၂၀၂၅ မတ်လ ၂၇ ရက်နေ့ ညနေခင်း နောက်ဆုံးရပြည်တွင်းသတင်းများ
📌 ၁။ နှစ် (၈၀) ပြည့် ဖက်ဆစ်တော်လှန်ရေးနေ့အတွက် CRPHနဲ့NUGက သဝဏ်လွှာများပေးပို့ထုတ်ပြန်
📌 ၂။ ချင်းပြည်လွှတ်တော်က ဒေသန္တရအုပ်ချုပ်ရေးဥပဒေ အတည်ပြုပြဌာန်း
📌 ၃။ ”အာဏာရှင် ဗဟိုပြုစနစ် မုချပြိုလဲရမည် " ခေါင်းစဉ်ဖြင့် ယနေ့ မနက်အစောပိုင်းတွင် ရန်ကုန်မြို့လည်ခေါင်တစ်နေရာ၌ Banner ချိတ်ဆွဲ
📌 ၄။ ရေကြည်မြို့နယ်က စစ်ကောင်စီထောက်တိုင်တွေစာရင်း စုဆောင်းထားတယ်လို့ မြို့နယ် ပကဖပြော
========================
၂၀၂၅ ခုနှစ် မတ်လ ၂၇ ရက် ညပိုင်းမှာတင်ပြပေးမယ့် Radio NUG စစ်ရေးသတင်းကောက်နုတ်ချက်များ
🚩 ၁။ မိုးဗြဲမြို့ ပြန်ရဖို့ စစ်ကောင်စီဘက်က သာလွန်အင်အားနဲ့ စစ်ကြောင်းထိုးနေ
🚩 ၂။ မုံရွာ-မန်းလေးလမ်းပိုင်းမှာ စစ်ယာဉ်တန်းကို မိုင်းဆွဲတိုက်ခိုက်
🚩 ၃။ စစ်ကိုင်းတိုင်းဒေသ၊ ရွှေဘိုခရိုင်၊ တန့်ဆည်မြို့ အကြမ်းဖက်စစ်ကောင်စီ ကလေးမြို့ အခြေစိုက် ခြေမြန်တပ်ရင်း ( ခမရ-၃၆၁ ) နှင့်ပျူစောထီးများကို တော်လှန်ရေးတပ်များတိုက်ခိုက်၍ ရန်သူ့ဘက်မှအနည်းဆုံးအယောက်၂၀ သေဆုံး
🚩 ၄။ ဆောနယ်မှာရှိတဲ့ အရက် ဘီယာဆိုတွေ ရက်အကန့်အသတ်မရှိပိတ်ထားဖို့ ဂန့်ဂေါ PDF ညွှန်ကြား
🚩 ၅။ ရှမ်းပြည်နယ်မြောက်ပိုင်းမဟာမိတ်တပ်တော်မှတပ်သားသစ်များခေါ်ယူ
🚩 ၆။ စစ်အုပ်စုရဲ့ထောက်ပံ့ပို့ဆောင်ရေးကွန်ရက်တွေပြိုလဲနေပြီး တပ်စခန်း ၅၀၀ ကျော်ကို အပြည့်အဝထောက်ပံ့ဖို့မစွမ်းဆောင်နိုင်တော့
ဤသတင်းများကို ရေဒီယိုအန်ယူဂျီသတင်းတာဝန်ခံများနှင့် ခိုင်လုံသော မိတ်ဖက်သတင်းရင်းမြစ်များဆီမှ အခြေခံတင်ပြထားခြင်း ဖြစ်ပါတယ်။
========================
📌📌 ၁။ နှစ် (၈၀) ပြည့် ဖက်ဆစ်တော်လှန်ရေးနေ့အတွက် CRPHနဲ့NUGက သဝဏ်လွှာများပေးပို့ထုတ်ပြန်
မတ်လ ၂၇ ရက်
ယနေ့ကျရောက်သည့် နှစ် (၈၀) ပြည့် ဖက်ဆစ်တော်လှန်ရေးနေ့ အချိန်အခါသမယတွင် မြန်မာနိုင်ငံအတွင်း မှီတင်းနေထိုင်ကြသော တိုင်းရင်းသားပြည်သူအားလုံးနှင့်တကွ ကမ္ဘာ့နေရာ ဒေသအသီးသီးတွင် ရောက်ရှိနေကြသော မြန်မာနိုင်ငံသူ၊ နိုင်ငံသားများအားလုံး ဖက်ဆစ် အာဏာရှင်များထက် အဆပေါင်းများစွာ ရက်စက်ကြမ်းကြုတ်သော အကြမ်းဖက်စစ်အာဏာရှင် စနစ်ဆိုးအား အပြီးတိုင် ပပျောက်သည်အထိ တွန်းလှန်တိုက်ထုတ်ပြီး တော်လှန်ရေးအောင်ပွဲများ ဆင်နွှဲနိုင်ကြပါစေကြောင်း ဆန္ဒပြုအပ်ပါတယ်လို့ ပြည်ထောင်စုလွှတ်တော်ကိုယ်စားပြုကော်မတီကဖော်ပြပါတယ်။
