08 Feb 2025 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၅ ဖေဖော်ဝါရီလ ( ၈ ) ရက်နေ့နောက်ဆုံးရပြည်တွင်းသတင်းများ 

📌📌 ၁။ တိုက်ပွဲပြင်းထန်နေတဲ့ ဖလမ်းမှာ စစ်ကူလာတဲ့စစ်ကောင်စီတပ်ဖွဲ့ဝင်တွေကို ဖမ်းဆီးရမိ။

 

‘ချင်းညီနောင်’ စစ်ဆင်ရေးဖော်ဆောင်တဲ့ ဖလမ်းဘက် စစ်ကူသွားတဲ့ စစ်ကောင်စီတပ်ဖွဲ့ဝင်တချို့ကို ဖမ်းဆီးရမိတဲ့အကြောင်း ‘ချင်းညီနောင်’ က ရုပ်သံဖိုင် ထုတ်ပြန်လာပါတယ်။

၂၀၂၄ ဒီဇင်ဘာနှောင်းပိုင်းက အင်အား ၁၀၀ နီးပါးရှိတဲ့ စစ်ကောင်စီတပ်ဖွဲ့ဝင်တွေဟာ ကလေးမြို့ကနေ စစ်ကူအဖြစ်ဖလမ်းမြို့ကို သွားရောက်စဉ် အခုလိုဖမ်းဆီးခံရတာလို့ ‘ချင်းညီနောင်’ ထုတ်ပြန်တဲ့ ရုပ်သံဖိုင်အရ သိရပါတယ်။

“ကျနော်တို့ ကလေးမြို့ကနေ ရဟတ်ယာဉ် ၂ စင်းနဲ့ ၄ ခေါက်ပို့တယ်၊ တောင်ကုန်းပေါ်ရောက်တော့ ဒါဖလမ်းပဲ ဆင်းကြဆိုလို့ ဆင်းပြီး သိရတာ။ ကျနော်ဆို လေယာဉ်က ဆင်းဆင်းချင်း ဒဏ်ရာရတယ်၊ ၁၀ ပေလောက်အမြင့်ကနေ ခုန်ရတာ။” လို့ ဖမ်းဆီးခံရတဲ့ စစ်သုံ့ပန်းတစ်ဦးက ထွက်ဆိုပါတယ်။

နှစ်ဖက်တိုက်ပွဲအတွင်း စစ်ကောင်စီက လူအင်အားဆယ်ဂဏန်းလောက်နဲ့ လေကြောင်းအကူအညီပေးနိုင်မှာ မဟုတ်ဘူးဆိုတဲ့ ပြောဆိုချက်မျိုးရှိတယ်လို့လည်း သူတို့က ထွက်ဆိုထားပါတယ်။

ဖမ်းဆီးခံရသူတွေ ကောင်းကောင်းမွန်မွန်ထိန်းသိမ်းခံထားလို့ လက်နက်ချ အလင်းဝင်လိုသူတွေ အမြန်လာနိုင်တယ်လို့ သူတို့က ဖိတ်ခေါ်ကြပါတယ်။

မြို့သိမ်းစစ်ဆင်ရေးကြေညာထားတဲ့ ဖလမ်းမြို့မှာ ၂၀၂၄ နိုဝင်ဘာဒုတိယအပတ်ကလည်း စစ်ကောင်စီလက်အောက်ခံ ရဲတပ်ဖွဲ့ဝင် ၄၃ ဦးကို ဖမ်းဆီးရမိတဲ့ ဖြစ်စဉ်ရှိခဲ့ပါတယ်။

 

========================

 

📌📌 ၂။ ချင်းပြည်သစ်ပါတီ ပေါ်ပေါက်လာ။

 

စစ်ကောင်စီအဖွဲ့ဝင် ဒေါက်တာမှုထန်က ချင်းပြည်သစ်ဆိုတဲ့ ပါတီတစ်ခုထူထောင်ပြီး အဲဒီပါတီကနေ စစ်ကောင်စီပြုလုပ်မယ့်ရွေးကောက်ပွဲမှာ ဝင်ပြိုင်ဖို့ လုပ်နေတယ်လို့ သိရပါတယ်။

ရန်ကုန်ခေတ်သစ် သတင်းဌာနရဲ့ ဇန်နဝါရီ ၃၁ရက်နေ့ ဖော်ပြချက်အရ အဲဒီပါတီမှာ ပါဝင်သူတွေဟာ ချင်းပြည်နယ်အစိုးရအဖွဲ့ဝန်ကြီးချုပ်ဟောင်း ဦးဟုန်းငိုင်း၊ ရာထူးဝန် အဖွဲ့ဝင်ဟောင်း ဦးငွန်မောင်း၊ လူမှုရေးဝန်ကြီးဟောင်း ဒေါက်တာဘမောင်နဲ့ ချင်းအမျိုးသားဒီမိုကရေစီအဖွဲ့ချုပ် - CNLD ပါတီရဲ့ အတိုင်ပင်ခံ ဦးနိုးထန်ကပ်စတဲ့ ပုဂ္ဂိုလ်တွေ ပါဝင်ပါတယ်။

