၂၀၂၅ မတ်လ ၃၁ ရက်နေ့ ညနေခင်း နောက်ဆုံးရပြည်တွင်းသတင်းများ
📌 ၁။ အီဒွလ်ဖိသ်ရ် ဝါကျွတ်အီးဒ် ဆုတောင်းသဝဏ်လွှာကို CRPHနဲ့NUGတို့ပေးပို့
📌 ၂။ အမေရိကန်နိုင်ငံအစိုးရနှင့် အမေရိကန်နိုင်ငံရောက်မြန်မာပြည်သူများမှ မြန်မာငလျင်ဘေးသင့် လုပ်ငန်းများအတွက် NUGဝန်ကြီးများ Dr.Roy (Burma Advocacy Group-BAG) နှင့်တွေ့ဆုံ
📌 ၃။ ငလျင်ဘေးသင့်ပြည်သူများအတွက်ကူညီရန် အမေရိကန်မှာ ငွေစာရင်းအကောင့်များဖွင့်လှစ်ထားရှိ၍ မည်သူမဆိုပါဝင်နိုင်
📌 ၄။ ဗီယမ်နမ် ကယ်ဆယ်ရေးတပ်ဖွဲ့ဝင် ၁၀၆ ဦးနှင့်အတူ ရှာဖွေကယ်ဆယ်ရေး ခွေးများ၊ဆေးဘက်ဆိုင်ရာ ပစ္စည်းများနှင့် ရိက္ခာများအပါအဝင်မြန်မာနိုင်ငံရောက်ရှိ
📌 ၅။ အမျိုးသားညီညွတ်ရေးအစိုးရ ဂျပန်နိုင်ငံဆိုင်ရာ ကိုယ်စားလှယ်ရုံးမှမြန်မာ ငလျင်ဘေးအရေးပေါ်ကူညီနိုင်ရင် ကော်မတီဖွဲ့စည်း
📌 ၆။ စစ်ကိုင်းမြို့၊ မြတ်ကိုယ်ပိုင်ကျောင်း အဆောက်အဦပြိုကျပျက်စီး၍ ပိတ်မိနေသူ ၄ဦးအား အသက်ရှင်လျက်ကယ်ထုတ်နိုင်ခဲ့
📌 ၇။ စစ်ကိုင်းမြို့ဗဟိုပြုလှုပ်ခတ်ခဲ့တဲ့ အင်အား၇.၇အဆင့်ရှိငလျင်ကြောင့် လူပေါင်း ၇ သန်းခန့် ထိခိုက်ခဲ့ပြီးဆေးရုံများ၊ တံတားများနှင့် အမွေအနှစ်နေရာများ အပါအဝင် အရေးပါသော အခြေခံအဆောက်အဦများ ဆိုးရွားစွာ ပျက်စီးခဲ့တယ်လို့ UN-HABITAT ထုတ်ပြန်
========================
၂၀၂၅ ခုနှစ် မတ်လ ၃၁ ရက် ညပိုင်းမှာတင်ပြပေးမယ့် Radio NUG စစ်ရေးသတင်းကောက်နုတ်ချက်များ
🚩 ၁။ စစ်ကောင်စီဘက်ကလုံခြုံရေးအာမခံချက်ပေးပါက ငလျင်ဘေးသင့်ပြည်သူများကိုဆေးကုသမှုစောင့်ရှောက်မှုပေးရန် ပြည်ထောင်စုဝန်ကြီးဒေါက်တာဇော်ဝေစိုးနဲ့CDMဆေးကုသမှုအဖွဲ့ မန္တလေးနဲ့နေပြည်တော်ကိုဝင်ရန်အသင့်ရှိ
🚩 ၂။ မန္တလေးမြို့ရှိ Sky Villa ကွန်ဒိုတွင် နာရီ၆၀ကျော်ကြာ မြုပ်နေသည့် အသက် ၅ နှစ်အရွယ် ကလေး ၁ ဦး၊ကိုယ်ဝန်ဆောင် အမျိုးသမီး ၁ ဦးနှင့် အသက် ၂၉ နှစ် အမျိုးသမီးတို့ကို ကယ်ဆယ်နိုင်ခဲ့
🚩 ၃။ မြန်မာငလျင်ဘေးသင့်ပြည်သူပြည်သားများကို တတ်နိုင်တဲ့ဘက်ကကူညီပါဝင်မယ်လို့ KIOနဲ့KNUတို့အသီးသီးထုတ်ပြန်
🚩 ၄။ ပြင်းထန်ငလျင်ကြောင့် သေဆုံးခဲ့ရတဲ့ ပြည်သူ(၂) ဦးကို ရွှေဘိုပကဖ ထောက်ပံ့ပေးအပ်မှုများပြုလုပ်
🚩 ၅။ ZFU/PDF ZOLAND တည်ထောင်မှု ၄ နှစ်ပြည့်ခဲ့
🚩 ၆။ ကယန်းအမျိုးသားတပ်မတော် KNA က အမှတ် (၂၁၀၃) တပ်ရင်းရုံးတစ်ခုကို လွိုင်ကော်ဒေသတစ်နေရာတွင် ဖွင့်လှစ်
🚩 ၇။ မြန်မာနိုင်ငံသား အိုင်တီပညာရှင်များ ဖန်တီးထားတဲ့ ငလျင်အသိပေး Telegram ChatBot လေး တခု မျှဝေထား
ဤသတင်းများကို ရေဒီယိုအန်ယူဂျီသတင်းတာဝန်ခံများနှင့် ခိုင်လုံသော မိတ်ဖက်သတင်းရင်းမြစ်များဆီမှ အခြေခံတင်ပြထားခြင်း ဖြစ်ပါတယ်။
========================
📌📌 ၁။ အီဒွလ်ဖိသ်ရ် ဝါကျွတ်အီးဒ် ဆုတောင်းသဝဏ်လွှာကို CRPHနဲ့NUGတို့ပေးပို့
မတ်လ ၃၁ ရက်