ယနေ့အချိန်တွင် အကြမ်းဖက်စစ်အာဏာရှင်များ၏ လူမဆန်သောလုပ်ရပ်များကြောင့် တိုင်းရင်းသားပြည်သူများ၏ အသက်၊ အိုးအိမ် စည်းစိမ်များစွာ ပျက်စီးဆုံးရှုံးနေရပြီး လူ့အခွင့် အရေးများလည်း ဆိုးရွားစွာ ချိုးဖောက်ခံနေရပြီးတော်လှန်ရေးအင်အားစုများအားလုံး အနေဖြင့် အနာဂတ်မျိုးဆက်သစ်များအတွက် လွတ်လပ်၍ တရားမျှတသော ဖက်ဒရယ်ဒီမိုကရေစီ ပြည်ထောင်စုတည်ဆောက်ရေးတွင် ပြည်သူလူထု၏ ညီညွတ်မှုစွမ်းအားဖြင့် ဖက်ဆစ်ဂျပန်တို့ကို တော်လှန်တိုက်ထုတ်နိုင်ခဲ့သည့် အတိတ်သမိုင်းသင်ခန်းစာများကို စံနမူနာယူ၍ ဇွဲမလျှော့ဘဲ ဆက်လက်တိုက်ပွဲဝင်သွားကြစေလိုကြောင်း အလေးအနက် တိုက်တွန်းအပ်တယ်လို့ဖော်ပြပါတယ်။
တိုင်းရင်းသားပြည်သူလူထု၏ အခွန်ဘဏ္ဍာ ချွေးနည်းစာဖြင့် တည်ဆောက် ထားသည့် နိုင်ငံတော်ကာကွယ်ရေးယန္တရားသည် ကိုယ်ကျိုးအတ္တဖက်ပြီး ညံ့ဖျင်းသည့် အကြမ်းဖက် စစ်အုပ်စု၏ အဓမ္မအာဏာလုယူခဲ့မှုကြောင့် ပြည်သူလူထု၏ အသက်အိုးအိမ်စည်းစိမ်ကို ကာကွယ် ရမည့် စစ်တပ်အဖြစ်မှ ပြည်သူ လူထု၏ အသက်အိုးအိမ်စည်းစိမ်ကို ရန်ပြုခြိမ်းခြောက် ဖျက်ဆီးနေ သည့် ဖက်ဆစ်စစ်တပ်အသွင်သို့ ကူးပြောင်းလာခဲ့သည့်အတွက် တိုင်းရင်းသားပြည်သူလူထုတရပ် လုံးက နေရာအနှံ့ တော်လှန်တိုက်ခိုက်နေကြရာ ခေတ်သစ်ဖက်ဆစ်တော်လှန်ရေးကာလ ဟူ၍ပင် ရည်ညွှန်းရပေမည်လို့အမျိုးသားညီညွတ်ရေးအစိုးရကလည်းဆိုပါတယ်။
အမျိုးသားညီညွတ်ရေးအစိုးရအနေဖြင့် အတိတ်သမိုင်းကာလများ၌ တိုင်းရင်းသား ပြည်သူများအားလုံး စုစည်းညီညွတ်မှု၊ အပြန်အလှန် ယုံကြည်လေးစား အသိမှတ်ပြုမှုတို့ဖြင့် အောင်ပွဲကို ဆွတ်ခူးနိုင်သကဲ့သို့ ယခုခေတ်သစ်ဖက်ဆစ်မိစ္ဆာ အကြမ်းဖက်စစ်အုပ်စုအား တိုက်ခိုက် နေကြသည့် ပြည်သူ့နွေဦးတော်လှန်ရေးတွင်လည်း တိုင်းရင်းသားပြည်သူများအားလုံး အကြား ဟန်ချက်ညီညီ လက်တွဲဆောင်ရွက်လျက် ရှိပါကြောင်းနှင့် မကြာမီကာလတွင် ပြည်သူများအားလုံး အတွက် အောင်ပွဲများဆွတ်ခူးနိုင်ပြီး အသစ်ပြန်လည်တည်ဆောက်မည့် ဖက်ဒရယ်တပ်မတော်ကို ဖက်ဆစ်သန္ဓေဆိုးကင်းစင်၍ ပြည်သူကို အလေးထားကာကွယ်ပေးသော ပြည်သူ့တပ်မတော် တစ်ရပ်အဖြစ် ထူထောင်နိုင်ရန် မျှော်မှန်းဆန္ဒပြုရင်း ဤသဝဏ်လွှာအား ပေးပို့အပ်တယ်လို့ဖော်ပြပါတယ်။
========================
📌📌 ၂။ ချင်းပြည်လွှတ်တော်က ဒေသန္တရအုပ်ချုပ်ရေးဥပဒေ အတည်ပြုပြဌာန်း
မတ်လ ၂၇ ရက်
ချင်းပြည်လွှတ်တော်က ချင်းပြည်ဒေသန္တရအုပ်ချုပ်ရေးဥပဒေကို မတ်လ ၁၃ ရက်နေမှာ အတည်ပြု ပြဌာန်းလိုက်ပြီလို့ ဒေသတွင်းသတင်းရင်းမြစ်တွေက ပြောပါတယ်။
ပထမကြိမ် ချင်းပြည်လွှတ်တော် ပဉ္စမ ပုံမှန်အစည်းအဝေးကနေ ချင်းပြည် ဒေသန္တရအုပ်ချုပ်ရေးဥပဒေနဲ့ အခွန်အကောက် ဥပဒေ - ၂၀၂၅ တို့ကို မတ်လ ၁၃ ရက်နေ့မှာ အတည်ပြုပြဌာန်းနိုင်ခဲ့တာဖြစ်ပြီး အသေးစိတ်ကိုတော့ တရားဝင်ထုတ်ပြန်တာ မရှိသေးဘူးလို့ ဆိုပါတယ်။
