၂၀၂၅ ဧပြီလ ၅ ရက်နေ့ မနက်ခင်း နောက်ဆုံးရပြည်တွင်းသတင်းများ
📌 ၁။ အစိုးရပီသတဲ့ အစိုးရတစ်ရပ်ရဲ့ စီမံအုပ်ချုပ်မှုအောက်မှာသာ သဘာဝဘေးတွေ ရင်ဆိုင်ရရင် တိုင်းပြည်ဟာ ဒီလောက်အခြေအနေဆိုးမှာ မဟုတ်ဘူးလို့ ပြည်ထောင်စုဝန်ကြီးချုပ် ပြောကြား
📌 ၂။ NUG Public Affairs Hotline က ငလျင်ဘေးသင့်ပြည်သူများအတွက် ဝန်ဆောင်မှုများကို နေ့စဉ် နံနက် ၁၀ နာရီမှ ည ၁၀ နာရီအထိ ဆောင်ရွက်ပေးနေပြီဖြစ်ကြောင်း အသိပေးကြေညာ
📌 ၃။ NUG လူသားချင်း စာနာထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာနက ငလျင်ဘေးသင့်မြို့နယ်များအား ငွေကျပ် သိန်း ၁ သောင်း ၂ထောင်ကျော် ထောက်ပံ့ထား
📌 ၄။ မြန်မာ့ဒီမိုကရေစီအရေးအား ထောက်ခံအားပေးသော ပါတီစုံလွှတ်တော်အမတ်များသမဂ္ဂ၏ အရေးပေါ် အစည်းအဝေးကျင်းပ
📌 ၅။ အရေးပေါ် ကူညီကယ်ဆယ်ရေးဆိုင်ရာ ပေါင်းစပ်ညှိနှိုင်းရေးမှူး Tom Fletcher မြန်မာနိုင်ငံသို့ လာမည်ဖြစ်ပြီး မြန်မာနိုင်ငံဆိုင်ရာ အထူးကိုယ်စားလှယ် Julie Bishop ကိုလည်း ရက်ပိုင်းအတွင်း မြန်မာသို့ စေလွှတ်မည်ဟု ကုလသမဂ္ဂ အတွင်းရေးမှူးချုပ် ပြောကြား
📌 ၆။ ယူကေအစိုးရ၏ ငလျင်ဒဏ်ပျက်စီးမှုများအတွက် ရန်ပုံငွေများသည် မြန်မာစစ်တပ်ထံသို့ စီးဆင်းခြင်းလုံးဝမရှိကြောင်း ထုတ်ပြန်
📌 ၇။ မန္တလေးမှာ ဂျပန်အရေးပေါ်ကယ်ဆယ်ရေး ဆေးဘက်ဆိုင်ရာ နည်းပညာအဖွဲ့ (JDR) ဆေးကုသမှုစတင်ကြောင်း ဂျပန်သံရုံးထုတ်ပြန်
📌 ၈။ မြန်မာနိုင်ငံကို အမေရိကန်ဒေါ်လာ သန်း ၂၀ ကျော်တန်ဖိုးရှိ လူသားချင်းစာနာမှုအကူအညီများပေးရန် Quad မဟာမိတ်အဖွဲ့ ကတိပြု
========================
၂၀၂၅ ခုနှစ် ဧပြီလ ၅ ရက်နေ့ မနက်ပိုင်းမှာတင်ပြပေးမယ့် Radio NUG စစ်ရေးနှင့် ငလျင်ဘေးဒဏ်သတင်းကောက်နုတ်ချက်များ
🚩 ၁။ ဖယ်ခုံမြို့နယ် ခေါင်းအိရွာသစ်ကို အကြမ်းဖက်စစ်ကောင်စီမှ အသေခံဒရုန်း ၂စီးဖြင့် တိုက်ခိုက်ရာ ၁စီး ပစ်ချနိုင်ခဲ့
🚩 ၂။ မိုးဗြဲ ခမရ ၄၂၂က ပီကင်းကောခူကျေးရွာကို လက်နက်ကြီးနှင့် ပစ်ခတ်ပြီး လေကြောင်းတိုက်ခိုက်မှုကြောင့် ပြည်သူ ၅ ဦး သေဆုံးပြီး အများအပြား ထိခိုက်
🚩 ၃။ စဉ့်ကူးနှင့် မတ္တရာမြို့နယ်အတွင်း ငလျင်ဒဏ်ကြောင့် ထိခိုက်ဒဏ်ရာရရှိသူများနှင့် သေဆုံးသူမိသားစုများအား ပကဖ၊ ပအဖနှင့် တပ်ရင်းတပ်ဖွဲ့များ စုပေါင်း၍ ကူညီကယ်ဆယ်လှူဒါန်းမှုများ ပြုလုပ်
🚩 ၄။ ဖြူးမြို့နယ်အတွင်းရှိ ငလျင်ကြောင့် ပျက်စီးသွားသော နေအိမ် (၄၅) လုံးအတွက် PDF၊ ပကဖများ သွားရောက်လှူဒါန်း
🚩 ၅။ ငလျင်ဘေးဒဏ် ခံစားနေရသည့် ပြည်သူများထံသို့ ငွေကျပ် သိန်း ခြောက်ရာ့လေးဆယ် ကျပ်တိတိ ပေးပို့ကူညီ
ဤသတင်းများကို ရေဒီယိုအန်ယူဂျီသတင်းတာဝန်ခံများနှင့် ခိုင်လုံသော မိတ်ဖက်သတင်းရင်းမြစ်များဆီမှ အခြေခံတင်ပြထားခြင်း ဖြစ်ပါတယ်။
========================
📌📌 ၁။ အစိုးရပီသတဲ့ အစိုးရတစ်ရပ်ရဲ့ စီမံအုပ်ချုပ်မှုအောက်မှာသာ သဘာဝဘေးတွေ ရင်ဆိုင်ရရင် တိုင်းပြည်ဟာ ဒီလောက်အခြေအနေဆိုးမှာ မဟုတ်ဘူးလို့ ပြည်ထောင်စုဝန်ကြီးချုပ် ပြောကြား