အစ္စလာမ်ဘာသာဝင်များ၏ ထူးမြတ်သော အီဒွလ်ဖိသ်ရ်ဝါကျွတ်အီးဒ်နေ့ နေ့ထူးနေ့မြတ် အချိန်အခါသမယတွင် အစ္စလာမ်ဘာသာဝင်များအားလုံး စိတ်၏ချမ်းသာခြင်း ကိုယ်၏ကျန်းမာ ခြင်းနှင့် ပြည့်စုံကြပါစေကြောင်း ဆုတောင်းမေတ္တာ ပို့သအပ်တယ်လို့ပြည်ထောင်စုလွှတ်တော်ကိုယ်စားပြုကော်မတီကဖော်ပြပါတယ်။
ရာမဒါန်လအတွင်း ဥပုသ်သီလ ဆောက်တည်ခဲ့ကြသည့် အစ္စလာမ်ဘာသာဝင် မိဘ ပြည်သူများ၊ ညီအစ်ကိုမောင်နှမများအနေဖြင့် ဝါကျွတ်အီးဒ်နေ့ပွဲတော်ကို ပုံမှန်အားဖြင့် ပျော်ရွှင် ချမ်းမြေ့စွာ လှူဒါန်းပေးကမ်းခြင်း၊ ကျွေးမွေးခြင်းများဖြင့် ကျင်းပလေ့ရှိကြသော်လည်းမတ်လ ၂၈ ရက်နေ့တွင် မြန်မာနိုင်ငံနေရာဒေသအချို့တွင် အင်အားပြင်းငလျင် ၇.၇ ရစ်ချ်တာစကေး လှုပ်ခတ် ခဲ့သည့်အတွက် လူမျိုးဘာသာဝင်အသီးသီး၏ သာသနိကအဆောက်အဦများ ပြိုကျပျက်စီးခဲ့တယ်လို့ဆိုပါတယ်။
ပြင်းထန်သည့်ငလျင်လှုပ်ခတ်သည့်အချိန်သည် အစ္စလာမ်ဘာသာဝင်များ၏ နေ့ထူးနေ့မြတ် ဖြစ်သော သောကြာနေ့၊ စုပေါင်းဝတ်ပြုနေသည့်အတွက် ဝတ်ပြုလာသူ အစ္စလာမ်ဘာသာဝင် အများအပြား မြင့်မြတ်သော ရှဟီဒီများအဖြစ် ကွယ်လွန်သေဆုံးခဲ့ရပြီး ယနေ့ အီးဒ်နေ့အချိန်အခါ သမယသည် ကျန်ရစ်သူ မိဘမောင်ဖွား ညီအစ်ကို မောင်နှမများ ဆွေမျိုးများနှင့်အတူ ပူဆွေး သောကရောက် နေရချိန်ဖြစ်သည့်အတွက် မိမိတို့ ပြည်ထောင်စုလွှတ်တော်ကိုယ်စားပြုကော်မတီ အနေဖြင့် အစ္စလာမ်ဘာသာဝင်မိသားစုများနှင့် ထပ်တူခံစားရပါကြောင်း ဖော်ပြလိုတယ်လို့ဆိုပါတယ်။
ငလျင်လှုပ်ချိန်သည် သောကြာနေ့ ဝတ်ပြုချိန် (ဂျွမ္မာဆွလာသ်) နှင့် တိုက်ဆိုင်နေခဲ့ပြီး အစ္စလာမ်ဘာသာဝင် အများအပြား ငလျင်ဘေးကြောင့် သေဆုံးခဲ့ရခြင်းအပေါ် မိမိတို့ အမျိုးသား ညီညွတ်ရေးအစိုးရက ယူကြုံးမရဖြစ်ကာ ကာယကံရှင်မိသားစုဝင်များနှင့်အတူ ထပ်တူထပ်မျှ ဝမ်းနည်းပူဆွေးရပါကြောင်း ပြောကြားလိုတယ်လို့ဖော်ပြပါတယ်။
အမျိုးသားညီညွတ်ရေးအစိုးရအနေဖြင့် ယနေ့ကျရောက်သော အီဒွလ်ဖိသ်ရ် ဝါကျွတ် အီးဒ်နေ့ ထူးနေ့မြတ် အချိန်အခါသမယတွင် အဖက်ဖက်ကချိနဲ့ကာ ဝမ်းနည်းပူဆွေးနေရသည့် မြန်မာနိုင်ငံက အစ္စလာမ်ဘာသာဝင်များအားလုံး ဘေးအပေါင်းမှကင်းဝေးကြစေရန် ညှိုးငယ်သော စိတ်ဖြင့် ဆုတောင်းမေတ္တာ ပို့သရင်း ဤသဝဏ်လွှာအား ထုတ်ပြန်အပ်တယ်လို့ဖော်ပြပါတယ်။
========================
📌📌 ၂။ အမေရိကန်နိုင်ငံအစိုးရနှင့် အမေရိကန်နိုင်ငံရောက်မြန်မာပြည်သူများမှ မြန်မာငလျင်ဘေးသင့် လုပ်ငန်းများအတွက် NUGဝန်ကြီးများ Dr.Roy (Burma Advocacy Group-BAG) နှင့်တွေ့ဆုံ
မတ်လ၃၁ရက်
အမေရိကန်နိုင်ငံအစိုးရနှင့် အမေရိကန်နိုင်ငံရောက်မြန်မာပြည်သူများမှ မြန်မာငလျင်ဘေးသင့်အရေးပေါ်ကယ်ဆယ်ရေးလုပ်ငန်းများအတွက် ဝိုင်းဝန်းကူညီပံ့ပိုးပေးနိုင်ရန် NUGဝန်ကြီးများ Dr.Roy (Burma Advocacy Group-BAG) နှင့်တွေ့ဆုံခဲ့တယ်လို့ သတင်းရရှိပါတယ်။
