17 Feb 2025 - (Ethnic language program-Matupi) by The Matupi Times

📌 (ချင်း တိုင်းရင်းသား - Matupi ) ထုတ်လွှင့်မှု အစီအစဥ် ၂၀၂၅ ဖေဖော်ဝါရီလ ( ၁၇ ) ရက်နေ့ ရပြည်တွင်းသတင်းများ

📌📌 1. ချင်းအမျိုးသားတပ်မတော် (CNA) ထံ စကစတပ်သား (၄) ဦး အလင်းဝင်

The Matupi Times | ဖေဖော်ဝါရီလ ၁၀၊ ၂၀၂၅

ဟားခါး-ထန်တလန်ကြားတွင် ခြေကုပ်ယူထားသော ပွိုင့်-3 စခန်းမှ စစ်ကောင်စီတပ်ဖွဲ့ဝင် (၄) ဦးသည် လက်နက်များယူဆောင်ကာ ၂၀၂၅ ခုနှစ်၊ ဖေဖော်ဝါရီလ ၅ ရက်နေ့၌ ချင်းအမျိုးသားတပ်မတော် (CNA) ထံ အလင်းဝင်လာကြောင်း သိရသည်။

အဆိုပါ (၄) ဦးသည် စစ်မှုထမ်းမထမ်းမနေရ ဥပဒေကြောင့် ဖမ်းဆီးစုဆောင်းခံထားရသူများဖြစ်ကြောင်း သိရပြီး လက်နက် (၃) လက်နှင့် ခဲယမ်း အပြည့်အစုံဖြင့် အလင်းဝင်လာခဲ့ခြင်းဖြစ်ကြောင်း သိရသည်။

လက်နက်ဖြင့် အလင်းဝင်လာသူများကို ၂၀၂၅ ခုနှစ်၊ ဖေဖော်ဝါရီလ ၈ ရက်နေ့တွင် ချင်းအမျိုးသားတပ်မတော်မှ လက်နက် (၁) လက်ကို သိန်း (၅၀) ကျပ်တိတိဖြင့် ဆုငွေချီးမြှင့်ပေးခဲ့ကြောင်း သိရသည်။

========================

📌📌 2. မတူပီ (ချင်း) စစ်ရှောင်ကော်မတီ MCRC ၏ (၆) လပတ်အစည်းအဝေး ကျင်းပ

The Matupi Times | ဖေဖော်ဝါရီလ ၁၂၊ ၂၀၂၅

အိန္ဒိယ၊ မီဇိုရမ်ပြည်နယ်၊ Lawngtlai ခရိုင်၊ College Refugee Camp တွင် မတူပီ (ချင်း) စစ်ဘေးရှောင်ကော်မတီ Matupi Chin Refugee Community (MCRC) ၏ (၆) လပတ်အစည်းအဝေးကို ဖေဖော်ဝါရီလ ၆၊ ၂၀၂၅ ရက်နေ့၌ ကျင်းပခဲ့ကြောင်း သိရသည်။

အစည်းဝေးတွင် -

• မီဇိုရမ်ပြည်နယ်ရှိ စစ်ဘေးရှောင်များသည်သာရေးနာရေးတွင် အတူတကွ လက်တွဲပူးပေါင်းဆောင်ရွက်ရန်
• စစ်ဘေးရှောင်များ၏ Data များကို Update ပြုလုပ်တင်ပြခြင်း
• စစ်ဘေးရှောင် Data များကို အခြားသော အဖွဲ့အစည်းများက တောင်းခံပါက ပေးသင့်မသင့်ကို ကော်မတီများမှ ပြန်လည်စီစစ်ရန်
• ရှေ့လုပ်ငန်းစဉ်များကို အချိန်နှင့်တပြေးညီ ဆောင်ရွက်ရန်

စသောအချက်များကို အဓိကထားဆွေးနွေးခဲ့ကြောင်း သိရသည်။

ဒါ့အပြင် မတူပီစစ်ဘေးရှောင် ပြည်သူများ အနေဖြင့် မီဇိုရမ်ပြည်နယ်တွင် နေထိုင်စဉ် YMA, YLA, VCP တို့၏ လမ်းညွှန်ချက်များအတိုင်း လိုက်နာရန် တိုက်တွန်းထားသည်။

၄င်းအစည်းအဝေးတွင် Lawngtlai District, Aizawl District, Lunglei District, Saiha District မှ စစ်ဘေးရှောင်ကော်မတီများ တက်ရောက်ခဲ့ကြပြီး စုစုပေါင်း ဦးရေ (၄၃) ဦး တက်ရောက်ခဲ့ကြောင်း သိရသည်။

