22 Feb 2025 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၅ ဖေဖော်ဝါရီလ ( ၂၂ ) ရက်နေ့နောက်ဆုံးရပြည်တွင်းသတင်းများ 

📌📌 ၁။ မင်းတပ်မှာ စစ်ကောင်စီထောင်တဲ့ မိုင်း ၁,၀၀၀ ဝန်းကျင် ရှင်းလင်းထား

မင်းတပ်မြို့ပေါ်မှာ စစ်ကောင်စီထောင်ခဲ့တဲ့ မိုင်းအလုံးရေ ၁,၀၀၀ ဝန်းကျင်ကို ရှင်းလင်းထားပြီလို့ ချင်းကာကွယ်ရေးတပ်ဖွဲ့ - မင်းတပ် ပြန်ကြားရေးတာဝန်ရှိသူက ပြောပါတယ်။
“အများစုတော့ ရှင်းနိုင်ပြီလို့ ပြောရမယ်ထင်တယ်။ အတတ်နိုင်ဆုံးရှာပြီး ရှင်းလင်းရေးလုပ်နေပါတယ်” လို့ ဆိုပါတယ်။

အရှေ့ပြင်၊ အနောက်၊ စံပြ နဲ့ ဘဝသစ် ရပ်ကွက်တွေမှာ အဲဒီမိုင်း ၁,၀၀၀ ဝန်းကျင်ကို ရှင်းလင်းနိုင်ခဲ့ပြီး အနောက်ရပ်ကွက်မှာ အများဆုံး ရှင်းလင်းခဲ့တယ် လို့ ချင်းကာကွယ်ရေးတပ်ဖွဲ့ - မင်းတပ် ပြန်ကြားရေးတာဝန်ရှိသူ ဆက်ပြောပါတယ်။

မင်းတပ်မြို့ထဲကို ပြည်သူတွေ ရက်သတ္တပတ်တိုင်း ၂ ရက် ဝင်ခွင့်ပြုမယ်လို့ မြို့နယ်ပြည်သူ့အုပ်ချုပ်ရေးအဖွဲ့က ၂၀၂၅ ခုနှစ် ဖေဖော်ဝါရီ ၉ ရက်နေ့ စတင်ကြေညာပါတယ်။

မြို့ထဲ ပြန်လည်ဝင်ရောက်မယ့် ပြည်သူတွေ လိုက်နာဖို့ အချက် ၁၂ ချက် နဲ့ ကုန်စည်တင်ဆောင်ပြီး မြို့ဖြတ်သန်းမယ့် ယာဉ်မောင်းတွေ လိုက်နာဖို့ အချက် ၉ ချက် ပါဝင်ပါတယ်။

မင်းတပ်မြို့သိမ်းတိုက်ပွဲမှာ ‘ချင်းညီနောင်’ နဲ့အတူ အာရက္ခတပ်တော် - AA၊ ယောကာကွယ်ရေးတပ် - YDF၊ ယောတပ်တော် - YA နဲ့ မုံရွာခရိုင် PDF တပ်ရင်း ၃ တို့ ရက်ပေါင်း ၄၀ ကျော် ကြာတိုက်ပွဲဝင်ခဲ့ပြီး ၂၀၂၄ ဒီဇင်ဘာ ၂၁ ရက်နေ့ မှာ မြို့တစ်ခုလုံးကို အပြည့်အဝ ထိန်းချုပ်နိုင်ခဲ့ခြင်း ဖြစ်ပါတယ်။

========================

📌📌 ၂။ မလေးရှားမှာ ချင်းအမျိုးသမီးတစ်ဦး အကြမ်းဖက်သတ်ဖြတ်ခံရမှု တရားခံကို ဖမ်းဆီးရမိ

မလေးရှားနိုင်ငံ ကွာလာလမ်ပူ မှာ ချင်းလူမျိုး မင်းတပ်မြို့ဒေသခံ အမျိုးသမီးတစ်ဦးကို အကြမ်းဖက်ပြီး သတ်ဖြတ်ခဲ့တဲ့ တရားခံကို ဖမ်းဆီးရမိပြီလို့ Dai Community in Malaysia က ထုတ်ပြန်ထားပါတယ်။

