04 Jan 2025 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၅ ဇန်နဝါရီလ ( ၄ ) ရက်နေ့နောက်ဆုံးရပြည်တွင်းသတင်းများ 

📌📌 ၁။ ချင်းပြည်ပေါင်းစည်းရေး ကြိုးစားဆောင်ရွက်မယ်လို့ ‘ချင်းညီနောင်’ ကြေညာ။

 

ချင်းပြည်ပေါင်းစည်းရေး ကြိုးစားဆောင်ရွက်မယ်လို့ ‘ချင်းညီနောင်’ ဖွဲ့စည်းတည်ထောင်ခြင်း ၁ နှစ်ပြည့် အစီရင်ခံစာမှာ ဖော်ပြပါတယ်။

“ချင်းမှာ နှစ်ဖွဲ့ကွဲနေတာ အားလုံးသိပြီးသား ဖြစ်ပါတယ်။ ကျနော်တို့အနေနဲ့ ချင်းပြည်ပြန်လည်ပေါင်းစည်းရေးအတွက် ပြည်တွင်း၊ ပြည်ပက အဖွဲ့အစည်း ၇ ခုလောက်နဲ့ တစိုက်မတ်မတ် လုပ်ဆောင်နေတာမျိုး ရှိပါတယ်။”လို့ ‘ချင်းညီနောင်’ အတွင်းရေးမှူးအဖွဲ့ဝင်က ပြောဆို‌ကြောင်း The Mindat Postက ရေးသားဖော်ပြပါတယ်။

၄ နှစ်တာကာလအတွင်း ပလက်ဝမြို့နယ်၊ တီးတိန်မြို့နယ်၊ မတူပီမြို့နယ်၊ မင်းတပ်မြို့နယ်၊ ကန်ပက်လက်မြို့နယ်၊ ဖလမ်းမြို့နယ်နဲ့ တခြားနယ်နိမိတ်ချင်း ထိစပ်နေတဲ့ဒေသရှိ စစ်ကောင်စီတပ်စွဲစခန်း ၃၀ ထက်မနည်း  သိမ်းပိုက်ထားနိုင်တယ်လို့ ‘ချင်းညီနောင်’ စစ်ရေးတာဝန်ခံက ဒီအခမ်းအနားမှာ ပြောပါတယ်။

‘ချင်းညီနောင်’ ဖွဲ့စည်းတည်ထောင်ခြင်း ၁ နှစ်ပြည့် အခမ်းအနားမှာ NUG ယာယီသမ္မတ၊ NUG ဝန်ကြီး၊ BPLA (ဗမာအမျိုးသားလွတ်မြောက်ရေးတပ်) ကွပ်ကဲရေးမှူး၊ BNRA တာဝန်ရှိသူ၊ ယောကာကွယ်ရေးတပ် - YDF၊ ယောတပ်တော် - YA၊ ပြည်သူ့ကာကွယ်ရေးတပ်မတော် - PDF တာဝန်ရှိသူတွေနဲ့ တော်လှန်ရေးအင်အားစု တာဝန်ရှိသူတွေ တက်ရောက်ခဲ့ပါတယ်။

‘ချင်းညီနောင်’ကို ၂၀၂၃ခုနှစ်၊ ဒီဇင်ဘာလ ၃၀ ရက်နေ့ ဖွဲ့စည်းတည်ထောင်ကြောင်း ကြေညာခဲ့တာပါ။

ဒီအဖွဲ့အစည်းမှာ ချင်းအမျိုးသားအဖွဲ့ချုပ် (CNO)၊ ချင်းအမျိုးသားကောင်စီ (မင်းတပ်)၊ ဇိုမီးဖက်ဒရယ်အစည်းအရုံး (ZFU)၊ ချင်းကာကွယ်ရေးတပ်ဖွဲ့ (ကန်ပက်လက်)၊ ချင်းလဲန်းကာကွယ်ရေးတပ် (မတူပီ) တပ်မဟာ (၁) နဲ့ မရာနယ်မြေအုပ်ချုပ်ရေးကောင်စီ (MTC) တို့ ပါဝင်ပါတယ်။

 

========================

 

📌📌 ၂။ မင်းတပ်မှာ ၂၀၂၄ ဒီဇင်ဘာလအတွင်း လေကြောင်းတိုက်ခိုက်ခံရမှု ဘယ်လောက်ရှိခဲ့လဲ။

 

မင်းတပ်မှာ ၂၀၂၄ ဒီဇင်ဘာလအတွင်း စစ်ကောင်စီက လေကြောင်းတိုက်ခိုက်မှု အကြိမ် ၇၀ ထက်မနည်း ပြုလုပ်ခဲ့တာလို့

