21 Jun 2025 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၅ ဇွန်လ ( ၂၁ ) ရက်နေ့နောက်ဆုံးရပြည်တွင်းသတင်းများ

📌📌 ၁။ (၄) နှစ်ကျော်အတွင်း စစ်ကောင်စီကြောင့် ချင်းလူမျိုး တစ်ထောင်ကျော် သေဆုံး။

 

စစ်တပ်အာဏာသိမ်းတဲ့ ၂၀၂၁ ခုနှစ် ဖေဖော် ဝါရီလကနေ ၂၀၂၅ ခုနှစ် မေလ ၃၁ ရက်အတွင်း စစ်ကောင်စီကြောင့် ချင်းလူမျိုး ၁,၀၉၉ ဦးသေဆုံးခဲ့ပြီလို့ ချင်းရေးရာအဖွဲ့ ချုပ်(ICA)က ဇွန် ၁၈ ရက်နေ့က ထုတ်ပြန်ပါတယ်။ 

စစ်ကောင်စီကို ဆန့်ကျင်ဆန္ဒပြစဉ် စစ်ကောင်စီရဲ့ ပစ်ခတ်မှုကြောင့် သေဆုံးသူ ၃၂၈ ဦး၊ အကြောင်းမဲ့ ပစ်ခတ်သတ်ဖြတ်ခံရလို့ သေဆုံးသူ အရပ်သား ၂၀၂ ဦး၊ ဖမ်းဆီး သတ်ဖြတ်ခံရသူနဲ့ မုဒိမ်းပြုကျင့်ခံရပြီး အသတ်ခံရသူ ၆၃ ဦးနဲ့ လူသားဒိုင်း အသုံးပြုခံရလို့ သေဆုံးသူ ၁၁ ဦးတို့ ဖြစ်ပါတယ်။ 

ဒါ့အပြင် ဆေးဝါးမလုံလောက်လို့ သေဆုံးသူ ၂၄ ဦး၊  မြေမြှုပ်မိုင်းကြောင့် သေဆုံးသူ ၈၃ ဦး၊ ဘာသာရေးခေါင်းဆောင် ၁၇ ဦးနဲ့ တိုက်ပွဲအတွင်း ကျဆုံးသွားတဲ့ တော်လှန်ရေးအဖွဲ့ဝင် ၃၆၁ဦးတို့ ဖြစ်ပါတယ်။ 

မြေမြှုပ်မိုင်းကြောင့် သေဆုံးသူ ၈၂ ဦးထဲမှာ  အရပ်သားပြည်သူ ၅၄ ဦးနဲ့ တော်လှန်ရေးတပ်ဖွဲ့ဝင် ၂၉ ဦး ပါ၀င်ပြီး ဒဏ်ရာရရှိသူ ၁၃၅ ဦး ကျော်ရှိတယ်လို့ ICA က ဆိုပါတယ်။ 

International campaign to Ban Landmineရဲ့အစီရင်ခံစာ အရ မြန်မာနိုင်ငံအတွင်း မြေမြှုပ်မိုင်းကြောင့် ထိခိုက်သေဆုံးမှုဟာ ဆီးရီးယား၊ အာဖဂန်နစ္စတန်နဲ့ ယူကရိန်းတို့ကို ကျော်လွန်ကာ ကမ္ဘာမှာ အများဆုံးဖြစ်လာတယ်လို့ ICA က ပြောပါတယ်။ 

မြို့ပေါင်း ၂၀ ရှိတဲ့ ချင်းပြည်နယ်မှာ ၁၅ မြို့ကတော့ ဒေသတော်လှန်ရေးတပ်တွေရဲ့ ထိန်းချုပ်မှုအောက်မှာ ရှိနေပေမယ့် လေကြောင်းနဲ့ မိုင်းအန္တရာယ်တွေကြောင့် ပြည်သူတွေဟာ မိမိဒေသကို မပြန်နိုင်ဘဲရှိနေတယ်လို့ ချင်းရေးရာအဖွဲ့ချုပ် (ICA) က ပြောပါတယ်။

 

========================

 

📌📌 ၂။ မလေးရှားနိုင်ငံမှာ တရားမဝင် ရွှေ့ပြောင်းနေထိုင်တဲ့ မြန်မာနိုင်ငံသား ၃၂၀ကို ပြည်နှင်ဒဏ်ပေးကာ မြန်မာပြည်ပြန်ပို့။

 

မလေးရှားနိုင်ငံကို တရားမဝင် ရွှေ့ပြောင်းနေထိုင်တဲ့ မြန်မာနိုင်ငံသား ၃၂၀ အပါအဝင် အခြားနိုင်ငံသားစုစုပေါင်း ၁၇၀၁ဦးကို ဇွန်လ ၁၆ ရက်နေ့က ကွာလာလမ်ပူမြို့၊ လူဝင်မှုကြီးကြပ်ရေး ထိန်းသိမ်းရေးစခန်းမှ ပြည်နှင်ဒဏ်ပေးခဲ့ကြောင်း မလေးရှားလူဝင်မှုကြီးကြပ်ရေးဌာနက ထုတ်ပြန်ပါတယ်။

