14 Dec 2024 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၄ ဒီဇင်ဘာလ ( ၁၄ ) ရက်နေ့နောက်ဆုံးရပြည်တွင်းသတင်းများ 

📌📌 ၁။ နော်ဝေနိုင်ငံအဆင့် လက်ဝှေ့ပြိုင်ပွဲမှာ ချင်းလူငယ် ရွှေတံဆိပ်ဆွတ်ခူး။

 

နော်ဝေမှာ တနိုင်ငံလုံးအတိုင်းအတာကျင်းပတဲ့ လက်ဝှေ့ပြိုင်ပွဲအတွင်း ချင်းလူငယ်တဦး ရွှေတံဆိပ်ဆု ဆွတ်ခူးတယ်လို့ K'Cho Ethnic Association Europe က ဖော်ပြပါတယ်။

၂၀၂၄ ဒီဇင်ဘာ ၇ ရက်ကနေ ၈ ရက်နေ့အထိ ကျင်းပပြုလုပ်ခဲ့တဲ့ အသက် ၁၅ နှစ်အောက် ၅၀ ကီလိုဝိတ်တန်းမှာ အခုလို ရွှေတံဆိပ်ရတာလို့ ဆိုပါတယ်။

ရွှေတံဆိပ်ဆွတ်ခူးသူဟာ နော်ဝေနိုင်ငံရောက် အသက် ၁၃ နှစ်အရွယ် K'Cho (ချိုး) လူငယ် ဆလိုင်းနိုင်းရှိန်း (Salai Naing Shing) လို့ သိရပါတယ်။

 

========================

 

📌📌 ၂။ အမေရိကန်နိုင်ငံခြားရေးဝန်ကြီးဌာနကပေးတဲ့ လူ့အခွင့်အရေးကာကွယ်သူဆုကို CHRO မှ ဆလိုင်းမန်ဟရဲလျန် ရရှိ။

 

အမေရိကန်ပြည်ထောင်စု၊ နိုင်ငံခြားရေးဝန်ကြီးဌာနက ချီးမြှင့်တဲ့ ကမ္ဘာလုံးဆိုင်ရာလူ့အခွင့်အရေးကာကွယ်သူဆု ကို မြန်မာနိုင်ငံက ချင်းလူအခွင့်အရေးအဖွဲ့ ( CHRO) မှ ဆလိုင်းမန်ဟရဲလျန်က ရရှိခဲ့တယ်လို့ CHROက ဒီဇင်ဘာလ ၁၀ ရက်နေ့မှာသတင်းထုတ်ပြန်ပါတယ်။

အမေရိကန်ပြည်ထောင်စု၊ ဝါရှင်တန်ဒီစီရှိ နိုင်ငံခြားရေးဝန်ကြီးဌာနက ဒီဇင်ဘာလ ၁၀ ရက်နေ့မှာ ကျင်းပတဲ့ နိုင်ငံတကာလူ့အခွင့်အရေးနေ့ မှာ လူ့အခွင့်အရေးကာကွယ်သူများဆုချီးမြှင့်ခြင်းကိုပြုလုပ်ခဲ့ခြင်းဖြစ်ပြီး အမေရိကန် နိုင်ငံခြားရေးဝန်ကြီး အန်တိုနီဘလင်ကန် ( Antony Blinken ) ကိုယ်တိုင်တက်ရောက်ပြီး ဆုချီးမြှင့် ခဲ့ခြင်းဖြစ်ပါတယ်။

ဆလိုင်း မာန်ဟရဲလျန်ဟာ လက်ရှိ ချင်းလူအခွင့်အရေးအဖွဲ့မှာ အစီအစဉ်ညွန်ကြားရေးမှူးအဖြစ်တာဝန်ယူ ဦးဆောင်နေသူဖြစ်ပြီး ဆယ်စုနှစ်ကြာအောင် လူ့အခွင့်အရေး၊ ရွေးကောက်ပွဲအတွင်း ပွင့်လင်းမြင်သာမှုရှိရေးနဲ့ မြန်မာ့နိုင်ငံရေးမှာ လူငယ်များပါဝင်မှုအားကောင်းအောင် ဆောင်ရွက်နေသူဖြစ်တယ်လို့ ထုတ်ပြန်ချက်မှာဖော်ပြ ထားပါတယ်။

