31 AUG 2024 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၄ သြဂုတ်လ ( ၃၁ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ မင်းတပ်မှာ စစ်ကောင်စီက ရိက္ခာဖြည့်။

 

မင်းတပ်မြို့ပေါ် ခလရ ၂၇၄ တပ်ရင်းမှာ စစ်ကောင်စီက ရိက္ခာခဲယမ်းလို့ ယူဆရတဲ့အထုပ်တွေကို ဩဂုတ် ၂၈ရက်နေ့အစောပိုင်းက Y12 လေယာဉ်ကနေ လေထီးကတဆင့် ချပေးနေတာပါ။

ကုန်းကြောင်းကနေ ရိက္ခာဖြည့်တင်းဖို့အခက်တွေ့နေတဲ့ စစ်ကောင်စီက ခုနောက်ပိုင်း လေကြောင်းကတဆင့် ချပေးတာမျိုးကို ပိုလုပ်လာတာ ဖြစ်ပါတယ်။

လေကြောင်းကတဆင့်ချတဲ့ စစ်ကောင်စီ ခဲ၊ယမ်းထုပ်အများစုဟာ ခလရ ၂၇၄နဲ့ ကပ်လျက်တည်ရှိတဲ့ တောင်ပုလုဘုန်းကြီးကျောင်းဝန်းထဲ ကျသွားတာကို ထွက်ပေါ်လာတဲ့ ရုပ်ပုံတွေမှာ တွေ့ရပါတယ်။

တစ်ဖက်မှာ မင်းတပ်မြို့နယ်ထဲ စစ်ကောင်စီရဲ့ လေကြောင်းတိုက်ခိုက်မှု၊ လက်နက်ကြီးပစ်ခတ်မှု ပိုများလာတာကြောင့် အချိန်မရွေး နှစ်ဖက်တိုက်ပွဲ ဖြစ်ပွားနိုင်တယ်လို့ ချင်းကာကွယ်ရေးတပ်ဖွဲ့ (မင်းတပ်)က အခုဩဂုတ်လထဲ ကြေညာပါတယ်။

ဩဂုတ်လအတွင်း မင်းတပ်မြို့နယ်ထဲ လေကြောင်း၊ လက်နက်ကြီးတိုက်ခိုက်ခံရမှု အကြိမ် ၃၀ ထက်မနည်းရှိပြီး လူ ၃ ဦးအသက်ဆုံးရှုံးတယ်လို့ The Mindat Postက ရေးသားထားပါတယ်။

 

========================

 

📌📌 ၂။ ချင်းလူငယ်တစ်ဦးက Professional Refereeဖြစ်ဖို့ ခြေလှမ်းစတင်။

 

အမေရိကနိုင်ငံက ပရော်ဖက်ရှင်နယ် ဘောလုံးပြိုင်ပွဲတွေမှာ ကွင်းလယ်ဒိုင်၊ စည်းကြပ်ဒိုင်အဖြစ် တာဝန်ယူခွင့်ရနေတဲ့ ချင်းလူငယ်တစ်ယောက်ရှိပါတယ်။

သူကတော့ မင်းတပ်မြို့နယ်၊ ကြုတ်ကျေးရွာဇာတိ အသက် ၂၄ နှစ်အရွယ် ဆလိုင်းဒေးဗစ်ချွဲကီးပါ။

အသက် ၁၈ နှစ်အရွယ်ကတည်းက ဘောလုံးဒိုင်လူကြီးဖြစ်ဖို့ စိတ်ဝင်စားပြီး တစိုက်မတ်မတ်ကြိုးစားခဲ့တာလို့ ပြောပါတယ်။

“ကျနော်က ၂၀၁၀ လောက်မှာ USAကို စရောက်တယ်၊ အဲဒီကနေ ကျောင်းတက်၊ ဘောလုံးကန်ရင်းကနေ ၁၈ နှစ်ပြည့်လာတော့ ကွင်းလယ်ဒိုင်လုပ်ဖို့ ရွေးချယ်ခဲ့တာပါ။” လို့ ပြောပါတယ်။

၂၀၂၄ ဇွန်လအတွင်း ပြုလုပ်တဲ့ Representing Tennessee State for President Cup မှာ လက်ရှိသူနေထိုင်တဲ့ ပြည်နယ်ကိုယ်စားပြုဒိုင်အဖြစ် ရွေးချယ်ခံထားရသလို လက်ရှိ 3rd Divisions of United States Soccer League မှာလည်း ကွင်းလယ်ဒိုင်လုပ်ခွင့်ရနေပြီလို့ သူက ဆိုပါတယ်။