ချင်းပြည်အစိုးရ ဝန်ကြီးချုပ်ပူးပါထန်းနဲ့ လူဝင်မှုကြီးကြပ်ရေးဝန်ကြီး၊ လျှပ်စစ်နှင့် စွမ်းအင်ဝန်ကြီး၊ ဆောက်လုပ်ရေးဝန်ကြီး တို့ပါဝင်တဲ့အဖွဲ့ဟာ မတူပီမြို့နယ်က လလွီကျေးရွာနဲ့ လွီဗန်းကျေးရွာ၊ ဇိုတုန်ဒေသက ရေဇွာမြို့ကို မတ် ၁၇ ကနေ ၂၁ ရက် အထိ သွားရောက်ခဲ့ရာမှာလည်း ဒေသန္တရအစိုးရအဖွဲ့၊ ဒေသခံလူထုနဲ့တွေ့ဆုံခဲ့ပြီး ဒေသန္တရအုပ်ချုပ်ရေးဥပဒေအကြောင်း ရှင်းလင်းတင်ပြခဲ့တယ်လို့ ဒေသတွင်းသတင်းဌာနတခုဖြစ်တဲ့ ခူမီး မီဒီယာက ဖော်ပြထားပါတယ်။
ဒါ့အပြင် ချင်းပြည်ကောင်စီ ဒုဥက္ကဋ္ဌ - ၂၊ လွှတ်တော် ဥက္ကဋ္ဌ၊ ပြည်ထဲရေးဝန်ကြီးတို့ဟာလည်း ဇိုဖေရမ်ဒေသ လေတပ်ရွာ မရာဒေသက ငဖိုင်းသဲရွာ၊ လုံကျွေးပီးရွာ၊ လုံကျွေးသေးရွာ၊ လောက်တူဒေသက ဖန်ထဲန်ရွာတို့ ကို မတ်လ ၁၄ ရက်မှ ၁၈ ရက်အထိ သွားရောက်ခဲ့ပြီး ပြည်သူလူထုနဲ့တွေ့ဆုံကာ ချင်းပြည်လွှတ်တော်က ပြဌာန်းလိုက်တဲ့ ဒေသန္တရအုပ်ချုပ်ရေးဥပဒေ ကို ရှင်းပြခဲ့တယ်လို့ ဆိုပါတယ်။
ချင်းပြည်နယ်အတွင်းက မြို့နယ်နဲ့ဒေသအသီးသီးမှာ ချင်းတော်လှန်ရေးအင်အားစုတွေကြား မတူညီတဲ့ဥပဒေတွေနဲ့ အုပ်ချုပ်နေတာတွေရှိနေပေမယ့် ဒေသန္တရဥပဒေပြဌာန်းပြီးပြီဆိုရင် မြို့နယ်နဲ့ ဒေသအုပ်ချုပ်ရေးပိုင်းမှာဖြစ်စေ ချင်းပြည် အစိုးရနဲ့ဖြစ်စေ လုပ်ငန်းဆောင်ရွက်မှုတွေမှာ ပိုပြီး အဆင်ပြေလာနိုင်မယ်လို့ သိရပါတယ်။
ချင်းပြည်လွှတ်တော်ဟာ ဘဏ္ဍာငွေစီမံခန့်ခွဲခြင်းဥပဒေ၊ အသင်းအဖွဲ့များ မှတ်ပုံတင်ခြင်းဆိုင်ရာဥပဒေ၊ အခွန်အကောက် ဥပဒေ၊ တရားစီရင်ရေးဥပဒေတို့ကို ပြဌာန်းထားပြီးဖြစ်တယ်လို့လည်း သိရပါတယ်။
========================
📌📌 ၃။ ”အာဏာရှင် ဗဟိုပြုစနစ် မုချပြိုလဲရမည် " ခေါင်းစဉ်ဖြင့် ယနေ့ မနက်အစောပိုင်းတွင် ရန်ကုန်မြို့လည်ခေါင်တစ်နေရာ၌ Banner ချိတ်ဆွဲ
မတ်လ ၂၇ ရက်
တော်လှန်ရေးနေ့ နှစ်ပေါင်း (၈၀) ပြည့်အထိမ်းအမှတ်အနေဖြင့် Youth of Anarchy - YOA အဖွဲ့သားများမှ နှစ်ပေါင်းများစွာတိုင် အာဏာရှင်သည်သာ သခင်၊ အာဏာရှင်သည်သာ ကျေးဇူးရှင်ပုံစံမျိုးဖြင့် လုပ်သားပြည်သူတို့ အလုပ်အကျွေးပြုနေရသော အာဏာကို ဗဟိုပြုထိန်းချုပ်သော စနစ်ကို မုတ်ချပြိုလဲရမည်ဟု " အာဏာရှင် ဗဟိုပြုစနစ် မုချပြိုလဲရမည် " ခေါင်းစဉ်ဖြင့် ယနေ့ မနက်အစောပိုင်းတွင် ရန်ကုန်မြို့လည်ခေါင်တစ်နေရာ၌ Banner ချိတ်ဆွဲ ဆန္ဒထုတ်ဖော်ခဲ့တယ်လို့အတည်ပြုပါတယ်။
