12th NOV 2022 - (Ethnic language program-CHO_DAAI) by Radio NUG ~ Newsletter by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၂ နိုဝင်ဘာလ ( ၁၂ ) ရက်နေ့ နောက်ဆုံးရပြည်တွင်းသတင်းများ

📌📌 ၁။ ကန်ပက်လက် စစ်ဘေးဒုက္ခသည် ငါးထောင်ကျော် အနွေးထည်နဲ့စောင် လိုအပ်နေ

စစ်ကောင်စီတပ်နဲ့ ဒေသကာကွယ်အဖွဲ့တွေအကြား တိုက်ပွဲတွေကြောင့် ထွက်ပြေးနေရတဲ့ ကန်ပက်လက်မြို့က စစ်ဘေးဒုက္ခသည် ငါးထောင်ကျော်ဟာ လက်ရှိ အနွေးထည်နဲ့ ခြုံစောင်တွေ အရေးပေါ် လိုအပ်နေတယ်လို့ ဒေသခံတွေက ပြောပါတယ်။ ဆောင်းရာသီ ရောက်လာပြီဖြစ်လို့ ချင်းပြည်နယ်က မြို့နယ်တွေမှာ အအေးဒဏ် စခံစားလာရပြီး နေရပ်စွန့်ခွာ ထွက်ပြေးနေရသူတွေအတွက် အနွေးထည်နဲ့စောင်တွေ အရေးပေါ် လိုအပ်နေတာလို့ စစ်ဘေးဒုက္ခသည် တွေကို ကူညီပေးနေသူတွေက RFA Burmese သတင်းဌာနကို ပြောပါတယ်။

"အခု ချင်းမှာက တော်တော်အေးနေပြီ။ ညဘက်ပိုအေးတယ်။ စစ်ဘေးရှောင်တွေ အနွေးထည်မရှိ၊ ခြုံစောင်မရှိနဲ့ တော်တော်ကို အခက်အခဲဖြစ်တယ်" လို့ ဆိုပါတယ်။

ဒါ့အပြင် ဆန်၊ ဆီ၊ ဆား၊ အမိုးအကာ၊ ဆေးဝါးနဲ့ ကျန်းမာရေး စောင့်ရှောက်မှုတွေလည်း လိုအပ်နေတယ်လို့ ပြောပါတယ်။

ကန်ပက်လက်မြို့နယ်က စစ်ဘေးဒုက္ခသည် ငါးထောင်ကျော်ဟာ ထန်းကုန်း စစ်ဘေးဒုက္ခသည်စခန်း၊ အောက်လှယ် စစ်ဘေးဒုက္ခသည်စခန်းနဲ့ မကွေးတိုင်း၊ ဆောမြို့နယ်မှာရှိတဲ့ အညာကတင်း၊ သီးကုန်း စစ်ဘေးဒုက္ခသည်စခန်းတွေမှာ နေထိုင်နေကြသလို နီးစပ်ရာ ရွာတွေမှာလည်း ခိုလှုံနေရတယ်လို့လည်း ဒေသခံတွေက ပြောပါတယ်။

စစ်အာဏာသိမ်းပြီးနောက်ပိုင်း နှစ်ဖက်တိုက်ပွဲတွေကြောင့် ချင်းပြည်နယ်မှာ စစ်ဘေးဒုက္ခသည် တစ်သိန်း တစ်သောင်းကျော်ရှိနေပြီး ပြည်တွင်းမှာပဲ ထွက်ပြေးတိမ်းရှောင်နေရသူ ခြောက်သောင်းကျော်နဲ့ တစ်ဖက်အိန္ဒိယနိုင်ငံ မီဇိုရမ်ပြည်နယ်ကို ထွက်ပြေးခိုလှုံနေရသူ ငါးသောင်းနီးပါး ရှိနေပြီဖြစ်ပါတယ်။ စစ်တပ်က အာဏာမသိမ်းခင်ချိန်အထိ ကန်ပက်လက်မြို့နယ်မှာ လူဦးရေနှစ်သောင်းသုံးထောင်ကျော် နေထိုင်ခဲ့ကြပါ တယ်။

