14 Oct 2024 - (Ethnic language program-Matupi) by The Matupi Times ~ Newsletter by Radio NUG

📌 (ချင်း တိုင်းရင်းသား - Matupi ) ထုတ်လွှင့်မှု အစီအစဥ် ၂၀၂၄ အောက်တိုဘာလ ( ၁၄ ) ရက်နေ့ ရပြည်တွင်းသတင်းများ

📌📌 1. မီဇိုရမ်ရှိ ချင်းစစ်ရှောင်စခန်းတခုတွင် မြေပြိုမှုကြောင့် ၊ နေအိမ်တလုံးပျက်စီးပြီး အရေးပေါ်ကူညီလိုအပ်နေ

The Matupi Times ၊ အောက်တိုဘာလ ၇ ၊ ၂၀၂၄

မီဇိုရမ် ပြည်နယ်၊ လောင်တလိုင်ခရိုင်ရှိ ၊ College Matu Refugee Camp (2) တွင် ဒီကနေ့ အောက်တိုဘာလ ၇ ရက်နေ့ နံနက်(၆း၃၀)အချိန်၌ ကမ်းပါးမြေပြိုကျမှုဖြစ်ပွားခဲ့ပြီး လမ်းအာက်ဘက်က နေအိမ်တစ်လုံး ပျက်စီးသွား ကြောင်းသိရပါတယ္။

"မနေ့ညကစပြီး ကမ်းပါးတစတစပြိုကျလာတာပေါ့ ။ ညကတည်းကသူတို့အိမ်ပိုင်ရှင်တွေကလည်း ညကတည်းက ကြိုတင်ရွှေ့ပြောင်းတာတွေမလုပ်ကြဘဲ ခုလိုအိမ်ပါသွားတော့ တော်တော်လေးအခက်တွေ့နေကြတယ် ။ သူတို့ အိမ်လည်းပါသွားတော့ ဆန်လည်းအကုန်ပါသွားတယ် သူတို့မှာ နေစရာမရှိတော့သလို ဘာမှစားစရာမရှိတော့ဘူး ။ " ဟုစစ်ရှောင်စခန်းတာဝန်ရှိသူတစ်ဦးက Matupi Times ကိုပြောပါတယ်။

အဆိုပါ နေအိမ်တွင် သားအမိ(၃)ဦးနေထိုင်ကြတာဖြစ်ပြီး လောလော အိမ်ပိုင်ရှင်သည် နေစရာမရှိ၊စားစရာမရှိသောကြောင့် ၎င်း ဒုက္ခသည် စခန်းကော်မတီများမှ အဆင်ပြေသလို ဆောင်ရွက်ပေးနေကြောင်း သိရပါတယ္။

========================

📌📌 2. ထန်တလန်မြို့ထဲက CB Bank ကိုချင်းပြည်ကောင်စီနဲ့ပူးပေါင်းတပ်ကသိမ်းပိုက်

The Matupi Times ၊အောက်တိုဘာ ၇ ၊ ၂၀၂၄

တိုက်ပွဲပြင်းထန်နေတဲ့ ထန်တလန်မြို့မှာ ချင်းပြည်ကောင်းစီနဲ့ ပူးပေါင်းတပ်ဖွဲ့တွေက စစ်ကောင်စီ တပ်စွဲထားတဲ့ CB Bank ကို ဒီကနေ့အောက်တိုဘာလ ၇ ရက်နေ့မှာ သိမ်းပိုက်နိုင်ခဲ့ပြီလို့သိရပါတယ်။

အဆိုပါ CB Bank ကို ဒီကနေ့ညနေပိုင်းမှာ သိမ်းပိုက်နိုင်ခဲ့တာလို့ချင်းပြည်ကောင်စီ စစ်ရေးသတင်းရင်းမြစ်တွေထံက သိရပါတယ်။

