28th JAN 2023 - (Ethnic language program-CHO_DAAI) by Radio NUG ~ Newsletter by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ ဇန်နဝါရီလ ( ၂၈ ) ရက်နေ့ နောက်ဆုံးရပြည်တွင်းသတင်းများ

📌📌 ၁။ မင်းတပ်မှာ စစ်ကောင်စီရဲ့ လေကြောင်းတိုက်ခိုက်ခံရမှုကြောင့် ပျက်စီးဆုံးရှုံးမှုများကို မြို့နယ် ပအဖ ထုတ်ပြန်

မင်းတပ်မြို့နယ် တိုက်နယ်အမှတ် ၁ စွန်တောင်ကျေးရွာအနီး ဇန်နဝါရီ ၂၁ ရက်နေ့ညက စစ်ကောင်စီရဲ့လေကြောင်း တိုက်ခတ်မှုကြောင့် ပျက်စီးရှုံးဆုံးမှုတွေကို မင်းတပ်မြို့နယ်ပြည်သူ့အုပ်ချုပ်ရေးသတင်းနှင့် ပြန်ကြားရေးက ထုတ်ပြန်ပါ တယ်။ အဲဒီနေ့ ည ၁၁ နာရီ မိနစ် ၅၀ ဝန်းကျင်မှာ စစ်ကောင်စီဂျက်ဖိုက်တာ တစ်စင်းနဲ့ နှစ်ကြိမ်ဆက်တိုက် ဗုံးကြဲခဲ့တာလို့ ပြောပါတယ်။ တိုက်ပွဲဖြစ်ပွားတာမရှိဘဲ စစ်ကောင်စီရဲ့လေကြောင်းနဲ့ တိုက်ခိုက်ခံရတာကြောင့် ဗုံးဆံထိမှန်တဲ့ အမျိုးသားတစ်ဦးနဲ့ အမျိုးသမီးတစ်ဦး ဒဏ်ရာ (မစိုးရိမ်ရ) ရထားတယ်လို့ ထုတ်ပြန်ထားပါတယ်။

ဇန်နဝါရီ ၂၂ ရက်နေ့ မနက် ၁၁ နာရီဝန်းကျင်မှာလည်း အကြမ်းဖက်စစ်တပ်မှ မင်းတပ်မြို့ပေါ်မှာ တပ်ဆင်ထားတဲ့ ဟောင်ဝစ်ဇာ ‌(Howitzer) လက်နက်ကြီးနဲ့ ဝမ္မသူးကျေးရွာကို ၅ ကြိမ်ထက်မနည်း ပစ်ခတ်ခဲ့ပြီး ထိခိုက်မှုအခြေနေကို မသိရသေးဘူးလို့ ဆိုပါတယ်။

စစ်ကောင်စီက ခုလိုကျေးရွာတွေကို အကြောင်းမဲ့ ဗုံးကြဲတာ၊ လက်နက်ကြီးနဲ့ ရမ်းသမ်းပစ်ခတ်တာတွေကြောင့် ကျေးရွာနေပြည်သူအများစု ထွက်ပြေးတိမ်းရှောင်နေရတယ်လို့လည်း ထုတ်ပြန်ထားပါတယ်။

========================

📌📌 ၂။ မင်းတပ်မှာ စစ်ကောင်စီက လေကြောင်းနဲ့ တိုက်ခိုက်တာဟာ မထူးဇာတ်ခင်းနေတာလို့ CNFတုံ့ပြန်

မင်းတပ်မြို့နယ်အတွင်းမှာ ပြီးခဲ့တဲ့ ဇန်နဝါရီ ၇ ရက်နေ့ကနေ ဇန်နဝါရီ ၂၃ ရက်နေ့အထိ ၁၅ ရက်အတွင်း လေကြောင်း တိုက်ခိုက်ပေါင်း ၈ ကြိမ်ထက်မနည်းပြုလုပ်ခဲ့တယ်လို့ မင်းတပ်မြို့နယ် ပြည်သူ့အုပ်ချုပ်ရေးက ထုတ်ပြန်ပါတယ်။

