03 Mar 2025 - (Ethnic language program-Matupi) by The Matupi Times

📌 (ချင်း တိုင်းရင်းသား - Matupi ) ထုတ်လွှင့်မှု အစီအစဥ် ၂၀၂၅ မတ်လ ( ၃ ) ရက်နေ့ ရပြည်တွင်းသတင်းများ

📌📌 1/ CDF Matupi တပ်ရင်း (၂) ၏ အထွေထွေညီလာခံ ကျင်းပ

The Matupi Times | ဖေဖော်ဝါရီ ၂၅၊ ၂၀၂၅

CDF Matupi တပ်မဟာ (၂) အဖွဲ့ဝင် CDF-Matupi တပ်ရင်း (၂) - အောက်ချင်းတပ်ရင်း၏ (၄) ကြိမ်မြောက် ညီလာခံအခမ်းအနားကို ယမန်နေ့ ဖေဖော်ဝါရီ ၁၈ ရက်နေ့မှ ၂၄၊ ၂၀၂၅ ရက်နေ့ထိ (၇) ရက်ကြာ ကျင်းပပြုလုပ်ခဲ့သည်။

တော်လှန်ရေး (၄) နှစ်တာကာလအတွင်း CDF-Matupi တပ်ရင်း (၂) မှ တပ်ရင်းမှူးအပါအဝင် ရဲဘော် (၇) ဦး ကျဆုံးကြောင်း CDF-Matupi တပ်ရင်း (၂) ၏ (၄) ကြိမ်မြောက် ညီလာခံသတင်းထုတ်ပြန်ချက်တွင် ဖော်ပြထားသည်။

ညီလာခံတွင် တပ်မဟာမှူးမှ မိန့်ခွန်းပြောကြားခဲ့ပြီး တော်လှန်ရေး (၄) နှစ်အတွင်း ကျဆုံးခဲ့သော ရဲဘော် (၇) ဦး၏ ဂုဏ်ပြုမှတ်တမ်းလွှာများကို ကျန်ရစ်သူ မိသားစုထံ ပေးအပ်ချီးမြှင့်ခဲ့သည်။

ဒါ့အပြင် ရဲဘော် (၁၆) ဦးသည်လည်း တိုင်းပြည်နှင့် လူမျိုးအတွက် ကိုယ်လက်အင်္ဂါပေးဆပ်၍ တာဝန်ထမ်းဆောင်ခဲ့ကြကြောင်း ဖော်ပြထားသည်။

ညီလာခံကျင်းပသည့်ရက်အတွင်း ရဲဘော်များ၏ စိတ်ဓာတ်မြှင့်တင်ရေးအတွက် အားကစားပြိုင်ပွဲ တချို့ကို ထည့်သွင်းကျင်းပခဲ့သည်။

========================

📌📌 2/ Chinland Council နှင့် ICNCC တို့ ကောင်စီသစ်တစ်ရပ်အဖြစ် ပေါင်းစည်းရန် သဘောတူညီမှုရရှိ

The Matupi Times | ဖေဖော်ဝါရီ ၂၆၊ ၂၀၂၅

ချင်းပြည် (Chinland) ကောင်စီနှင့် ကြားကာလ ချင်းအမျိုးသားအတိုင်ပင်ခံကောင်စီ (ICNCC) တို့သည် ကောင်စီသစ်တစ်ရပ်အဖြစ် ပေါင်းစည်းရန် သဘောတူညီမှု ရရှိခဲ့ကြောင်း ဒီကနေ့ ဖေဖော်ဝါရီ ၂၆၊ ၂၀၂၅ တွင် သတင်းထုတ်ပြန်သည်။

ICNCC နှင့် Chinland Council တို့အနေဖြင့် ချင်းပြည်သူများအတွက် ကောင်စီ (၂) ရပ် ရှိနေခြင်းကို မဖြစ်သင့်ကြောင်း နှစ်ဖက်လက်ခံ ယုံကြည်ကြသဖြင့် ကောင်စီအသစ်တစ်ရပ်အဖြစ် ပေါင်းစည်းရန် သဘောတူညီခဲ့ကြသည်။

ထိုကောင်စီ၏ အမည်ကို "ချင်းအမျိုးသားကောင်စီ" ဟု ခေါ်တွင်ရန် သဘောတူညီကြကြောင်း ထုတ်ပြန်ချက်တွင် ဖော်ပြထားသည်။