ချင်းပြည်ကောင်စီနဲ့ ပူးပေါင်းတပ်ဖွဲ့တို့က (Tilim Operation-4) ကိုစတင်ပြီးနောက် ထန်တလန်မြို့ထဲက စစ်ကောင်စီတပ်ဖွဲ့နေရာယူတပ်စွဲထားတဲ့အဆောက်အဦးတွေကို ၀င်ရောက် တိုက်ခိုက်ခဲ့တာဖြစ်ပါတယ်။

စက်တင်ဘာလအတွင်းမှာ Laivilla Guest House ကိုသိမ်းပိုက်နိုင်ခဲ့ပြီး နောက် အခုအောက်တိုဘာလမှာ CB Bank ကိုထပ်မံသိမ်းနိုင်ခဲ့တာပါ။

ပြီးခဲ့တဲ့ရက်ပိုင်းက ထန်တလန်မြို့ထဲမှာနှစ်ဘက်တိုက်ပွဲပြင်းထန်ခဲ့ပြီး စစ်ကောင်စီက လေကြောင်းဖြင့် အကြိမ်(၆၀)ထက်မနည်း ပစ်ခတ်ပေးခဲ့သလို ဟားခါးမြို့မှလည်း လက်နက်ကြီးတွေနဲ့ ပစ်ခတ်ပေးခဲ့ပါတယ်။ တိုက်ပွဲအတွင်းမှာ နှစ်ဘက်ထိခိုက်ကျဆုံးမှုများရှိကြောင်းသိရသည်။

========================

📌📌 3. ဟားခါးမြို့က ရဲတပ်သားတစ်ဦး လက်နက်ယူဆောင်ကာ CDF-Hakha ထံအလင်းဝင်

The Matupi Times ၊ အောက်တိုဘာလ ၈ ၊ ၂၀၂၄

ချင်းပြည်နယ် ၊ ဟားခါးမြို့က စစ်ကောင်စီလက်အောက်ခံ ရဲတပ်သားတစ်ဦးသည် ဒီကနေ့အောက်တိုဘာလ ၈ ၊ ၂၀၂၄ ရက်နေ့မှာ ချင်းပြည်ကာကွယ်ရေးတပ်ဖွဲ့-ဟားခါးထံ အလင်းဝင်လာကြောင်းသိရသည်။

အလင်းဝင်လာသူသည် ၎င်းနဲ့အတူ လက်နက်၊ခဲယမ်းတချို့နဲ့အတူ အလင်းဝင်လာခြင်းဖြစ်ပြီး ချင်းပြည်ကာကွယ်ရေးတပ်ဖွဲ့-ဟားခါးမှ ဆုငွေပေးအပ်ခဲ့ပြီး လွတ်မြောက်နယ်မြေသို့ပို့ဆောင်ပေးခဲ့တယ်လို့သိရပါတယ္။ စစ်ကောင်စီတပ်ဖွဲ့ဝင်များအနေဖြင့် အလင်းဝင်ရောက်လိုပါက ချင်းပြည်ကာကွယ်ရေးတပ်ဖွဲ့-ဟားခါးမှ လက်ခံကြိုဆိုလျက်ရှိကြောင်းထည့်သွင်းဖော်ပြထားပါတယ္။

========================

📌📌 4. ငါးရစ်တက်ကာလအတွင်း မည်သူမျှငါးဖမ်းခြင်းမပြုလုပ်ရန် ZZLMS ညီနောင်အဖွဲ့အသိပေး

The Matupi Times ၊ အောက်တိုဘာလ ၈ ၊ ၂၀၂၄

သား၊ ငါး ၊ သတ္တဝါထိန်းသိမ်းခြင်းနှင့်စပ်လျဉ်း၍ လိုက်နာရမည့်အချက်တွေကို ဒီကနေ့ အောက်တိုဘာလ ၈ ၊ ၂၀၂၄ ရက်နေ့မှာ ZZLMS ညီနောင်အဖွဲ့က သတင်းထုတ်ပြန်ပါတယ္။

