26 Apr 2025 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၅ ဧပြီလ ( ၂၆ ) ရက်နေ့နောက်ဆုံးရပြည်တွင်းသတင်းများ

📌📌 ၁။ မြို့သိမ်းစစ်ဆင်ရေးအတွက် လူငယ်တွေ ပါဝင်ဖို့ CDF – Hakhaပြော။

 

ချင်းပြည်ရဲ့ မြို့တော် ဟားခါးမြို့သိမ်းစစ်ဆင်ရေးအတွက် လူငယ်တွေအနေနဲ့ ပူးပေါင်းပါဝင်ကြဖို့ဆိုတဲ့ ကြေညာချက်ကို Chinland Defense Force – Hakha က ဧပြီလ ၂၃ရက်နေ့က ထုတ်ပြန်လာပါတယ်။

တိုင်းပြည်နဲ့ လူမျိုး လွတ်မြောက်ရေးဟာ အားလုံးရဲ့တာဝန်ဖြစ်လို့ မိဘတွေအနေနဲ့လည်း မိမိတို့ကလေးတွေကို မြို့သိမ်းစစ်ဆင်ရေးမှာ ပါဝင်လာနိုင်အောင် တိုက်တွန်းကြဖို့ အဲဒီကြေညာချက်မှာ ဖော်ပြပါတယ်။ 

လူငယ်တွေအနေနဲ့ အချိန်ပြည့်တပ်ဖွဲ့ဝင်အဖြစ်ပါဝင်နိုင်သလို၊ အချိန်ပြည့်တပ်ဖွဲ့ဝင်အဖြစ်မပါဝင်နိုင်ခဲ့ရင် အရန်တပ်ဖွဲ့ဝင်အနေနဲ့ပါဝင်နိုင်တယ်လို့ CDF – Hakha က ဆိုပါတယ်။

လက်ရှိချင်းပြည်မှာ မြို့အတော်အများကို ချင်းတော်လှန်ရေးအင်အားစုတွေက သိမ်းပိုက်ထိန်းချုပ်ထားပြီး စစ်ကောင်စီက ထိန်းချုပ်ထားဆဲဖြစ်တဲ့မြို့တွေအဖြစ် ဟားခါး၊ ထန်တလန်၊ တီးတိန် မြို့ ၃ မြို့ပဲ ကျန်ရှိတော့တာပါ။ ဟားခါးမှာ စစ်ကောင်စီဗျူဟာနဲ့ အမှတ် ၂၆၆ ခြေလျင်တပ်ရင်း၊ တီးတိန်မှာ အမှတ် ၂၆၉ ခြေလျင်တပ်ရင်း တည်ရှိပါတယ်။ 

ဟားခါးမြို့ဟာ ထန်တလန်မြို့နဲ့ မိုင်ပေါင်း ၂၀ ကျော်အကွာမှာတည်ရှိပြီး ၂၀၂၅ ဧပြီလအစောပိုင်း ‘ချင်းညီနောင်’ သိမ်းပိုက်ထိန်းချုပ်တဲ့ ဖလမ်းမြို့နဲ့လည်း မိုင် ၄၀ ဝန်းကျင်အကွာမှာ တည်ရှိပါတယ်။

========================

📌📌 ၂။ စစ်ကောင်စီ ဗုံးကြဲလို့ ၁၀ ရက်အတွင်း ချင်းပြည်သူ ၁၃ ဦးအထိ သေဆုံး။

 

ချင်းပြည်မှာ ၂၀၂၅ ဧပြီလဒုတိယအပတ်ထဲ လေကြောင်းတိုက်ခိုက်မှု ပြင်းပြင်း ထန်ထန်ခံရလို့ အရပ်သား ၁၃ ဦးအထိသေဆုံးပြီး ၁၀ ဦးထက်မနည်း ထိခိုက်ဒဏ်ရာရသလို အဆောက်အအုံပျက်စီးထိခိုက်မှုလည်း ၁၀၀ ဝန်းကျင်အထိ ရှိနေပါတယ်။

