3rd DEC 2022 - (Ethnic language program-CHO_DAAI) by Radio NUG ~ Newsletter by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၂ ဒီဇင်ဘာလ ( ၃ ) ရက်နေ့ နောက်ဆုံးရပြည်တွင်းသတင်းများ

📌📌 ၁။ စစ် ကောင်စီတပ်သားတစ်ဦး CDF ကန်ပက်လက် ထံသို့ လက်နက်နှင့်တကွ အလင်းဝင်

စစ် ကောင်စီတပ်သား တစ်ဦး CDF ကန်ပက်လက်ထံ ပြီးခဲ့တဲ့ နိုဝင်ဘာလ ၁၁ ရက် နေ့က လက်နက်နဲ့တကွ အလင်းဝင် ရောက်လာ တယ်လို့ CDF ကန်ပက်လက်က နိုဝင်ဘာလ ၂၇ ရက် နေ့ ညဦးပိုင်းမှာ ရုပ်သံဖိုင်နဲ့အတူ သတင်းထုတ်ပြန်လာ ပါတယ်။ ခေါလေး (ခ) ကျော်ဝင်းမောင် (ခ) ကျော်စိုင်းခန့်ဆိုတဲ့ လူငယ်လေးတစ်ယောက်ဟာ စစ်တပ်ရဲ့ ပေါ်တာဆွဲခံရပြီး ၂၀၂၁ စစ်တပ်ရဲ့ အာဏာသိမ်းပြီးနောက်ပိုင်း တိုက်ပွဲပြင်းထန်နေတဲ့ ချင်းပြည်နယ် ကန်ပက်လက်မြို့ကို စေလွှတ်ခြင်း ခံခဲ့ရတယ်လို့ အဲဒီ ရုပ်သံဖိုင်မှာ ဖြေဆိုထားပါတယ်။

စစ် ကောင်စီတပ်က ပြည်သူ တွေကို ဖိနှိပ်တိုက်ခိုက် နေတဲ့ အခြေနေတွေ၊ CDF ကန်ပက်လက်ထံကနေ ပြင်းပြင်းထန်ထန် ခုခံတွန်းလှန်နေတဲ့ အခြေနေအရပ်ရပ်မှာ CDM ဝင်ပြီးလက်နက်နဲ့တကွ ပြည်သူ့ရင်ခွင်ခိုလှုံခဲ့တာဖြစ်တယ်လို့ CDF ကန်ပက်လက်က ဆိုပါတယ်။ အဲဒီစစ် ကောင်စီ တပ်သားကို CDF ကန်ပက်လက်အနေနဲ့ လွတ်မြောက်နယ်မြေကို ပို့ဆောင်ပေးခဲ့တယ်လို့ဆိုပါတယ်။

========================

📌📌 ၂။ SAVE Team က မင်းတပ်မြို့နယ်ရှိ ကလေးသူငယ်များအား ကျန်းမာရေး ကာကွယ်စောင့်ရှောက်မှုပေးနေ

မင်းတပ်မြို့နယ် ပြည်သူ့အုပ်ချုပ်ရေးအဖွဲ့ရဲ့ အခြေခံပညာကျောင်းတွေမှာ တက်ရောက်နေတဲ့ ကလေးသူငယ်တွေတွက် ကျန်းမာရေး အသိပညာပေးခြင်းနဲ့ လိုအပ်တဲ့ကျန်းမာရေးစောင့်ရှောက်မှုတွေကို SAVE Team က ကွင်းဆင်း ဆောင်ရွက်ပေးနေတယ်လို့ သိရပါတယ်။ မင်းတပ်မြို့နယ်မှာရှိတဲ့ အခြေခံပညာ အလယ်တန်းကျောင်း၊ မူလတန်းကျောင်းတချို့မှာ သွားရောက်ပြုလုပ် တာ ဖြစ်တယ်လို့ SAVE Team တာဝန်ခံက ပြောပါတယ်။

“ကျွန်တော်တို့ လက်လှမ်းမီတဲ့နေရာက ကျောင်းတွေမှာ မနေ့က အပြီးစီးလုပ်ခဲ့ပါတယ်။ ကျောင်းကျန်းမာရေးနဲ့ ပတ်သက်တာ ပြောပြတယ်၊ ကလေးတွေကို အာဟာရတိုက်ကျွေးတယ်။ ပြီးတော့ ကျောင်းစာ၊ တကိုယ်ရည် ကျန်းမာရေးနဲ့ ဆိုင်တဲ့ အသိပညာတွေ စစ်ဆေးပြီး ဆုပေးတာမျိုးလည်း လုပ်ဖြစ်ပါတယ်” လို့ သူက ပြောပြပါတယ်။