📌📌 ၂။ ဆောရဲစခန်းမှ ရဲတပ်သား တစ်ဦး ကျောက်ထု PDF ထံ လက်နက်နှင့်အတူ CDM ဝင်

ပြီးခဲ့တဲ့ ၂.၁၁.၂၀၂၂ ရက်နေ့မှာ ဆောမြို့နယ် ရဲစခန်းက ရဲတပ်သား တစ်ဦး ကျောက်ထု PDF (YRPA) နှင့် ချိတ်ဆက်ပြီး CDM ဝင် ရောက်လာ ကြောင့် နိုဝင်ဘာ ၅ ရက် နေ့ ညဦးပိုင်းမှာ သတင်းထုတ်ပြန်ပါတယ်။ အဆိုပါ ရဲတပ်သားဟာ (G3 သေနတ် ၁ လက်/ကျည်ဘောက် ၂ ခု/ ကျည် ၅၃ တောင့်) ယူ ဆောင်လာတယ်လို့ သိရပါတယ်။

ကျောက်ထု PDF (YRPA) က ၎င်းရဲတပ်သားကိုဆုကြေးငွေ ကျပ်သိန်း ၄၀ တိတိအား ချီးမြှင့်ခဲ့ပြီး လွတ်မြောက် နယ်မြေဆီကိုလည်း ဘေးကင်းလုံခြုံစွာ ပို့ဆောင်ပေးခဲ့ပြီးဖြစ်တယ်လို့ သတင်းထုတ်ပြန်ချက်မှာ ဖော်ပြထားပါတယ်။ နောက်ပြီး ယခင်က CDM ချီးမြှင့်ငွေကို ကျောက်ထု PDF (YRPA) က ကျပ်သိန်း ၈၀ အဖြစ် ကြေညာထားခဲ့ ပေမဲ့ ယခုလက်ရှိ တော်လှန်ရေးရေချိန် အချိန်ကာလအနေအထားနှင့် ချီးမြှင့်ငွေကို ချင့်ချိန်ရတာ တစ် ကြောင်း CDM ဝင် ရောက်လာသူဘက်က ယူ ဆောင်လာတဲ့ လက်နက် အမျိုးအစားအပေါ်မူတည်ပြီး ချီးမြှင့် ငွေ ပမာဏ ပြောင်းလဲ သတ်မှတ် သွားမှာ ဖြစ်ကြောင်း ကျောက်ထု PDF က ဆိုပါတယ်။

📌📌 ၃။ ဟားခါးနဲ့ ထန်တလန် နယ်စပ် သီးမစ်ဒေသမှာ စစ်ကောင်စီက လေကြောင်းဖြင့် တိုက်ခိုက်

နိုဝင်ဘာလ ၇ ရက်နေ့ မွန်းလွဲပိုင်း ၂ နာရီဝန်းကျင်လောက်မှာ စစ်ကောင်စီက ဟားခါး၊ ထန်တလန် နယ်စပ် သီးမစ်ဒေသကို လေကြောင်းနဲ့ တိုက်ခိုက်ခဲ့တယ်လို့ ဒေသတွင်း သတင်းဌာနတွေ ဒေသခံတွေဆီက သိရပါတယ်။ ယင်းတိုက်ခိုက်မှုမှာ လေယာဉ်ပေါ်ကနေ ၃ ကြိမ် ဗုံးကျဲချခဲ့တယ်လို့ The Chin Post သတင်းဌာနက ဖော်ပြပါတယ်။ ပေါက်ကွဲသံတွေ ကျယ်လောင်စွာ ထွက်ပေါ်လာခဲ့ပြီး ဟားခါးမြို့ပေါ်ကနေလည်း ပေါက်ကွဲသံတွေ ကြားနေရတယ်လို့ သိရပါတယ်။ ပြီးခဲ့တဲ့ နို၀င်ဘာ ၁ ရက် နေ့ နဲ့ ၂ ရက်နေ့ တွေမှာလည်း စစ်ကောင်စီပိုင် ကင်းထောက်လေယာဉ်တွေဟာ ထန်တလန် မြို့နယ်နဲ့ ချင်းအမျိုးသား တပ်မတော် (CNA) ဌာနချုပ် Camp Victoria ပတ်ဝန်းကျင်တွေမှာ ကင်းထောက် ပျံသန်းခဲ့ တယ်လို့ သိရပါတယ်။