ဧပြီ ၄
Radio NUG
အမျိုးသားညီညွတ်ရေးအစိုးရ၊ ကြားကာလဒေသန္တရ ပြည်သူ့အုပ်ချုပ်ရေးဖော်ဆောင်မှု ဗဟိုကော်မတီ အစည်းအဝေးအမှတ်စဉ် (၁၃/၂၀၂၅)ကို ဧပြီလ(၃) ရက်နေ့ နံနက် (၁၀:၀၀) နာရီ အချိန်တွင် ကျင်းပပြုလုပ်ခဲ့ရာ အစည်းအဝေးတွင် ကြားကာလဒေသန္တရ ပြည်သူ့အုပ်ချုပ်ရေး ဖော်ဆောင်မှု ဗဟိုကော်မတီဥက္ကဋ္ဌ ပြည်ထောင်စုဝန်ကြီးချုပ် မန်းဝင်းခိုင်သန်းက အဖွင့်အမှာ စကားပြောကြားရာမှာ "ဒီတော်လှန်ရေးမြန်မြန် အောင်ပွဲရပြီး ဆိုးရွားလွန်းတဲ့ စစ်မိစ္ဆာတွေကို အပြီးတိုင် ချေမှုန်းနိုင်ဖို့ သိပ်အရေးကြီးပါကြောင်း၊ လူကြောင့်ဖြစ်တဲ့ဘေးကတော့ အားလုံးသိပြီးသားမို့ မပြော လိုတော့ပေမယ့် ဒီလိုဆိုးရွားတဲ့ သဘာဝဘေးကို ကြုံတိုင်း ပုံမှန်ကာလအရပ်သားအစိုးရလက်ထက်မှာ ကြုံခဲ့ရတဲ့ Covid ကပ်ဆိုးကြီးကို ဖြတ်သန်းခဲ့ချိန်နဲ့ ချိန်ထိုးစဥ်းစားမိရင် အင်မတန် ဝမ်းနည်းရပါကြောင်း၊ အစိုးရပီသတဲ့ အစိုးရတစ်ရပ်ရဲ့ စီမံအုပ်ချုပ်မှုအောက်မှာသာ ဒီလိုဘေးတွေ ရင်ဆိုင်ရရင် တိုင်းပြည်ဟာ ဒီလောက်အခြေအနေဆိုးမှာ မဟုတ်ဘူးဆိုတာ အားလုံးလည်း နားလည်လက်ခံလိမ့်မယ် ထင်ပါကြောင်း၊ ဒါကြောင့် တိုင်းပြည်ကို နည်းမျိုးစုံနဲ့ ဒုက္ခပေးနေတဲ့ ဒီစစ်မိစ္ဆာတွေမရှိမှသာ ကျွန်တော်တို့ တိုင်းပြည်ဟာ နလန်ထူနိုင်မှာဖြစ်ပါကြောင်း၊ ဒါကြောင့် ဘယ်လို အရေးကိစ္စတွေပဲ ကြုံကြုံ ကျွန်တော်တို့ရဲ့အဓိက ရည်မှန်းချက်ကို မျက်ခြေမပျက်စေပဲ အားသွန်ခွန်စိုက် အလုပ်ဆက်လုပ်ကြဖို့" ပြောကြားခဲ့ပါတယ်။
========================
📌📌 ၂။ NUG Public Affairs Hotline က ငလျင်ဘေးသင့်ပြည်သူများအတွက် ဝန်ဆောင်မှုများကို နေ့စဉ် နံနက် ၁၀ နာရီမှ ည ၁၀ နာရီအထိ ဆောင်ရွက်ပေးနေပြီဖြစ်ကြောင်း အသိပေးကြေညာ
ဧပြီ ၄
Radio NUG
NUG Public Affairs Hotline က ငလျင်ဘေးသင့်ပြည်သူများအတွက် ဝန်ဆောင်မှုများကို နေ့စဉ် နံနက် ၁၀ နာရီမှ ည ၁၀ နာရီအထိ ဆောင်ရွက်ပေးနေပြီဖြစ်ပါကြောင်း အမျိုးသားညီညွတ်ရေးအစိုးရမှ အသိပေးကြေညာပါတယ်။
ပြည်တွင်း/ပြည်ပ၊ ရပ်ဝေး/ရပ်နီးတွင် ရောက်ရှိနေပြီး ငလျင်ဒဏ်ကြောင့် မိသားစုနှင့် အဆက်သွယ်ပြတ်တောက်နေသူများအား အမျိုးသားညီညွတ်ရေးအစိုးရ ထိန်းချုပ်နယ်မြေများအတွင်းဖြစ်ပါက မိသားစု၏ အခြေအနေကို စုံစမ်းပေးခြင်း၊ ငလျင်ဘေးအတွက် လှူဒါန်းနိုင်မည့် ယုံကြည်စိတ်ချရသော အဖွဲ့အစည်းများထံ လမ်းညွှန်ပေးခြင်းနှင့် ချိတ်ဆက်ပေးခြင်း၊ ငလျင်ဘေးဒဏ်ကြောင့် ကြုံတွေ့နေရသော အခက်ခဲများနှင့် လိုအပ်ချက်များအား သတင်းပို့နိုင်ခြင်းနှင့် ကျန်းမာရေး၊ နေထိုင်စားသောက်ရေး၊ ကယ်ဆယ်ရေးရရှိနိုင်သော အကူညီများသို့ လမ်းညွှန်ချိတ်ဆက်ပေးခြင်း၊ ယခု ကာလအတွင်း စစ်ကောင်စီတပ်ဖွဲ့ဝင်နှင့် အပေါင်းအပါများ၏ အကျင့်ပျက်ခြစားမှုများနှင့် မတရားဖိနှိပ်မှုများရှိပါက ဖြစ်စဉ်အပြည့်အစုံကို အထောက်ထားများနှင့် သတင်းပေးပို့နိုင်ခြင်း စသည်တို့ကို ကူညီဆောင်ရွက်သွားမည်ဖြစ်တယ်လို့ ဖော်ပြထားပါတယ်။