Dai Community in Malaysia ရုံးဝန်ထမ်းနဲ့ မလေးရှားအစိုးရအာဏာပိုင် ပူးပေါင်းပြီး ဖေဖော်ဝါရီ ၁၆ ရက်နေ့က ဖမ်းဆီးရမိပြီး အဆိုပါတရားခံကို အာဏာပိုင်လက်ထဲ အပ်နှံလိုက်ပြီ လို့ ပြောပါတယ်။

ဖေဖော်ဝါရီ ၁၄ ရက်နေ့ မနက်အစောပိုင်းက ကွာလာလမ်ပူရှိ နေအိမ်မှာ ချင်းလူမျိုး အမျိုးသမီးတစ်ဦး အကြမ်းဖက်ပြီး သတ်ဖြတ်ခံထားရတာ ဖြစ်ပါတယ်။

သေဆုံးသူဟာ အသက် ၃၆ နှစ်အရွယ်ဖြစ်ပြီး မလေးရှားနိုင်ငံမှာ နေနေသေးတဲ့အထိ အတန်ကြာနေခဲ့သူဖြစ်သည့် မင်းတပ်မြို့ အရှေ့ပြင်ရပ်ကွက် မှသူ ဖြစ်ပါတယ်။

========================

📌📌 ၃။ အာဂျင်တီးနားနိုင်ငံရဲ့ ဖမ်းဝရမ်းမှာ ဒေါ်အောင်ဆန်းစုကြည်နဲ့ ဦးထင်ကျော်တို့ ပါဝင်နေ

ရိုဟင်ဂျာတွေအပေါ် လူမျိုးတုံးသတ်ဖြတ်မှု စွဲချက်နဲ့ အာဂျင်တီးနားတရားရုံးက ဖမ်းဝရမ်း ထုတ်ပြန်တဲ့အထဲမှာ နိုင်ငံတော်အတိုင်ပင်ခံ ဒေါ်အောင်ဆန်းစုကြည် နဲ့ သမ္မတဟောင်း ဦးထင်ကျော် ပါဝင်ကြောင်း သိရပါတယ်။

စစ်ခေါင်းဆောင် မင်းအောင်လှိုင် နဲ့ ဒုခေါင်းဆောင် စိုးဝင်း အပါအဝင် ၂၃ ဦးကို ဖမ်းဝရမ်းထုတ်တဲ့အကြောင်း BROUK က ထုတ်ပြန်ခဲ့တာပါ။

ဖမ်းဝရမ်းထုတ်ခံရသူတွေထဲမှာ ဒေါ်အောင်ဆန်းစုကြည်နဲ့ ဦးထင်ကျော်တို့ပါ ပါဝင်တယ်လို့ Burmese Rohingya Organisation UK က ပြင်ဆင်ထုတ်ပြန်တာ တွေ့ရပါတယ်။

Burmese Rohingya Organisation UK ရဲ့ တာဝန်ရှိသူ ဦးထွန်းခင် ကလည်း—

“ကျနော်တို့အနေနဲ့ စစ်ခေါင်းဆောင်တွေကို ဦးတည်ပြီး ဖမ်းဝရမ်းထုတ်ဖို့ တင်သွင်းပေမယ့် အရပ်သား ၃ ဦးထဲမှာ ဒေါ်အောင်ဆန်းစုကြည်နဲ့ ဦးထင်ကျော် ကိုလည်း ဝရမ်းထုတ်တာ ဖြစ်ပါတယ်။
အဓိကတော့ စစ်တပ်ကို ဦးတည်ပြီး ဖမ်းကြပါလိမ့်မယ်”

လို့ ပြည်တွင်းသတင်းဌာနတစ်ခုမှာ ပြောထားပါတယ်။

#RadioNUGLocalNews

#SpringRevolution