07 Dec 2024 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၄ ဒီဇင်ဘာလ ( ၇ ) ရက်နေ့နောက်ဆုံးရပြည်တွင်းသတင်းများ 

📌📌 ၁။ မင်းတပ်မြို့ပေါ်မှာ စစ်ကောင်စီ မီးရှို့၊ လေကြောင်းဗုံးကြဲမှုဖြစ်စဉ်များ။

 

မင်းတပ်မြို့ပေါ်မှာ စစ်ကောင်စီက နေအိမ်မီးရှို့တာတွေ ဆက်လုပ်နေပါတယ်။

မင်းတပ်မြို့ပေါ်မှာ စစ်ဆင်ရေးစတင်ကြောင်းကြေညာပြီးတဲ့ ၂၀၂၄ နိုဝင်ဘာလပထမအပတ်ကစလို့ လေကြောင်းတိုက်ခိုက်ခံရမှုပေါင်း အကြိမ် ၁၀၀ ထက်မနည်း ရှိနိုင်ပါတယ်။

လေကြောင်းတိုက်ခို၊က်ခံရတဲ့ အကြိမ် ၁၀၀ ကျော်အတွင်း Cluster၊ ပေါင် ၅၀၀ အပြင် အခြား ဗုံးသီးအလုံး ၄၀၀ ကျော်နဲ့ စစ်ကောင်စီဘက်က အသုံးပြုထားတာပါ။

လေကြောင်းတိုက်ခိုက်ခံရမှုအပြင် မင်းတပ်မြို့ပေါ်နေအိမ်တွေကိုလည်း စစ်ကောင်စီဘက်က တအိမ်တက်ဆင်း မီးရှို့တာမျိုး လုပ်နေတာ ဖြစ်ပါတယ်။

နေအိမ်ထိခိုက်ဆုံးရှုံးမှု အရေအတွက် အတိအကျမသိရသေးပေမယ့် မင်းတပ်မြို့၊ အရှေ့ပြင်၊ အနောက်၊ စံပြ၊ ဘဝသစ် ရပ်ကွက်လေးခုရှိ အိမ်ခြေ ၁၀၀ ကျော် ပျက်စီးနိုင်ပါတယ်။

မင်းတပ်မြို့ပေါ်မှာ တံတားဦးလေတပ်၊ ရှမ်းတဲလေတပ်၊ မကွေးလေတပ်တို့က လေကြောင်းတိုက်ခိုက်မှုအများဆုံးပြုလုပ်တာဖြစ်ပြီး ခလရ ၂၇၄ တပ်နဲ့ ကျောက်ထုမြို့ အမြောက်တပ်တို့က လက်နက်ကြီး ပစ်ခတ်မှု လုပ်နေတာ ဖြစ်ပါတယ်။

 

========================

 

📌📌 ၂။ တောင်ကိုရီးယား သမ္မတက အရေးပေါ် စစ်အုပ်ချုပ်ရေး ကြေညာ။

 

တောင်ကိုရီးယား သမ္မတ Yoon Suk Yeol က  ဒီဇင်ဘာလ (၃) ရက်၊ နေ့ အင်္ဂါနေ့ ညနက်ပိုင်းမှာ တိုင်းပြည်အတွင်း အရေးပေါ် စစ်အုပ်ချုပ်ရေး ကြေညာ လိုက်ပါတယ်။

အရေးပေါ် စစ်အုပ်ချုပ်ရေး ကြေညာချက်ကို ညနက်ပိုင်း ရုပ်မြင်သံကြား မိန့်ခွန်းကနေ ကြေညာ လိုက်တာဖြစ်ပါတယ်။

သမ္မတ Yoon က အတိုက်အခံပါတီရဲ့လုပ်ရပ်တွေကို “နိုင်ငံတော် ပုန်ကန်ဆန့်ကျင်ရေး လှုပ်ရှားမှုတွေ” အဖြစ် စွပ်စွဲလိုက်ပါတယ်။

လွှတ်တော်အတွင်း နေရာဒုတိယ အများဆုံး ရရှိထားတဲ့ အတိုက်အခံ “People Power Party”ပါတီ ခေါင်းဆောင် Han Dong-hoon ကတော့သမ္မတရဲ့ ကြေညာချက်ဟာ မှားယွင်းနေပြီး အတိုက်အခံ ပါတီအနေနဲ့ ပြည်သူလုထု နဲ့ ပူးပေါင်းပြီး သမ္မတရဲ့ လုပ်ဆောင်ချက်တွေကို တားဆီးသွားမယ်လို့ ဆိုပါတယ်။ 

 

========================

 

📌📌 ၃။ စစ်ကောင်စီတပ်ကြောင့် သုံးလအတွင်း အမျိုးသမီး ၁၅၀ သေဆုံးပြီး ၄၉ ဦး ဖမ်းဆီးခံရ။

 

နိုင်ငံတစ်ဝန်း စစ်ကောင်စီတပ် တိုက်ခိုက်မှုကြောင့်သုံးလအတွင်း  အမျိုးသမီး ၁၅၀ ဦး သေဆုံးခဲ့တယ်လို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) က ဒီဇင်ဘာလ ၄ ရက်နေ့မှာ ထုတ်ပြန်ပါတယ်။

၂၀၂၄ခုနှစ် ပြီးခဲ့တဲ့ စက်တင်ဘာလ ၁ ရက်နေ့ကနေ နိုဝင်ဘာလ ၃၀ ရက်နေ့အထိ သေဆုံးခဲ့တဲ့ အရေအတွက် ဖြစ်ပါတယ်။ 

သေဆုံးတဲ့ အမျိုးသမီးတွေထဲက ၁၀၇ ဦးဟာ လေကြောင်းတိုက်ခိုက်မှုကြောင့် သေဆုံးတာဖြစ်ပြီး ရခိုင်ပြည်နယ်နဲ့ စစ်ကိုင်းတိုင်းက သေဆုံးသူ ၃၄ ဦးစီနဲ့ အများဆုံး ဖြစ်တယ်လို့ ဆိုပါတယ်။ 

ဒါ့အပြင် သေဆုံးသူ ၁၅၀ အထဲမှာ  အသက် ၁၈ နှစ်အောက် အသက်မပြည့်သေးတဲ့ ကလေးငယ် သုံးဆယ်လည်း ပါဝင်တယ်လို့ သိရပါတယ်။ 

စက်တင်ဘာလကနေ နို၀င်ဘာလအထိ သုံးလအတွင်း အမျိုးသမီး ၄၉ ဦးကို စစ်ကောင်စီတပ်က ဖမ်းဆီးခဲ့တယ်လို့ AAPP က ဆိုပါတယ်။ 

AAPP ရဲ့ ဒီဇင်ဘာလ ၄ ရက်နေ့အထိ စာရင်းတွေအရ အာဏာသိမ်းကာလအတွင်း ဒီမိုကရေစီအရေးလှုပ်ရှားသူနဲ့ ပြည်သူ စုစုပေါင်း ၆၀၁၇ ဦး သေဆုံးခဲ့ပြီး ၂၁,၂၀၁ ဦး ဖမ်းဆီးထိန်းသိမ်းခံထားရဆဲ ဖြစ်ပါတယ်။

#RadioNUGLocalNews

#SpringRevolution