30 Jun 2025 - (Ethnic language program-Matupi) by The Matupi Times

📌 (ချင်း တိုင်းရင်းသား - Matupi ) ထုတ်လွှင့်မှု အစီအစဥ် ၂၀၂၅ ဇွန်လ ( ၃၀ ) ရက်နေ့ ရပြည်တွင်းသတင်းများ

📌📌 1/ မင်းတပ်မြို့နယ်တွင် ပိတ်ပင်ထားသည့် မူးယစ်သေစာ အရက်များကို မင်းတပ်ပြည်သူ့ရဲဌာနက မီးရှို့ဖျက်ဆီး

 

The Matupi Times ၊ ဇွနလ ၂၃ ၊ ၂၀၂၅

မင်းတပ်မြို့နယ်တွင် ပိတ်ပင်ထားသည့် မူးယစ်သေစာ အရက်များကို ကြားကာလ မင်းတပ်မြို့နယ်ပြည်သူ့အုပ်ချုပ်ရေးအဖွဲ့၏ ပြည်သူ့ရဲဌာန၊ က မင်းတပ်မြို့ပေါ်အတွင် ရှောင်တခင်စစ်ဆေးမှုပြုလုပ်ခဲ့ကြောင်းသိရသည်။

သက်ဆိုင်ရာတာဝန်ရှိသူများက ရှောင်တခင်စစ်ဆေးရာတွင် ရှာဖွေဖမ်းဆီးရမိသည့် ပိတ်ပင်ထားသော အရက်ဘီယာများကို ပိုင်ရှင်များနှင့် အများပြည်သူရှေ့၌ (၂၀.၆.၂၀၂၅) ရက်နေ့တွင် မီးရှို့ ဖျက်ဆီးခဲ့ကြောင်း မင်းတပ်မြို့နယ်(ပအဖ)က သတင်းထုတ်ပြန်ပါတယ်။

မီးရှို့ဖျက်ဆီးခဲ့သည့် ဖမ်းဆီးရမိ အရက်၊ ဘီယာများမှာ Yoma တံဆိပ်ပါ ဘီယာဘူး (၂၅) ဘူး ၊ Tapper တံဆိပ်ပါ ဘီယာဘူး (၁၈) လုံး ၊ Grand Royal အရက်ပုလင်း (၃) လုံးနှင့် ၅ ဂါလံပုံး တစ်ပုံး ၊ ဝီစကီ အရက်ဘူး (၁၄) ဘူး၊ ရွှေအရက်သန့် တံဆိပ်ပါ ၁ လီတာဘူး (၉) ဘူး ၊ ရွှေအရက်သန့် တံဆိပ်ပါ အသေးဘူး (၄၁) ဘူး ၊ လီဒါအရက်ဖြူသန့် တံဆိပ်ပါ ၁ လီတာဘူး (၁၂) ဘူး ၊ လီဒါအရက်ဖြူသန့် တံဆိပ်ပါ အသေးဘူး (၁၀၅) ဘူး ၊ အားမာန်တံဆိပ်ပါ ပလပ်စတိတ်ဘူးသေး (၁) ဗူးတို့ဖြစ်ကြောင်း ထုတ်ပြန်ချက်မှာ ဖော်ပြထားပါတယ်။ 

 

========================

 

📌📌 2/ မင်းတပ်-မတူပီလမ်း ပြန်လည်သွားလာနိုင်ပြီဟု မင်းတပ်မြို့နယ်ပြည်သူ့အုပ်ချုပ်ရေးအဖွဲ့ထုတ်ပြန်

 

The Matupi Times ၊ ဇွန်လ ၂၃ ၊ ၂၀၂၅

ချင်းပြည်နယ်တောင်ပိုင်း ၊ မင်းတပ်-မတူပီလမ်းပိုင်းပြုပြင်ဆောင်ရွက်မှုပြီးစီပြီဖြစ်၍ ဇွန်လ ၂၄ ရက်မှစပြီး လွတ်လပ်စွာပြန်လည်သွားလာနိုင်ပြီဖြစ် ကြောင်း မင်းတပ်မြို့နယ် ပြည်သူ့အုပ်ချုပ်ရေးအဖွဲ့က ဒီကနေ့ ညပိုင်းမှာ သတင်း ထုတ်ပြန်ပါတယ်။ 

ပြီးခဲ့တဲ့တဲ့ရက်ပိုင်းက အဆိုပါလမ်းပိုင်းသည် မိုးသည်းထန်စွာ ရွာသွန်းမှုကြောင့် လမ်းများ၊ မြေပြိုပျက်စီးမှုတွေကြောင့် (၁၈.၆.၂၀၂၅) ရက်နေ့မှစ၍ စက်ယန္တရားများဖြင့် မင်းတပ်(ပအဖ)က ပြုပြင်ဆောင်ရွက်ခဲ့တာပါ။ 