အမေရိကန်နိုင်ငံအစိုးရနှင့် အမေရိကန်နိုင်ငံရောက်မြန်မာပြည်သူများမှ ငလျင်ဘေးသင့်အရေးပေါ်ကယ်ဆယ်ရေးလုပ်ငန်းများအတွက် ဝိုင်းဝန်းကူညီပံ့ပိုးပေးနိုင်ရန် အမျိုးသမီး၊ လူငယ်နှင့် ကလေးသူငယ်ရေးရာဝန်ကြီးဌာနမှ ပြည်ထောင်စုဝန်ကြီး နော်စူဆန်နာလှလှစိုးနဲ့ နိုင်ငံရေးဝန်ကြီးဌာနမှ ဒုဝန်ကြီးဦးမိုးဇော်ဦးတို့က Dr.Roy (Burma Advocacy Group-BAG) နှင့်တွေ့ဆုံခဲ့ကြပါတယ်။
ထိုသို့တွေ့ဆုံရာမှာ မြန်မာနိုင်ငံ ဒီမိုကရေစီရရှိရေး၊ အမေရိကန်နိုင်ငံ အစိုးရနှင့် ကယ်ဆယ်ရေးလုပ်ငန်းစဉ်များအား ပူးပေါင်းဆောင်ရွက်ရေး ကိစ္စရပ်များအား ရင်းနှီးပွင့်လင်းစွာဆွေးနွေးခဲ့ကြပါတယ်။
========================
📌📌 ၃။ ငလျင်ဘေးသင့်ပြည်သူများအတွက်ကူညီရန် အမေရိကန်မှာ ငွေစာရင်းအကောင့်များဖွင့်လှစ်ထားရှိ၍ မည်သူမဆိုပါဝင်နိုင်
မတ်လ၃၁ရက်
ငလျင်ဘေးသင့်ပြည်သူများအတွက်ကူညီရန် အမေရိကန်မှာငွေစာရင်းအကောင့်များဖွင့်လှစ်ထားရှိ၍ မည်သူမဆိုပါဝင်နိုင်ကြောင်း NUGနိုင်ငံခြားရေးဝန်ကြီးဌာနကဖော်ပြပါတယ်။
၂၀၂၅ ခုနှစ် မတ်လ ၂၈ ရက်က မြန်မာနိုင်ငံတွင် ကပ်ဘေးငလျင်တစ်ခု လှုပ်ခတ်ခဲ့ရာ ပြင်းထန်စွာ သေဆုံးဒဏ်ရာရခဲ့ပြီး သန်းနှင့်ချီသော အကူအညီများ အပူတပြင်း လိုအပ်နေခဲ့တယ်လို့ဖော်ပြပါတယ်။
ငလျင်ဘေးအန္တရာယ်ကြောင့် လူသေဆုံးစေရုံသာမက အဖိုးမဖြတ်နိုင်သော သမိုင်းဝင် အထင်ကရနေရာများဖြစ်သည့် ဘုရားကျောင်းများ၊ ဘုန်းတော်ကြီးကျောင်းများနှင့် ဗလီများနှင့် အရေးပါသော အခြေခံအဆောက်အဦများ အပါအဝင် ဆိုးရွားစွာ ပျက်စီးခဲ့ပြီးယခုအခါ မရေမတွက်နိုင်သော လူများသည် စားနပ်ရိက္ခာ၊ ရေသန့်နှင့် ဆေးဝါးအကူအညီများကဲ့သို့ မရှိမဖြစ်လိုအပ်သော ထောက်ပံ့ရေးပစ္စည်းများ ပြတ်လပ်မှုနှင့် ရင်ဆိုင်နေရတယ်လို့ဖော်ပြပါတယ်။
အဆိုပါ ကမ်ပိန်းသည် အရေးပေါ် ကယ်ဆယ်ရေးနှင့် ထိခိုက်သူများအား ထောက်ပံ့ရန် ရန်ပုံငွေ ရှာဖွေရန် ရည်ရွယ်ပြီး ပမာဏမည်မျှပင်ရှိစေကာမူ ပံ့ပိုးကူညီမှုသည် အသက်ကယ်တင်ခြင်းဆိုင်ရာ ခြားနားချက်တစ်ခုကို ဖန်တီးနိုင်ပြီးလှူဒါန်းမှုတိုင်းသည် လိုအပ်နေသူများအား တိုက်ရိုက်ပေးဆောင်သွားမယ်လို့ဆိုထားပါတယ်။
ပါဝင်လိုသူများအနေနဲ့ငွေစာရင်းများကို NUGနိုင်ငံခြားရေးဝန်ကြီးဌာန လူမှုကွန်ရက်စာမျက်နှာတွင်ဖော်ပြထားပါတယ်။
========================
📌📌 ၄။ ဗီယမ်နမ် ကယ်ဆယ်ရေးတပ်ဖွဲ့ဝင် ၁၀၆ ဦးနှင့်အတူ ရှာဖွေကယ်ဆယ်ရေး ခွေးများ၊ဆေးဘက်ဆိုင်ရာ ပစ္စည်းများနှင့် ရိက္ခာများအပါအဝင်မြန်မာနိုင်ငံရောက်ရှိ
မတ်လ၃၁ရက်
ဗီယမ်နမ် ကယ်ဆယ်ရေး တပ်ဖွဲ့ဝင် ၁၀၆ ဦးနှင့်အတူ ရှာဖွေကယ်ဆယ်ရေး ခွေးများ၊ဆေးဘက်ဆိုင်ရာ ပစ္စည်းများနှင့် ရိက္ခာများအပါအဝင် မြန်မာနိုင်ငံရောက်ရှိခဲ့တယ်လို့ သတင်းရရှိပါတယ်။