Hotline အချိန်ပြင်ပဖြစ်ပါက ပြည်သူ့ရင်ခွင်သို့လည်း (၂၄) နာရီလာရောက်ဆက်သွယ်နိုင်ကြောင်း အသိပေးထားပါတယ်။
========================
📌📌 ၃။ NUG လူသားချင်း စာနာထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာနက ငလျင်ဘေးသင့်မြို့နယ်များအား ငွေကျပ် သိန်း ၁ သောင်း ၂ထောင်ကျော် ထောက်ပံ့ထား
ဧပြီ ၄
Radio NUG
အမျိုးသားညီညွတ်ရေးအစိုးရ၊ လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာနက ငလျင်ဘေးသင့် မြို့နယ်များအား ရန်ပုံငွေထောက်ပံ့ထားရှိမှု အခြေအနေ ဆောင်ရွက်ချက်များကို အများပြည်သူသိရှိနိုင်စေရန် ဧပြီလ ၄ရက်နေ့တွင် အစီရင်ခံတင်ပြထားပါတယ်။
ငလျင်ဘေးသင့်မြို့နယ် ၂၄ မြို့နယ်အတွက် ငွေကျပ်သိန်းပေါင်း ၁,၂၀၀,၀၂၆,၀၀၀ ကျပ် ထောက်ပံ့ပေးခဲ့တယ်လို့ ဖော်ပြထားပါတယ်။
မန္တလေးတိုင်းဒေသကြီးကို ၇၈၅, ၉၂၆,၀၀၀(သိန်းခုနှစ်ထောင် ရှစ်ရာငါးဆယ့်ကိုးသိန်းနှစ်သောင်းခြောက်ထောင်) ကျပ်၊ စစ်ကိုင်းတိုင်းဒေသကြီးနှင့် အိန္ဒိယနယ်စပ်တို့ကို ၁၅၀,၅၀၀,၀၀၀(သိန်းတစ်ထောင့်ငါးရာ ငါးသိန်း) ကျပ်၊ ပဲခူးတိုင်းဒေသကြီးကို ၁၇၆,၃၀၀,၀၀၀(သိန်းထောင့်ခုနှစ်ရာခြောက်ဆယ့်သုံးသိန်း) ကျပ်၊ ရှမ်းပြည်နယ်တောင်ပိုင်းကို ၈၄,၀၀၀,၀၀၀(သိန်းရှစ်ရာ့လေးဆယ်) ကျပ်နှင့် နေပြည်တော်ကို ၃,၃၀၀,၀၀၀ ကျပ် ထောက်ပံ့ပေးခဲ့တယ်လို့ သိရပါတယ်။
========================
📌📌 ၄။ မြန်မာ့ဒီမိုကရေစီအရေးအား ထောက်ခံအားပေးသော ပါတီစုံလွှတ်တော်အမတ်များသမဂ္ဂ၏ အရေးပေါ် အစည်းအဝေးကျင်းပ
ဧပြီ ၄
Radio NUG
မြန်မာ့ဒီမိုကရေစီအရေးအား ထောက်ခံအားပေးသော ပါတီစုံလွှတ်တော်အမတ်များသမဂ္ဂ၏ အရေးပေါ် အစည်းအဝေးအား ဧပြီလ ၄ ရက်နေ့၊ နံနက် ၀၈:၀၀ နာရီမှ ၀၉:၃၀ နာရီအထိ၊ ဂျပန်နိုင်ငံ၊ အောက်လွှတ်တော်အမတ်များရုံး အဆောက်အဦ၊ အထူးအစည်းအဝေးခန်းမ၊ မြေညီထပ်တွင် ကျင်းပ ပြုလုပ်ခဲ့ကြောင်း ဂျပန်နိုင်ငံဆိုင်ရာ အမျိုးသားညီညွတ်ရေးအစိုးရ ကိုယ်စားလှယ်ရုံးမှ သတင်းထုတ်ပြန်ပါတယ်။
အဆိုပါအစည်းအဝေးသို့ အမျိုးသားညီညွတ်ရေးအစိုးရ၊ လူသားချင်းစာနာ ထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာန၊ ဒုတိယဝန်ကြီး၊ ဒေါက်တာငိုင်းတမ်မောင်းသည် အွန်လိုင်းမှ တက်ရောက်ခဲ့ပြီး လက်ရှိငလျင်ဘေး ထိခိုက်ပျက်စီးမှု အခြေအနေများကို ရှင်းလင်းတင်ပြကာ ငလျင်ဘေးသင့်ပြည်သူများအား အရေးပေါ်အမြန်ဆုံး ကူညီပေးနိုင်ရန် မေတ္တာရပ်ခံတောင်းဆိုခဲ့တယ်လို့ သိရပါတယ်။
UNDP ၊ WFPနှင့် အခြားသော NPOအဖွဲ့အစည်းများမှ တက်ရောက်လာသူများကလည်း ထိခိုက်ပျက်စီးမှု အခြေအနေများ၊ လိုအပ်ချက်များနှင့် အရေးပေါ် အကူအညီလိုအပ်နေသည့် ရေတိုရေရှည် စီမံကိန်းများကို ရှင်းလင်းတင်ပြခဲ့တယ်လို့ ဖော်ပြထားပါတယ်။
