05 Apr 2025 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၅ ဧပြီလ ( ၅ ) ရက်နေ့နောက်ဆုံးရပြည်တွင်းသတင်းများ 

📌📌 ၁။ မင်းတပ်၊ ကန်ပက်လက်ကို စစ်ကောင်စီက လေကြောင်းနဲ့ ၂ ရက်ဆက်တိုက် ဗုံးကြဲနေ၊ အဆောက်အအုံ ထိခိုက်မှုရှိ။

 

မင်းတပ်နဲ့ ကန်ပက်လက်ကို စစ်ကောင်စီက လေကြောင်းနဲ့ ဗုံးကြဲတိုက်ခိုက်မှု နှစ်ရက်ဆက်တိုက် ပြုလုပ်နေခဲ့ပါတယ်။

ဧပြီလ ၁ ရက်နေ့ မနက် ၁၀ နာရီဝန်းကျင်မှာ  ကန်ပက်လက်မှာ ဂျက်ဖိုက်တာနဲ့ လေကြောင်းဗုံးကြဲခဲ့သလို ည ၆ နာရီခွဲနဲ့ ၁၀ နာရီခွဲဝန်းကျင်လည်း မင်းတပ်မှာ ဗုံးကြဲခံရတာပါ။ မင်းတပ်ဗုံးကြဲခံရမှုမှာအဆောက်အအုံ ထိခိုက်မှုရှိတယ်လို့ မြို့နယ်ပြည်သူ့အုပ်ချုပ်ရေးအဖွဲ့က ဧပြီ ၁ ရက်နေ့ ညနေပိုင်းက ထုတ်ပြန်ပါတယ်။

ဧပြီလ ၂ရက်နေ့ မွန်းလွဲ ၁ နာရီ ၂၅ မိနစ်ဝန်းကျင်မှာလည်း မင်းတပ်မြို့ပေါ်မှာ စစ်ကောင်စီက ထပ်မံဗုံးကြဲပြီး ထိခိုက်ပျက် စီးမှုအခြေအနေကိုတော့ မသိရသေးပါဘူး။

အဲဒီနေ့ မွန်းလွဲ ၁ နာရီ မိနစ် ၄၀ နဲ့ ၂ နာရီ ၆ မိနစ်ဝန်းကျင်တွေမှာလည်း ကန်ပက် လက်မြို့ကို ၂ကြိမ်တိတိ ထပ်မံဗုံးကြဲခဲ့တဲ့အတွက် ထွေအုပ်အဆောက်အဦး ၈လုံးအပါအင် အစိုးရဆောက်အဦး ၁၅လုံးပျက်စီးခဲ့သလို ပြည်သူ့နေအိမ် ၅လုံးပျက်စီးကြောင်း ကန်ပက်လက်မြို့နယ်၊ ပြည်သူ့အုပ်ချုပ်ရေးအဖွဲ့က ဧပြီလ ၂ရက်နေ့က သတင်းထုတ်ပြန်ထားပါတယ်။

 

========================

 

📌📌 ၂။ မင်းတပ်မှာ စစ်ကောင်စီဖမ်းဆီးတဲ့ ဒေသခံ ၂ ဦး ရုပ်အလောင်း ပြန်တွေ့။

 

မင်းတပ်မြို့ပေါ်မှာ စစ်ကောင်စီက ဖမ်းဆီးပြီး သတ်ဖြတ်တဲ့ ဒေသခံအမျိုးသား ၂ ဦးရဲ့ ရုပ်အလောာင်းကို ပြီးခဲ့တဲ့ မတ်လ ၃၁ ရက်နေ့က ပြန်တွေ့တယ်လို့ သိရပါတယ်။ 

အသက် ၃၈ နှစ်အရွယ် ဆလိုင်းဘွေနဲ့ ၂၁ နှစ်အရွယ် ဆလိုင်းရှိန်းဖေတို့ ဖမ်းဆီးသတ်ဖြတ်ခံရအပြီး ၁ နှစ်ဝန်းကျင်အကြာ သူတို့ရုပ်အလောာင်းကို မင်းတပ်မြို့ အရှေ့ပြင်ရပ်ကွက်မှာ ပြန်ရှာတွေ့တာပါ။