ဟားခါးနဲ့ ထန်တလန် မြို့တွေကို ဆက်သွယ်ထားတဲ့ သီးမစ်တံတားကို CNA နဲ့ ဒေသခံကာကွယ်ရေး ပူးပေါင်းတပ်ဖွဲ့တွေက ၂၀၂၁ ခုနှစ် အောက်တိုဘာ ၂၁ ရက်နေ့မှာ မိုင်းခွဲဖျက်ဆီးခဲ့ ပြီးတဲ့နောက် စစ်ကောင်စီနဲ့ ချင်းဒေသခံ ကာကွယ်ရေးတပ်ဖွဲ့ တွေကြား တိုက်ပွဲတွေ ပြင်းထန်ခဲ့ပါတယ်။

📌📌 ၄။ စစ်ကောင်စီက မင်းတပ်၊ ပလုံတွီကျေးရွာတွင် အစုလိုက် အပြုံလိုက် မီးရှို့သတ်ဖြတ်ခဲ့ခြင်းဖြစ်နိုင်ကြောင်း CDF မင်းတပ် ထုတ်ပြန်

ပြီးခဲ့တဲ့ နိုဝင်လာ ၇ ရက်၊ တနင်္လာနေ့ နံနက် ၁၀:၃၀ ခန့်မှာ PDF ဝတ်စုံများ ဝတ်ဆင်ထားသော စစ်ကောင်စီ အင်အား ၁၂၀ ခန့်သည် ဝန်းကျင်ဟာ ချင်း-မကွေး နယ်စပ် မင်းတပ်မြို့နယ် ပလုံတွီရွာထဲကို ဝင်ရောက်စီးနင်းပြီး ဒေသခံအများစုနဲ့ စစ်ဘေးရှောင်ပြည်သူ အယောက် ၄၀ ခန့်ကို ဓားစားခံအဖြစ် ဖမ်းဆီးခဲ့တယ်လို့ CDF မင်းတပ် သတင်းနှင့် ပြန်ကြားရေး ဌာနက ထုတ်ပြန်ပါတယ်။

ပြီးခဲ့တဲ့ တနင်္လာနေ့ နေ့လယ် ၁၂:၃၀ ခန့်မှာ CDF မင်းတပ်က စစ်ကောင်စီ စစ်ကြောင်းကိုအနီးကပ်တိုက်ခိုက်မှု နှစ်ကြိမ်ပြုလုပ်ခဲ့ပြီး စစ်ကောင်စီတပ်သား ၂ဦး သေဆုံးသွားတယ်လို့ ထုတ်ပြန်ချက်မှာ ပါရှိပါတယ်။ ကျေးရွာထဲမှာ ဓားစာခံ အများအပြားရှိနေတာကြောင့် စစ်ဆင်ရေးပြုလုပ်ရန် ခက်ခဲခဲ့တယ်လို့ ဆိုပါတယ်။