မင်းတပ်၊ တီးတိန်၊ ကန်ပက်လက်၊ မတူပီတွေမှာ ဧပြီလ ရက်ပေါင်း ၂၀ ဝန်းကျင်အတွင်း စစ်ကောင်စီက လေကြောင်းဗုံးကြဲတိုက်ခိုက်မှုအကြိမ် ၂၀ ကျော် ပြုလုပ်ခဲ့တာပါ။

မင်းတပ်မြို့နယ်မှာ လေကြောင်းဗုံးကြဲတိုက်ခိုက်ခံရတဲ့ ဧပြီ ၁၊ ၉၊ ၁၃ ရက်နေ့တွေမှာ ပြည်သူ ၆ ဦးအထိသေဆုံးပြီး ထိခိုက်ဒဏ်ရာရသူ ၁၀ ဦးထက်မနည်းရှိတယ်လို့ ပြည်သူ့အုပ်ချုပ်ရေးအဖွဲ့ရဲ့ ထုတ်ပြန်ချက်အရ သိရပါတယ်။ ဘုရားရှစ်ခိုးကျောင်း ၂ ကျောင်းအပါအဝင် အဆောက်အအုံ ၃၀ ကျော် ပျက်စီးတယ်လို့လည်း ဆိုပါတယ်။ 

ကန်ပက်လက်မြို့နယ်မှာတော့ ဧပြီလအတွင်း စစ်ကောင်စီလေကြောင်းတိုက်ခိုက်မှု ၇ ကြိမ်ပြုလုပ်ကြောင့် အရပ်သား ၁ ဦးသေဆုံးပြီး ထိခိုက်သူ ၁ ဦးနဲ့ အဆောက်အအုံ ၆၀ ကျော် ပျက်စီးတယ်လို့ ပြည်သူ့အုပ်ချုပ်ရေးအဖွဲ့က ဧပြီ ၁၈ ရက်နေ့ ထုတ်ပြန်ပါတယ်။

တီးတိန်မြို့နယ်မှာလည်း ဧပြီ ၉ ရက်နေ့ည ၁၁ နာရီကျော်က လေကြောင်းတိုက်ခိုက်ခံရလို့ ကလေး၊ အမျိုးသမီး ၆ ဦး ပွဲချင်းပြီး သေဆုံးပြီး အဆောက်အအုံတွေပါ ထိခိုက်မှုများခဲ့ပါတယ်။

မတူပီမှာတော့ ၂၀၂၅ ဧပြီ ၁၇ ရက်နေ့ မွန်းလွဲပိုင်း ၂ ကြိမ်လေကြောင်းဗုံးကြဲခံရလို့ အရပ်သား ၅ ဦးထိခိုက်ဒဏ်ရာရပြီး လူနေအိမ်အဆောက်အအုံတွေ ပျက်စီးတယ်လို့ ကြားသိရပါတယ်။ 

========================

📌📌 ၃။ ချင်းပြည်တစ်ခုလုံး လွတ်မြောက်ရေး စွမ်းစွမ်းတမံပူးပေါင်းသွားမယ်လို့ ချင်းကာကွယ်ရေးတပ်ဖွဲ့ - မင်းတပ် စစ်ဦးစီးချုပ် ပြောကြား။

 

ချင်းပြည်တစ်ခုလုံးသာမက တစ်နိုင်ငံလုံး လွတ်မြောက်ရေးအတွက် စွမ်းစွမ်းတမံပူးပေါင်းဆောင်ရွက်သွားမယ်လို့ ချင်းကာကွယ်ရေးတပ်ဖွဲ့ - မင်းတပ် စစ်ဦးစီးချုပ် ဆလိုင်းထန်းချွမ်ဖေက ပြောကြားပါတယ်။

ဧပြီလ ၂၄ရက်မှာ ကျရောက်တဲ့ ချင်းကာကွယ်ရေးတပ်ဖွဲ့ - မင်းတပ်ရဲ့ တော်လှန်ရေး ၄ နှစ်ပြည့် မိန့်ခွန်းမှာ အခုလို ပြောကြားတာပါ။