ဆလိုင်းဒေးဗစ်ချွဲကီးရဲ့ ရည်မှန်းချက်အိပ်မက်ကတော့ အမေရိကရဲ့ အမြင့်ဆုံးဘောလုံးပြိုင်ပွဲဖြစ်တဲ့ Major League Soccer (MLS) မှာ ဒိုင်လူကြီး လုပ်ခွင့်ရဖို့လို့ ဆိုပါတယ်။

 

========================

 

📌📌 ၃။ Daailand Supporting Committeeက CDF-Daaiနှင့် ဒိုင်ရ်ဒေသပညာရေး၊ ကျန်းမာရေးရန်ပုံငွေအတွက် ကံစမ်းမဲရောင်းချ။

 

Daailand Supporting Committeeကဦးဆောင်ပြီး CDF-Daaiနှင့် ဒိုင်ရ်နယ်ရှိ ကလေးငယ်များရဲ့ ပညာရေး၊ ကျန်းမာရေးစောင့်ရှောက်နိုင်ရေး

ရန်ပုံငွေရရှိဖို့အတွက် ကံစမ်းမဲရောင်းချနေတယ်လို့ထုတ်ပြန်ပါတယ်။

ကံစမ်းမဲ တစောင်ကို အမေရိကန် ဒေါ်လာ၂၀၊ စင်္ကာပူဒေါ်လာ ၁၅၊ဂျပန်ယန်း ၁၀၀၀၊ သြစတေးလျဒေါ်လာ ၁၅ဖြင့် နိုက်ငံအလိုက် ငွေကြေးသတ်မှတ်ရောင်းချနေတာဖြစ်ပြီး ကံထူးရှင်များအတွက် ဆုကျေးများအနေနဲ့ ပထမဆု $ ၄၀၀၀၊ ဒုတိယဆု $၃၀၀၀၊ တတိယဆု MacBook၊ နှစ်သိမ့်ဆုများအဖြစ် ဒိုင်ရ်ချင်းရိုးရာ ကျား/မ ဝတ်စုံ(၅)စုံ သတ်မှတ်တယ်လို့ ဆိုပါတယ်။

နိုင်ငံတကာရောက် ဒိုင်ရ်ချင်း မိဘပြည်သူများ၊ ချင်းအစ်ကိုများနှင့် ပြည်ထောင်စုသား ညီနောင်အပေါင်းတို့အနေဖြင့် ကံစံမဲ ဝယ်ယူအားပေးခြင်းဖြင့် CDF-Daai နှင့် ဒိုင်ရ်ချင်း မိဘပြည်သူများကို ဝိုင်းဝန်းကူညီကြဖို့ ကော်မတီကမေတ္တာရပ်ခံထားပါတယ်။

ကံစမ်းမဲကို အမေရိကန်နိုင်ငံမှာတော့ ဒိုင်ရ်မျိုးနွယ်စုများ အခြေချနေထိုင်တဲ့ ပြည်နယ်များမှာ အဓိကရောင်းချသွားမှာဖြစ်တဲ့အပြင် ဂျပန်နိုင်ငံ၊ သြစတေးလျနိုင်ငံ၊ နယူးဇီလန်နိုင်ငံ၊ မလေးရှား၊ Singapore နှင့်Indiaနိုင်ငံတို့မှာလည်း ရောင်းပေးမှာဖြစ်ပြီး အဲဒီနိုင်ငံများမှာရှိတဲ့ မိဘပြည်သူများအနေနဲ့ ဝယ်ယူအားပေးကြဖို့ကော်မတီက တောင်းဆိုထားပါတယ်။

Daailand Supporting Committeeကို Daai Regional Council-DRCပေါ်ပေါက်လာပြီးနောက် ဒိုင်ရ်ဒေသလုံးအတွက် ရန်ပုံငွေရှာဖွေရေးကိုရည်ရွယ်ပြီး အမေရိကန်နိုင်ငံရောက် ဒိုင်ရ်မျိုးနွယ်စုက အဓိကဦးဆောင်နေတာ ဖြစ်ပါတယ်။

#RadioNUGLocalNews

#SpringRevolution