18 Jan 2025 - (Ethnic language program-CHO_DAAI) by Radio NUG

 

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၅ ဇန်နဝါရီလ ( ၁၈ ) ရက်နေ့နောက်ဆုံးရပြည်တွင်းသတင်းများ 

📌📌 ၁။ မင်းတပ်မှာ မြေမြှုပ်မိုင်းရှင်းနဲ့ မြို့သန့်ရှင်းရေး ဆက်လက်လုပ်ဆောင်၊ မိုင်း ၂၀၀ ကျော် ရှင်းလင်းထားပြီးဟုဆို။

 

မင်းတပ်မှာ စစ်ကောင်စီထောင်ထားတဲ့ မြေမြှပ်မိုင်း ရှင်းလင်းမှု ဆက်လက်လုပ်ဆောင်နေတယ်လို့ ချင်းကာကွယ်ရေးတပ်ဖွဲ့ - မင်းတပ် သတင်းပြန်ကြားရေးအဖွဲ့ဘက်က ပြောပါတယ်။

စစ်ကောင်စီထောင်တဲ့ မိုင်းအရေအတွက် နှစ်ရာကျော်ကို ရှင်းလင်းထားပြီလို့ ဆိုပါတယ်။

“လက်ရှိချိန်ထိ ကျနော်တို့အနေနဲ့ အလုံးပေါင်း ၂၀၀ ကျော် ရှင်းထားတယ်၊ ဒါပေမယ့် မပြီးသေးဘူး၊ ဆက်ရှင်းဖို့ ကျန်သေးတယ်။”လို့ CDF-Mindatကပြောဆိုကြောင်း The Mindat Postက ဖော်ပြပါတယ်။

မင်းတပ်မှာ ပြည်သူတွေပြန်လည် ဝင်ရောက်လာနိုင်ဖို့ ကြိုးစားဆောင်ရွက်နေသလို အဲဒီအချိန်ကို သက်ဆိုင်ရာကနေ တရားဝင် ထုတ်ပြန်သွားမယ်လို့လည်း ချင်းကာကွယ်ရေးတပ်ဖွဲ့ - မင်းတပ် သတင်းပြန်ကြားရေးအဖွဲ့ဘက်က ပြောပါတယ်။

မင်းတပ်မြို့သိမ်းစစ်ဆင်ရေးကို ‘ချင်းညီနောင်’ နဲ့အတူ အာရက္ခတပ်တော် - AA၊ ယောကာကွယ်ရေးတပ် - YDF၊ ယောတပ်တော် - YA နဲ့ မုံရွာခရိုင် PDF တပ်ရင်း ၃ တို့ ရက်ပေါင်း ၄၀ ကျော်ကြာ ပူးပေါင်း တိုက်ပွဲဝင်ခဲ့ပြီး ၂၀၂၄ ဒီဇင်ဘာ ၂၁ ရက်နေ့မှာ မြို့တခုလုံးကို အပြည့်အဝ ထိန်းချုပ်နိုင်ခဲ့ပါတယ်

 

========================

 

📌📌 ၂။ စစ်ကိုင်းတိုင်းမှာ NUG ရုံးစိုက်မယ်လို့ဆို။

 

ကချင်၊ ချင်း၊ ရှမ်း (မြောက်)၊ မန္တလေး၊ မကွေးတိုင်းတို့နဲ့ ထိစပ်နေတဲ့ နိုင်ငံအလယ်ပိုင်း စစ်ကိုင်းတိုင်းမှာ ပြည်ထောင်စုအဆင့် ရုံးစိုက်ဖို့ အမျိုးသားညီညွတ်ရေးအစိုးရ - NUG က ပြောတဲ့အကြောင်း Myanmar Now ရဲ့ ဇန်နဝါရီ ၁၃ရက် သတင်းတပုဒ်မှာ ရေးသားလာပါတယ်။

အဝေးရောက်အစိုးရ မဖြစ်စေဖို့ ပြည်ပရောက် NUG အစိုးရအဖွဲ့ဝင်တွေ ပြည်တွင်း ပြန်ဖို့ဆိုတဲ့ တိုက်တွန်းချက်မျိုးကို NUG ယာယီသမ္မတ ဒူဝါလရှီလက ၂၀၂၄ နှောင်းပိုင်းကစလို့ ဆက်တိုက် ပြောဆိုခဲ့တဲ့နောက် ဒီသတင်းထွက်ပေါ်လာတာ ဖြစ်ပါတယ်။