နှစ် ၁၀၀လျှင် ၁ ကြိမ်ဖြစ်ပွားသည့် ငလျင်ကြီးကြောင့် ပြည်သူအများစု အသက်အိုးအိမ်စည်စိမ်ဆုံးရှုံးကာ ဒုက္ခ ပင်လယ်ဝေနေသည့်ကြားမှပင် စစ်ကောင်စီ၏ လူမဆန်စွာ ဗုံးကြဲတိုက်ခိုက်နေမှုများ၊ ကယ်ဆယ်ရေးလုပ်ငန်းများအပေါ် ပိတ်ပင်တားဆီးနေမှုများ၊ အမျိုးသားညီညွတ်ရေးအစိုးရ၏ ရက်သတ္တ ၂ ပါတ်တာ အပစ်အခတ်ရပ်စဲရေးနှင့် ကယ်ဆယ်ရေးလုပ်ငန်းများ ပူးပေါင်းဆောင်ရွက်ရန် ကမ်းလှမ်းချက်ကို စစ်ကောင်စီက လက်မခံခဲ့သည့် အချက်အလက်များပါဝင်သည့် စာရွက်စာတမ်းများကိုလည်း အဆိုပါအစည်းအဝေး၌ ဖြန့်ဝေခဲ့ပြီး၊ မြန်မာနိုင်ငံ၊ ငလျင်ဒဏ်သင့် ပြည်သူများအတွက် အရေးပေါ် အကူအညီများ လျင်မြန်စွာပေးအပ်နိုင်ပါရန် မေတ္တာရပ်ခံတောင်းဆိုစာကို မြန်မာ့ဒီမိုကရေစီအရေးအား ထောက်ခံအားပေးသော ပါတီစုံလွှတ်တော်အမတ်များသမဂ္ဂသို့ ပေးအပ်ခဲ့တယ်လို့ သိရပါတယ်။
ထို့နောက် အမေးအဖြေကဏ္ဍတစ်ရပ်ကို ပြုလုပ်ခဲ့ပြီး ဂျပန်လွှတ်တော်အမတ်များမှ အရေးပေါ် အကူအညီ လိုအပ်နေသည့် နေရာများသို့ အမြန်ဆုံးရောက်ရှိအောင် မည်သည့်နည်းလမ်း၊ မည်သည့်ပုံစံ မည်သည့် လမ်းကြောင်းများမှ ဆောင်ရွက်နိုင်သည်စသည့် မေးခွန်းပေါင်းများစွာ မေးမြန်းခဲ့ပြီး၊ ပြန်လည်ဖြေကြား ဆွေးနွေးမှုများ ပြုလုပ်ခဲ့ပါတယ်။
တော်လှန်ရေးအင်အားစုများမှ စိုးမိုးထားသည့် ဒေသများတွင် နိုင်ငံတကာအကူအညီများ မရောက်ရှိသေးသည့်အတွက် အမျိုးသားညီညွတ်ရေးအစိုးရ အပါအဝင် ဒေသခံအဖွဲ့အစည်းများ၊ တိုင်းရင်းသား အဖွဲ့အစည်းများနှင့် ချိတ်ဆက်ကာ အရေးပေါ်အကူအညီများ အမြန်ဆုံးပေးအပ်ရန် လေးလေးနက်နက် မေတ္တာရပ်ခံ တိုက်တွန်းခဲ့ကြောင်း ထုတ်ပြန်ထားပါတယ်
========================
📌📌 ၅။ အရေးပေါ် ကူညီကယ်ဆယ်ရေးဆိုင်ရာ ပေါင်းစပ်ညှိနှိုင်းရေးမှူး Tom Fletcher မြန်မာနိုင်ငံသို့ လာမည်ဖြစ်ပြီး မြန်မာနိုင်ငံဆိုင်ရာ အထူးကိုယ်စားလှယ် Julie Bishop ကိုလည်း ရက်ပိုင်းအတွင်း မြန်မာသို့ စေလွှတ်မည်ဟု ကုလသမဂ္ဂ အတွင်းရေးမှူးချုပ် ပြောကြား
ဧပြီ ၄
Radio NUG
အရေးပေါ် ကူညီကယ်ဆယ်ရေးဆိုင်ရာ ပေါင်းစပ်ညှိနှိုင်းရေးမှူး Tom Fletcher ကို မြန်မာနိုင်ငံသို့ စေလွှတ်လိုက်ပြီး မြန်မာနိုင်ငံဆိုင်ရာ အထူးကိုယ်စားလှယ် Julie Bishop ကိုလည်း ငြိမ်းချမ်းရေးနှင့် တွေ့ဆုံဆွေးနွေးမှု လမ်းကြောင်းများဆီသို့ သွားရောက်သည့် ကတိကဝတ်များ ပိုမိုခိုင်မာ အားကောင်းလာစေဖို့ လာမယ့်ရက်ပိုင်းတွေအတွင်းမှာ မြန်မာနိုင်ငံကို သွားရောက်ရန် စေလွှတ်ထားကြောင်း ကုလသမဂ္ဂ အတွင်းရေးမှူးချုပ် ပြောကြားခဲ့ပါတယ်။
အရှေ့တောင် အာရှတွင် လွန်ခဲ့တဲ့ သီတင်းပတ်က လှုပ်ခတ်ခဲ့သော ငလျင်သည် ထိုင်းနိုင်ငံနှင့် တခြားနေရာများအပါအဝင် မြန်မာနိုင်ငံက ငလျင်ဗဟိုချက်နေရာ ဖြစ်ခဲ့ပြီး မြန်မာနိုင်ငံသည် ဆိုးရွားသည့် အပျက်အစီးများနှင့် ကူကယ်ရာမဲ့နေသည့် အရိပ်အယောင်တွေ တွေ့ရတယ်လို့ ဆိုထားပါတယ်။
သေဆုံးသူဦးရေသည်လည်း လက်ရှိအချိန်တွင် ၃၀၀၀ ကျော်သွားပြီး ဆက်လက် မြင့်တက်နေကာ လူပေါင်း ထောင်ချီ ထိခိုက်ဒဏ်ရာရခဲ့သလို အုတ်ကျိုးအုတ်ပဲ့တွေအောက်မှာ လူအများအပြားလည်း ပိတ်မိနေကာ ထိုကပ်ဘေးသည် နိုင်ငံတဝန်းတွင် ပြည်သူများ ရင်ဆိုင်နေရသည့် ပိုမိုနက်ရှိုင်းသည့် အားနည်းချက်များကို ဖွင့်ဟပြလိုက်တာ ဖြစ်တယ်လို့ ဆိုထားပါတယ်။