========================

📌📌 3. PDA-Tedim စခန်းတစ်ခုကို ZRA တပ်ဖွဲ့မှ သိမ်းယူ

The Matupi Times | ဖေဖော်ဝါရီလ ၁၃၊ ၂၀၂၅

ချင်းပြည်ကောင်စီလက်အောက်ခံ အဖွဲ့ဝင်တစ်ခုဖြစ်သည့် PDA-Tedim ၏ စခန်းတစ်ခုကို ZRA တပ်ဖွဲ့ က ဝင်ရောက်တိုက်ခိုက် သိမ်းယူခဲ့ကြောင်း ဒေသခံသတင်းများထံမှ သိရသည်။

တီးတိန်မြို့နယ် အတွင်းရှိ PDA-Tedim တပ်ဖွဲ့၏ စခန်းတစ်ခုကို ဖေဖော်ဝါရီလ ၁၂ ရက်နေ့၊ ည ၆:၀၀ နာရီခန့် တွင် ZRA တပ်ဖွဲ့ဝင် အင်အား (၁၀၀) ခန့် က ဝင်ရောက်တိုက်ခိုက်ခဲ့ခြင်း ဖြစ်သည်။

အဆိုပါစခန်းတွင် PDA-Tedim တပ်ဖွဲ့ဝင် (၈) ဦး ခန့်သာ ရှိခဲ့ပြီး နှစ်ဖက် ထိခိုက်ကျဆုံးမှု မရှိခဲ့ကြောင်း သိရသည်။

ထွက်ပေါ်လာသော ရုပ်သံဖိုင်များတွင် CNA & PDA တံဆိပ်ပါ ဝတ်စုံတချို့နှင့် Sniper တလက် တွေ့ရသည်။

ပြီးခဲ့သည့် ဖေဖော်ဝါရီလအစောပိုင်းတွင်လည်း ချင်းပြည်ကောင်စီ ပူးပေါင်းတပ်က ZRA တပ်စခန်းတစ်ခုကို တိုက်ခိုက် သိမ်းပိုက်ခဲ့ကြောင်း သိရသည်။

========================

 

📌📌 4. ကလေး-ဂန့်ဂေါကြားက စစ်ကောင်စီစခန်းတစ်ခုကို တော်လှန်ရေးပူးပေါင်းတပ်များ သိမ်းပိုက်

The Matupi Times | ဖေဖော်ဝါရီ ၁၄၊ ၂၀၂၅

စစ်ကိုင်းတိုင်း၊ ကလေးမြို့နယ်၊ ကလေး-ဂန့်ဂေါကားလမ်းပိုင်းရှိ အကြမ်းဖက် စစ်ကောင်စီ၏ ကမ်းပါးနီ (ကမ္ဘာနီ) စခန်း ကို တော်လှန်ရေးပူးပေါင်းတပ်ဖွဲ့များက သိမ်းပိုက်ခဲ့ကြောင်း သိရသည်။
စခန်းသိမ်းတိုက်ပွဲတွင် ပြည်သူ့ကာကွယ်ရေးတပ်ဖွဲ့များနှင့် ချင်းလဲန်းကောင်စီ အဖွဲ့ဝင် ချင်းတော်လှန်ရေးပူးပေါင်းတပ်များ ပူးပေါင်းတိုက်ခိုက်ခဲ့ကြောင်း သိရသည်။

စကစ စခန်းကို ဖေဖော်ဝါရီလ ၁၁ ရက်နေ့မှစတင်တိုက်ခိုက်ခဲ့ပြီး ဖေဖော်ဝါရီလ ၁၂ ရက်နေ့ ညပိုင်းတွင် အပြီးသတ် သိမ်းပိုက်နိုင်ခဲ့ကြောင်း သိရသည်။

အဆိုပါ ကမ်းပါးနီစခန်း တွင် ပျူစောထီးနှင့် စစ်ကောင်စီတပ်ဖွဲ့ အင်အားစုစုပေါင်း ၇၀ ခန့် ခံတပ်ထားခဲ့သည်။
စခန်းသိမ်းတိုက်ပွဲတွင် စစ်ကောင်စီဘက်မှ အကျအဆုံးများ ဖြစ်ပွားခဲ့သလို လက်နက်၊ ခဲယမ်း အမြောက်အများကိုလည်း တော်လှန်ရေးတပ်များက သိမ်းပိုက်နိုင်ခဲ့ကြောင်း သိရသည်။
စစ်ကောင်စီတပ်ဖွဲ့ဝင် အချို့သည် မှန်တောဘက်သို့ ဆုတ်ခွာ ထွက်ပြေးသွားကြသည် ဟု သိရသည်။