လမ်းပြုပြင်ဆောင်ရွက်မှုတွေကြောင့်ဇွန်လ ၂၁ မှ ၂၈ ရက်နေ့အထိ ဖြတ်သန်းသွားလာခွင့်ယာယီပိတ်ထားကြောင်း သတင်းထုတ်ပြန်ခဲ့ပေမယ့် သတ်မှတ်ရက်မတိုင်ခင် လမ်းပြုပြင်ဆောင်ရွက်မှု 

ပြီးစီးသွားတာကြောင့် အဲ့ဒီထုတ်ပြန်ချက်ကို ပြန်လည်ပယ်ဖျက်လိုက်ပါတယ်။

လမ်းပိုင်း ပြုပြင်ဆောင်ရွက်မှုပြီးစီးသည်အထိပူးပေါင်းဆောင်ရွက်ပေးကြသည့် ပြည်သူများအပေါ်အထူးကျေးတင်ရှိတယ်လို့လည်းဆိူပါတယ်။

 

========================

📌📌 3/ မီဇိုရမ်ရှိ မြန်မာနိုင်ငံမှစစ်ရှောင်ပြည်သူများကို ဇီဝမက်ထရစ်မှတ်ပုံတင်ခြင်းပြုလုပ်မည် 

 

The Matupi Times ၊ ဇွန်လ ၂၇ ၊ ၂၀၂၅ 

အိန္ဒိယနိုင်ငံ၊ မီဇိုရမ်ပြည်နယ်မှာ လာရောက်လိုလှုံနေတဲ့ မြန်မာနိုင်ငံမှစစ်ရှောင်ပြည်သူများကို ဇီဝမက်ထရစ်မှတ်ပုံတင်ခြင်း (biometric registration) ပြုလုပ်မည်ဖြစ်ကြောင်းသိရပါတယ္။

ဇီဝမက်ထရစ်မှတ်ပုံတင်ခြင်း (biometric registration)ဆောင်ရွက်ရန်အတွက် ပြင်ဆင်မှုအားလုံးပြီးစီးသွားပြီဖြစ်၍ ပြည်နယ်အတွင်း ခိုလှုံနေထိုင်သော မြန်မာနိုင်ငံသား ၃၂,၀၀၀ ကျော်အား လာမည့်ဇူလိုင်လမှ စတင်ပြုလုပ်သွားမှာဖြစ်ပြီး ပြည်နယ်ခရိုင် (၁၁) ခုလုံးမှာ ပြုလုပ်သွားမည်ဖြစ်ကြောင်း NorthEast Today ရဲ့သတင်းတပုဒ်မှာဖော်ပြပါတယ္။

အချက်အလက်မှတ်ပုံတင်ခြင်းလုပ်ငန်းစဉ်ကို ဒုတိယကော်မရှင်အဖွဲ့ဝင်များ ဦးဆောင်သည့် ခရိုင်အဆင့်ကော်မတီများသည် စာရင်းသွင်းခြင်းလုပ်ငန်းစဉ်ကို ဆောင်ရွက်မည်ဖြစ်ပြီး ပြည်ထဲရေးဝန်ကြီး K. Sapdanga ဦးဆောင်သော ပြည်နယ်အဆင့် ကော်မတီက မှတ်ပုံတင်ခြင်းလုပ်ငန်းကို ကြီးကြပ်ကြီးကြပ်ဆောင်ရွက်သွားမယ်လို့သိရပါတယ္။

အဆိုပါလုပ်ငန်းစဉ်သည် ၂၀၂၁ ခုနှစ် မြန်မာစစ်တပ်၏ အာဏာသိမ်းမှုအပြီး မီဇိုရမ်သို့ ထွက်ပြေးခိုလှုံလာသူများကို မှတ်တမ်းတင်ရန် ရည်ရွယ်ခြင်းဖြစ်ပြီး ယခင်က ပြည်ထဲရေးဝန်ကြီးဌာနမှ ပေးထားသော ဒေတာစုဆောင်းမှုပုံစံများနှင့် ပတ်သက်၍ ပြဿနာများကြောင့် နှောင့်နှေးခဲ့ရသော်လည်း၊ မီဇိုရမ်ရှိ နေရပ်ပြောင်းရွှေ့နေထိုင်သူများ၏ ဥပဒေရေးရာအဆင့်အတန်းကို ထင်ဟပ်စေရန် ပုံစံပြင်ဆင်ပြီးနောက် ပြန်လည်စတင်ခဲ့တယ်လို့ သိရပါတယ်။

မီဇိုရမ်ပြည်နယ်အတွင်း မြန်မာနိုင်ငံသားဒုက္ခသည်များမှာ ချမ်ဖိုင်ခရိုင်တွင် ၁၃,၅၈၆ ဦး၊ လောင်လ်တိုင်ခရိုင်တွင် ၆,၀၁၇ ဦး၊ ဆီယာဟာခရိုင်တွင် ၅,၀၃၆ ဦး၊ အိုင်ဇောလ်ခရိုင်တွင် ၃,၆၆၉ ဦးနှင့် ကိုလဆစ်ခရိုင်တွင် ၁၂၉ ဦး ရှိတယ်လို့ သိရပါတယ်။