လက်ရှိ SAVE Team ရဲ့ ကျေးရွာအတွင်းမှာ အခြေခံပညာ မူလတန်း၊ အလယ်တန်းတက်နေတဲ့ ကျောင်းသူ၊ သား ကလေးသူငယ် ၁၅၀ ဝန်းကျင်ရှိပြီး သူတို့တွက် လိုအပ်တာတွေ ဆက်လက်လုပ်ဆောင်သွားနိုင်ဖို့ ပြည်တွင်း ပြည်ပက အသိမိတ်ဆွေများ ဆက်လက်ပါဝင်လာနိုင်တယ်လို့လည်း တောင်းဆိုပါတယ်။ SAVE Team ဟာ စစ်ကောင်စီက အာဏာသိမ်းပြီးတဲ့နောက် မင်းတပ်မြို့နယ်အတွင်းမှာရှိတဲ့ ကျေးရွာ ၁၂ ရွာဝန်းကျင်က ပြည်သူတွေရဲ့ ကျန်းမာရေးကို စောင့်ရှောက်မှုပေးနေတဲ့ မင်းတပ် ပရဟိတ လူငယ်အဖွဲ့စည်းတစ်ခု ဖြစ်ပါတယ်။

========================

📌📌 ၃။ တစ်လတာ တိုက်ပွဲအတွင်း စစ်ကောင်စီတပ်သား ၅၅ ဦးကျော် ရှင်းလင်းနိုင်ပြီး CNA ရဲဘော်တစ်ဦး အသက်ပေးလှူ ခဲ့တယ်လို့ CNF ထုတ်ပြန်

ချင်းအမျိုးသားတပ် CNA ရဲ့ တပ်မဟာ ၃ နယ်မြေအတွင်းမှာ CNA ဦးဆောင်တဲ့ ပူးပေါင်းတပ်တွေနဲ့ စစ်ကောင်စီတပ်တို့ ယခုနှစ် နိုဝင်ဘာလဆန်းပိုင်းလောက်ကနေ စတင်ပြီး တိုက်ပွဲပြန်လည်ပြင်းထန်ခဲ့တယ်လို့ ချင်းအမျိုးသားတပ်ဦး CNF က နိုဝင်ဘာလ ၃၀ ရက်နေ့ မှာ သတင်းထုတ်ပြန်ပါတယ်။ နိုဝင်ဘာလ တစ်လအတွင်းမှာ ဟားခါးမြို့တွင်းတိုက်ပွဲ၊ ဟားခါး - ထန်တလန်မြို့အကြားတိုက်ပွဲတွေက ပြင်းထန်ခဲ့ပြီး စစ်ကောင်စီတပ်သား ၅၅ ဦးထက်မနည်း ရှင်းလင်းနိုင်ခဲ့တယ်လို့ အဲဒီ ထုတ်ပြန်ချက်ထဲမှာ ဖော်ပြပါတယ်။

တိုက်ပွဲတွေအတွင်းမှာ စစ်ကောင်စီက ဂျက်ဖိုက်တာနှစ်စင်း၊ တိုက်ခိုက်ရေး ရဟတ်ယာဥ် သုံးစင်းအထိအသုံးပြုပြီး လေကြောင်းကနေ ပစ်ခတ်ခဲ့သလို ဟားခါးမြို့ပေါ် ဗျူဟာကုန်း (Rung Tlang) ကနေပါ လက်နက်ကြီးနဲ့ နေ့စဥ်ပစ် ခတ်တယ်လို့ ဆိုပါတယ်။ အထိနာတဲ့ စစ်ကောင်စီရဲ့ မတူညီတဲ့လက်နက် ၉ လက်နဲ့အတူ ခဲယမ်းတွေ သိမ်းဆည်းထားနိုင်ပြီး နိုဝင်ဘာလ တစ်လတာတိုက်ပွဲအတွင်းမှာပဲ ချင်းအမျိုးသားတပ် CNA ရဲဘော်တစ်ဦး တိုင်းပြည်နဲ့ လူမျိုးအတွက် အသက်ပေး လှူသွားခဲ့တယ်လို့လည်း ထုတ် ပြန်ထားပါတယ်။

========================

📌📌 ၄။ ဒဂုံတက္ကသိုလ်က ကျောင်းသား ၇ ဦး သေဒဏ်ချမှတ်ခံရ

ရန်ကုန်မြို့ ဒဂုံတက္ကသိုလ်က ကျောင်းသား ၇ဦးကို အင်းစိန်ထောင် စစ်ခုံရုံးက သေဒဏ်ချမှတ်လိုက်တယ်လို့ ဒဂုံတက္ကသိုလ် ကျောင်းသားများ သမဂ္ဂရဲ့ ဒီဇင်ဘာလ ၁ရက်အစောပိုင်း သတင်းထုတ်ပြန်ချက်အရ သိရပါတယ်။ နိုဝင်ဘာလ ၃၀ရက်နေ့က အင်းစိန်ထောင် စစ်ခုံရုံးကနေ အဲဒီကျောင်းသား ၇ဦးကို ပုဒ်မ ၃၀၂ (က) နဲ့ မတရားစွပ်စွဲပြီး သေဒဏ်ချမှတ်ခဲ့တာဖြစ်တယ်လို့ ဆိုပါတယ်။