========================

 

📌📌 5. ဟားခါးမြို့တွင် စစ်ကောင်စီခန့် ဝန်ကြီးများနှင့် ဗိုလ်မှူးချုပ်များ ဦးစီး၍ ချင်းအမျိုးသားနေ့ ကျင်းပမည်

Zalen | ဖေဖော်ဝါရီ

ချင်းပြည်နယ်၊ ဟားခါးမြို့ တွင် စစ်ကောင်စီခန့် ဝန်ကြီးများနှင့် ဗိုလ်မှူးချုပ်များ ဦးစီး၍ (၇၇) နှစ်မြောက် ချင်းအမျိုးသားနေ့ ကို ဖေဖော်ဝါရီလ ၂၀ ရက်နေ့တွင် ကျင်းပရန် ပြင်ဆင်ဆောင်ရွက်နေသည်ဟု ဒေသခံများထံမှ သိရသည်။

"အရင်နှစ်တွေထက် ပြင်ဆင်မှုတွေ ထူးခြားတယ်။ ဒီနှစ်တော့ နိုင်ငံတော်အဆင့် လူကြီးတွေ လာမယ် ထင်တယ်။ ဌာနဆိုင်ရာ ဝန်ထမ်းတွေလည်း တက်ကြွစွာ ပါဝင် ပြင်ဆင်ဆောင်ရွက်နေကြတာ တွေ့တယ်။" ဟု ဟားခါးမြို့ ဒေသခံတစ်ဦးက ပြောသည်။

ချင်းပြည်နယ် ဝန်ကြီးချုပ် ဒေါက်တာ ဝုန်ဆွန်းထန် သည် ဖေဖော်ဝါရီလ ၁၃ ရက်နေ့တွင် (၇၇) နှစ်မြောက် ချင်းအမျိုးသားနေ့ အခမ်းအနား ပြင်ဆင်မှုများအား စစ်ဆေးခဲ့သည် ဟု စစ်ကောင်စီ သတင်းထုတ်ပြန်ချက်အရ သိရသည်။

တချို့သော ချင်းပြည်နယ်မြို့များတွင် စစ်တပ်နှင့် ချင်းတော်လှန်ရေးတပ်ဖွဲ့များ တိုက်ပွဲပြင်းထန်နေသည်။
ထန်တလန်မြို့နှင့် ဖလမ်းမြို့ များတွင် မြို့သိမ်းတိုက်ပွဲများ ဆက်လက်ဖြစ်ပွားနေသည် ဟု သိရသည်။

========================

 

📌📌 6. အောင်လအန်ဆန်းနှင့် အာဒိုဂန် မက်ချ် ပြန်ထိုးမည်

The Matupi Times | ဖေဖော်ဝါရီ ၁၃၊ ၂၀၂၅

မြန်မာ MMA ဖိုက်တာ အောင်လအန်ဆန်း သည် တူရကီ ဖိုက်တာ ရှာမေးလ် အာဒိုဂန် နှင့် လာမည့်အပတ်တွင် ယှဉ်ပြိုင်ထိုးသတ်မည်ဖြစ်ကြောင်း သိရသည်။

ဖေဖော်ဝါရီလ ၂၀၊ ၂၀၂၅ ရက်နေ့တွင် ကာတာနိုင်ငံ တွင်ကျင်းပမည့် ONE 171: Qatar ပြိုင်ပွဲ တွင် အောင်လအန်ဆန်းနှင့် ရှာမေးလ် အာဒိုဂန် တို့ ယှဉ်ပြိုင်မည်ဖြစ်သည်။

အောင်လအန်ဆန်းသည် နောက်ဆုံးယှဉ်ပြိုင်မှုအဖြစ် ၂၀၂၄ ခုနှစ်၊ စက်တင်ဘာလ ၆ ရက်နေ့တွင် ကျင်းပခဲ့သည့် ONE 168 ပြိုင်ပွဲတွင် ရှာမေးလ် အာဒိုဂန် နှင့် ယှဉ်ပြိုင်ခဲ့သည်။
အဆိုပါပြိုင်ပွဲတွင် တူရကီ ဖိုက်တာ ရှာမေးလ် အာဒိုဂန် ကို ဒုတိယအချီတွင် ချုပ်ကွက်ဖြင့် အောင်လအန်ဆန်းက အနိုင်ယူခဲ့သည်။

#RadioNUGLocalNews

#SpringRevolution