“ကျနော်တို့ ချင်းညီနောင်က ဆက်ပြီးဖော်ဆောင်ရမယ့် တီးတိန်စစ်ဆင်ရေး၊ ထိုနည်းတူ ချင်းပြည်မှာ လွတ်မြောက်ဖို့ ကျန်ရှိနေတဲ့ ဟားခါး၊ ထန်တလန်မြို့တွေ လွတ်မြောက်နိုင်ဖို့အတွက် စွမ်းစွမ်းတမံပူးပေါင်း ဆောင်ရွက်သွားပါမယ်။” လို့ ပြောပါတယ်။

တော်လှန်ရေးကာလ အာဏာရှင်တော်လှန်ရေး အသက်ခန္ဓာပေးဆပ်ကြတဲ့ ရဲဘော်၊ ဘက်ပေါင်းစုံကနေ တော်လှန်နေကြသူအားလုံးကို လေးစားဂုဏ်ပြုတယ်လို့လည်း မိန့်ခွန်းမှာ ထည့်သွင်းပြောကြားပါတယ်။

ပြည်သူတွေအနေနဲ့ ချင်းညီနောင်အဖွဲ့ဝင်တော်လှန်ရေးအင်အားစုတွေကို ဆက်ပြီး အားပေးပံ့ပိုးပေးကြဖို့လည်း ချင်းကာကွယ်ရေးတပ်ဖွဲ့ - မင်းတပ် စစ်ဦးစီးချုပ်က ဖော်ပြပါတယ်။

မိတ်ဆွေကောင်းပီသတဲ့ မဟာမိတ်အင်အားစုအားလုံးကို ကျေးဇူးတင်ရှိပြီး နောက်နောင် နှစ်ဖက်ပြည်သူတွေ အကျိုးရှိအောင် အပြန်အလှန် ဆက်လက်ပံ့ပိုးပေးသွားနိုင်ဖို့ လုပ်ဆောင်နေတယ်လို့လည်း ချင်းကာကွယ်ရေးတပ်ဖွဲ့ - မင်းတပ် တော်လှန်ရေး ၄ နှစ်ပြည့် မိန့်ခွန်းမှာ စစ်ဦးစီးချုပ်က ထည့်သွင်း ပြောကြားပါတယ်။

ချင်းကာကွယ်ရေးတပ်ဖွဲ့ - မင်းတပ်အနေနဲ့ ဒေသတွင်း အာဏာရှင်စနစ်ပပျောက်ရေး၊ ကိုယ့်ကြမ္မာကိုယ်ဖန်တီးရေးသာမက၊ ချင်းပြည်နဲ့ တနိုင်ငံလုံးလွတ်မြောက်ရေးအတွက်ပါ တတောင့်တနေရာကနေ ကြိုးစားပေးဆပ်ရင်း တော်လှန်ရေးခရီးကို ရှေ့ဆက်သွားမယ်လို့လည်း ပြောကြားထားပါတယ်။ 

၂၀၂၁ ဖေဖော်ဝါရီလက စစ်ကောင်စီအာဏာသိမ်းတာကြောင့် မင်းတပ်မြို့နယ် ဒေသခံတွေဟာ ငြိမ်းငြိမ်းချမ်းချမ်းနဲ့ ဆန့်ကျင်ဆန္ဒထုတ်ဖော်ခဲ့ကြပါတယ်။

၂၀၂၁ ဧပြီ ၂၄ ရက်မှာတော့ မင်းတပ်မြို့ထဲ ဆန္ဒထုတ်ဖော်တဲ့ စာတန်းပါစာစောင်ကိုင်ဆောင်တဲ့ လူငယ် ၇ ဦးကို စစ်ကောင်စီတပ်က ဖမ်းဆီးခဲ့တဲ့နောက် အဲဒီညပိုင်းမှာ စစ်ကောင်စီတပ်တွေကို ချင်းကာကွယ်ရေးတပ်ဖွဲ့ - မင်းတပ် က ပစ်ခတ် တိုက်ခို၊က်ခဲ့လို့ အဲဒီနေ့ကို တော်လှန်ရေးနေ့အဖြစ် သတ်မှတ်ခဲ့ကြတာ ဖြစ်ပါတယ်။

#RadioNUGLocalNews

#SpringRevolution