ငလျင်မလှုပ်ခင်ကတည်းကတောင် မြန်မာနိုင်ငံသည် နိုင်ငံရေး၊ လူ့အခွင့်အရေးနှင့် လူသားချင်းစာနာထောက်ထားမှု အကျပ်အတည်းများကြောင့် ဒုက္ခပင်လယ်ဝေနေပြီး ပဋိပက္ခနှင့် အကြမ်းဖက်မှုများကြောင့် လူသန်းနဲ့ချီ နေအိမ်တွေကနေ စွန့်ခွာထွက်ပြေးခဲ့ကြပြီးလည်း ဖြစ်တယ်လို့ ပြောကြားထားပါတယ်။
မုတ်သုံရာသီလည်း ရောက်တော့မည်အချိန်တွင် ငလျင်သည် ထိုဒုက္ခဆင်းရဲများကို ပိုမို ဆိုးရွားစေခဲ့တာကြောင့် အကျပ်အတည်း အရွယ်အစားနှင့် ကိုက်ညီသော အင်မတန်အရေးကြီးသည့် လိုအပ်သည့် ရန်ပုံငွေများကို နိုင်ငံတကာအသိုင်းအဝန်းအနေဖြင့် ချက်ချင်း မြှင့်တင်ကြရန် မေတ္တာရပ်ခံထားပြီး နိုင်ငံတဝန်း အကူအညီအလိုအပ်ဆုံးသူတွေထံသို့ ရောက်ရှိရန် မြန်ဆန် ဘေးကင်းပြီး ရေရှည်တည်တံ့ခိုင်မြဲကာ အတားအဆီးမရှိသည့် လူသားချင်းစာနာမှုဆိုင်ရာ ဝင်ရောက်ခွင့်များ ရရှိစေရန်ကိုလည်း တောင်းဆိုထားပါတယ်။
========================
📌📌 ၆။ ယူကေအစိုးရ၏ ငလျင်ဒဏ်ပျက်စီးမှုများအတွက် ရန်ပုံငွေများသည် မြန်မာစစ်တပ်ထံသို့ စီးဆင်းခြင်းလုံးဝမရှိကြောင်း ထုတ်ပြန်
ဧပြီ ၄
Radio NUG
ယူကေအစိုးရမှ လက်ရှိဖြစ်ပေါ်နေသော ငလျင်ဒဏ်ပျက်စီးမှုများအတွက် အကူအညီများ ထပ်တိုးမြှင့်ပြီး Disasters Emergency Committee (ဘေးအန္တရာယ်များဆိုင်ရာ အရေးပေါ်ကော်မတီ) ၏ ရန်ပုံငွေကောက်ခံခြင်းအစီအစဥ်တွင် စတာလင်ပေါင် ၅ သန်း ထည့်ဝင်ကြောင်း ဧပြီလ ၄ရက်နေ့တွင် ကြေညာပါတယ်။
ယူကေအစိုးရသည် ငလျင်ဘေးဒဏ်သင့် မြန်မာပြည်သူများအတွက် စတာလင်ပေါင် ၁၀ သန်းကို ကနဦး ပံ့ပိုးပေးခဲ့ပြီးဖြစ်ရာ ယခုထပ်တိုး ရန်ပုံငွေအပါအဝင် စုစုပေါင်း စတာလင်ပေါင် ၁၅ သန်း ကူညီထောက်ပံ့ထားပြီဖြစ်တယ်လို့ ဖော်ပြထားပါတယ်။
ယူကေဖွံ့ဖြိုးရေးဆိုင်ရာဝန်ကြီး Baroness Chapman က
“ယူကေအစိုးရအနေနဲ့ မြန်မာနိုင်ငံက အကူအညီအလွန်အမင်းလိုအပ်နေတဲ့ ပြည်သူများအတွက် တုံ့ပြန်ဆောင်ရွက်မှုများ ပိုမိုလုပ်ဆောင်ပေးနိုင်ရန် Disasters Emergency Committee (ဘေးအန္တရာယ်များဆိုင်ရာ အရေးပေါ်ကော်မတီ) ရဲ့ ဆောင်ရွက်မှုများကို ပံ့ပိုးခွင့်ရတဲ့အတွက် ဂုဏ်ယူမိပါတယ်။ မငြိမ်မသက်မှုများကြား ကြံ့ကြံ့ခံနေထိုင်နေရတဲ့ မြန်မာပြည်သူများအတွက် အခုအကျပ်အတည်းက ဆင်းရဲဒုက္ခများ ထပ်တိုးစေကာ အရေးပေါ်အကူအညီများ ပိုမိုလိုအပ်စေပါတယ်။ အစားအစာ၊ ရေနဲ့ နေထိုင်စရာ အမိုးအကာများအစရှိတဲ့ အရေးပေါ် ပစ္စည်းများ အပါအဝင် ယူကေအစိုးရရဲ့ အကူအညီများဟာ ငလျင်ဒဏ်အပြင်းအထန်ဆုံးခံရတဲ့ဒေသများသို့ ရောက်ရှိနေပြီဖြစ်ပါတယ်” လို့ ပြောကြားထားပါတယ်။
========================
📌📌 ၇။ မန္တလေးမှာ ဂျပန်အရေးပေါ်ကယ်ဆယ်ရေး ဆေးဘက်ဆိုင်ရာ နည်းပညာအဖွဲ့ (JDR) ဆေးကုသမှုစတင်ကြောင်း ဂျပန်သံရုံးထုတ်ပြန်
ဧပြီ ၄
Radio NUG