မတ် ၃၀ ရက် မွန်းလွဲပိုင်းတွင် VJ2875 နှင့် VJ2877 နံပါတ်ပါ လေယာဉ်နှစ်စင်းသည် ဗီယက်နမ်နိုင်ငံ ဟနွိုင်းမြို့ Noi Bai လေဆိပ်မှ ထွက်ခွာခဲ့ပြီး ကယ်ဆယ်ရေးတပ်ဖွဲ့ဝင်၁၀၆ဦးနှင့်အတူ ရှာဖွေကယ်ဆယ်ရေး ခွေးများဆေးဘက်ဆိုင်ရာ ပစ္စည်းများနှင့် ရိက္ခာများအပါအဝင် ကယ်ဆယ်ရေးလုပ်ငန်းများအတွက် ကုန်သေတ္တာတန်ချိန် ၆၀ ကျော်နှင့်အတူ ရန်ကုန်မြို့သို့ ပို့ဆောင်ခဲ့တယ်လို့ Vietjetsလေကြောင်းလိုင်းက အတည်ပြုဖော်ပြထားပါတယ်။
ငလျင်ဘေးဒဏ်ကြောင့် မြန်မာနိုင်ငံတွင် အရေးပေါ်အခြေအနေအတွက် ဗီယက်နမ်ပြည်သူ့လုံခြုံရေးဝန်ကြီးဌာနနှင့် အမျိုးသားကာကွယ်ရေးဝန်ကြီးဌာနသည် မြန်မာနိုင်ငံရှိ ပြည်သူများအား ကူညီပေးရန် ကိုယ်စားလှယ်အဖွဲ့တစ်ဖွဲ့ကို အမြန်စေလွှတ်ခဲ့တာဖြစ်တယ်လို့ဆိုပါတယ်။
========================
📌📌 ၅။ အမျိုးသားညီညွတ်ရေးအစိုးရ ဂျပန်နိုင်ငံဆိုင်ရာ ကိုယ်စားလှယ်ရုံးမှမြန်မာ ငလျင်ဘေးအရေးပေါ်ကူညီနိုင်ရင် ကော်မတီဖွဲ့စည်း
မတ်လ၃၁ရက်
အမျိုးသားညီညွတ်ရေးအစိုးရ ဂျပန်နိုင်ငံဆိုင်ရာ ကိုယ်စားလှယ်ရုံးအနေဖြင့် မြန်မာနိုင်ငံအတွင်း ဖြစ်ပွားခဲ့သော ငလျင်ဒဏ်ကြောင့် ပျက်ဆီးဆုံးရှုံးမှုများနှင့် ပြန်လည်ထူထောင်ရေးလုပ်ငန်းစဉ်များ၊လူသားချင်းထောက်ထားစာနာမှုဆိုင်ရာ အကူအညီများ ပံ့ပိုးကူညီဆောင်ရွက်နိုင်ရန်အတွက် အရေးပေါ်ကော်မတီတရပ်ဖွဲ့စည်းပြီးဖြစ်တယ်လို့ မတ်လ၃၁ရက် အသိပေးထုတ်ပြန်ပါတယ်။
မှန်ကန်သောမြေပြင်သတင်းအချက်အလက်များရယူနိုင်ရန် ဝန်ကြီးဌာနများနှင့်ချိတ်ဆက်ဆောင်ရွက်ကာ ဂျပန်အစိုးရ၊နိုင်ငံတကာအသိုင်းအဝိုင်းနှင့် အရပ်ဘက်အဖွဲ့အစည်းများထံမှ အကူအညီများတောင်းခံနိုင်ရန် စီစဉ်ဆောင်ရွက်လျက်ရှိတယ်လို့သတင်းထုတ်ပြန်ပါတယ်။
လက်ရှိမှာ ဂျပန်နိုင်ငံဆိုင်ရာကိုယ်စားလှယ်ရုံး မှ မတည်ငွေ ဂျပန်ယန်းငွေ ၁.၅ သန်း အပါအဝင် အများပြည်သူထံမှ လက်ခံရရှိသော ကူညီကယ်ဆယ်ရေး အလှူငွေများကို အမျိုးသားညီညွတ်ရေးအစိုးရ၊ လူသားချင်း စာနာထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာနမှတဆင့် ငလျင်ဘေးဒဏ်သင့် ပြည်သူများထံသို့ မြေပြင်ရှိ တိုက်ရိုက်ကူညီဆောင်ရွက်ပေးနေသာ အဖွဲ့အစည်းများနှင့် ချိတ်ဆက် ထောက်ပံ့ပေးသွားမည် ဖြစ်ကြောင်းဖော်ပြပါတယ်။
========================
📌📌 ၆။ စစ်ကိုင်းမြို့၊ မြတ်ကိုယ်ပိုင်ကျောင်း အဆောက်အဦပြိုကျပျက်စီး၍ ပိတ်မိနေသူ ၄ဦးအား အသက်ရှင်လျက်ကယ်ထုတ်နိုင်ခဲ့
မတ်လ၃၁ရက်
စစ်ကိုင်းမြို့၊ မြတ်ကိုယ်ပိုင်ကျောင်း အဆောက်အဦပြိုကျပျက်စီး၍ ပိတ်မိနေသူ၄ဦးအား အသက်ရှင်လျက်ကယ်ထုတ်နိုင်ခဲ့ပါတယ်။
စစ်ကိုင်းတိုင်းဒေသကြီးအတွင်း ငလျင်လှုပ်ခတ်မှုကြောင့် စစ်ကိုင်းမြို့၊ မြတ်ကိုယ်ပိုင်ကျောင်း အဆောက်အဦပြိုကျပျက်စီး၍ ပိတ်မိနေသူများအားမတ်လ ၃၀ ရက်နေ့တွင်ရှာဖွေကယ်ဆယ်ခဲ့ကြတယ်လို့ သိရပါတယ်။