နောက်တစ်ရက် အင်္ဂါနေ့မှာ ဖမ်းဆီးခံ ဓားစာခံတွေထဲက အမျိုးသား ၇ ဦးကို စစ်ကောင်စီ တပ်သားတွေက လက်ပြန်ကြိုးတုပ်ပြီး အခြားတစ်နေရာခေါ်ဆောင်သွားခဲ့တယ်လို့ ဆိုပါတယ်။ စစ်ကောင်စီ ဖမ်းဆီးသွားတဲ့ ၇ဦးထဲက ၆ဦးကို ယခုတိုင် အဆက်အသွယ်မရသေးဘဲ မီးရှို့ သ-တ်ဖြ-တ်ခဲ့ရသူများထဲမှာ အဆိုပါ ၆ဦးပါတယ်လို့ ယူဆရကြောင်း CDF မင်းတပ်က ထုတ်ပြန်ပါတယ်။ ကနဦးဖမ်းဆီးခံရတဲ့ ကျေးရွာသား ၂ဦးအပါအဝင် အဆက်အသွယ် မရရှိသေးသူ ၉ ဦးအထိရှိတယ်လို့ သိရပါတယ်။

ယမန်နေ့၊ ကြာသပတေးနေ့ နံနက် ၄:၃၀ ခန့်က ချင်းပြည်နယ်ထဲကနေ မကွေးတိုင်းဘက်ကိုတပ်ဆုတ်သွားခဲ့ပြီး ဖမ်းဆီးခံ အမျိုးသားတစ်ဦးကို ထီးလင်းမြို့ထဲသို့ပြန်ဝင်သွားကြတယ်လို့ သိရပါတယ်။ စစ်ကောင်စီတပ်သားတွေ ပြန်လည် ဆုတ်ခွာသွားပြီးနောက် CDF မင်းတပ်ဘက်က နယ်မြေရှင်းလင်းရေး ပြုလုပ်ခဲ့ရာတွင် စစ်ကောင်စီက အစုလိုက် အပြုံလိုက် မီးရှို့သတ်ဖြတ်ခဲ့သော အလောင်းမီးရှို့ရာနေရာ အားစစ်ဆေးခဲ့တယ်လို့ သိရပါတယ်။ စစ်ကောင်စီ တပ်သား တွေက အလောင်းတွေကိုမီးရှို့ပြီး ကျန်အရိုးစုများကိုလည်း ကြေမွအောင် ထုချေခဲ့တာကြောင့် ကျန်ရစ်သူ မိသားစုများ အနေနဲ့ အသုဘခံဖို့အတွက် သေဆုံးသူအရိုးစုတွေဟာ ဘယ်သူဘယ်ဝါဆိုတာ အတည်မပြုနိုင်ဘဲ ဖြစ်နေတယ်လို့ သိရပါတယ်။

ဆက်အသွယ် မရရှိသေးတဲ့ ပြည်သူတွေကိုတောနင်းရှာဖွေမှုများဆောင်ရွက်လျက်ရှိတယ်လို့ CDF မင်းတပ်က ထုတ်ပြန်ထားပါတယ်။ ဓားစားခံ စစ်ဘေးရှောင်များနဲ့ ရွာခံအများစုအား လုံခြုံရာသို့ ရွှေ့ပြောင်းပေးခဲ့ပြီး ဖြစ်တယ်လို့လည်း သိရပါတယ်။ ပလုံတွီတိုက်ပွဲအတွင်း သေဆုံးသွားခဲ့တဲ့ ပြည်သူများ၏ ကျန်ရစ်သူ မိသားစုများနှင့်ထပ်တူ ဝမ်းနည်းရ တယ်လို့ CDF မင်းတပ်ရဲ့ ထုတ်ပြန်ချက်မှာတွေ့ရပါတယ်။

နိုဝင်ဘာ ၁၁ ရက်နေ့မှာ ထီးလင်းမြို့တွင်း စစ်ကောင်စီ တပ်သားတွေ အထုပ်အပိုး ပြင်ဆင်နေ ကြလျက် ရှိတာကြောင့် ထီးလင်းနဲ့ မင်းတပ်မြို့နယ်များတွင် ပြည်သူတွေ သွားလာခြင်း မပြုလုပ်ကြဖို့ CDF မင်းတပ်က အသိပေး ထုတ်ပြန် ထားပါတယ်။