စစ်ကောင်စီရဲ့ အကြမ်းဖက်လေကြောင်းတိုက်ခိုက်မှုအပါအဝင် လက်နက်ကြီးရမ်းသမ်းပစ်ခတ်မှုကြောင့် ဘာသာရေး အဆောက်အဦး၊ ပြည်သူပိုင်နေအိမ်၊ စစ်ဘေးရှောင်ပြည်သူတွေအတွက် ဖွင့်လှစ်ထားတဲ့ ဆေးခန်း စစ်ရှောင်စခန်းတွေနဲ့ အရပ်ဖက်ပြည်သူတွေ ထိခိုက်မှုများခဲ့ပါတယ်။

စစ်ကောင်စီရဲ့ ဒီလိုအကြမ်းဖက်တိုက်ခိုက်မှုတွေဟာ ၎င်းတို့တရားဝင် ရပ်တည်နိုင်ဖို့ နိုင်ငံရေးထွက်ပေါက်အနေနဲ့ လူထုအပေါ် မထူးဇာတ်ခင်းနေတာသာဖြစ်တယ်လို့ ချင်းအမျိုးသားတပ်ဦး၊ တပ်မတော်က ဇန်နဝါရီ ၂၅ ရက်နေ့မှာ ကြေညာချက် ထုတ်ပြန်လိုက်ပါတယ်။

စစ်ကောင်စီရဲ့ အာဏာရှင်စနစ်အမြစ်ပြတ်ချေမှုန်း ပြီး ဖက်ဒရယ်ဒီမိုကရေစီပြည်ထောင်စုတည်ဆောက်ရေးအတွက် ချင်းအမျိုးသားတပ်ဦး၊ တပ်မတော်အနေနဲ့ ဆက်လက်တိုက်ပွဲဝင်သွားမယ်လို့လည်း ဆိုပါတယ်။

စစ်ကောင်စီဟာ ၂၀၂၃ ဇန်နဝါရီလအတွင်းမှာပဲ CNF ဌာနချုပ်အပါအဝင် မင်းတပ်မြို့နယ်နဲ့ မြန်မာနိုင်ငံအနှံ့ တော်လှန်ရေး အင်အားစုတွေတည်ရှိရာနေရာတွေကို လေကြောင်းတိုက်ခိုက်မှု ပိုမိုလုပ်ဆောင်လာတာ မြင်တွေ့ရပါတယ်။

စစ်ကောင်စီရဲ့ လေကြောင်းတိုက်ခိုက်မှုတွေကြောင့် အိမ်နီးချင်းနိုင်ငံတွေအနေနဲ့ လေပိုင်နက်အသုံးပြုခွင့်မပေးဖို့ NUG က ၂၀၂၃ ဇန်နဝါရီ ၁၇ ရက်နေ့က ကြေညာချက်ထုတ်ပြန် တောင်းဆိုခဲ့ပေမယ့် အိမ်နီးချင်းနိုင်ငံတွေအနေနဲ့ တစ်စုံတစ်ရာ ပြန်လည်တုံ့ပြန်တာမျိုးမရှိသေးပါဘူး။

ကုလသမဂ္ဂ အထွေထွေအတွင်းရေးမှူး မြန်မာနိုင်ငံဆိုင်ရာ အထူးကိုယ်စားလှယ်ကလည်း ၂၀၂၂ ခုနှစ် သြဂုတ်လအတွင်းက စစ်ကောင်စီဥက္ကဌ ဗိုလ်ချုပ်မှူးကြီး မင်းအောင်လှိုင်ကို လေကြောင်းတိုက်ခိုက်မှု မလုပ်ဖို့တိုက်တွန်းခဲ့ပေမယ့် စစ်ကောင်စီ ဥက္ကဌက ချက်ချင်းပယ်ချခဲ့တယ်လို့ RFA သတင်းဌာနက ရေးသားထားပါတယ်။

========================

📌📌 ၃။ ဟားခါးမှာ စစ်ကောင်စီတပ်ဖွဲ့ဝင် ၂ ဦး ပစ်သတ်ခံရ၊ လက်နက် ၁ လက်သိမ်းဆည်း

ဟားခါး ကျော်ဘုတ်ရပ်ကွက်မှာ ဇန်နဝါရီ ၂၅ ရက်နေ့ မနက်အစောက စစ်ကောင်စီရဲ့ လက်အောက်ခံတပ်ဖွဲ့ဝင်တွေကို တိုက်ခိုက်ခဲ့တယ်လို့ CDF ဟားခါးက သတင်းထုတ်ပြန်ပါတယ်။ ဒီပစ်ခတ်တိုက်ခိုက်မှုမှာ စစ်ကောင်စီ လက်အောက်ခံတပ်ဖွဲ့ဝင် ၂ ဦးသေပြီး လက်နက် ၁ လက်ကိုပါ သိမ်းဆည်းရမိတယ် လို့ ပြောပါတယ်။