ထိုသို့ရှာဖွေကယ်ဆယ်ရေးလုပ်ငန်းများဆောင်ရွက်ခဲ့ရာ အသက်ရှင်လျက်(၄)ဦးအား ကယ်ထုတ်နိုင်ခဲ့ပြီး သေဆုံးသူ(၁)ဦးတို့၏ ရုပ်အလောင်းများအား ရှာဖွေတွေ့ရှိခဲ့ပါတယ်။
========================
📌📌 ၇။ စစ်ကိုင်းမြို့ဗဟိုပြုလှုပ်ခတ်ခဲ့တဲ့ အင်အား၇.၇အဆင့်ရှိငလျင်ကြောင့် လူပေါင်း ၇ သန်းခန့် ထိခိုက်ခဲ့ပြီးဆေးရုံများ၊ တံတားများနှင့် အမွေအနှစ်နေရာများ အပါအဝင် အရေးပါသော အခြေခံအဆောက်အဦများ ဆိုးရွားစွာ ပျက်စီးခဲ့တယ်လို့ UN-HABITAT ထုတ်ပြန်
မတ်လ၃၀ရက်
စစ်ကိုင်းမြို့ဗဟိုပြုလှုပ်ခတ်ခဲ့တဲ့ အင်အား၇.၇အဆင့်ရှိငလျင်ကြောင့် လူပေါင်း ၇သန်းခန့် ထိခိုက်ခဲ့ပြီးဆေးရုံများ၊ တံတားများနှင့် အမွေအနှစ်နေရာများ အပါအဝင် အရေးပါသော အခြေခံအဆောက်အဦများ ဆိုးရွားစွာ ပျက်စီးခဲ့တယ်လို့ UN-HABITATထုတ်ပြန်ပါတယ်။
မြန်မာနိုင်ငံနှင့် ထိုင်းနိုင်ငံတို့တွင် ရစ်ခ်ျတာစကေး ၇ ဒသမ ၇ အဆင့်ရှိ ငလျင်တစ်ခု လှုပ်ခတ်ခဲ့ပြီး လူသေဆုံးမှုများနှင့် ပျက်စီးဆုံးရှုံးမှုများ ကျယ်ကျယ်ပြန့်ပြန့် ဖြစ်ပွားခဲ့တယ်လို့ဖော်ပြပြီးခန့်မှန်းခြေအားဖြင့် လူပေါင်း ၇ သန်းခန့် ထိခိုက်ခဲ့တယ်လို့ဖော်ပြပါတယ်။
UN-HABITATသည် အစိုးရများ၊ လူသားချင်းစာနာထောက်ထားမှုဆိုင်ရာအေဂျင်စီများနှင့် မိတ်ဖက်အဖွဲ့အစည်းများအား အသက်ကယ်အကူအညီနှင့် ရေရှည်ပြန်လည်ထူထောင်ရေးဆိုင်ရာဖြေရှင်းချက်များအတွက် အရင်းအမြစ်များကို စုစည်းပြီး ကြိုးပမ်းမှုများတွင် ပူးပေါင်းပါဝင်ရန် တောင်းဆိုထားတယ်လို့ဖော်ပြပါတယ်။
ငလျင်အန္တရာယ်စီမံခန့်ခွဲမှုတွင် နှစ်ပေါင်းများစွာ ကျွမ်းကျင်မှုဖြင့် UN-HABITATသည် ပံ့ပိုးကူညီရန် အသင့်ရှိနေပြီး တုံ့ပြန်ဆောင်ရွက်မှုများကို အသိပေးရန် လျင်မြန်သော ပျက်စီးဆုံးရှုံးမှု အကဲဖြတ်ခြင်းစတဲ့အရာများကို လုပ်ဆောင်နိုင်တယ်လို့ဆိုပါတယ်။
အခု တင်ပြခဲ့တဲ့ သတင်းအတွေကို Radio NUG သတင်းထောက်ကို မင်းသီဟန်မှ ပေးပို့ထားတာ ဖြစ်ပါတယ်။
========================
========================
🚩🚩 ၁။ စစ်ကောင်စီဘက်ကလုံခြုံရေးအာမခံချက်ပေးပါက ငလျင်ဘေးသင့်ပြည်သူများကိုဆေးကုသမှုစောင့်ရှောက်မှုပေးရန် ပြည်ထောင်စုဝန်ကြီးဒေါက်တာဇော်ဝေစိုးနဲ့CDMဆေးကုသမှုအဖွဲ့ မန္တလေးနဲ့နေပြည်တော်ကိုဝင်ရန်အသင့်ရှိ
မတ်လ၃၁ရက်
စစ်ကောင်စီဘက်ကလုံခြုံရေးအာမခံချက်ပေးပါက ငလျင်ဘေးသင့်ပြည်သူများကိုဆေးကုသမှုစောင့်ရှောက်မှုပေးရန် ပြည်ထောင်စုဝန်ကြီးဒေါက်တာဇော်ဝေစိုးနဲ့CDMဆေးကုသမှုအဖွဲ့ မန္တလေးနဲ့နေပြည်တော်ကိုဝင်ရန်အသင့်ရှိတယ်လို့ ပြည်ထောင်စုဝန်ကြီး ဒေါက်တာဇော်ဝေစိုးကPVTVနဲ့အင်တာဗျူးမှာပြောပါတယ်။
"ကျနော်အခုသွားဖို့အဆင်သင့်လုပ်ထားတယ်။မန္တလေးကိုသွားဖို့အဆင်သင့်လုပ်ထားတယ်။နေပြည်တော်ကိုသွားဖို့အဆင်သင့်လုပ်ထားတယ်။ဒီနေ့သူတို့သဘောတူဒီနေကျနော်သွားလို့ရပြီ။ကျနော်တင်မကဘူး။ကျနော်တို့CDM Teamတွေအဆင်သင့်ဖြစ်တယ်။အရေးပေါ် အထူးကုတွေ၊အရိုးခွဲစိပ်တွေ၊ ဆရာဝန်တွေ၊သူနာပြုတွေ အဆင်သင့်ရှိတယ်"လို့ဝန်ကြီးကပြောပါတယ်။
