29 Mar 2025 - (Ethnic language program-CHO_DAAI) by Radio NUG

 

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၅ မတ်လ ( ၂၉ ) ရက်နေ့နောက်ဆုံးရပြည်တွင်းသတင်းများ 

📌📌 ၁။ PDF - Zolandက တပ်သားသစ် ထပ်မံလက်ခံ။

 

PDF–Zolandက တပ်သားသစ် ထပ်မံလက်ခံနေတယ်လို့ မတ်လ ၂၂ ရက်နေ့ ကြေညာပါတယ်။

တပ်ဖွဲ့ဝင်အဖြစ် ဝင်ရောက်လိုသူတွေဟာ ZFU/PDF – Zolandရဲ့ စစ်ရေးနိုင်ငံရေးလက်ခံနိုင်သူဖြစ်ပြီး အနည်းဆုံးတစ်နှစ် တာဝန်ထမ်းဆောင်နိုင်သူ၊ အထက်အမိန့်နာခံနိုင်သူ ဖြစ်ရမယ်လို့ ဆိုပါတယ်။

ကျန်းမာရေး ကောင်းမွန်ပြီး အသက် ၁၈ နှစ်ပြည့်သူနဲ့ လူပုဂ္ဂိုလ်ဒါမှမဟုတ်အဖွဲ့အစည်းတခုခုရဲ့ စေခိုင်းမှုမပါဘဲ ကိုယ်ပိုင်ဆုံးဖြတ်ချက်ဖြင့် ဝင်ရောက်လိုသူဖြစ်ရမယ်လို့လည်း တပ်ဖွဲ့ဝင်သစ်လက်ခံတဲ့ ကြော်ငြာစာထဲ ဖော်ပြပါတယ်။

PDF - Zolandက အခြေခံစစ်သင်တန်း အပတ်စဉ် (၁၅) သင်တန်းဆင်းပွဲကို ပြီးခဲ့တဲ့ မတ်လ ၁၁ ရက်နေ့က ပြုလုပ်ခဲ့ပါသေးတယ်။

PDF – Zolandဟာ ‘ချင်းညီနောင်’ အဖွဲ့ဝင်ဖြစ်ပြီး ချင်းမြောက်၊ တီးတိန်မှာ အခြေချလှုပ်ရှားနေတာပါ။

လက်ရှိမှာ မြို့သိမ်းစစ်ဆင်ရေးဖော်ဆောင်နိုင်ဖို့ ‘ချင်းပြည်မြောက်ပိုင်း နောက်ဆုံးလှိုင်း’  ကမ်ပိန်း ပြုလုပ်နေတယ်လို့လည်း ထုတ်ပြန်ထားပါတယ်။

 

========================

 

📌📌 ၂။ စစ်ကောင်စီအဖွဲ့ဝင် ဒေါက်တာမှုထန်ရဲ့ အိမ်၊ ခြံ၊ မြေတွေကို အပြီးသိမ်းဆည်း။

 

ထန်တလန်မြို့နယ်ဒေသခံတစ်ဦးဖြစ်တဲ့ စစ်ကောင်စီအဖွဲ့ဝင် ဒေါက်တာမှုထန်ရဲ့ ပိုင်ဆိုင်သမျှ အိမ်၊ ခြံ၊ မြေကို CDF ထန်တလန်ကောင်စီက သိမ်းဆည်းလိုက်ပြီလို့ ထုတ်ပြန်ပါတယ်။

CDF ထန်တလန်ထိန်းချုပ်နယ်မြေအတွင်းက သိမ်းဆည်းတဲ့ အိမ်၊ ခြံ၊ မြေတွေကို အသစ်တက်လာမယ့် အစိုးရထံလွှဲပြောင်းပေးမယ်လို့လည်း ဆိုပါတယ်။

ဒေါက်တာမှုထန်ဟာ ချင်းပြည်နယ် ကြံ့ဖွံ့ (ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ) ဥက္ကဌဟောင်းဖြစ်ပြီး ၂၀၂၃ ဖေဖော်၀ါရီလ ၁၇ ရက်နေ့က စစ်ကောင်စီအဖွဲ့ဝင်အဖြစ် ခန့်အပ်ခံရတာ ဖြစ်ပါတယ်။

 

========================

 

📌📌 ၃။ မန္တလေးက ပြည်သူတွေ စစ်မှုထမ်းဖို့ စတင်မဲနှိုက်နေရ။

 

မန္တလေးမြို့၊ မဟာအောင်မြေမြို့နယ်က ရပ်ကွက်တွေမှာ မတ်လ  ၂၄ရက် မနက်ပိုင်းကစလို့ မန္တလေးမြို့၊ မဟာအောင်မြေမြို့နယ်အတွင်းက ရပ်ကွက်ရုံး၊ ဓမ္မာရုံနဲ့ သတ်မှတ်နေရာတွေမှာ စစ်ကောင်စီက မြို့ခံတွေကို လူစုမဲနှိုက်ခိုင်းပြီး အပါတ်စဉ် ၁၂ အတွက် စစ်သားသစ် စုဆောင်းနေတယ်လို့ Mandalay Free Press က ရေးသားပါတယ်။

မတ် ၂၃ရက်နေ့က အသက်အရွယ် အကျုံးဝင်တဲ့ လူငယ်တွေအနေနဲ့ ကိုယ်တိုင်ဖြစ်စေ၊ ကိုယ်စားဖြစ်စေ အပျက်မကွက် မဲလာနှိုက်ကြဖို့နဲ့ ပျက်ကွက်ရင် ကိုယ်စား မဲနှိုက်မယ်လို့ စစ်ကောင်စီက ပြောထားတာပါ။

စစ်ကောင်စီဘက်က ထွက်လာတဲ့ ဓာတ်ပုံတွေမှာတော့ စစ်မှုထမ်းဖို့ မဲနှိုက်နေတဲ့ ပြည်သူတွေမှာ အမျိုးသမီးတွေနဲ့ အသက်ကြီးပိုင်းအမျိုးသား အများစု ပါဝင်နေတာ တွေ့ရပါတယ်။

#RadioNUGLocalNews

#SpringRevolution