အင်အားပြင်းငလျင်ဒဏ်ခံစားခဲ့ရတဲ့ မန္တလေးမြို့မှာ ဂျပန် အရေးပေါ်ကယ်ဆယ်ရေး ဆေးဘက်ဆိုင်ရာ နည်းပညာအဖွဲ့ (JDR) အဖွဲ့ရဲ့ ဆေးကုသမှု စတင်လုပ်ဆောင်နေပြီဖြစ်ကြောင်း ဧပြီ ၄ ရက်မှာ မြန်မာနိုင်ငံဆိုင်ရာ ဂျပန်သံရုံးအကြီးအကဲ Mr. Shogo Yoshitake(ရှိုဂို ယိုရှိတခဲ)က ထုတ်ပြန်ပြောဆိုလိုက်ပါတယ်။
ဂျပန်ဆေးပညာရှင်အဖွဲ့ဟာ မန္တလေးမြို့ စည်ပင်သာယာရေးကော်မတီရုံး ၇၁ လမ်းနဲ့ ၇၂ လမ်းကြား ချမ်းအေးသာစံမြို့နယ်မှာ ဆေးကုသပေးနေတယ်လို့ သိရပါတယ်။
ဂျပန်နိုင်ငံက အရေးပေါ်ကူညီထောက်ပံ့ငွေ အမေရိကန်ဒေါ်လာ ၆ သန်းခန့်ကို အမှန်တကယ် လိုအပ်နေတဲ့ ငလျင်ဒဏ်သင့်ပြည်သူတွေဆီ တိုက်ရိုက်ရရှိစေမယ့် နည်းလမ်းတွေနဲ့ အစွမ်းကုန် ကူညီပေးသွားမယ်လို့ ဆိုထားပါတယ်။
========================
📌📌 ၈။ မြန်မာနိုင်ငံကို အမေရိကန်ဒေါ်လာ သန်း ၂၀ ကျော်တန်ဖိုးရှိ လူသားချင်းစာနာမှုအကူအညီများပေးရန် Quad မဟာမိတ်အဖွဲ့ ကတိပြု
ဧပြီ ၄
Radio NUG
မတ် ၂၈ ရက်တွင် မြန်မာနိုင်ငံအလယ်ပိုင်းတွင် လှုပ်ခတ်ခဲ့သော ငလျင်ကြောင့် မြန်မာနှင့် ထိုင်းနိုင်ငံတို့မှ ပြည်သူများအား နက်နက်ရှိုင်းရှိုင်းကိုယ်ချင်းစာပြီး ဝမ်းနည်းကြောင်း၊ ငလျင်ဒဏ်သင့် မြန်မာနိုင်ငံကို အမေရိကန်၊ ဩစတေးလျ၊ ဂျပန်နှင့် အိန္ဒိယတို့ဖြင့် ဖွဲ့စည်းထားတဲ့ Quad မဟာမိတ်အဖွဲ့က အမေရိကန်ဒေါ်လာ သန်း ၂၀ ကျော်တန်ဖိုးရှိ လူသားချင်းစာနာမှုအကူအညီများကို ပေးအပ်ရန် ကတိပြုကြောင်း အမေရိကန်အစိုးရ Mission To ASEAN ဌာနမှ ဧပြီလ ၄ရက်နေ့တွင် ထုတ်ပြန်ပါတယ်။
မဟာမိတ်အဖွဲ့ရန်ပုံငွေနှင့် နှစ်ဘက် ကြိုးပမ်းဆောင်ရွက်မှုများမှတစ်ဆင့် ကယ်ဆယ်ရေးပစ္စည်းများ ပေးပို့ကာ အရေးပေါ် ဆေးကုသရေးအဖွဲ့များ ဖြန့်ကျက်ပြီး ငလျင်ဒဏ်ခံရသူများအား ပြုစုစောင့်ရှောက်ပေးရန် မြန်မာနိုင်ငံတွင် လုပ်ဆောင်နေသော လူသားချင်းစာနာမှုဆိုင်ရာ မိတ်ဖက်များအား ပံ့ပိုးကူညီလျက်ရှိတယ်လို့ ဖော်ပြထားပါတယ်။
Quad အဖွဲ့အနေဖြင့် တုံ့ပြန်မှုကို ထိရောက်စွာ ထိရောက်စွာဖြန့်ဝေပေးပြီး ထိခိုက်ခံစားရသည့် ရပ်ရွာဒေသများ၏ လိုအပ်ချက်များကို ဖြည့်ဆည်းပေးနိုင်ရန် ကြိုးပမ်းမှုများကို ညှိနှိုင်းဆောင်ရွက်နေတယ်လို့ ဆိုထားပါတယ်။
သိသာထင်ရှားသော အသက်ဆုံးရှုံးခြင်း၊ ထိခိုက်ဒဏ်ရာရခြင်းနှင့် အခြေခံအဆောက်အဦများ ကျယ်ကျယ်ပြန့်ပြန့် ပျက်စီးခြင်းများကြောင့် မြန်မာနိုင်ငံတွင် လူသားချင်းစာနာထောက်ထားမှုဆိုင်ရာ အခြေအနေများကို ပိုမိုဆိုးရွားလာစေကြောင်း၊ ယာယီ၊ တစ်စိတ်တစ်ပိုင်း အပစ်အခတ်ရပ်စဲရေးဆိုင်ရာ ကတိကဝတ်များကို ကြိုဆိုပြီး အဆိုပါအစီအမံများကို အကောင်အထည်ဖော်ရန်၊ တိုးချဲ့ရန်နှင့် ကျယ်ပြန့်စေရန်၊ လုံခြုံပြီး မြန်မာနိုင်ငံတစ်ဝှမ်းတွင် လူသားချင်းစာနာမှုအကူအညီများ အချိန်နှင့်တစ်ပြေးညီ ပို့ဆောင်ပေးနိုင်ရန် လုံခြုံစိတ်ချရသော ပတ်ဝန်းကျင်တစ်ခု ပေးဆောင်ရန် အဖွဲ့အစည်းအားလုံးကို တောင်းဆိုကြောင်း ထုတ်ပြန်ချက်တွင် ဖော်ပြထားပါတယ်။