မတ်လ၂၉ရက်NUGအစိုးရထုတ်ပြန်ချက်တွင်လည်း စစ်ကောင်စီထိန်းချုပ်နယ်မြေများဖြစ်သော မြို့ကြီးများတွင် လုံခြုံရေးအာမခံချက်ရှိပါက အမျိုးသားညီညွတ်ရေးအစိုးရနှင့် ပူးပေါင်းဆောင်ရွက်လျက်ရှိသော CDM ကျွမ်းကျင်ဝန်ထမ်းများ အနေဖြင့် နိုင်ငံတကာကူညီကယ်ဆယ်ရေးအဖွဲ့အစည်းများနှင့် ပူပေါင်းဆောင်ရွက်၍ ငလျင်ဘေးသင့် ပြည်သူများအတွက် အရေးပေါ်ကယ်ဆယ်ရေးနှင့်ကုသရေး လုပ်ငန်းများ ဆောင်ရွက်သွားမည်ဖြစ်ကြောင်းဖော်ပြပါရှိပါတယ်။
========================
🚩🚩 ၂။ မန္တလေးမြို့ရှိ Sky Villa ကွန်ဒိုတွင် နာရီ၆၀ကျော်ကြာ မြုပ်နေသည့် အသက် ၅ နှစ်အရွယ် ကလေး ၁ ဦး၊ကိုယ်ဝန်ဆောင် အမျိုးသမီး ၁ ဦးနှင့် အသက် ၂၉ နှစ် အမျိုးသမီးတို့ကို ကယ်ဆယ်နိုင်ခဲ့
မတ်လ၃၁ရက်
မန္တလေးမြို့ရှိ Sky Villa ကွန်ဒိုတွင် နာရီ ၆၀ ကျော်ကြာ မြုပ်နေသည့် အသက် ၅ နှစ်အရွယ် ကလေး ၁ ဦး၊ကိုယ်ဝန်ဆောင် အမျိုးသမီး ၁ ဦးနှင့် အသက် ၂၉ နှစ် အမျိုးသမီးတို့ကိုတရုတ်ကယ်ဆယ်ရေးအဖွဲ့ ကယ်ဆယ်နိုင်ခဲ့တယ်လို့သိရပါတယ်။မတ်လ ၃၁ ရက်နေ့ ဒေသစံတော်ချိန် နံနက် ၅ နာရီ ၃၇ မိနစ် နှင့် ၆ နာရီ ၂၀ မိနစ်တို့တွင် ညလုံးပေါက် ကယ်ဆယ်ရာမှ တရုတ်ကယ်ဆယ်ရေးအဖွဲ့နှင့် တရုတ် Ramunion Rescue ကယ်ဆယ်ရေး အဖွဲ့တို့ ပူးပေါင်း၍ မန္တလေးမြို့ရှိ Sky Villa ကွန်တိုတွင် နာရီ ၆၀ ကျော်ကြာ မြုပ်နေသည့် အသက် ၅ နှစ်အရွယ် ကလေး ၁ ဦး၊ကိုယ်ဝန်ဆောင် အမျိုးသမီး ၁ ဦးနှင့် အသက် ၂၉ နှစ် အမျိုးသမီးတို့ကို ကယ်ဆယ်နိုင်ခဲ့ကြောင်း သိရပါတယ်။ကယ်ထုတ်ချိန်တွင် ကလေး၏ အသက်ရှင် လက္ခဏာများ ကောင်းမွန်ခဲ့ပြီး ၂ ဦးစလုံးကို ဆေးရုံသို့ ပို့ဆောင်ကုသပေးခဲ့တယ်လို့တရုတ်သံရုံးရန်ကုန်ကဖော်ပြပါတယ်။အလားတူမန္တလေးမြို့ ဂရိတ်ဝေါဟိုတယ်Great Wall Hotelတွင် ပိတ်မိနေသော အမျိုးသမီး ၁ ဦးကို တရုတ်ကယ်ဆယ်ရေးအဖွဲ့မှ ကယ်တင်ပေးနိုင်ခဲ့ပါတယ်။
မတ်လ၂၈ရက်မန္တလေးတိုင်းဒေသကြီးအတွင်း ငလျင်လှုပ်ခတ်မှုကြောင့် Sky Villa အဆောက်အဦ ပြိုကျပျက်စီးသည့်နေရာတွင် ပိတ်မိသည့်လူအများအပြားရှိခဲ့ပါတယ်။
အဆိုပါနေရာအားမတ်လ၃၁ရက်ရှာဖွေကယ်ဆယ်ရေးအဖွဲ့ဝင်များသည် တရုတ်ပြည်သူ့သမ္မတနိုင်ငံမှ ရှာဖွေကယ်ဆယ်ရေးတပ်ဖွဲ့ဝင်များနှင့်ပူးပေါင်း၍ ကူညီကယ်ဆယ်ရေးလုပ်ငန်းများ ဆောင်ရွက်ခဲ့ရာ အမျိုးသမီး(၂)ဦးအား အသက်ရှင်လျက် ကယ်ဆယ်နိုင်ခဲ့တယ်လို့သိရပါတယ်။ထို့အပြင် သေဆုံးသူ မ(၂)ဦး၏ ရုပ်အလောင်းများအား ရှာဖွေတွေ့ရှိခဲ့ပြီး ရှာဖွေကယ်ဆယ်ရေးလုပ်ငန်းများ ဆက်လက်ဆောင်ရွက်လျက်ရှိတယ်လို့သိရပါတယ်။
လတ်တလောမှာမန္တလေးမြို့ရှိ Sky Villa အဆောက်အဦအောက်တွင် မိသားစုဝင်များအသက်ရှင်လျက်ရှိနေသေးသည်ဟု မြေပြင်ပေါ်ရှိ မိသားစုဝင်များက ယုံကြည်ထားကြပါတယ်။
