23rd APR 2022 - (Ethnic language program-CHO_DAAI) by Radio NUG

📌(ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၂ ဧပြီလ ၂၃ ရက်နေ့ နောက်ဆုံးရပြည်တွင်းသတင်းများ

📌📌၁။ ပြည်သူ့ စစ်သားတစ်ဦး CDF-Daai ထံသို့ အလင်းဝင်

ရခိုင်ပြည်နယ် ၊ အမ်းမြို့ ၊ အမှတ် (၂) ကုတင် ၃၀၀ ဆံ့ စစ်ဆေးရုံ တဆရ (၂/၃၀၀)တပ်ရင်းမှ ဒု -တပ်ကြပ် မြင့်သိန်း (ကိုယ်ပိုင်အမှတ် တ/ ၄ ၂၆၆၃၈) သည် စစ်ခေါင်းဆောင်များ၏ မတရား အကြမ်းဖက်သည့် လုပ်ရပ်များကို မလိုလားသည့်အတွက် (၁. ၄. ၂၀၂၂) ရက်နေ့တွင် Chinland Defense Force - Daai ထံသို့ မိသားစု နှင့်အတူ (CDM) ပြုလုပ်ကာ လာရောက်အလင်းဝင်ခဲ့သဖြင့် နွေးထွေးစွာ လက်ခံခဲ့ပြီး လွတ်မြောက်နယ်မြေ တစ်နေရာသို့ ပို့ဆောင် ပေးခဲ့ကြောင်း CDF Daai က သတင်း ထုတ်ပြန်ထားသည်။

ဆက်လက်၍ CDF-Daai အကြမ်းဖက် စစ်ကောင်စီလက်အောက်တွင် တာဝန်ထမ်းဆောင်လိုခြင်းမရှိသဖြင့် (CDM ) ပြုလုပ်၍ ပြည်သူ့ရင်ခွင် ခိုလှုံချင်သူ ပြည်သူ့ တပ်မတော်သားများအား နွေးထွေးစွာ လက်ခံကြိုဆိုသွားမည်ဖြစ် ကြောင်း CDF Daai ၏ ထုတ်ပြန်ချက်တွင် ဖော်ပြထားသည်။

 

📌📌၂။ မင်းတပ် - မတူပီလမ်း လည်မျိုချောင်းဆုံတိုက်ပွဲတွင် စစ်ကောင်စီတပ်သား (၈)ဦးခန့်သေ

၂၀၂၂၊ ဧပြီ (၂၀)ရက်နေ့ မင်းတပ် - မတူပီလမ်းရှိ လည်မျိုချောင်းဆုံတဝိုက်တွင် အကြမ်းဖက်စစ်ကောင်စီ ခမရ (၃၀၄) တပ်ရင်းနှင့် ဒေသခံကာကွယ်ရေးတပ် CDF-MATUPI တိုက်ပွဲဖြစ်ပွားခဲ့ပြီး စစ်ကောင်စီတပ်မှ ဗိုလ် ကြီးတစ်ဦးအပါဝင် တပ်သား (၈)ဦးသေဆုံး၊ (၅)ဦးထက်မနည်းဒဏ်ရာရရှိခဲ့သည်ဟု CDF-MATUPI ကထုတ်ပြန်သည်။

ထို့နောက် အဆိုပါတိုက်ပွဲတွင် ချင်းပြည်သူ့ကာကွယ်ရေးတပ် မတူပီမှ ရဲဘော်များ အထိခိုက်မရှိ ဆုတ်ခွာလာနိုင်ကြောင်းနှင့် မတူပီစစ်ကောင်စီတပ်ရင်း၏ မင်းတပ် - မတူပီလမ်းပိုင်း CDF-MATUPI နယ်မြေအတွင်းသို့ စစ်အင်အား အဆမတန်ဖြည့်တင်းနေမှုကြောင့် တိုက်ပွဲဆက်လက်ပြင်းထန်လာနိုင်ကြောင်းဖော်ပြထားသည်။

 

📌📌၃။ ကန်ပက်လက်တွင် စစ် ကောင်စီက အင်အား ၁၅၀ ဝန်းကျင်ဖြင့် စစ် ကြောင်းထိုး နေ ၊ နှစ်ဖက်ထိ တွေ့ တိုက်ပွဲ ပြင်းထန်လျက်ရှိ

ကန်ပက်လက်တွင် စစ် ကောင်စီက အင်အား ၁၅၀ ဝန်းကျင်ဖြင့် စစ် ကြောင်းထိုး နေ ၊ နှစ်ဖက်ထိ တွေ့ တိုက်ပွဲ ပြင်းထန်လျက်ရှိ ကြောင်း CDF ကန်ပက်လက်က သတင်းထုတ်ပြန်ထားသည်။

