21 SEP 2024 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၄ စက်တင်ဘာလ ( ၂၁ ) ရက်နေ့နောက်ဆုံးရပြည်တွင်းသတင်းများ 

📌📌 ၁။ မင်းတပ် ခလရ ၂၇၄ အနီးရှိ နေအိမ်ကို စစ်ကောင်စီက မီးရှို့နေ။

 

မင်းတပ်မြို့ အခြေစိုက် ခလရ ၂၇၄ တပ်ရင်းအနီးအနားမှာ စစ်ကောင်စီက နေအိမ်တွေကို မီးရှို့ ဖျက်ဆီးနေတယ်လို့ ဒေသခံသတင်းရင်းမြစ်တွေဆီက သိရပါတယ်။

အခုရက်သတ္တပတ်ထဲ မင်းတပ်မြို့ အနောက်ရပ်ကွက် လှေးကောင်းလမ်းခွဲအနီး ပြည်သူ့နေအိမ် ၈ လုံးဝန်းကျင်ကို စစ်ကောင်စီတပ်က မီးရှို့ပြီးတဲ့နောက် စက်တင်ဘာ ၁၅ ရက်ကလည်း အနောက်ရပ်ကွက်၊ ဘုရင့်နောင်လမ်းခွဲအနီး နေအိမ်တွေ ထပ်မံမီးရှို့ခံရတယ်လို့ HKL – Mindat က ဖော်ပြပါတယ်။ ဘုရင့်နောင်လမ်းခွဲမှာတော့ နေအိမ် ၃ လုံးမီးလောင်တယ်လို့ ဆိုပါတယ်။

စစ်ကောင်စီ မီးရှို့တဲ့ နေအိမ်တွေဟာ မင်းတပ်မြို့ ခလရ ၂၇၄ တပ်ရင်းကနေ တစ်မိုင်ဝန်းကျင် ပတ်ချာလည်နေရာတွေအတွင်းမှာ တည်ရှိတာပါ။

၂၀၂၄ ဧပြီလ၊ ဩဂုတ်လတွေတုန်းကလည်း မင်းတပ်မြို့ပေါ်မှာ စစ်ကောင်စီတပ်ရဲ့ နေအိမ်မီးရှို့မှုဖြစ်စဉ်ကြောင့် အရှေ့ပြင်နဲ့ အနောက်ရပ်ကွက်မှာ နေအိမ် အလုံး ၃၀ ဝန်းကျင်ပျက်စီးခဲ့ပါတယ်။

တစ်နိုင်ငံလုံးနီးပါး ရေဘေးသင့်နေပေမယ့် ရေဘေးဒဏ်ကင်းလွတ်တဲ့ဒေသတွေမှာ စစ်ကောင်စီက လေကြောင်း၊ ဗုံးကြဲတာနဲ့ နေအိမ်မီးရှို့တာမျိုး လုပ်ဆောင်နေတာ ဖြစ်ပါတယ်။

 

========================

 

📌📌 ၂။ ထန်တလန်မြို့ပေါ်မှာ စစ်ကောင်စီတပ်စွဲထားတဲ့Lai Villaတပ်စခန်းကို Chinland Council ပူးပေါင်းတပ်က သိမ်းပိုက်။

 

ချင်းပြည်နယ်၊ ထန်တလန်မြို့ပေါ်က စစ်ကောင်စီတပ်စွဲထားတဲ့ Lai Villa(တည်းခိုခန်း) တပ်စခန်းကိုစက်တင်ဘာလ ၁၇ ရက် ညနေပိုင်းမှာ ချင်းအမျိုးသားတပ်ဦး(CNF/CNA) ဦးဆောင်တဲ့ Chinland Council ပူးပေါင်းတပ်က တိုက်ခိုက်သိမ်းပိုက်လိုက်ကြောင်း Chinland Councilရဲ့သတင်းရင်းမြစ်တွေကတဆင့် သိရပါတယ်။

စက်တင်ဘာလ ၁၆ ရက်နေ့မှာ လည်း ထန်တလန်မြို့ပေါ်က Lai Villa မှာတပ်စွဲထားတဲ့ စစ်ကောင်စီတပ်ဖွဲ့၀င် ၃ ဦး Chinland Council ပူးပေါင်းတပ်ဖွဲ့ဆီမှာ လက်နက်နဲ့အတူအလင်းဝင်ရောက်ခဲ့တယ်လို့လည်း ဆိုပါတယ်။

ဟားခါးနဲ့ထန်တလန်အကြားက စစ်ကောင်စီတပ်စခန်းတွေကို CNAဦးဆောင်တဲ့ Chinland Councilတပ်က သိမ်းပိုက်ထားပြီး ထန်တလန်မြို့ပေါ်က စစ်ကောင်စီတပ်စခန်းတွေကိုလည်း သိမ်းပိုက်ခဲ့ပြီး ဖြစ်ပါတယ်။

 

========================

 

📌📌 ၃။ မင်းတပ်မြို့နယ်တွင် စစ်ကောင်စီကလေကြောင်းတိုက်ခိုက်မှု ၃ကြိမ်ပြုလုပ်။

 

ချင်းပြည်နယ်၊ မင်းတပ်မြို့နယ်အတွင်း တိုက်နယ်အမှတ် ၁ ရှိ၊ မိုင်၄၀ ကျေးရွာ အနီးအနားကို စက်တင်ဘာ ၁၈ ရက် ညနေ ၃ နာရီ ခွဲ၀န်းကျင်မှာ စစ်ကောင်စီက လေကြောင်းတိုက်ခိုက်မှု ၃ ကြိမ်ပြုလုပ်ခဲ့တယ်လို့သတင်းရရှိပါတယ်။

အဆိုပါလေကြောင်းတိုက်ခိုက်မှုမှာ စစ်ကောင်စီ ဗုံကြဲလေယာဉ်နှစ်စင်းဖြင့် ပေါင် ၅၀၀ဗုံးသီး၃ လုံးအပြင် ဗုံးအသေးစားတွေကိုလည်း ကြဲချခဲ့တာကြောင့် အထိအခိုက်၊ အပျက်အစီး များရှိနိုင်ပြီး အသေးစိတ်မသိရသေးဘူလို့ သိရပါတယ်။

‌စစ်ကောင်စီလေကြောင်းတိုက်ခိုက်တဲ့ နေရာဟာ မိုင်လေးဆယ်ကျေးရွာနဲ့နီးသလို ဒေသခံများ တောင်ယာလုပ်တဲ့ နေရာတွေနဲ့လည်းနီးတယ်လို့ဒေသခံတွေထံက သိရပါတယ်။

ယခုလ စက်တင်ဘာလ ၁ ရက်နေ့မှ ၁၈ ရက်နေ့အထိ မင်းတပ်မြို့နယ်အတွင်း စစ်ကောင်စီ၏လေကြောင်းတိုက်ခိုက်မှုဟာအကြိမ်ရေ၂၀ ခန့်ရှိနေပြီး အရပ်သား ပြည်သူ နှစ်ဦးထိခိုက်ဒဏ်ရာရသလို လူနေအိမ်များ ထိခိုက်ပျက်စီးခဲ့တာဖြစ်ပါတယ်။

#RadioNUGLocalNews

#SpringRevolution