သေဒဏ်ချမှတ်ခံရတဲ့ ကျောင်းသား ၇ ဦးဟာ ပြီးခဲ့တဲ့ ဧပြီလနှောင်းပိုင်းက မတရား ဖမ်းဆီးခံထားရသူတွေပါ။ အာဏာသိမ်း စစ်ကောင်စီဟာ ပြီးခဲ့တဲ့ ဇူလိုင်လအတွင်းကပဲ ကိုဖြိုးဇေယျာသော်၊ ကိုဂျင်မီ၊ ကိုလှမိုးအောင်နဲ့ ကိုအောင်သူရဇော်တို့ ၄ဦးအပေါ် ထောင်တွင်း လူသတ်မှု ကျူးလွန်ခဲ့တာ ထင်ထင်ရှားရှားတွေ့ရပါတယ်။ စစ်ကောင်စီက အာဏာသိမ်းပြီးနောက်ပိုင်းမှာ ဖမ်းဆီးခံပြည်သူ ၁၂၈ဦးထိ သေဒဏ်ချမှတ်ခံထားရတယ်လို့လည်း နိုင်ငံရေးအကျဉ်းသားများ ကူညီစောင့်ရှောက်ရေးအသင်း AAPP ရဲ့ ၂၀၂၂ နိုဝင်ဘာ ၂၄ရက်နေ့ မှတ်တမ်းများအရ သိရပါတယ်။

========================

📌📌 ၅။ လေယာဉ်ပစ် လက်နက်ပေးရန် နိုင်ငံတကာကို အမျိုးသားညီညွတ်ရေး အစိုးရ (NUG) တောင်းဆို

စစ်ကောင်စီသည် ရုရှားနိုင်ငံထုတ် လေယာဉ်များဖြင့် မြန်မာပြည်သူများကို လေကြောင်းမှ အကြမ်းဖက် တိုက်ခိုက်နေသောကြောင့် လေယာဉ်ပစ် လက်နက်များ ကူညီပေးရန် နိုင်ငံတကာသို့ အမျိုးသားညီညွတ်ရေး အစိုးရ (NUG) ယာယီ သမ္မတ ဒူဝါလရှီးလက တောင်းဆိုလိုက်သည်ဟု The Irrawaddy - Burmese Edition က ရေးသားသည်။ ဒီဇင်ဘာ ၁ ရက် မြန်မာစံတော်ချိန် နေ့လယ် ၂ နာရီ ၁၀ မိနစ်၌ ကျင်းပသည့် REUTERS Next Leadership Summit နှင့် Global Broadcast တွင် ယင်းကဲ့သို့ ပြောကြားလိုက်ခြင်းဖြစ်သည်ဟု သိရသည်။

“ကျွန်တော်တို့ PDF တွေကို အင်အားကောင်းကောင်းနဲ့ အထူးသဖြင့် ရုရှားလေယာဉ် ကောင်းကောင်းနဲ့ ပြည်သူ လူထုတွေကို သတ်ဖြတ်နေတာ၊ ရွာတွေကို လိုက်ပြီး မီးရှို့နေတာ စတာတွေကို ကာကွယ်ဖို့ လေယာဉ်ပစ်ချတဲ့ လက်နက်များရှိရင်တော့ ကျနော်ထင်တာ ၆ လလောက်နဲ့ဆို ကျတော်တို့ လုံးဝ နိုင်သွားပါပြီ” ဟု ၎င်းက ပြောသည်။ ယူကရိန်းနိုင်ငံအား အမေရိကန်၊ အီးယူကဲ့သို့ နိုင်ငံတကာမှ ထောက်ပံ့သလို မြန်မာနိုင်ငံအားလည်း ထောက်ပံ့ကူညီပါက မြန်မာပြည်သူများ ခံစားနေရသော ဒုက္ခများ ငြိမ်းအေးသွားနိုင်ကြောင်း ဆက်ပြောသည်။

ထို့ပြင် အာဏာသိမ်းပြီးနောက် ယမန်နှစ်က စစ်ကောင်စီတပ်များနှင့် ထိတွေ့တိုက်ပွဲများအတွင်း ဒီမိုကရေစီလိုလားသူ ၂၀၀၀ ဦးထက်မနည်း သေဆုံးခဲ့ရကြောင်း၊ ယင်းကဲ့သို့ ဆုံးရှုံးမှုများကို အရင်းအနှီးအဖြစ် ခံယူပြီး နောက်ဆုတ်သွားမည် မဟုတ်ကြောင်းလည်း NUG ယာယီသမ္မတက ပြောသည်။ အဆိုပါ အခမ်းအနားတွင် ကနေဒါဝန်ကြီးချုပ်၊ လစ်သူယေးနီးယားဝန်ကြီးချုပ်၊ ဂျပန်နိုင်ငံခြားရေးဝန်ကြီး၊ IMF မန်နေးဂျင်းဒါရိုက်တာ၊ ကမ္ဘာ့ဘဏ် ဥက္ကဋ္ဌ၊ Morgan Stanley ဥက္ကဋ္ဌ နှင့် CEO တို့ အပါအဝင် ကမ္ဘာလုံးဆိုင်ရာ နိုင်ငံရေးနှင့် စီးပွားရေးခေါင်းဆောင်များပါဝင် ဟောပြောခဲ့ကြသည်။