ဒါ့အပြင် ၂၀၂၁ ခုနှစ်စစ်တပ်အာာဏာသိမ်းပြီးနောက် စစ်ကောင်စီရဲ့ လူ့အခွင့်အရေးကျူးလွန်မှုများ ကို ဖော်ထုတ်မှတ်တမ်းတင်နိုင်ရန်အတွက် CHROရဲ့ လူ့အခွင့်အရေးမှတ်တမ်းပြုစုရေးအဖွဲ့ကို ဆလိုင်းမာန်ဟရဲလျန်က ဦးဆောင်ခဲ့ပြီး စစ်တပ်ကျူးလွန်တဲ့ စစ်ရာဇဝတ်မှု၊ လူသားမျိုးနွယ်အပေါ်ကျူးလွန်တဲ့ ရာဇဝတ်မှုများနဲ့ အခြားလူ့အခွင့်အရေးချိုးဖောက်မှုများကို စနစ်တကျပြုစုနိုင်ခဲ့တယ်လို့ဆိုပါတယ်။

ဆလိုင်းမာန်ဟရဲလျန်ဟာ ရန်ကုန်မြို့၊ဒဂုံတက္ကသိုလ်မှာ အဝေးသင် ဖြေကြားရင်း ခရစ်ယာန်ဓမ္မကျောင်းတက်ခဲ့ပြီးနောက် Mahidol Universityမှာ လူ့အခွင့်အရေးနဲ့ပက်သက်တဲ့ မဟာဘွဲ့ကိုရယူခဲ့သူဖြစ်ပါတယ်။

 

========================

 

📌📌 ၃။ ဟားခါးမြို့နားက ချွန်ကျုံးရွာကို စစ်ကောင်စီက လေကြောင်းကနေ တိုက်ခိုက်၊အရပ်သားပြည်သူ ၄ ဦးသေဆုံး၊ ၉ ဦး ဒဏ်ရာရ။

 

ချင်းပြည်နယ်၊ ဟားခါးမြို့နဲ့ (၇) မိုင်အကွာဝေးမှာရှိတဲ့ ချွန်ကျုံးကျေးရွာကို စစ်ကောင်စီက တိုက်ပွဲမရှိဘဲ ဒီဇင်ဘာလ (၁၀) ရက်နေ့ မနက် ၂ နာရီဝန်းကျင်မှာ ဂျက်ဖိုက်တာနဲ့ ၂ ကြိမ်ဗုံးကြဲတိုက်ခိုက်ခဲ့လို့ အသက်မပြည့်သေးတဲ့ ကလေးတစ်ဦးအပါအဝင် မိသားစုဝင် (၄ ) ဦးသေဆုံးပြီး ၉ ဦး ထိခိုက်ဒဏ်ရာရတယ်လို့ သိရပါတယ်။

စစ်ကောင်စီရဲ့ဒီလေကြောင်း တိုက်ခိုက်မှုမှာ အရပ်သားနေအိမ်တွေလည်း အများအပြားထိခိုက်ပျက်စီးတယ်လို့ ဆိုပါတယ်။

စစ်ကောင်စီတပ်ဖွဲ့က ချွန်ကျုံးကျေးရွာက အရပ်သားလူနေအိမ်အများအပြားကိုလည်း ပြီးခဲ့တဲ့ ၂၀၂၂ ခုနှစ်ဇူလိုင်လ ၁၄ ရက်နေ့တုန်းက မီးရှို့ဖျက်ဆီးတာတွေ လုပ်ခဲ့ပါတယ်။

ချွန်ကျုံးကျေးရွာဟာ ဟားခါးမြို့နယ်ထဲမှာတည်ရှိပြီး ချင်းပြည်နယ်မြို့တော် ဟားခါးမြို့နဲ့ ဖလမ်းမြို့ ကားလမ်းဘေးမှာတည်ရှိတဲ့ ကျေးရွာလည်း ဖြစ်ပါတယ်။

#RadioNUGLocalNews

#SpringRevolution