ဒါ့အပြင် "ချင်းအမျိုးသားကောင်စီ" အမြန်ဆုံး ပေါ်ပေါက်ရေးအတွက် ဥပဒေမူကြမ်းရေးဆွဲရေးအဖွဲ့ကို ဖွဲ့စည်းရန် သဘောတူညီခဲ့ကြကြောင်း သိရသည်။

========================

📌📌 3/ တပ်ရင်းတပ်ဖွဲ့များထံ လက်နက်ခဲယမ်းများ အပ်နှံကြရန် CDF မင်းတပ် ထုတ်ပြန်

The Matupi Times | ဖေဖော်ဝါရီ ၂၇၊ ၂၀၂၅

မင်းတပ်မြို့သိမ်းတိုက်ပွဲအတွင်း စစ်ကောင်စီတပ်ဖွဲ့ဝင်များထံမှ ရရှိထားသော လက်နက်ခဲယမ်းဖြစ်စေ၊ တခြားနည်းလမ်းများဖြင့် ရရှိထားသော လက်နက်ခဲယမ်းဖြစ်စေ တိုက်ခိုက်ရေးမောင်းပြန်ရိုင်ဖယ် (Rifle) နှင့် တခြား လက်နက်ခဲယမ်းများကို နီးစပ်ရာ တပ်ရင်းတပ်ဖွဲ့များထံ အပ်နှံရန် CDF မင်းတပ်မှ ဖေဖော်ဝါရီ ၂၅ ရက်နေ့တွင် သတင်းထုတ်ပြန်ထားသည်။

ချင်းကာကွယ်ရေးတပ်ဖွဲ့ မင်းတပ် ထိန်းချုပ်နယ်မြေအတွင်းရှိ ပြည်သူများအနေဖြင့် လက်နက်ခဲယမ်းများကို တပ်ရင်းတပ်ဖွဲ့များထံ မတ် ၁၅ ရက်နေ့နောက်ဆုံးထား အပ်နှံရန် တိုက်တွန်းထားသည်။

လက်နက်များကို ဆုကြေးဖြင့် ဝယ်ယူထားခြင်း အထောက်အထားခိုင်လုံပါက တန်ဖိုးထုတ်ယူနိုင်မည်ဖြစ်ကြောင်းလည်း ဖော်ပြထားသည်။

CDF-Mindat အနေဖြင့် လက်နက်ခဲယမ်း ထိန်းချုပ်နိုင်ရေးနှင့် ပြည်သူလူထုကို လက်နက်ခဲယမ်းနှင့် ဖောက်ခွဲရေးပစ္စည်း အန္တရာယ်မှ ကာကွယ်နိုင်ရေးအတွက် အထူးအလေးထား ဆောင်ရွက်နေသည်။

သတ်မှတ်ရက်ထက် ကျော်လွန်၍ လက်နက်ခဲယမ်းများကို လက်ဝယ်ထားရှိခြင်း၊ ကိုင်ဆောင်ခြင်း၊ ရောင်းဝယ်ဖောက်ကားခြင်းများ ပြုလုပ်ပါက ပြင်းပြင်းထန်ထန် အရေးယူမည်ဖြစ်ကြောင်း ထုတ်ပြန်ချက်တွင် ဖော်ပြထားသည်။

မင်းတပ်မြို့ကို ချင်းညီနောင်ပူးပေါင်းတပ်ဖွဲ့က ၂၀၂၄ ခုနှစ် ဒီဇင်ဘာ ၂၁ ရက်နေ့တွင် သိမ်းယူခဲ့ပြီး ယခုဖေဖော်ဝါရီ ၉ ရက်နေ့မှစတင်၍ ပြည်သူများ မြို့ထဲ ပြန်လည်နေထိုင်ခွင့်ပြုခဲ့သည်။

========================

 

📌📌 4/ စကစက ဗုံးကြဲတိုက်ခိုက်မှုကြောင့် ပလက်ဝမြို့နယ်၊ ပျဥ်ဝရွာရှိ ဘုန်းကြီးကျောင်းနှင့် ဘုရားကျောင်း ပျက်စီး

The Matupi Times | ဖေဖော်ဝါရီ ၂၈၊ ၂၀၂၅

ချင်းပြည်နယ်၊ ပလက်ဝမြို့နယ်၊ ဆမီးမြို့၊ ပျဥ်ဝရွာတွင် စစ်ကောင်စီတပ်က လေကြောင်းဗုံးကြဲတိုက်ခိုက်မှု ပြုလုပ်ခဲ့ကြောင်း သိရသည်။