၂၀၂၄ ဧပြီလ ၁ ရက်က သူတို့ ၂ ဦးဟာ စိချဲ့ကနေ မင်းတပ်မြို့ပေါ်ကို ဈေးဝယ်ဖို့ အသွားလမ်း စစ်ကောင်စီကင်းလှည့်တပ်ဖွဲ့ရဲ့ ဖမ်းဆီးခြင်းခံရတာဖြစ်ပြီး သူတို့သတ်ဖြတ်ခံရတဲ့ဖြစ်စဉ်အတိအကျ အခုမှသိရတာလို့ ဆလိုင်းဘွေရဲ့ မိသားစုဝင်တဦးက ပြောဆိုကြောင်း The Mindat Postက ဖော်ပြပါတယ်။

“ဖမ်းထားတဲ့ စစ်တပ်သုံ့ပန်းတွေကတဆင့် သိရလို့ သူတို့မြှုပ်ထားတဲ့နေရာကိုသွားပြီး အလောင်းပြန်ဖော်တာ ပြန်တွေ့တယ်။ သူတို့နှစ်ယောက်ကို ဖမ်းတဲ့နောက် ၄ ရက်လောက်အထိ အစာမကျွေးဘဲ သတ်ကြတာလို့လည်း အဲစခသုံ့ပန်းတွေက ပြောတယ်။”လို့ ဆိုပါတယ်။

 

========================

 

📌📌 ၃။ ငလျင်ဒဏ်ကြောင့် သေဆုံးသူ ၄၀၀၀ နီးပါးအထိတိုးလာ။

 

မြန်မာ့ငလျင် ဒဏ်ကြောင့် ဧပြီ ၃ ရက် မြန်မာစံတော်ချိန် ည ၈ နာရီအထိ စုစုပေါင်း သေဆုံးသူ ၃,၉၀၁ ယောက်၊ ထိခိုက်ဒဏ်ရာရရှိသူ ၅,၉၇၈ ယောက်၊ ပျောက်ဆုံးနေသူ ၇၁၉ ယောက်နှင့် ကယ်ဆယ်ရရှိသူ ၄၉၃ ယောက်ရှိကြောင်း DVB Data Team က ကောက်ယူစုဆောင်းထားတဲ့ စာရင်းတွေအရ သိရပါတယ်။

 

ငလျင်နောက်ဆက်တွဲအနေနဲ့ မန္တလေးမြို့ရှိ မန္တလေးတက္ကသိုလ် ပင်မဆောင်ပြိုကျရာကနေ မီးလောင်မှုဖြစ်ပွားပြီး မန္တလေး၊စစ်ကိုင်း၊ ကချင်ပြည်က ၂၀၂၄ - ၂၀၂၅ တက္ကသိုလ်ဝင်တန်း စာမေးပွဲဖြေလွှာအုပ်ရေ ၄ သိန်းနီးပါး မီးလောင်ပျက်စီးတယ်လို့လည်း ထုတ်ပြန်ထားပါတယ်။

 

မြန်မာနိုင်ငံမှာ မတ်လ ၂၈ ရက် နေ့လယ် တစ်နာရီဝန်းကျင်က စစ်ကိုင်းမြို့မြောက်ဘက် ဆယ်မိုင်အကွာကို ဗဟိုပြုလှုပ်ခတ်ခဲ့ပြီး အမေရိကန်အစိုးရ ဘူမိဗေဒတိုင်းတာရေးအဖွဲ့ (USGS) ရဲ့ ထုတ်ပြန်ချက်အရ မြေငလျင်ပြင်းအားဟာ ၇ ဒသမ ၇ ရှိတယ်လို့ ဆိုပါတယ်။

#RadioNUGLocalNews

#SpringRevolution