05 Oct 2024 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၄ အောက်တိုဘာလ ( ၅ ) ရက်နေ့နောက်ဆုံးရပြည်တွင်းသတင်းများ 

📌📌 ၁။ မင်းတပ်၊ အနောက်ရပ်ကွက် စစ်ကောင်စီမီးရှို့မှုဖြစ်စဉ်မှာ နေအိမ် ၂၀ ကျော် လောင်ကျွမ်း။

 

မင်းတပ်မြို့ အနောက်ရပ်ကွက်မှာ စစ်ကောင်စီတပ်ဖွဲ့ဝင်တွေရဲ့ မီးရှို့မှုကြောင့် ပြည်သူပိုင်အိမ်ခြေ ၂၀ ကျော် မီးလောင်ခဲ့ပါတယ်။

အနောက်ရပ်ကွက် ဘုရင့်နောင်လမ်းခွဲအနီး မင်းတပ် - မတူပီကားလမ်းမတလျှောက် နေအိမ်တွေ အောက်တိုဘာ ၁ ရက် နေ့လယ်ပိုင်းကစလို့ မီးရှို့ခံရတာဖြစ်ပြီး နေအိမ် ၂၈ လုံး ဝန်းကျင်လောင်ကျွမ်းတယ်လို့ HKL – Mindat က ဖော်ပြပါတယ်။

အဲဒီနေ့မီးလောင်မှုဖြစ်စဉ်ဟာ နေ့လယ်ပိုင်းကနေ ညသန်းခေါင်ယံအထိ အချိန်ကြာမြင့်ခဲ့ပါတယ်။

စစ်ကောင်စီတပ်က မီးရှို့တာကြောင့်လို့ ပြောဆိုမှုရှိသလို ဒရုန်းနဲ့ဗုံးသီးကြဲချတာကြောင့် မီးလောင်တာလို့လည်း ပြောဆိုမှုတွေ ရှိနေပါတယ်။

“အဲနေ့က နှစ်ဖက်ပစ်သံ ကြားတယ်၊ အဲအသံတွေ ငြိမ်ပြီးမှ စလောင်တာလို့ ထင်တယ်၊ ခုကရပ်ကွက်တိုင်းမှာ မီးရှို့ခံရတာရော လက်နက်ကြီးကျည်ကျလို့လောင်နေတာရောပဲ၊ ဘာမှဝင်လုပ်လို့ မရဘူး။” လို့ မြို့ပေါ်နေထိုင်သူတဦးက ပြောပါတယ်။

၂၀၂၄ စက်တင်ဘာ ၁၀ ရက်ကနေ ၁၆ ရက်အတွင်း အနောက်ရပ်ကွက်၊ စက်တင်ဘာ ၂၁, ၂၂ ရက်နေ့တွေမှာ စံပြရပ်ကွက်၊ ၂၆ ရက်နေ့မှာ အရှေ့ပြင် နမ့်ထားရပ်ကွက်၊ ၂၇၊ ၂၉ ရက်နေ့မှာ အရှေ့ပြင်ရပ်ကွက်နဲ့ အောက်တိုဘာ ၁ မှာ အနောက်ရပ်ကွက်ရှိ နေအိမ်တချို့ မီးရှို့ခံရတယ်လို့ The Mindat Postမှာ ရေးသားထားပါတယ်။

စစ်ကောင်စီတပ်ဟာ မင်းတပ်မြို့ပေါ်မှာ ရည်ရွယ်ချက်ရှိရှိ ပြည်သူပိုင်နေအိမ်မီးရှို့တာ၊ ဒရုန်းနဲ့တိုက်ခိုက်တာ၊ လက်နက်ကြီးပစ်ခတ်တာတွေကြောင့် ၂၀၂၄စက်တင် ဘာလဆန်းကနေ အောက်တိုဘာ ၁ ရက်နေ့အထိ မြို့ပေါ် ရပ်ကွက် ၄ ခုမှာ ပျက်စီးတဲ့ အဆောက်အအုံ ၆၀ ထက်မနည်း ရှိလာနိုင်ပါတယ်။

 

========================

 

📌📌 ၂။ စစ်ကောင်စီအတွက် သန်းခေါင်စာရင်းကောက်ယူပေးသူတွေကို ထိထိရောက်ရောက်  အရေးယူမယ်လို့ ‘ချင်းညီနောင်’ ကြေညာ။

 