ဆက်လက်၍လဲ YOA မှ ညီညွတ်သော၊ တရားသော၊ ဘက်မလိုက်သော နည်းလမ်းများဖြင့် အာဏာရှင်ကို အဆုံးထိ တော်လှန်လူထုများနှင့်လက်တွဲကာ အတူတကွ တိုက်ထုတ်သွားမည်ဖြစ်ကြောင်း ဖော်ပြပါတယ်။
========================
📌📌 ၄။ ရေကြည်မြို့နယ်က စစ်ကောင်စီထောက်တိုင်တွေစာရင်း စုဆောင်းထားတယ်လို့ မြို့နယ် ပကဖပြော
မတ်လ ၂၇ ရက်
စစ်ကောင်စီခန့် ဧရာဝတီတိုင်းဝန်ကြီးချုပ်ဦးတင်မောင်ဝင်းရဲ့ဇာတိ ရေကြည်မြို့နယ်က စစ်တပ်ထောက်တိုင်တွေရဲ့စာရင်း ပြုစုထားပြီးဖြစ်တယ်လို့ ရေကြည်မြို့နယ် ပြည်သူ့ကာကွယ်ရေးအဖွဲ့ - ပကဖ က ထုတ်ပြန်ထားပါတယ်။
ပြည်သူလူထုအပေါ် နည်းမျိုးစုံနဲ့ ယုတ်မာခဲ့တဲ့ စစ်ကောင်စီရဲ့ အုပ်ချုပ်ရေးထောက်တိုင်၊ စီးပွားရေးထောက်တိုင်နဲ့ စည်းရုံးရေးထောက်တိုင်တွေစာရင်းကို အဓိကပြုစုထားတာလို့ ဆိုပါတယ်။
ရေကြည်မြို့ဟာ စစ်ကောင်စီခန့် ဧရာဝတီတိုင်းဝန်ကြီးချုပ်ရဲ့ဇာတိဖြစ်သလို စီးပွားရေးလုပ်ငန်းရှင် ခရိုနီဦးဇော်ဇော်ရဲ့ ဇာတိလည်းဖြစ်တာကြောင့် မကင်းရာမကင်းကြောင်းတွေများနေတဲ့အတွက် ဒေသနေပြည်သူတွေဒုက္ခရောက်နေရတာလို့ ဒေသနေပြည်သူအချို့က ပြောပါတယ်။
စစ်ကောင်စီရဲ့ အုပ်ချုပ်ရေးထောက်တိုင်၊ စီးပွားရေးထောက်တိုင်နဲ့ စည်းရုံးရေးထောက်တိုင်အရေအတွက်နဲ့ အသေးစိတ် အချက်အလက်တွေကို ဖော်ပြမထားပေမယ့် စာရင်းပြုစုရာရာ ပုဂ္ဂိုလ်ရေးခံစားချက်တွေကြောင့် စာရင်းပေးတာမျိုး မဖြစ်စေဖိုနဲ့ ကာယကံရှင်တွေ နစ်နာမှုမဖြစ်စေရေး အဆင့်ဆင့်အတည်ပြုပြီးမှ စရင်းပြုစုထားတာလို့ ရေကြည်မြို့နယ် ပြည်သူ့ကာကွယ်ရေးအဖွဲ့က အသိပေးပါတယ်။
ရေကြည်မြို့နယ် ပြည်သူ့ကာကွယ်ရေးအဖွဲ့ထုတ်ပြန်ချက်မှာ ပြည်သူလူထု ပူးပေါင်းကူညီမှုနဲ့ စာရင်းအတိအကျ ကောက်ယူပြုစုထားတာလို့လည်း ထုတ်ပြန်ချက်မှာ ဖော်ပြထားပါတယ်။
ဒါကြောင့် ရေကြည်မြို့နယ်အတွင်းက ဒေသနေပြည်သူတွေအပေါ် အကြမ်းဖက်စစ်တပ်အားကိုးနဲ့ ယုတ်မာ ဖိနှိပ်ခဲ့သူများ၊ ဘုံရန်သူ စစ်ကောင်စီအား သတင်းပေးနေသူတွေအကြောင်း ထပ်မံ သတင်းပေးပို့နိုင်တယ်လို့ မြို့နယ်ပကဖက ထပ်ပြီး အသိပေးထားပါတယ်။
ရေကြည်မြို့နယ်မှာ ရခိုင့်တပ်တော် AA ပါဝင်တဲ့ တော်လှန်ရေးအင်အားစုတွေနဲ့ စစ်ကောင်စီတပ်တွေကြား မတ်လ ၁၆ ရက် ကစပြီး တိုက်ပွဲတွေပြင်းထန်နေပြီး စစ်ကောင်စီဘက်က လေကြောင်းကနေတိုက်ခိုက်တာတွေကြောင့် အရပ်သားပြည်သူ ထိခိုက်သေဆုံးမှုတွေရှိနေချိန်မှာ ရေကြည်မြို့နယ် ပြည်သူ့ကာကွယ်ရေးအဖွဲ့ - ပကဖ ဘက်ကနေ စစ်တပ်ထောက်တိုင်တွေ စာရင်း ပြုစုထားပြီးဖြစ်တယ်လို့ ထုတ်ပြန်လာတာပဲဖြစ်ပါတယ်။
အခု တင်ပြခဲ့တဲ့ သတင်းအတွေကို Radio NUG သတင်းထောက်ကို မင်းသီဟန်နှင့်ကိုခန့်တို့မှ ပေးပို့ထားတာ ဖြစ်ပါတယ်။