========================
🚩🚩 ၃။ မြန်မာငလျင်ဘေးသင့်ပြည်သူပြည်သားများကို တတ်နိုင်တဲ့ဘက်ကကူညီပါဝင်မယ်လို့ KIOနဲ့KNUတို့အသီးသီးထုတ်ပြန်
မတ်လ၃၁ရက်
မြန်မာငလျင်ဘေးသင့်ပြည်သူပြည်သားများကို တတ်နိုင်တဲ့ဘက်ကကူညီပါဝင်မယ်လို့ KIOနဲ့KNUတို့ အသီးသီးထုတ်ပြန်လိုက်ပါတယ်။
မတ်လ၃၀ရက်KIOရဲ့ထုတ်ပြန်ချက်အရ အင်အားအလွန်ပြင်းမြေငလျင်ကြောင့် မန္တလေးတိုင်း၊စစ်ကိုင်းတိုင်း၊ရှမ်းပြည်နယ်တောင်ပိုင်း၊မကွေးတိုင်း၊ပဲခူးတိုင်းတို့ရှိမြို့၊ရွာတို့ရှိ လူ့အသက်များစွာ သေဆုံးခြင်း၊ပျောက်ဆုံးခြင်း၊ထိခိုက်ခြင်းနဲ့လူနေအိမ်နဲ့အဆောက်အဦများပြိုကျပျက်စီးတို့အပေါ်KIOနဲ့ကချင်ပြည်သူလူထုကလည်းထပ်တူ ကြေကွဲဝမ်းနည်းရတယ်လို့ဖော်ပြပါတယ်။
ထို့အပြင်မြို့ရွာများပြန်လည်ထူထောင်ရေးနဲ့ လူသားချင်းစာနာထောက်သားသောအကူအညီများကို KIOနဲ့ကချင်လူထုတရပ်လုံးကတတ်နိုင်တဲ့ဘက်က ပံ့ပိုးကူညီဆောင်ရွက်သွားမယ်လို့ဆိုပါတယ်။
အလားတူ မြေငလျင်ဒဏ်ကြောင့် အသက်အိုးအိမ်စည်းစိမ် မြောက်မြားစွာ ပျက်စီးဆုံးရှုံးခဲ့ရမှုများနှင့် ပတ်သက်၍ ကေအဲန်ယူ-ကရင်အမျိုးသားအစည်းအရုံး (KNU) အနေဖြင့် အများပြည်သူတို့နှင့်အတူ ထပ်တူထပ်မျှ ကြေကွဲဝမ်းနည်းရတယ်လို့ထုတ်ပြန်ပါတယ်။(KNU) အနေဖြင့်လည်း အရေးပေါ်လိုအပ်မှုများကို တုံ့ပြန်ကူညီဆောင်ရွက်နိုင်ရန် ကိုယ်စွမ်း၊ ဉာဏ်စွမ်းရှိသ၍ တတ်နိုင်သည့်နည်းလမ်းမှ ပါဝင်သွားမည်ဖြစ်ကြောင်း ကြေညာထားပါတယ်။
========================
🚩🚩 ၄။ ပြင်းထန်ငလျင်ကြောင့် သေဆုံးခဲ့ရတဲ့ ပြည်သူ(၂) ဦးကို ရွှေဘိုပကဖ ထောက်ပံ့ပေးအပ်မှုများပြုလုပ်
မတ်လ၃၁ရက်
ငလျင်ဒဏ်ကြောင့် သေဆုံးခဲ့ရတဲ့ ကံသာကုန်းရွာက ပြည်သူ (၂) ဦးရဲ့ မိသားစုဝင်တွေကို ရွှေဘိုမြို့နယ်ပကဖ ကထောက်ပံ့ ငွေပေးအပ်ကာ အားပေးစကား ပြောကြားခဲ့တယ်လို့ ပကဖအသံကဖော်ပြပါတယ်။
ထို့အပြင် ငလျင်လှုပ်ခက်မှုတွင် ပြိုကျပျက်စီးခဲ့ရတဲ့ ကံသာကုန်းဗလီ အား ကွင်းဆင်းကြည့်ရှုကာ လိုအပ်တဲ့ထောက်ပံ့ပစွည်းတွေကို ပေးအပ်ခဲ့တယ်လို့ သိရပါတယ်။
သဘာဝဘေးကိုကြုံတွေ့ခဲ့ရတဲ့ ပြည်သူများရဲ့အခက်အခဲတွေကို ပြည်သူကာကွယ်ရေးတပ်မတော်နဲ့ ပြည်သူ့ကာကွယ်ရေးအဖွဲ့ တွေက မိမိနယ်မြေ အတွင်းရှိ တော်လှန်ရေးအဖွဲ့အစည်းတွေနဲ့ ပေါင်းစပ်ညှိနိုင်းကာ တက်စွမ်းသမျှအစွမ်းကုန် ကူညီကြဖို့ အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၊ ပြည်ထောင်စု၀န်ကြီး ဦးရည်မွန်က မတ်လ (၂၈) ရက်က ညွှန်ကြားထားပါတယ်။
========================
🚩🚩 ၅။ ZFU/PDF ZOLAND တည်ထောင်မှု ၄ နှစ်ပြည့်ခဲ့
မတ်လ၃၁ရက်
ZFU/PDF ZOLAND တည်ထောင်မှု ၄ နှစ်ပြည့်ခဲ့ပြီလို့ မတ်လ၃၁ရက်မှာ အသိပေးထုတ်ပြန်ပါတယ်။