ZZLMS သည် သား၊ ငါး ၊ သတ္တဝါထိန်းသိမ်းစောင့်ရှောက်ခြင်းအား အစဉ်ဆောင်ရွက် ခဲ့သည့်နည်းတူ ယခင်က ကျင်းပခဲ့သော ZZLMS ညီနောင်အဖွဲ့၏ (၆)ကြိမ်မြောက်အစည်းအဝေးတွင် သား၊ငါး၊ သတ္တဝါထိန်းသိမ်းခြင်းနှင့် စပ်လျဉ်း၍ ယခင်ဆုံးဖြတ်ချက်အတိုင်း ဆက်လက်အကောင်အထည်ဖော်ဆောင်ရွက်ရန် ဆုံးဖြတ်ခဲ့တယ်လို့ဆိုပါတယ္။

လိုက်နာရမည့်အချက်တွင် ယခုစာထုတ်ပြန်သည့်နေမှစ၍ ၂၀၂၄ ခုနှစ်၊ နို်ဝင်ဘာလ ၂၄ ရက်နေ့အထိ(ငါးရစ်တက်ကာလအတွင်း) မည်သူမျှ ဒိုင်နမိုဖြင့် ငါးဖမ်းခြင်း ၊ မိုင်းခွဲငါးဖမ်းခြင်း နှင့် ဆေးခတ်ငါးဖမ်းခြင်း မပြုလုပ်ရန်၊ ၎င်းအပြင် နည်းလမ်းအမျိုးမျိုးဖြင့် ငါးဖမ်းခြင်းလုံးဝမပြုလုပ်ရ စတဲ့အချက်တွေပါဝင်ပါတယ္။

ဆက်လက်၍ အထက်ပါတားမြစ်ချက်များကို ဖောက်ဖျက်ကျူးလွန်သူများအား သက်ဆိုင်ရာအဖွဲ့အစည်း၏ ဉပဒေ၊အမိန့် ညွှန်ကြားချက်၊ စည်းမျဉ်းစည်းကမ်းများနှင့်အညီ အရေးယူသွားမည်ဖြစ်ကြောင်း ထည့်သွင်းဖော်ပြထားပါတယ္။

========================

📌📌 5. ထိုင်း-မလေးရှားနယ်စပ်တွင် ချင်းအမျိုးသမီးတစ်ဦး ယာဉ်မတော်တဆမှုကြောင့် သေဆုံး

The Matupi Times ၊ အောက်တိုဘာ ၊ ၉ ၊ ၂၀၂၄

ထိုင်း-မလေးရှားနယ်စပ်တွင် ချင်းအမျိုးသမီးတစ်ဦးသည် ယာဉ်မတော်တဆမှုကြောင့် ဒီကနေ့အောက်တိုဘာလ (၉)ရက်နေ့ မနက်ပိုင်းတွင် သေဆုံးသွားကြောင်း ဝမ်းနည်းစွာကြားသိရပါတယ်။

သေဆုံးသူ အမျိုးသမီးသည် မတူပီမြို့နယ်၊ ဝါပုန်းကျေးရွာဇာတိမှ ဒေါ်နီ(Nu Daw Ni) ဖြစ်ကြောင်းသိရပြီး အမျိုးသားမှာ CDM ကျောင်းဆရာ Saya Pa Aung ဖြစ်တယ်လို့သိရပါတယ္။ ပြီးခဲ့တဲ့ရက်ပိုင်းက အမျိုးသားရှိရာ မလေးရှားနိုင်ငံသို့ သွားနေစဉ် ထိုင်းနှင့်မလေးရှားနယ်စပ်မှာ ကား accident ဖြစ်ပွားခဲ့ပြီး ဆေးရုံပို့သို့ပို့ဆောင်ပေးခဲ့ကြပေမယ့် ဒီကနေ့မှာ ‌ဆေးရုံ၌ သေဆုံးသွားရခြင်း ဖြစ်ကြောင်းသိရပါတယ္။