========================
========================
🚩🚩 ၁။ မိုးဗြဲမြို့ ပြန်ရဖို့ စစ်ကောင်စီဘက်က သာလွန်အင်အားနဲ့ စစ်ကြောင်းထိုးနေ
မတ်လ ၂၇ ရက်
ရှမ်း-ကရင်နီနယ်စပ်က မိုးဗြဲမြို့ ပြန်ရဖို့ စစ်ကောင်စီဘက်က သာလွန်အင်အားနဲ့ စစ်ကြောင်းထိုးနေတယ်လို့ ဒေသအခြေစိုက်တော်လှန်ရေးအင်အားစုတွေက ပြောပါတယ်။
စစ်ကောင်စီဟာ မိုးဗြဲမြို့ကို ပြန်လည်ထိန်းချုပ်နိုင်ဖို့ အခုရက်ပိုင်းအတွင်း ခမရ ၄၂၂ တပ်တွင်းမှာ စစ်အင်အားတွေဖြည့်တင်းထားပြီး PNO ပြည်သူ့စစ်နဲ့ပူးပေါင်းကာ မိုးဗြဲကို ထိုးစစ်ဆင်ဖို့ ပြင်ဆင်နေတယ်လို့ တပ်သတင်းရင်းမြစ်ဆီကတဆင့် သိရတဲ့အတွက် မဟာမိတ်တပ်ပေါင်းစုဘက်က လည်း အကောင်းဆုံးစုဖွဲ့မှုနဲ့ မိုးဗြဲမြို့ကို ဆက်ပြီးထိန်းချူပ်ကာကွယ်အောင် ပြင်ဆင်နေတယ်လို့ South Shan Tactical Operation Command -1 PDF က ဒီနေ့ မတ်လ ၂၇ မှာ ထုတ်ပြန်ပါတယ်။
အခုလို စစ်ကောင်စီဘက်က အတင်းအားဓမ္မတပ်စုဆောင်းနေပေမယ့် မြေပြင်မှာရှိတဲ့စစ်ကောင်စီတပ်ဖွဲ့ ဝင်တွေဟာ အလင်းဝင်နိုင်ဖို့ ပိုပြီးဆက်သွယ်လာတာတွေလည်းရှိတယ်လို့ ဆိုပါတယ်။
စစ်ကောင်စီအနေနဲ့ လူအင်အားအလွန်အကျွံထုတ်သုံးလာနိုင်ပြီး ဒရုန်း၊ လက်နက်ကြီးနဲ့ လေကြောင်း တိုက်ခိုက်မှုတွေ အလွန်အကျွံသုံးလာနိုင်တဲ့အပြင် အဆိပ်ငွေ့ဗုံးတွေနဲ့ မီးလောင်ဗုံးတွေသုံးပြီး မိုးဗြဲမြို့ကို ထိန်းချုပ်နိုင်ဖို့ ကြိုးစားလာနိုင်တယ်လို့ South Shan Tactical Operation Command -1 PDF ခန့်မှန်းထားပါ တယ်။
လက်ရှိမှာလည်း မိုးဗြဲ-ကုန်းသာ-လွိုင်ကော် လမ်းမကြီးကိုပြန်ရဖို့ စစ်ကောင်စီဘက်က သာလွန်အင်အားနဲ့ စစ်ကြောင်းထိုး နေတာရှိတယ်လို့ ကရင်နီအမျိုးသားများကာကွယ်ရေးတပ် - KNDF တပ်ရင်း ၃ ကလည်း ထုတ်ပြန်ထားပါတယ်။
စစ်ကောင်စီက မိုးဗြဲ-ကုန်းသာ-လွိုင်ကော်လမ်းမကြီးကို ထိန်းချုပ်နိုင်ဖို့ စစ်ကြောင်း ၄ ခုနဲ့ တလှည့်စီ စစ်ကြောင်းထိုးနေ တဲ့အတွက် တိုက်ပွဲတွေ နေ့စဉ်ဖြစ်နေတယ်လို့ သိရပါတယ်။
စစ်ကောင်စီရဲ့ တိုက်စစ်နဲ့ ခံစစ်လှုပ်ရှားမှုတွေကို ကြည့်နိုင်မယ့် ကင်းထောက်ဒရုန်းတစင်းလိုအပ်နေတဲ့အတွက် ပြည်သူ လူထုအနေနဲ့ ထောက်ပို့ကူညီပေးကြဖို့လည်း KNDF တပ်ရင်း - ၃ က တိုက်တွန်းထားပါတယ်။
စစ်ကောင်စီဟာ မိုးဗြဲမြို့ကို ပြန်ရဖို့ နေ့စဥ်နီးပါး လက်နက်ကြီးတွေ ဒရုန်းတွေ မီးလောင်ဗုံးတွေနဲ့ ပစ်ခတ်တိုက်ခိုက်နေတဲ့အ တွက် နေအိမ်တွေ မီးလောင်ပျက်စီးနေရာ အခု မတ်လအတွင်းမှာပဲ မြို့ပေါ်ရပ်ကွက်တွေက အိမ်အလုံး ၃၀ ထက်မနည်း မီးလောင်ပျက်စီးခဲ့ရတယ်လို့ ရှမ်းတောင် ဗျူဟာ - ၁ ရဲ့ မှတ်တမ်းတွေအရ သိရပါတယ်။
