတပ်မြို့နယ်အတွင်း စစ်ကောင်စီက လက်နက်ကြီး ပစ်တာ၊ လေကြောင်းတိုက်ခိုက်တာမျိုး ခပ်စိပ်စိပ်ပြုလုပ်လာတာလည်း တွေ့ရပါတယ်။

 

========================

 

📌📌 ၃။ CDF မင်းတပ်က တော်လှန်ရေး ရုပ်ရှင် ဇာတ်လမ်းတို ပြသတော့မည်ဟုဆို။

 

ချင်းကာကွယ်ရေးတပ်ဖွဲ့ (မင်းတပ်) က ‘နွေဦးဇာတ်ခုံ’ လို့ ခေါင်းစဉ်ပေးထားတဲ့ တော်လှန်ရေး ရုပ်ရှင် ဇာတ်လမ်းတိုကို မကြာခင် အွန်လိုင်းကတဆင့် ပြသတော့မယ်လို့ ဆိုပါတယ်။

ရုပ်ရှင်ကြည့်ခွင့် လက်မှတ်တွေ ကို နိုင်ငံတကာမှာ စတင်ဖြန့်ချိ ရောင်းချပေးတော့မှာဖြစ်ပြီး အသေးစိပ် အချက်အလက်တွေကို ပြန်လည်ဖော်ပြပေးသွားမယ်လို့ ကြေညာထားပါတယ်။

မြေပြင်က ရဲဘော် ရဲမေများနှင့် CDM ဝန်ထမ်းများကိုယ်တိုင် သရုပ်ဆောင်ထားကြပြီး ဒါရိုက်တာ Chin Gyiက ရိုက်ကူးထားတာလို့ ဆိုပါတယ် ။

နွေဦးဇာတ်ခုံ ရုပ်ရှင်အတွက် Project Target ကတော့ ကျပ်သိန်း ၁,၂၀၀ မျှော်မှန်းထားပြီး အားဖြည့် ပါဝင်ပေးကြဖို့ တိုက်တွန်းထားပါတယ်။

#RadioNUGLocalNews

#SpringRevolution