The Mindat Postက ဆိုပါတယ်။

အဆိုပါ လေကြောင်းတိုက်ခိုက်မှုတွေကြောင့် မင်းတပ်မြို့ အရှေ့ပြင်၊ စံပြ၊ ဘဝသစ်နဲ့ အနောက်ရပ်ကွက်ရှိ အဆောက်အအုံ ၁၀၀ မနည်း ထပ်မံပျက်စီးခဲ့ရပြီး လူနေအိမ်နဲ့ ဘာသာရေးအဆောက်အအုံတွေ ပါဝင်ပါတယ်။

၂၀၂၄ နိုဝင်ဘာလကနေ ဒီဇင်ဘာနှောင်းပိုင်းအထိ မင်းတပ်မှာ လေကြောင်းတိုက်ခိုက်ခံရမှုအကြိမ် ၂၀၀ ဝန်းကျင် ရှိကြောင်း The Mindat Post က ရရှိထားတဲ့ အချက်အလက်တွေက ဖော်ပြပါတယ်။ 

လေကြောင်းတိုက်ခိုက်စဉ် Cluster၊ ပေါင် ၅၀၀ အပြင် တခြားဗုံးသီးအလုံး ၇၀၀ ကျော်နဲ့ စစ်ကောင်စီက အသုံးပြုထားတာပါ။

မင်းတပ်မှာ လေကြောင်းတိုက်ခိုက်မှုအများဆုံးလုပ်တဲ့ လေတပ်တွေကတော့ တံတားဦးလေတပ်၊ ရှမ်းတဲလေတပ်နဲ့ မကွေးလေတပ်တို့ ဖြစ်ကြပါတယ်။

၂ လတာနီးပါးအတွင်း လေကြောင်းတိုက်ခိုက်ခံရမှုကြောင့် နေအိမ်ထိခိုက်ဆုံးရှုံးမှု အရေအတွက် အတိအကျမသိရသေးပေမယ့် မင်းတပ်မြို့၊ အရှေ့ပြင်၊ အနောက်၊ စံပြ၊ ဘဝသစ် ရပ်ကွက်လေးခုရှိ အိမ်ခြေ ၂၀၀ ကျော် ပျက်စီးနိုင်တယ်လို့ မင်းတပ်မြို့နယ် စစ်ဘေးရှောင်များ ကူညီစောင့်ရှောက်ရေးကော်မတီက ဒီဇင်ဘာ ၂၅ ရက်နေ့ ထုတ်ပြန်ပါတယ်။

 

========================

 

📌📌 ၃။ မင်းတပ် ခလရ ၂၇၄ကနေ ကစဉ့်ကလျား ထွက်ပြေးတဲ့ စစ်ကောင်စီတပ်ဖွဲ့ဝင် တချို့ကို ယောဗျူဟာက ဖမ်းဆီးရမိ။

 

‘ချင်းညီနောင်’ စစ်ဆင်ရေး မင်းတပ်မြို့သိမ်းတိုက်ပွဲအတွင်း ခလရ ၂၇၄ ကနေ ကစဉ့်ကလျား ထွက်ပြေးတဲ့ စစ်ကောင်စီတပ်ဖွဲ့ဝင် တချို့ကို ပြန်လည်ဖမ်းဆီးရမိတယ်လို့ ဗျူဟာအမှတ် - ၈၁ ယောဗျူဟာက ထုတ်ပြန်ပါတယ်။

ယောဗျူဟာရဲ့ ဖမ်းဆီးရမိသူတွေထဲမှာ စစ်ကောင်စီတပ်သားအဆင့်ရှိသူတွေအပါအဝင် တပ်မိသားစုဝင်လို့ ယူဆရသူ ၁၂ ဦး ပါဝင်ပါတယ်။

၂၀၂၄ နိုဝင်ဘာ ၉ ရက်နေ့စတင်တဲ့ မင်းတပ်မြို့သိမ်းတိုက်ပွဲမှာ ‘ချင်းညီနောင်’ နဲ့ မဟာမိတ် အာရက္ခတပ်တော်၊ ယောကာကွယ်ရေးတပ်၊ ယောတပ်တော်၊ မုံရွာခရိုင်ပြည်သူ့ကာကွယ်ရေးတပ်မတော် တပ်ရင်း ၃ အပါအဝင် မဟာမိတ်အင်အားစုတချို့ပူးပေါင်း တိုက်ပွဲဝင်ခဲ့ပြီး ၄၄ ရက်အကြာမှာတော့ မင်းတပ်မြို့တစ်ခုလုံးကို အပြည့်အဝထိန်းချုပ် နိုင်ခဲ့ပြီ ဖြစ်ပါတယ်။

#RadioNUGLocalNews

#SpringRevolution