========================
🚩🚩 ၂။ မုံရွာ-မန်းလေးလမ်းပိုင်းမှာ စစ်ယာဉ်တန်းကို မိုင်းဆွဲတိုက်ခိုက်
မတ်လ ၂၇ ရက်
စစ်ကိုင်းတိုင်း ချောင်းဦးမြို့နယ်ကိုဖြတ်သန်းသွားတဲ့ မုံရွာ - မန္တလေးလမ်းပိုင်းမှာ စစ်ကောင်စီယာဉ်တန်းကို မိုင်းဆွဲ တိုက်ခိုက်ခဲ့တယ် မုံရွာခရိုင် တပ်ရင်း ၁၂ ၊ တပ်ခွဲ ၃ လျှပ်စီးတပ်ခွဲက ပြောပါတယ်။
စစ်ကိုင်းမြို့ တပ်မ ၃၃ က ထွက်လာတဲ့ အက်ဆစ်တင် ကားတန်းအတွက် လုံခြုံရေးယူပေးဖို့ မုံရွာမြို့ နမခကနေ ထွက်လာ တဲ့ သံချပ်ကာယာဉ် ၄ စီးပါ စစ်ယာဉ်တန်းကို ချောင်းဦးမြို့အနီးမှာ မိုင်းဆွဲတိုက်ခိုက်ခဲ့တာလို့ ဆိုပါတယ်။
ဒီတိုက်ခိုက်မှုမှာ သံချပ်ကာယာဉ်တွေ ထိခိုက်မှုရှိပေမယ့် စစ်သားတွေ ထိခိုက်သေဆုံးမှုကိုတော့ အတည်ပြုနိုင်တာ မရှိသေးဘူးလို့ အသိပေးထားပါတယ်။
တော်လှန်ရေးတပ်တွေရဲ့ မိုင်းဆွဲတိုက်ခိုက်တာခံလိုက်ရတဲ့ သံချပ်ကာ စစ်ယာသ်တန်းပေါ်က စစ်သာတွေဟာ နတ်ရေကန် စစ်ဆေးရေးဂိတ်နားအထိ ရမ်းသမ်းပစ်ခတ်တာတွေလုပ်ခဲ့ပေမယ့် တော်လှန်ရေးရဲဘော်တွေ ထိခိုက်မှုမရှိဘူးလို့ သိရပါတယ်။
ဒီတိုက်ခိုက်မှုကို မုံရွာခရိုင် အမှတ် ၁၂ တပ်ရင်း ၊ တပ်ခွဲ ၃ လျှပ်စီးတပ်ခွဲ ၊ Nway Oo Brothers Column နဲ့ Royal Tigers Force - ဆားးလင်းကြီးတပ်ဖွဲ့တို့ ပူးပေါင်းလုပ်ဆောင်ခဲ့တာဖြစ်ပါတယ်။
========================
🚩🚩 ၃။ စစ်ကိုင်းတိုင်းဒေသ၊ ရွှေဘိုခရိုင်၊ တန့်ဆည်မြို့ အကြမ်းဖက်စစ်ကောင်စီ ကလေးမြို့ အခြေစိုက် ခြေမြန်တပ်ရင်း ( ခမရ-၃၆၁ ) နှင့်ပျူစောထီးများကို တော်လှန်ရေးတပ်များတိုက်ခိုက်၍ ရန်သူ့ဘက်မှအနည်းဆုံးအယောက်၂၀ သေဆုံး
မတ်လ ၂၇ ရက်
အမျိုးသားညီညွတ်ရေးအစိုးရ၊ ကာကွယ်ရေး၀န်ကြီးဌာန၊ ပြည်သူ့ကာကွယ်ရေးတပ်မတော်၊ အမှတ်(၁)စစ်ဒေသ၊ ဗျူဟာ-၅၂၊ ပေါ်ဦးစစ်ကြောင်း ( PAW OO Column ) သည် စစ်ကိုင်းတိုင်းဒေသ၊ ရွှေဘိုခရိုင်၊ တန့်ဆည်မြို့ အကြမ်းဖက်စစ်ကောင်စီ ကလေးမြို့ အခြေစိုက် ခြေမြန်တပ်ရင်း ( ခမရ-၃၆၁ ) နှင့် ၎င်း၏ လက်အောက်ခံ ပြည်သူ့စစ် (ခ) ပျူစောထီးတပ်များနှင့် တိုက်ပွဲများ ဖြစ်ပွားခဲ့တယ်လို့သတင်းရရှိပါတယ်။
တိုက်ပွဲများကို ပြည်သူ့ကာကွယ်ရေးတပ်မတော်၊ အမှတ် (၁) စစ်ဒေသ၊ ဗျူဟာ-၅၂၊ ပေါ်ဦးစစ်ကြောင်း ( PAW OO Column )၊ ပေါ်ဦး-၃ နှင့်ဖြစ်ပွားလျှက်ရှိပြီး ရန်သူ့ဘက်မှ ၂၀ ဦး အနည်းဆုံး သေဆုံး၊ ၄၀ ဦးခန့် ထိခိုက်ဒဏ်ရာရအနက် စစ်ကိုင်းတိုင်းဒေသ၊ ကန့်ဘလူခရိုင်၊ ကန့်ဘလူ ပြည်သူ့ဆေးရုံကြီးတွင် ၃၂ ဦး ဆေးကုသမှု ခံယူလျှက်ရှိတယ်လို့ဖော်ပြပါတယ်။