ထို့ပြင် မတ် ၂၉ ရက်နှင့် ၃၀ ရက်က အာဆီယံနိုင်ငံခြားရေးဝန်ကြီးများ၏ ထုတ်ပြန်ချက်များနှင့် ထိခိုက်ခံစားရသည့် လူမှုအသိုက်အဝန်းများအား အာဆီယံနှင့် ဒေသတွင်းနိုင်ငံများ၏ ပံ့ပိုးကူညီမှုများကို ကြိုဆိုကြောင်း၊ Quad ၏ လူသားချင်းစာနာထောက်ထားမှုအကူအညီနှင့် သဘာဝဘေး ကယ်ဆယ်ရေးမိတ်ဖက်အဖွဲ့သည် သဘာဝဘေးအန္တရာယ်စီမံခန့်ခွဲမှုဆိုင်ရာ၊ အာဆီယံလူသားချင်းစာနာထောက်ထားမှုအကူအညီဆိုင်ရာ ညှိနှိုင်း ရေး ဗဟိုအပါအဝင် အခြားသောမိတ်ဖက်များနှင့် အနီးကပ်ပူးပေါင်းဆောင်ရွက်နေသော ပူးပေါင်းအဖွဲ့ကို တည်ထောင်ထားကြောင်း ဖော်ပြထားပါတယ်။
အခုတင်ပြခဲ့တဲ့ သတင်းတွေကို Radio NUG သတင်းထောက် ခါးရှဲလ်က ပေးပို့ထားတာ ဖြစ်ပါတယ်။
========================
========================
🚩🚩 ၁။ ဖယ်ခုံမြို့နယ် ခေါင်းအိရွာသစ်ကို အကြမ်းဖက်စစ်ကောင်စီမှ အသေခံဒရုန်း ၂စီးဖြင့် တိုက်ခိုက်ရာ ၁စီး ပစ်ချနိုင်ခဲ့
ဧပြီ ၄
Radio NUG
ဧပြီလ ၃ရက်နေ့ ညနေ ၇နာရီတွင် ဖယ်ခုံမြို့နယ်၊ ခေါင်းအိရွာသစ်ကို စစ်ကောင်စီက အသေခံဒရုန်း ၂ စီးဖြင့် တိုက်ခိုက်ခဲ့ရာ တစ်စီးကို ဖယ်ခုံ PDF 1002 တပ်ရင်းက ပစ်ချနိုင်ခဲ့ကြောင်း သတင်းထုတ်ပြန်ထားပါတယ်။
ငလျင်ဒဏ်ကြောင့် စစ်ကောင်စီက အပစ်ရပ် ထုတ်ပြန်သော်လည်း မြေပြင်တွင် လေကြောင်းတိုက်ခိုက်မှုများ၊ အသေခံဒရုန်းများဖြင့် နေ့စဉ်တိုက်ခိုက်နေတာကြောင့် တော်လှန်ရေးရဲဘော်ရဲဘက်များ ရန်သူ၏ အပစ်ရပ်မှုကို လျော့မတွက်ဖို့ အသိပေးထားပါတယ်။
========================
🚩🚩 ၂။ မိုးဗြဲ ခမရ ၄၂၂က ပီကင်းကောခူကျေးရွာကို လက်နက်ကြီးနှင့် ပစ်ခတ်ပြီး လေကြောင်းတိုက်ခိုက်မှုကြောင့် ပြည်သူ ၅ ဦး သေဆုံးပြီး အများအပြား ထိခိုက်
ဧပြီ ၄
Radio NUG
ရှမ်းပြည်နယ်တောင်ပိုင်းနှင့် ကရင်နီနယ်စပ် မိုးဗြဲမြို့အခြေစိုက် ခမရ ၄၂၂ က ပီကင်းကောခူ ကျေးရွာအတွင်းကို ဧပြီလ ၄ရက် မနက် ၁၁နာရီကျော်အချိန်တွင် လက်နက်ကြီးများ ပစ်ခတ်ခြင်းကြောင့် အမျိုးသားတစ်ဦး သေဆုံးခဲ့ကြောင်း KPV သတင်းဌာနမှာ ဖော်ပြထားပါတယ်။
လက်နက်ကြီးထိမှန်မှုကြောင့် အသက် ၄၀ ဝန်းကျင် ခူးလူစ်သည် မျက်နှာနှင့် ကျောတို့တွင် ထိမှန်ကာ နေအိမ်လည်း ပျက်စီးသွားတယ်လို့ သိရပါတယ်။
ထို့အပြင် အကြမ်းဖက်စစ်ကောင်စီမှ ညနေ ၃နာရီခန့်တွင် လေကြောင်းတိုက်ခိုက်မှု ပြုလုပ်ခဲ့သည့်အတွက် ဒေသခံ ၄ဦး သေဆုံးခဲ့ပြီး ထိခိုက်ဒဏ်ရာရသူ များပြားကာ စိုးရိမ်ရတယ်လို့ သိရပါတယ်။
========================
🚩🚩 ၃။ စဉ့်ကူးနှင့် မတ္တရာမြို့နယ်အတွင်း ငလျင်ဒဏ်ကြောင့် ထိခိုက်ဒဏ်ရာရရှိသူများနှင့် သေဆုံးသူမိသားစုများအား ပကဖ၊ ပအဖနှင့် တပ်ရင်းတပ်ဖွဲ့များ စုပေါင်း၍ ကူညီကယ်ဆယ်လှူဒါန်းမှုများ ပြုလုပ်
ဧပြီ ၄
Radio NUG
စဉ့်ကူးမြို့နယ်အတွင်း ငလျင်ဒဏ်ကြောင့် ထိခိုက်ဒဏ်ရာရရှိသူများနှင့် သေဆုံးသူမိသားစုများအား ပြင်ဦးလွင်ခရိုင် ပကဖနှင့်အတူ စဉ့်ကူးမြို့နယ် ပကဖ၊ ပအဖနှင့် တပ်ရင်းတပ်ဖွဲ့များ စုပေါင်း၍ ကူညီကယ်ဆယ်လှူဒါန်းမှုများ ပြုလုပ်ပေးခဲ့ကြောင်း ပြင်ဦးလွင်ခရိုင် ပကဖမှ သတင်းထုတ်ပြန်ပါတယ်။