 

========================

 

📌📌 4/ Miss Universe Myanmar 2025(Grand Final) ပြိုင်ပွဲတွင် 1st runner up ဆုကို ဟားခါးကိုယ်စားပြုအလှမယ် Nan Inzali (Na Na) မှရရှိ 

 

The Matupi Times ၊ ဇွန်လ ၂၇ ၊ ၂၀၂၅ 

ဒီကနေ့ညပိုင်းမှာ ကျင်းပပြုလုပ်ခဲ့တဲ့ Miss Universe Myanmar 2025 Grand Final ပြိုင်ပွဲကြီးမှာ ချင်းပြည်နယ်၊ ဟားခါး ကိုယ်စားပြုအဖြစ် ယှဉ်ပြိုင်ခဲ့တဲ့ အလှမယ် Nan Inzali (Na Na) ဟာ 1st Runner-Up ဆု ဆွတ်ခူးရရှိခဲ့ပြီး Miss Universe Myanmar 2025 Winner ဆုကို ပြင်ဦးလွင် ကိုယ်စားပြု အလှမယ် မြတ်ရတနာစိုး က ရရှိခဲ့တယ်လို့ သိရပါတယ်။

𝐌𝐢𝐬𝐬 𝐔𝐧𝐢𝐯𝐞𝐫𝐬𝐞 𝐌𝐲𝐚𝐧𝐦𝐚𝐫 𝟐𝟎𝟐𝟓 ပြိုင်ပွဲ၏ Grand Final ပွဲကို ဒီကနေ့ ဇွန် ၂၇ ရက် ညနေပိုင်းက မြန်မာနိုင်ငံ ရန်ကုန်မြို့ Myanmar Expo (Fortune Plaza) မှာ ကျင်းပပြုလုပ်ခဲ့တာ ဖြစ်ပါတယ်။

Miss Universe Myanmar 2025 ပြိုင်ပွဲကြီးမှာ ဟားခါး ကိုယ်စားပြု အလှမယ် Na Na ဟာ Top 10 စာရင်း မကြေညာခင်မှာ ဆု (၅) ဆု ပိုင်ဆိုင်ခဲ့ပြီး Miss Celestial Nial by Luna Award ၊ Miss Picture Perfect by Love Diary ၊ Miss Beauty Face Award နဲ့ Miss Perfect Award ၊ Miss IM Title Award တို့ကို ရရှိခဲ့တာလည်း ဖြစ်ပါတယ်။

Miss Universe Myanmar 2025 ပြိုင်ပွဲကြီးမှာ ချင်းပြည်နယ် ကိုယ်စားပြုအဖြစ် အလှမယ် (၂) ဦး ပါဝင်ယှဉ်ပြိုင်ခဲ့ပြီး ၊ ဟားခါး ကိုယ်စားပြုအဖြစ် Na Na နှင့် ဖလမ်း ကိုယ်စားပြုအဖြစ် မိုင်အေးစန္ဒာအောင် တို့ ပါဝင်ယှဉ်ပြိုင်ခဲ့ကြပါတယ်။

 

========================

 

📌📌 5/ UFC Flyweight အဆင့် ၁ ဖိုက်တာကို Joshua Van အနိုင်ရ

 

The Matupi Times ၊ ဇွန်လ ၂၉ ၊ ၂၀၂၅

ဒီမနေ့ထိုးသတ်သွားတဲ့ UFC 317 ပြိုင်ပွဲမှာ ချင်းဖိုက်တာ Joshua Van ဟာ UFC Fyweight အဆင့် ၁ ဖိုက်တာကို အနိုင်ရရှိသွားပါတယ္။ 

ပွဲအစကနေ Final Roundထိ Joshua Van ဟာ ပြိုင်ဖက်ဖိုက်တာကို အကောင်းဆုံးယှဉ်ပြိုင်ထိုးသတ်ခဲ့ပြီး တတိယအချီပွဲပြီးခါနီးမှာ Royval ကိုလဲကျအောင်ထိုးပြီး တကယ်ပွဲဖြတ်နိုင်မလို ဖြစ်ခဲ့ပေမယ့် Bell ကယ်လို့ Royval သက်သာခဲ့ရတာပါ။

ဒီပွဲအနိုင်ရရှိသွားတာကြောင့် Joshua Van ဟာ UFC ဖလိုင်းဝိတ်တန်းချန်ပီယံခါးပတ်ပွဲထိုးသတ်ခွင့်ရရှိသွားပြီဖြစ်ပါတယ္။ ပွဲအပြီးမှာ Pantoja နဲ့ Kira France ပွဲက နိုင်တဲ့သူကိုလည်း စိန်ခေါ်သွားပါတယ်။

#RadioNUGLocalNews

#SpringRevolution