၂၁.၄.၂၀၂၂ရက်နေ့မှာ ဆောမြို့မှကန်ပက်လက်ကိုအင်အား ၆၂ ယောက်ခန့်နဲ့စစ်ကြောင်းထိုး တက်လာပြီး၊ ကန်ပက်လက်မြို့ပေါ်၌တပ်စွဲထားသော စကစ ဖက်မှလည်း အင်အား ၈၀ ခန့်ဖြင့်စစ်ကြောင်း ဆင်းလာကာ ကန်ပက်လက်မြို့နှင့် ဆောမြို့အကြားမှာဒေသခံပြည်သူ့ကာကွယ်ရေးတပ်ဖွဲ့ CDF Kanpetlet နဲ့တိုက်ပွဲတွေဖြစ်ပွား နေ ကြောင်း သိရသည်။

လက်နက်အင်အား၊ကျည်အင်အားမျှခြင်းနှင့်နှစ်ဖက်ညှပ်တိုက်ခံရခြင်းများကြောင့်မိမိတို့ CDF Kanpetlet ဖက်မှာလည်း အထိအခိုက်တွေရှိနေပါတယ်။တိုက်ပွဲအခြေအနေဆက်လက်ပြင်းထန်နိုင်ဖွယ်ရှိနေသောကြောင့်အချက်အလက်အပြည့်အစုံမထုတ်ပြန်နိုင်သေး ကြောင်း CDF ကန်ပက်လက်က သတင်းထုတ်ပြန်ထားသည်။

မိဘပြည်သူများအနေဖြင့်မည်သည့်အရေးကြီးအကြောင်းအရာများရှိနေပါစေ၊ဆောနဲ့ကန်ပက်လက်အကြားသွားလာခြင်းမပြုကြရန် CDF ကန်ပက်လက်က အသိ ပေး ထုတ်ပြန်ထားသည်။

 

📌📌၄။ စစ်ကောင်စီက နိုင်ငံတစ်ဝန်း တပ်များအားလုံးကို အရေးပေါ်ကာလအဖြစ် သတ်မှတ်တပ်လှန့်

အမျိုးသားညီညွတ်ရေးအစိုးရ NUG က ခုခံစစ်ကနေ ထိုးစစ်ကိုပြောင်းလဲတော့မယ်လို့ တရားဝင်ကြေညာလိုက်ပြီးနောက် အာဏာသိမ်းစစ်ကောင်စီက တနိုင်ငံလုံးမှာရှိနေတဲ့ တပ်ရင်းတပ်ဖွဲ့ အားလုံးကို အကန့်အသတ်မရှိ အရေးကြီးကာလအဖြစ် သတ်မှတ်လိုက်တယ်လို့ တပ်တွင်းသတင်းအရင်းအမြစ်တွေက ပြောပါတယ်။

CDM ဗိုလ်ကြီးလင်းထက်အောင်ကတော့ စစ်ရေးအရဆိုရင် ဒါဟာစစ်တပ်အနေနဲ့ ခံစစ်ကိုအသားပေး တည်ဆောက်လိုက်တဲ့သဘောဖြစ်ပြီး တချို့မြို့နယ်တွေက တပ်စခန်းတွေမှာ စစ်တပ်ရဲ့ လှုပ်ရှားနိုင်ရေးစွမ်းရည်ဟာရပ်တန့်နေပြီဖြစ်တာကြောင့် တပ်စခန်းတွေကို ဝင်အတိုက်မခံရရေးကို ပြင်ဆင်လိုက်တာဖြစ်နိုင်တယ်လို့ ဆိုပါတယ်။

မကြာခင်ကာလအတွင်းမှာ မိုးတွင်းကာလကို ရောက်လာတော့မှာဖြစ်တာကြောင့် တပ်တွေအရှေ့ကိုတိုးရင်း နောက်တန်းခံစစ်တွေ မလုံချိန်မှာ တိုင်းရင်းသားတော်လှနရေးတပ်ဖွဲ့တွေနဲ့ ပြည်သူ့ကာကွယ််ရေးတပ်တွေဝင်တိုက်မှာကို စိုးရိမ်တာကြောင့်လည်း ဖြစ်နိုင်တယ်လို့ CDM ဗိုလ်ကြီးလင်းထက်အောင်က ပြောပါတယ်။

အမျိုးသားညီညွတ်ရေးအစိုးရအနေနဲ့ ပြည်သူ့ကာကွယ်ရေးတပ်ရင်း ၂၅၉ တပ်ရင်းဖွဲ့စည်းပြီး LDF လို့ခေါ်တဲ့ ဒေသပြောက်ကျားတပ်ဖွဲ့ ၄၀၁ ဖွဲ့ရှိတယ်လို့ ကာကွယ်ရေးဝန်ကြီးဌာန ပြည်ထောင်စုဝန်ကြီးဦးရည်မွန်က ပြောဆိုပါတယ်။