အလားတူ မတ္တရာမြို့နယ်တွင်လည်း မတ္တရာပကဖ၊ ပအဖနှင့် တခြားတပ်ရင်း တပ်ဖွဲ့များမှ ကူညီကယ်ဆယ်လှူဒါန်းမှုများ ပြုလုပ်ခဲ့တယ်လို့ ဖော်ပြထားပါတယ်။
ငလျင်ဒဏ်ကြောင့် သပိတ်ကျင်းမြို့နယ် ၊ စဉ့်ကူးမြို့နယ်နှင့် မတ္တရာမြို့နယ်တို့တွင် ပြည်သူ ၄၄ဦး သေဆုံးခဲ့ပြီး ၁၀၀ ကျော် ထိခိုက်ကာ ဘုရားစေတီ အဆောက်အဦးများစွာ ပျက်စီးခဲ့တာကြောင့် စဉ့်ကူးမြို့နယ်နှင့် မတ္တရာမြို့နယ်တို့အား ကျပ်သိန်း (၅၀)စီ မတည်လှူဒါန်းမှု ပြုလုပ်ပေးခဲ့တယ်လို့ သိရပါတယ်။
========================
🚩🚩 ၄။ ဖြူးမြို့နယ်အတွင်းရှိ ငလျင်ကြောင့် ပျက်စီးသွားသော နေအိမ် (၄၅) လုံးအတွက် PDF၊ ပကဖများ သွားရောက်လှူဒါန်း
ဧပြီ ၄
Radio NUG
ပဲခူးတိုင်း၊ ဖြူးမြို့နယ်အတွင်းရှိ ငလျင်ဒဏ်ကြောင့် ထိခိုက်ပျက်စီးသွားသော ပြည်သူ့နေအိမ် (၄၅) လုံးအတွက် အိမ်တလုံးလျှင် (၅၀၀၀၀) ကျပ်နှုန်းဖြင့် ပြည်သူ့ကာကွယ်ရေးတပ်မတော်(PDF) အာဠာဝကစစ်ကြောင်း၊ ပြည်သူ့ကာကွယ်ရေးအဖွဲ့ (ပဲခူးတိုင်း)၊ ပြည်သူ့ကာကွယ်ရေးအဖွဲ့ (ဖြူးမြို့နယ်) ရဲဘော်များက သွားရောက်လှူဒါန်းခဲ့ပြီး ခွန်အားဖြည့် စကားများ ပြောကြားခဲ့ကြောင်း အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနမှ သတင်းထုတ်ပြန်ပါတယ်။
အဆိုပါ လှူဒါန်းမှုကို ဒုတိယအကြိမ် ထီရောင်းရသော ရန်ပုံငွေမှ ပေးပို့လှူဒါန်းခဲ့ခြင်း ဖြစ်ကြောင်း သိရပါတယ်။
အလားတူ ငလျင်ဒဏ်သင့် ပြည်သူများအတွက် စေတနာရှင်ပြည်သူများမှ လှူဒါန်းလာသည့် ကုန်ပစ္စည်းများကို ပြည်သူ့ကာကွယ်ရေးတပ်မတော် (PDF)၊ ရွှေဘိုခရိုင် တပ်ရင်း (၁၇) က ကူညီပို့ဆောင်ပေးခဲ့တယ်လို့ ဖော်ပြထားပါတယ်။
========================
🚩🚩 ၅။ ငလျင်ဘေးဒဏ် ခံစားနေရသည့် ပြည်သူများထံသို့ ငွေကျပ် သိန်း ခြောက်ရာ့လေးဆယ် ကျပ်တိတိ ပေးပို့ကူညီ
ဧပြီ ၄
Radio NUG
နွေဦးပြောက်ကျားတပ်ဖွဲ့မှ ငလျင်ဘေးသင့်ပြည်သူများအတွက် ရည်ရွယ်လုပ်ဆောင်ခဲ့တဲ့ ဧပြီလ ၂ရက်နေ့နှင့် ၃ရက်နေ့အထိ (၂)ရက်တာ လှုပ်ရှားမှုမှ ရရှိတဲ့ လောင်းလုံးမြို့နယ်ပြည်သူများ၏ လှူဒါန်းငွေ (၆၄,၀၀၀,၀၀၀) သိန်းခြောက်ရာ့လေးဆယ် ကျပ်ကို ငလျင်ဘေး အရေးပေါ်ကူညီကယ်ဆယ်ရေးလုပ်ငန်းစဉ်များ ပြုလုပ်နိုင်ရန်အတွက် စစ်ကိုင်းဒေသ သပိတ်အင်အားစုမှတဆင့် ပေးပို့လှူဒါန်းခဲ့ကြောင်း သတင်းထုတ်ပြန်ပါတယ်။
ပြည်ထောင်စုအတွင်း စစ်ရေး၊ နိုင်ငံရေး ပဋိပက္ခပေါင်းစုံနှင့် ကပ်ဘေးပေါင်းစုံကြား ခက်ခဲဆင်းရဲစွာ ဖြတ်သန်းနေကြရသည့် ပြည်သူလူထုတရပ်လုံးနှင့်အတူ နွေဦးပြောက်ကျားတပ်ဖွဲ့ ရဲဘော်များအနေဖြင့် တသားတည်းရပ်တည်ရင်း စစ်အာဏာရှင်စနစ် ဆုံးခန်းတိုင်သည်အထိ တိုက်ပွဲဝင်သွားမည်ဖြစ်ကြောင်း အသိပေးထားပါတယ်။
အခုတင်ပြခဲ့တဲ့ သတင်းတွေကို Radio NUG သတင်းထောက် ခါးရှဲလ်က ပေးပို့ထားတာ ဖြစ်ပါတယ်။
No comments:
Post a Comment