စစ်ကိုင်းတိုင်း လွတ်မြောက်နယ်မြေတွေမှာ အစိုးရဝန်ကြီးတွေရုံးထိုင်မယ့် ရုံးခန်းတွေ အခု ၂၀၂၅ ပထမလအတွင်း ဖွင့်လှစ်ပြီး အရပ်ဘက်အုပ်ချုပ်ရေးယန္တရား စတင်လည်ပတ်တော့မယ်လို့ ဖော်ပြထားပါတယ်။

NUGဟာ ပညာရေးဝန်ကြီးဌာန၊ ကာကွယ်ရေးဝန်ကြီးဌာန၊ ကျန်းမာရေးဝန်ကြီးဌာန၊ နိုင်ငံခြားရေးဝန်ကြီးဌာန၊ စီးပွားရေးဝန်ကြီးဌာန၊ သတင်းအချက် အလက်နှင့် နည်းပညာဝန်ကြီးဌာနအပါအဝင် အစိုးရဝန်ကြီးဌာန ၁၇ ခုနဲ့ လည်ပတ်နေတာပါ။

၂၀၂၅ခုနှစ်ဟာ အမျိုးသားညီညွတ်ရေးအစိုးရအတွက် မိမိကိုယ်ကို ပြုပြင်ပြောင်းလဲရေးတွေ စတင်ရမယ့်နှစ်ဖြစ်တယ်လို့ ယာယီသမ္မတက ၂၀၂၅ ဇန်နဝါရီ ၇ ရက်နေ့ ပြုလုပ်တဲ့ အမျိုးသားညီညွတ်ရေးအစိုးရရဲ့ ၁/၂၀၂၅ အစည်းအဝေးမှာ ပြောဆိုပါတယ်။

အမျိုးသားညီညွတ်ရေးအစိုးရ - NUG ရုံးစိုက်မယ့် စစ်ကိုင်းတိုင်းဟာ အိန္ဒိယနိုင်ငံ၊ နာဂဒေသ၊ မဏိပူရပြည်နယ်တွေနဲ့လည်း ထိစပ်နေပါတယ်။

တဖက်မှာ NUG လက်အောက်မှာ ရှိတဲ့ ပြည်သူ့ကာကွယ်ရေးတပ်မတော် (မန္တလေး) ကလည်း စစ်ကိုင်းမှာ တပ်မဟာအသစ် တစ်ခုဖွဲ့စည်းပြီး စစ်ဆင်ရေးအရှိန်အဟုန်ကို တိုးမြှင့်ဖော်ဆောင်သွားမယ်လို့ ၂၀၂၄ ဒီဇင်ဘာ ၃၀ ရက်နေ့က ကြေညာပါတယ်။

 

========================

 

📌📌 ၃။ ဆမီးမြို့ကို စစ်ကောင်စီ လေကြောင်း ဗုံးကြဲတိုက်ခိုက်။

 

ချင်းပြည်နယ်၊ ပလက်ဝမြို့နယ်၊ ဆမီးမြို့ကို စစ်ကောင်စီတပ်က ဇန်နဝါရီလ ၁၃ရက်နေ့၊ ည ၁၂ နာရီဝန်းကျင်မှာ လေကြောင်း ဗုံးကြဲတိုက်ခိုက်လို့ ထွေအုပ်ရုံး မီးလောင်ပျက်စီးသွားတယ်လို့ ဒေသခံတွေဆီက သိရပါတယ်။

အဲ့ဒီ လေကြောင်းဗုံးကြဲတိုက်ခိုက်တာကြောင့် ဆမီးမြို့ အမှတ် (၂) ရပ်ကွက်မှာ ကျပေါက်ကွဲပြီး ထွေအုပ်ရုံး မီးလောင်ပျက်စီးသွားတယ်လို့ သိရပါတယ်။

လူတွေထိခိုက်မှုအခြေအနေ အသေးစိတ်မသိရကြောင်း ဆမီးမြို့ဒေသခံတစ်ဦးက ပြောဆိုကြောင်း Zalen Mediaက ဖော်ပြပါတယ်။

ဆမီးမြို့ နေရာတချို့မှာ ဗုံးမကြဲမီအထိဖုန်းလိုင်းရပေမယ့် နောက်ပိုင်းမှာ ဆက်သွယ်ရေး ဖုန်းလိုင်းမရတော့ဘူးလို့လည်း ဆိုပါတယ်။

စစ်ကောင်စီတပ်က ပလက်ဝမြို့နယ်ကို လက်လွတ်လိုက်ရတဲ့ တစ်နှစ်ပြည့်နှစ်မှာ တိုက်ပွဲမရှိတော့ဘဲ ဆမီးမြို့ကို အခုလို လေကြောင်း ဗုံးကြဲသွားတာလို့ ဆိုကြပါတယ်။

#RadioNUGLocalNews

#SpringRevolution