ဖေဖော်ဝါရီ ၂၅ ရက်၊ ည ၉ နာရီဝန်းကျင်တွင် အကြမ်းဖက်စစ်ကောင်စီက ပေါင် ၅၀၀ ဗုံး ၂ လုံးဖြင့် တိုက်ခိုက်ခဲ့ကြောင်း ဆိုသည်။ ဗုံးကြဲမှုကြောင့် ဘုန်းကြီးကျောင်းနှင့် Presbyterian ဘုရားကျောင်း ပျက်စီးသွားခဲ့သော်လည်း အရပ်သားထိခိုက်မှုမရှိခဲ့ဘူးဟု ပလက်ဝဒေသခံသတင်းထံမှ သိရသည်။

========================

 

📌📌 5/ CDF-Kanpetlet ၏ အခြေခံစစ်ပညာသင်တန်း (၁) သင်တန်းဆင်း ရဲဘော်များကို လက်နက်များ တပ်ဆင်ပေး

The Matupi Times | မတ်လ ၁၊ ၂၀၂၅

Chin Defence Force - Kanpetlet (CDF-Kanpetlet) ၏ အခြေခံစစ်ပညာသင်တန်း (၁) ကို အောင်မြင်စွာ ပြုလုပ်ပြီးနောက် သင်တန်းဆင်းရဲဘော်/ရဲမေများ၏ ကျမ်းသစ္စာကျိန်ဆိုခြင်းနှင့် လက်နက်တပ်ဆင်ရေးအခမ်းအနားကို ဖေဖော်ဝါရီ ၂၈ ရက်တွင် ကျင်းပပြုလုပ်ခဲ့ကြောင်း CDF-Kanpetlet မှ သတင်းထုတ်ပြန်ခဲ့သည်။

သင်တန်းသည် လေးလကျော် ကြာမြင့်ခဲ့ပြီး အောင်မြင်စွာ ပြီးမြောက်စေရန်နှင့် လက်နက်တပ်ဆင်ရေးအစီအစဉ်များကို အကောင်အထည်ဖော်နိုင်ရေးအတွက် ရက္ခိုင်အမျိုးသားအဖွဲ့ချုပ်/အာရက္ခတပ်တော် (ULA/AA) နှင့် ပြည်တွင်းပြည်ပ Chin Defence Force - Kanpetlet ထောက်ပံ့ပြည်သူများက ပံ့ပိုးကူညီမှုများ ပြုလုပ်ပေးခဲ့ကြောင်း ထုတ်ပြန်ချက်တွင် ဖော်ပြထားသည်။

CDF-Kanpetlet အနေဖြင့် ကျင်ဒွေးမြို့နှင့် ကန်ပက်လက်မြို့နယ်တို့ကို အပြည့်အဝ ပြန်လည်သိမ်းပိုက် ထိန်းချုပ်နိုင်ခဲ့ပြီဖြစ်သလို ချင်းပြည်အတွင်းရှိ အခြားသော မြို့သိမ်းတိုက်ပွဲများတွင်လည်း စစ်ဆင်ရေးနှင့် စစ်ရေးလိုအပ်ချက်များအပေါ် မူတည်၍ ဆက်လက်တိုက်ပွဲဝင်နေသည်ဟု သိရသည်။

ထို့နောက်၊ CDF-Kanpetlet အနေဖြင့် ချင်းပြည်တောင်ပိုင်းတစ်ခုလုံး လွတ်မြောက်ပြီးဖြစ်ကြောင်း ထုတ်ပြန်ခဲ့သည်။ စစ်ဘေးရှောင်ပြည်သူများ ပြန်လည်အခြေချသည့်အခါတွင် ပြည်သူလူထုကို လုံခြုံစွာ အကာကွယ်ပေးရန်၊ စစ်စည်းကမ်းပြည့်ဝသည့် ပြည်သူ့စစ်သားများ ပေါ်ပေါက်လာစေရန်နှင့် အိမ်နီးချင်း မိတ်ဖက်မဟာမိတ်တပ်ဖွဲ့များနှင့် ပူးပေါင်း၍ အဖိနှိပ်ခံပြည်သူတစ်ရပ်လုံး လွတ်မြောက်ခြင်းရရှိသည်အထိ ဆက်လက်တိုက်ပွဲဝင်မည်ဖြစ်ကြောင်း ထုတ်ပြန်ချက်တွင် ထည့်သွင်းဖော်ပြထားသည်။

#RadioNUGLocalNews

#SpringRevolution