"မြန်မာနိုင်ငံ စစ်အာဏာရှင်လက်အောက်ကလွတ်မြောက်ဖို့အတွက်ကျွန်တော်/ကျမ တို့ ZFU/PDF ZOLAND တည်ထောင်ခဲ့တာ ဒီနေ့ဆို ၄ နှစ်ပြည့်ခဲ့ပါပြီ။ ဒီ ၄ နှစ်တာကာအတွင်းမှာ ZFU/PDF ZOLAND သည်ပေးဆပ်မှုပေါင်းများစွာရှိခဲ့ပါတယ်။ပြန်မရနိုင်တဲ့အသက်တွေအပြင် ကိုယ်လက်င်္အဂါတွေဆုံရှုံးပြီးတော့ တော်လှန်ရေးကိုပေးဆပ်အနစ်နာခံခဲ့ကြပါတယ်။ ဒီပေးဆပ်ကြိုးစားမှုတွေကြောင့် ZFU/PDF ZOLANG နဲ့ ထိုက်တန်သောအောင်မြင်မှုများစွာရရှိခဲ့ပါတယ်။ ဒီအောင်မြင်မှုတွေဟာကျွန်တော်တို့ရဲ့ခွန်အားတခုတည်းကြောင့်မဟုတ်ပဲ ပြည်သူလူထုအားလုံးရဲ့ထောက်ခံတွန်းအား နဲ့ ရဲဘော်တွေရဲ့ မဆုတ်မနစ်စည်းစည်းလုံးလုံးကြိုးစားအားထုတ်မှုတွေကြောင့်ရယ် ဘုရားသခင်ရဲ့ကာကွယ်စောက်ရှောက်မှုရယ်ကြောင့်ဖြစ်ပါတယ်"လို့ဆိုပါတယ်။
၄ နှစ်ပြည့် ZFU/PDF ZOLANDသို့သဝဏ်လွှာများလည်းအသီးသီးပေးအပ်ခဲ့ကြပါတယ်။
========================
🚩🚩 ၆။ ကယန်းအမျိုးသားတပ်မတော် KNA က အမှတ် (၂၁၀၃) တပ်ရင်းရုံးတစ်ခုကို လွိုင်ကော်ဒေသတစ်နေရာတွင် ဖွင့်လှစ်
မတ်လ၃၁ရက်
ကယန်းအမျိုးသားတပ်မတော် KNA အနေဖြင့် မတ်လ၃၀ ရက်တွင် အမှတ် (၂၁၀၃) တပ်ရင်းရုံးတစ်ခုကို လွိုင်ကော်ဒေသတစ်နေရာတွင် ဖွင့်လှစ်ခဲ့တယ်လို့ဆိုပါတယ်။
ရုံးဖွင့်ပွဲကို မဟာမိတ်ကိုယ်စားလှယ်တစ်ချို့နှင့် ဒေသခံရပ်မိရပ်ဖ ပြည်သူအချို့ပါဝင်တက်ရောက်ခဲ့တယ်လို့ ကယန်းအမျိုးသားတပ်မတော် (KNA)ကဖော်ပြပါတယ်။
========================
🚩🚩 ၇။ မြန်မာနိုင်ငံသား အိုင်တီပညာရှင်များ ဖန်တီးထားတဲ့ ငလျင်အသိပေး Telegram ChatBot လေး တခု မျှဝေထား
မတ်လ ၃၁ရက်
ငလျင်နဲ့ပတ်သက်ပြီး အများပြည်သူတွေဒုက္ခရောက်နေချိန်မှာ မြန်မာနိုင်ငံသား အိုင်တီပညာရှင်များလုပ်ဆောင်ထားတဲ့ Studio Next Stepsမှ ဖန်တီးထားတဲ့ ငလျင်အသိပေး Telegram ChatBot လေး တခု မျှဝေပေးချင်ပါတယ်။ အဆိုပါ Bot ကနေ ငလျင်လှုပ်ခတ်မှုအကြောင်းအရာများကို ထိုင်းနိုင်ငံမိုးဇလဌာနမှ အချိန်နှင့်တပြေးညီ ရယူပြီး အကြောင်းကြားပေးတဲ့ စနစ်တခုဖြစ်ပါတယ်။ အချက်အလက်များကို မြန်မာ၊ အင်္ဂလိပ် ၂ ဘာသာနဲ့ ပေးပို့ပါတယ်။”လုံခြုံစိတ်ချရတဲ့ ChatBot ဖြစ်တဲ့ အတွက်ကြောင့် စိတ်ချစွာအသုံးပြုနိုင်တဲ့အတွက် အသုံးပြုကြဖို့လည်း နှိုးဆော်ချင်ပါတယ်။ ပြန်လည်မျှဝေလို့လည်း ရပါတယ်ခင်ဗျ”လို့ ဆိုထားပါတယ်။
အသုံးပြုရန်လမ်းညွှန် အနေနဲ့ 👉 Telegram Install လုပ်ထားတဲ့ Mobile Device များမှာ ဖုန်းမှာပါတဲ့ ကင်မရာဖြင့် အောက်ပါ QR code ကို Scan ဖတ်ပြီး ထည့်သွင်းပြီးပါက Start ခလုပ်ကို နှိပ်ပြီး အသုံးပြုနိုင်ပါပြီ။ဒီTelegram ChatBotကို မြန်မာ ထိုင်းအပါအဝင် အခြားသောနိုင်ငံများမှပြည်သူများအနေဖြင့်လည်း အသုံးပြုနိုင်ကြောင်း သိရပါတယ်။
အခုတင်ပြခဲ့တဲ့ သတင်းကိုတော့ Radio NUGသတင်းထောက် မင်းသီဟန်မှ ပေးပို့ထားတာဖြစ်ပါတယ်
No comments:
Post a Comment