စစ်အာဏာသိမ်းပြီးနောက် စစ်ကောင်စီတပ်တွေ နေ့စဥ်လိုလို ထိခိုက်သေဆုံးမှုတွေရှိနေပြီး ၁ နှစ်အတွင်းသေဆုံးသူ သောင်းနဲ့ချီရှိသွားပြီဖြစ်ပြီး တပ်ကနေထွက်ပြီး ပြည်သူနဲ့ပူပေါင်းခဲ့ကြတဲ့ အရာရှိတွေအပါအဝင် စစ်တပ်နဲ့ ရဲတပ်ဖွဲ့ဝင်တွေလည်း သောင်းနဲ့ချီရှိလာနေပြီဖြစ်ပါတယ်။

📌📌၅။ ယူကရိန်းအတွက် ဘဏ္ဍာရေး အကူအညီ နောက်ထပ်ဒေါ်လာ သန်း ၅ဝဝ ပေးဖို့ ကန်ကြေညာ

ယူကရိန်းနိုင်ငံမှာ လစာတွေ၊ ပင်စင်တွေနဲ့ တခြားအစိုးရ လုပ်ငန်းတွေအတွက် သုံးစွဲနိုင်ဖို့ ဘဏ္ဍာရေးအကူအညီ နောက်ထပ် ဒေါ်လာ သန်း ၅၀၀ ပေးအပ်မှာဖြစ်ကြောင်း အမေရိကန်က ကြေညာလိုက်ပါတယ်။

ယူကရိန်းဝန်ကြီးချုပ် Denys Shmyhal ဘဏ္ဍာရေးဝန်ကြီး Serhiy Marchenko တို့နဲ့ ဝါရှင်တန်မှာ တွေ့ဆုံအပြီး အမေရိကန် ဘဏ္ဍာရေးဝန်ကြီး Janet Yellen ကြာသပတေးနေ့က ကြေညာလိုက်တာပါ။

ယူကရိန်းအတွက် စီးပွားရေး အကူအညီအဖြစ် ဒေါ်လာသန်း ၅၀၀ ထောက်ပံ့ဖို့ အမေရိကန်သမ္မတ Joe Biden မတ်လမှာ ကြေညာခဲ့ပြီး၊ အခုနောက်ထပ် ကူညီဖို့ ကြေညာလိုက်တာလည်း ဖြစ်ပါတယ်။ အခုပေးအပ်နေတဲ့ အကူအညီတွေဟာ ယူကရိန်းနိုင်ငံ ပြန်လည်တည်ဆောက်ရာမှာ လိုအပ်မယ့် အထောက်အပံ့တွေရဲ့ တစိတ်တပိုင်းသာ ဖြစ်ကြောင်းလည်း ဝန်ကြီး Yellen ကပြောပါတယ်။

ကြာသပတေးနေ့မှာပဲ ယူကရိန်း ဝန်ကြီးချုပ်နဲ့ တွေ့ဆုံခဲ့တဲ့ အောက်လွှတ်တော်ဥက္ကဋ္ဌ Nancy Pelosi ကလည်း ယူကရိန်းနိုင်ငံအတွက် အကူအညီပေးဖို့ ကွန်ဂရက်လွှတ်တော်က အသင့်ရှိနေကြောင်း ပြောဆိုခဲ့တာပါ။

သမ္မတ Joe Biden အစိုးရက အကူအညီ အထောက်အပံ့တွေ မကြာခင် ရက်ပိုင်းအတွင်း တောင်းခံလာတဲ့အခါ လွှတ်တော်က အမြန်ဆုံး ကိုင်တွယ်ဆောင်ရွက်မှာ ဖြစ်ကြောင်းလည်း ပြောပါတယ်။ ယူကရိန်းအတွက် စစ်ရေးအကူအညီ ဒေါ်လာ ၂.၆ ဘီလီယံ အတည်ပြုထားတဲ့ သမ္မတဘိုင်ဒင် အစိုးရကတော့ နောက်ထပ် အကူအညီ ဘယ်လောက် ထပ်မံတောင်းခံမယ်ဆိုတာ အတိအကျမပြောသေးဘဲ ကာကွယ်ရေးဆိုင်ရာ တာဝန်ရှိသူတွေနဲ့ တိုင်ပင်နေဆဲဖြစ်ကြောင်း ပြောဆိုထားပါတယ်။

#RadioNUGLocalNews

#SpringRevolution