တိုက်ပွဲအတွင်း ဖမ်းဆီးရမိ (လူ) အချို့နှင့် သိမ်းဆည်းရမိ (လက်နက်၊ခဲ၊ယမ်း) အချို့ ရှိခဲ့ပြီးဖမ်းဆီးရမိသည့် စစ်သုံ့ပန်းများအား အမျိုးသားညီညွတ်ရေးအစိုးရ၊ ကာကွယ်ရေး၀န်ကြီးဌာန၊ ပြည်သူ့ကာကွယ်ရေးတပ်မတော်၊ စစ်ရုံးချုပ် ( MOD ) မှ ပြဌာန်းထားသည့် စစ်သုံံ့ပန်းဥပဒေနှင့်အညီ နိုင်ငံတကာလူ့အခွင့်အရေးဆိုင်ရာ ဥပဒေ (သို့) အခွင့်အရေးများ (International Human Law / International Human Rights ) ၊ ဂျနီဗာကွန်ဗန်းရှင်း ဥပဒေ (Geneva Convention Law - from 1864 to 1949 ) အရ စစ်ဆေးလျှက် ရှိတယ်လို့ဖော်ပြပါတယ်။
========================
🚩🚩 ၄။ ဆောနယ်မှာရှိတဲ့ အရက် ဘီယာဆိုတွေ ရက်အကန့်အသတ်မရှိပိတ်ထားဖို့ ဂန့်ဂေါ PDF ညွှန်ကြား
မတ်လ ၂၇ ရက်
မကွေးတိုင်း ဆောမြို့နယ်အတွင်းမှာရှိတဲ့ အရက် ဘီယာရောင်းချတဲ့ဆိုင်တွေ ရက်အကန့်အသတ်မရှိပိတ်ထားဖို့ ဂန့်ဂေါခရိုင် PDF က ညွှန်ကြားထားပါတယ်။
ဒီနေ့ မတ်လ ၂၇ ကစပြီး ဆောမြို့နယ်အတွင်းမှာရှိတဲ့ အရက်၊ ဘီယာအရောင်းဆိုင်တွေ ရက်အကန့်အသတ်မရှိ ယာယီ ပိတ်သိမ်းရမယ်လို့ ဂန့်ဂေါခရိုင် PDF က အမိန့်ထုတ်ပြီး ညွှန်ကြားလိုက်တာဖြစ်ပါတယ်။
အမှတ် ၁ စစ်ဒေသနယ်မြေဖြစ်တဲ့ ဂန့်ဂေါခရိုင် ဆောမြို့နယ်အတွင်းက အမှတ် ၃ နဲ့ အမှတ် ၅ ပြည်သူ့ကာကွယ်ရေး တပ်ရင်းတို့ ထိန်းချုပ်ထားတဲ့ နယ်မြေမှာ မူးယစ်ယမ်းကားတာတွေ နေ့စဉ် ဖြစ်နေတာကြောင့် အခုလို ထုတ်ပြန်ရတာလို့ ဆိုပါတယ်။
ဒေသတွင်း တည်ငြိမ်အေးချမ်းစေရေးအတွက် သက်ဆိုင်ရာ ကွပ်ကဲရေး၊ အုပ်ချုပ်ရေးအဖွဲ့တွေနဲ့ ညှိနှိုင်းပြီး ဆောမြို့ပေါ်မှာ ရှိတဲ့ အရက်နဲ့ဘီယာရောင်းချတဲ့ဆိုင်တွေ သင်္ကြကာလမှာ ဆိုင်ဖွင့်ခွင့် ယာယီ ပိတ်သိမ်းလိုက်တယ်လို့ သိရပါတယ်။
ဆိုင်ပြန်ဖွင့်ခွင့်ကိုတော့ သင်္ကြန်ကာလအခြေအနေပေါ်မူတည်ပြီး ဆောနယ်က နယ်ခံတပ်ရင်းတွေဖြစ်တဲ့ အမှတ် ၃ နဲ့ အမှတ် ၅ ပြည်သူ့ကာကွယ်ရေးတပ်ဖွဲ့တွေက ပြန်လည်ထုတ်ပြန်ပေးမယ်လို့လည်း သိရပါတယ်။
သတ်မှတ်ထားတဲ့ကာလအတွင်း ရှောင်တခင်စစ်ဆေးမှုတွေပြုလုပ်မှာဖြစ်ပြီး ဆိုင်ဖွင့်ရောင်းချနေတာတွေ့ရင် ဒဏ်ကြေး အဖြစ် ကျပ်သိန်း ၅ဝ ပေးဆောင်ရမယ်လို့ ဆောမြို့ နယ်မြေခံတပ်ရင်းတွေဖြစ်တဲ့ ဂန့်ဂေါခရိုင် တပ်ရင်း ၃ နဲ့ တပ်ရင်း ၅ တို့က အသိပေး ထုတ်ပြန်ထားပါတယ်။
========================
🚩🚩 ၅။ ရှမ်းပြည်နယ်မြောက်ပိုင်းမဟာမိတ်တပ်တော်မှတပ်သားသစ်များခေါ်ယူ
မတ်လ ၂၇ ရက်