အဲဒီ ၁၇၀၁ ဦးထဲမှာ မြန်မာနိုင်ငံသား ၃၂၀ ဦးပါဝင်ပြီး အင်ဒိုနီးရှားက ၆၆၁ဦး၊ ဘင်္ဂလားဒေ့ရှ်က ၃၀၉ ဦး ၊ ထိုင်း (၁၂၀) နဲ့ အိန္ဒိယက ၁၀၃ဦး ပါဝင်တယ်လို့ ကွာလာလမ်ပူလူဝင်မှုကြီးကြပ်ရေးဌာန ထုတ်ပြန်ချက်အရ သိရပါတယ်။

ပြည်နှင်ဒဏ်ပေးတဲ့ မြန်မာနိုင်ငံသား ၃၂၀ထဲမှာ CDM ဝင်ထားသူတွေလည်းပါဝင်တယ်လို့ ရွှေ့ပြောင်းအလုပ်သမားအရေး ကူညီဆောင်ရွက်ပေးနေသူတွေဆီကနေ သိရပါတယ်။

ရွှေ့ပြောင်းအလုပ်သမားအရေး ကူညီဆောင်ရွက်ပေးနေသူ တစ်ဦးက “ချင်းတွေတချို့လည်းပါတယ် အတိကျတော့ မသိဘူး  ကော်မတီအလိုက်ဘဲ ဖြစ်နေတယ်ဆိုတော့  တချို့ဆိုရင် မြန်မာပြည်မှာ CDM ဝင်ထားလို့ ပြည်နှင်ဒဏ်ခံရပေမယ့်  CI (အထောက်အထားကတ်)မချပေးဘူး  ပြန်မရဘူးပေါ့ နေပြည်တော်ကနေ ထောက်ခံစာပေးမှ ပြန်ရမယ်ပြောတယ် သံရုံးဖက်က လက်ရှိမှာတော့ သူတို့ကို ထောင်ချထားတာပေါ့” လို့ပြောပါတယ်။

 

========================

 

📌📌 ၃။ အစ္စရေး - အီရန် နှစ်ဘက်တိုက်ခိုက်မှု ရပ်တန့်ဖို့ အချိန်တန်ပြီလို့ UN ပြော။

 

အစ္စရေး - အီရန်အကြား နှစ်ဘက်တိုက်ခိုက်မှု ရပ်တန့်ဖို့ အချိန်တန်ပြီလို့ ကုလသမ္မဂ - UN အထွေထွေအတွင်းရေးမှူး Antonio Guterresက တိုက်တွန်း တောင်းဆိုပါတယ်။

ပြီးခဲ့တဲ့ သောကြာနေ့အစောပိုင်း အီရန်ရဲ့ နျူကလီးယားစက်ရုံတည်နေရာတွေကို အစ္စရေးက ပစ်မှတ်ထားတိုက်ခိုက်ရာကနေ အီရန်ကလည်း စနေနေ့မှာ (Missile) ပဲ့ထိန်းဒုံးကျည် ရာချီနဲ့ အစ္စရေးကို ပြန်လည်ပစ်ခတ်ခဲ့တာပါ။

‘အီရန်နျူကလီးယားတည်နေရာတွေ အစ္စရေးက ဗုံးကြဲတာ၊ အစ္စရေး Tel Aviv မှာ အီရန်ရဲ့ ပဲ့ထိန်းဒုံး တိုက်ခိုက်မှုတွေ ရပ်တန့်ဖို့ အချိန်တန်ပါပြီ။ ငြိမ်းချမ်းရေးနဲ့ သံတမန်ရေးကသာ အောင်နိုင်ရမယ်။’ လို့ Antonio Guterresက သူ့ X လူမှုကွန်ရက်စာမျက်နှာမှာ ရေးသားပါတယ်။

သောကြာနေ့အစောပိုင်းစတင်တဲ့ နှစ်ဘက်ပစ်ခတ်တိုက်ခိုက်မှုအတွင်း အီရန်တော်လှန်ရေးတပ်ဖွဲ့ (IRGC) အကြီးအကဲတွေအပါအဝင် နျူကလီးယားသိပ္ပံပညာရှင် သေဆုံးခဲ့ပြီး အီရန်ရဲ့ တန်ပြန်တိုက်ခိုက်မှုကြောင့် အစ္စရေးဘက်ကလည်း သေဆုံးမှုနဲ့ ထိခိုက်ဒဏ်ရာရသူတွေ ရှိနေပါတယ်။

#RadioNUGLocalNews

#SpringRevolution