သူတို့ထဲမှာ CNLD ပါတီ အတိုင်ပင်ခံ ဦးနိုးထန်ကပ်ဟာ အာဏာသိမ်းကာလမှာ စစ်ကောင်စီရဲ့ ရွေးကောင်ပွဲကော်မရှင်ကို သွားရောက်တွေ့ဆုံခဲ့ဖူးတယ်လို့ CNLD ပါတီအသိုင်းအဝန်းက ပြောပါတယ်။

စစ်ကောင်စီအဖွဲ့ဝင် ဒေါက်တာမှုထန်က ရွေးကောက်ပွဲဝင်ပြိုင်ဖို့ ချင်းပြည်သစ်ဆိုတဲ့ ပါတီတခုထူထောင်တယ်ဆိုတဲ့သတင်းနဲ့ပတ်သက်ပြီး CNLD နဲ့ နီးစပ်သူကို မေးမြန်းရာ “ဟုတ်တယ်၊ အဲဒီသတင်းအမှန်ပါ။”လို့ ပြောကြောင်း The Mindat Postမှာ ဖော်ပြတယ်။

ချင်းပြည်သစ်ပါတီအနေနဲ့ ချင်းပြည်ရဲ့ ဘယ်အရပ်ဒေသကနေ ရွေးကောက်ပွဲဝင်ပြိုင်ကြမယ်ဆိုတာ မသိရပါဘူး။

တဖက်မှာ စစ်ကောင်စီက ရွေးကောက်ပွဲပြုလုပ်နိုင်ဖို့ဆိုတဲ့ အကြောင်းပြချက်နဲ့ အရေးပေါ်ကာလ ၆ လ သက်တမ်း ထပ်တိုးတယ်လို့ ကြေညာပါတယ်။

 

========================

 

📌📌 ၃။ မင်းတပ်မှာ ဝမ်းပျက်၊ ဝမ်းလျှော အဖြစ်များ၊ အသက်ဆုံးရှုံးမှုအထိ ဖြစ်နေ။

 

မင်းတပ်၊ မတူပီ၊ ကန်ပက်လက်၊ ပလက်ဝမြို့နယ်တွေမှာ ဝမ်းပျက်၊ ဝမ်းလျှော အဖြစ်များနေပြီး အသက်ဆုံးရှုံးမှုအထိ ဖြစ်ပွားနေတယ်လို့ Chin Telehealthကဖော်ပြပါတယ်။

၂၀၂၄ ဒီဇင်ဘာလ လလယ်ကနေ အခုရက်ပိုင်းအထိ မင်းတပ်မြို့နယ်အတွင်း ၁၄၃ ဦး၊ မတူပီမြို့နယ်အတွင်း ၁၉၀ ဦး၊ ကန်ပလက်မြို့နယ်အတွင်း ၂၄ ဦးနဲ့ ပလက်ဝမြို့နယ်အတွင်း ၁၂၄ ဦး၊ စုစုပေါင်း ၄၈၁ ဦးအထိ ဝမ်းရောဂါဖြစ်ပွားနေတယ်လို့ ပြောပါတယ်။

ရောဂါခံစားနေရသူ ၄၈၁ ယောက်ထဲက ပလက်ဝမြို့နယ်အတွင်း ၁ နှစ်အောက်ကလေး ၂ ဦးနဲ့ မင်းတပ်မြို့နယ်အတွင်း ၁ နှစ်အောက်ကလေး ၁ ဦး၊ လူကြီး ၁ ဦး စုစုပေါင်း ၄ ဦး အသက်ဆုံးရှုံးပြီလို့လည်း ဆိုပါတယ်။

၂၀၂၄ ဇွန်လတုန်းကလည်း မင်းတပ်မြို့နယ် တိုက်နယ်တချို့မှာ ဝမ်းပျက်၊ ဝမ်းလျှောဖြစ်ပွားခဲ့ပြီး ပြည်သူ အသက်ဆုံးရှုံးမှု ရှိခဲ့ဖူးပါတယ်။

ပြည်သူ့ကျန်းမာဆောင်ရွက်နေသူအဖွဲ့အစည်းတွေကတော့ ဝမ်းရောဂါနဲ့ ပတ်သက်ပြီး အစာကို ယင်လုံအောင် သိမ်းဆည်း စားဖို့၊ နို့တိုက်ကလေးတွေကို မိခင်နို့တစ်မျိုးတည်း တိုက်ဖို့၊ ယင်လုံအိမ်သာ သုံးကြဖို့၊ အိမ်သာသွားပြီးတိုင်းအစာမစားခင်၊ မပြင်ခင်၊ မချက်ခင် လက်ကို ဆပ်ပြာနဲ့ စင်အောင် ဆေးဖို့ ဝမ်းလျှောတာနဲ့ ကျန်းမာရေးဝန်ထမ်းဆီ ပြသဖို့၊ ဓာတ်ဆားမရှိရင် ဆားနဲ့ သကြားကို ဆတူရောသုံးပြီး ဖျော်သောက်ကြဖို့နဲ့ အရေးကြီးဆုံးက ရေကို ကျိုချက်ပြီး သောက်သုံးဖို့ တိုက်တွန်းထားကြပါတယ်။

#RadioNUGLocalNews

#SpringRevolution