ရှမ်းပြည်နယ်မြောက်ပိုင်းမဟာမိတ်တပ်တော်မှတပ်သားသစ်များခေါ်ယူလျက်ရှိတယ်လို့သိရပါတယ်။"ကျွန်တော်တို့တပ်တော်ဟာ တော်လှန်ရေးကာလလေးနှစ်ကျော်ကြာမြင့်လာပြီဖြစ်သော်လဲ ယခုအချိန်ထိတော်လှန်ရေးစိတ်ဓာတ်ခိုင်မာစွာဖြင့် စစ်အာဏာရှင်ကျဆုံးရေလုပ်ငန်းစဉ်များကို ကဏ္ဍအသီးသီးမှ ပါဝင်တော်လှန်နေကြဆဲဖြစ်ပါတယ်။ရှမ်းမြောက်တစ်ခွင်လုံး သိမ်းထားခဲ့နိုင်ပြီးဖြစ်သော်လဲ ရှမ်းမြောက်မှာ အမြုတေလာခဲ့တဲ့ ကျွန်တော်တို့တပ်တော်ဟာ ဒီလောက်နဲ့ရပ်တန့်နေလို့မရပါဘူး။ တစ်မျိုးသားလုံးလွတ်မြောက်ဖို့ရာအတွက် ဆက်လက်ပြီး မြေပြန့်ဒေသမှာလွတ်လပ်ရေးအတွက် တိုက်ပွဲဝင်ကြရမှာဖြစ်ပါတယ်။ ဒါကြောင့် တော်လှန်ရေးအင်အားပိုမိုအားကောင်းလာဖို့ တိုက်ခိုက်ရေးတပ်သားတွေအများကြီးထပ်ပြီးလိုအပ်နေပါတယ်"လို့ဖော်ပြပါတယ်။
တပ်တော်ကနေသတ်မှတ်ချက်အရအသက် ၁၈နှစ်အထက် ရှိသူ၊အာဏာရှင် စနစ် အမြစ်ပြတ်သည်ထိ တိုက်ခိုက် ချေမှုန်းရန် စိတ်အားထက်သန်သူ၊မည်သူတဦးတစ်ယောက်၏ တိုက်တွန်း ချက်မပါဘဲ မိမိသဘောဆန္ဒအလျောက် ဝင်တဲ့သူ ဖြစ်ရမယ်လို့ဆိုပါတယ်။
========================
🚩🚩 ၆။ စစ်အုပ်စုရဲ့ထောက်ပံ့ပို့ဆောင်ရေးကွန်ရက်တွေပြိုလဲနေပြီး တပ်စခန်း ၅၀၀ ကျော်ကို အပြည့်အဝထောက်ပံ့ဖို့မစွမ်းဆောင်နိုင်တော့
မတ်လ၂၇ရက်
စစ်အုပ်စုရဲ့ထောက်ပံ့ပို့ဆောင်ရေးကွန်ရက်တွေပြိုလဲနေပြီးတပ်စခန်း ၅၀၀ ကျော်ကို အပြည့်အဝထောက်ပံ့ဖို့မစွမ်းဆောင်နိုင်တော့ဘူးလို့ "ရေရှည်တည်တံ့သောငြိမ်းချမ်းရေးနှင့်လုံခြုံရေးကိုမြှင့်တင်ခြင်း - ထိုင်းနှင့်အာဆီယံ၏နယ်စပ်တည်ငြိမ်မှုနှင့်ဒီမိုကရေစီလမ်းကြောင်း" ဆွေးနွေးပွဲတွင် National War Collegeက ပါမောက္ခ Zach Abuza ကထောက်ပြပြောဆိုပါတယ်။
"စစ်အုပ်စုရဲ့ထောက်ပံ့ပို့ဆောင်ရေးကွန်ရက်တွေပြိုလဲနေတယ်။ စစ်တပ်ဟာသမိုင်းကြောင်းအရတိုင်းပြည်ကိုသိမ်းပိုက်ထားတဲ့တပ်ဖွဲ့လိုထိန်းချုပ်ထားပြီး၊ တပ်စခန်း ၅၀၀ ကျော်ရှိတယ်။ လက်ရှိအခြေအနေတွေမှာ၊ သူတို့ဟာအများစုကိုပြန်လည်ထောက်ပံ့ဖို့၊ ပြန်လည်တပ်ဆင်ဖို့မစွမ်းဆောင်နိုင်ဘူး။ ထောက်ပံ့ရေးလမ်းကြောင်းတွေဖြတ်တောက်ခံနေရပြီး၊ လေကြောင်းကနေဒီတပ်စခန်းတွေကိုထိန်းသိမ်းဖို့လုံလောက်တဲ့သယ်ယူပို့ဆောင်ရေးရဟတ်ယာဉ်တွေမရှိဘူး"လို့၄င်းကပြောပါတယ်။
စစ်တပ်ဟာဧရာဝတီမြစ်တစ်လျှောက်မှာကာကွယ်ရေးစက်ရုံ ၂၄ ရုံကိုလည်ပတ်နေပြီး၊ အဲဒါတွေဟာအလွန်အရေးကြီးတဲ့အခြေအနေတရပ်မှာရှိနေပြီး ရက္ခိုင့်တပ်တော်နဲ့ တော်လှန်ရေးတပ်ဖွဲ့တွေကစက်ရုံတွေကိုတိုက်ရိုက်သိမ်းပိုက်ဖို့မလိုဘဲဖြတ်တောက်လိုက်ရုံနဲ့လုံလောက်တယ်လို့ ပါမောက္ခ Zach Abuza ကသုံးသပ်ပါတယ်။
အခုတင်ပြခဲ့တဲ့ စစ်ရေးသတင်းကိုတော့ Radio NUGသတင်းထောက် ကိုခန့်နှင့်မင်းသီဟန်တို့မှ ပေးပို့ထားတာဖြစ်ပါတယ်
No comments:
Post a Comment