========================

📌📌 6. ချင်းဖိုက်တာ Joshua Van ဒီဇင်ဘာလတွင် ထိုးသတ်မည်

The Matupi Times ၊ အောက်တိုဘာလ ၈ ၊ ၂၀၂၄ ။

ချင်းဖိုက်တာ Joshua Van ဟာ ယခုနှစ်မကုန်ခင် UFC ပွဲထပ်မြင်တွေ့ရဖွယ်ရှိကြောင်း ပရိသတ်တွေကိုအသိပေးခဲ့တဲ့အတိုင်း ယခုနှစ် ဒီဇင်ဘာလထဲမှာ နောက်ထပ် UFC ပွဲထပ်မံထိုးသတ်သွားမယ်လို့ သူ့ရဲ့ဖေ့ဘုတ်စာမျက်နှာမှတဆင့် အတည်ပြုလိုက်ပါတယ္။

Joshua Van ဟာ ၂၀၂၄ ခုနှစ် ၊ လာမယ့်ဒီဇင်ဘာလ(၇)ရက်နေ့ မှာ အမေရိကန်ဖိုက်တာ Cody Durden နဲ့ ယှဉ္ပြိုင်ထိုးသတ်သွားမှာပါ။ Cody Durden ဟာ Bantamweight မှာထိုးသတ်နေသူဖြစ်သလို Joshua Van ကတော့ Flyweight မှာထိုးသတ်နေသူဖြစ်ပါတယ္။

Cody Durden က UFC ပြိုင်ပွဲမှာ(၆)ပွဲထိုးသတ်ထားပြီး ရာနှုန်းပြည့်နိုင်ပွဲရရှိထားသူဖြစ်သလိုချင်းဖိုက်တာ Joshua Van ဟာလည်း(၅)ပွဲထိုး(၁)ပွဲသာရှုံးနိမ့်ထားတာကြောင့် ပရိတ်သတ်တွေအနေနဲ့ ချင်းဖိုက်တာရဲ့ ပွဲကောင်းတစ်ပွဲကို နှစ်မကုန်ခင် ကြည့်ရှုအားပေးရအုံးမှာဖြစ်ပါတယ္။

========================

📌📌 7. ရှုံးပွဲမရှိ အမေရိကန်ဖိုက်တာနဲ့ ထိုးသတ်သွားမယ့် ချင်းဖိုက်တာ Tial Thang

The Matupi Times ၊ အောက်တိုဘာလ ၁၀ ၊ ၂၀၂၄

ချင်းဖိုက်တာ Tial Thang ဟာ Cage Fury Fighting Championship 137 ပြိုင်ပွဲမှာ ရှုံးပွဲမရှိသေးတဲ့ အမေရိကန်ဖိုက်တာနဲ့ ယှဉ်ပြိုင်ထိုးသတ်သွားမယ္လို့သိရပါတယ္။

အဆိုပါပြိုင်ပွဲကို လာမယ့္အပတ် အောက်တိုဘာလ ၁၈ ရက်(သောကြာနေ့)၌ အမေရိကန်ပြည်ထောင်စု၊ပင်ဆယ်ဗေးနီးယားပြည်နယ်၊ ဖီလာဒေလ်းဖီးယား မြို့မှာ ကျင်းပသွားမှာဖြစ်ပြီး အမေရိကန်နိုင်ငံသား Christian Mcauley နဲ့ထိုးသတ်သွားမှာဖြစ်ပါတယ်။

Christian Mcauley ဟာနောက်ဆုံးယှဉ်ပြိုင်ထိုးသတ်ခဲ့တဲ့ ပရော်ဖက်ရှင်နယ်ဖိုက်တာပွဲမှာ (၄)ပွဲထိုး(၄)ပွဲအနိုင်နဲ့ ရှုံးပွဲမရှိမှတ်တမ်းကောင်းပိုင်ဆိုင်ထားသူဖြစ်ပါတယ္။ Tial Thang ကတော့ နောက်ဆုံးယှဉ္ပြိုင်ထိုးသတ်ခဲ့တဲ့ ပွဲ(၄)ပွဲမှာ (၂)ပွဲရှုံးနိမ့်ထားတာဖြစ်ပါတယ္။