စစ်ကောင်စီပြုလုပ်မယ့် ရွေးကောက်ပွဲအတွက် ထိန်းချုပ်နယ်မြေအတွင်း သန်းခေါင်စာရင်းကောက်ယူတဲ့သူ မည်သူ့ကိုမဆို ထိထိရောက်ရောက်အရေးယူမယ်လို့ ‘ချင်းညီနောင်’က စက်တင်ဘာ ၃၀ရက်နေ့က ကြေညာလိုက်ပါတယ်။

စစ်ကောင်စီက သန်းခေါင်စာရင်းကောက်ယူခြင်းကို ၂၀၂၄ အောက်တိုဘာ ၁ ရက်ကနေ ၁၅ ရက်နေ့အထိ မြန်မာပြည်အနှံ့မှာ ပြုလုပ်နိုင်ဖို့ ပြင်ဆင်နေတာပါ။

လက်ရှိမြန်မာနိုင်ငံမှာ စစ်ဘေး၊ သဘာဝဘေးအန္တရာယ်တွေနဲ့ ကြုံတွေ့နေရချိန် ဒါကိုအခွင့်ကောင်းယူပြီး စစ်ကောင်စီက အတုအယောင်ရွေးကောက်ပွဲပြုလုပ်ဖို့ ကြိုးစားနေတာလို့လည်း ‘ချင်းညီနောင်’ ဘက်က ထုတ်ပြန်ထားပါတယ်။

ချင်းပြည်အတွင်း စစ်ကောင်စီ သန်းခေါင်စာရင်းကောက်ယူနိုင်တဲ့ မြို့တွေကတော့ မင်းတပ်၊ ကန်ပက်လက်၊ ဟားခါး၊ ဖလမ်း၊ တီးတိန်နဲ့ တွန်းဇံမြို့တွေ ဖြစ်ပါတယ်။ မတူပီနဲ့ ပလက်ဝကိုတော့ တော်လှန်ရေးအင်အားစုတွေက ထိန်းချုပ်ထားသလို ထန်တလန်မြို့မှာလည်း အရပ်သားပြည်သူ မရှိတာကြောင့် စစ်ကောင်စီဘက်က သန်းခေါင်စာရင်းကောက်ယူဖို့ မဖြစ်နိုင်ပါဘူး။

ဒီအထဲမှာ ‘ချင်းညီနောင်’ လှုပ်ရှားနယ်မြေတွေဖြစ်တဲ့ မင်းတပ်၊ ကန်ပက်လက်၊ ဖလမ်းနဲ့ တီးတိန်မြို့တွေမှာ စစ်ကောင်စီနဲ့ ပူးပေါင်းပြီး သန်းခေါင်စာရင်းကောက်ယူတာမလုပ်ကြဖို့ ပြင်းပြင်းထန်ထန် သတိပေးလာတာ ဖြစ်ပါတယ်။

 

========================

 

📌📌 ၃။ မလေးရှားနိုင်ငံရောက် ချင်းလူထုက UNHCR ထံ ဘာတွေ တောင်းဆိုခဲ့လဲ။

 

စစ်အာဏာသိမ်းမှုကြောင့် CDM ပြုလုပ်ပြီး မလေးရှားနိုင်ငံမှာ ခိုလှုံနေသူတွေနဲ့ ချင်းဒုက္ခသည် စုစုပေါင်း ၃၀၀ ကျော်က ကွာလာလမ်ပူမြို့ UNHCR ရုံးရှေ့မှာ ငြိမ်းချမ်းစွာ ဆန္ဒပြတောင်းဆိုမှုကို ပြုလုပ်ခဲ့ပါတယ်။

ဒီဆန္ဒပြပွဲကို ချင်းဒုက္ခသည်မဟာမိတ်အဖွဲ့အစည်း (ACR) က ဦးဆောင်တာဖြစ်ပြီး အချက် ၇ ချက် တောင်းဆိုခဲ့ကြတယ်လို့ သိရပါတယ်။

လက်ရှိ မလေးရှားနိုင်ငံမှာ ချင်းလူမျိုး ၈၀,၀၀၀ ကျော် ရှိနေပြီး တချို့က အထောက်အထား မရှိတာကြောင့် ဖမ်းဆီးခံရတာ ဘေးကင်းလုံခြုံရေးပြဿနာအပါအဝင်၊ ကျန်းမာရေးဆိုင်ရာ ဆေးဝါးကုသဖို့ အခက်အခဲတွေနဲ့ ရင်ဆိုင်ကြုံတွေ့နေရပါတယ်။

#RadioNUGLocalNews

#SpringRevolution