ပြီးခဲ့တဲ့ ဇန်နဝါရီ ၁၃ ရက်နေ့ကလည်း ဟားခါးမြို့ ဈေးဟောင်းရပ်ကွက်မှာ စစ်ကောင်စီရွေးကောက်ပွဲအတွက် စာရင်း ကောက်ယူတဲ့ ရဲတပ်သားတွေ တိုက်ခိုက်ခံရလို့ ၁ ဦးသေပြီး ၃ ဦးထက်မနည်း ဒဏ်ရာရတဲ့ဖြစ်စဥ် ဖြစ်ပွားခဲ့တယ်လို့ ချင်းဂျာနယ်ရဲ့ဖော်ပြချက်အရ သိရပါတယ်။

လာမယ့် ၂၀၂၃ သြဂုတ်လမှာ ပြုလုပ်မယ့် စစ်ကောင်စီရဲ့ အတုအယောင်ရွေးကောက်ပွဲကို မပြုလုပ်ဖို့နဲ့ ပါဝင်ပတ်သက်တဲ့ ဘယ်လိုပုဂ္ဂိုလ်မျိုးကိုမဆို ထိရောက်တဲ့အရေးယူမှုတွေ လုပ်ဆောင်သွားမယ်လို့ CDF ဟားခါးကောင်စီက ဇန်နဝါရီ ၉ ရက်နေ့ရက်စွဲနဲ့ အသိပေးထားပြီးဖြစ်ပါတယ်။

========================

📌📌 ၄။ တောင်ပိုင်းစစ်ဒေသမှာ NUG က လက်နက်ထပ်မံတပ်ဆင်ပေး

တောင်ပိုင်းစစ်ဒေသ၊ စစ်ဒေသခွဲ အမှတ် (၃) က ပြည်သူ့ကာကွယ်ရေးတပ်မတော် ကျားသစ်နက်စစ်ကြောင်းရဲ့ မွမ်းမံသင် တန်းဆင်းပွဲအခမ်းအနားကို ဇန်နဝါရီလ ၂၄ ရက်နေ့မှာ ကျင်းပခဲ့ပြီး အမျိုးသားညီညွတ်ရေးအစိုးရ (NUG) ကာကွယ်ရေး ဝန်ကြီးဌာနက လက်နက်တပ်ဆင်ပေးအပ်တယ်လို့ တောင်ပိုင်းစစ်ဒေသက သတင်းထုတ်ပြန်ပါတယ်။

သင်တန်းဆင်းပွဲအခမ်းအနားမှာ စစ်ဒေသခွဲအမှတ် (၃) တာဝန်ရှိသူတွေက အမျိုးသားညီညွတ်ရေးအစိုးရ၊ ပြည်ထောင်စု ဝန်ကြီးချုပ်ပေးပို့တဲ့ သဝဏ်လွှာနှင့် အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးပေးပို့တဲ့ သဝဏ်လွှာကို ဖတ်ကြားခဲ့တယ်လို့ ဆိုပါတယ်။

ကျားသစ်နက်စစ်ကြောင်းရဲ့ မွမ်းမံသင်တန်းဆင်းရဲဘော်တွေက လက်နက်ကိုင်တွယ် ဖြုတ်တပ်မှုအပါအဝင် စစ်ရေး ဆိုင်ရာ လှုပ်ရှားမှု၊ VIP ကာကွယ်မှု သက်တော်စောင့်တို့ရဲ့ ဗျူဟာနှင့် စစ်ပွဲအတွင်း အရေးပေါ်အခြေအနေမှာ လူနာသယ်ယူ တဲ့နည်းလမ်းတွေ သရုပ်ဖော်ပြသခဲ့တယ်လို့ ထုတ်ပြန်ထားပါတယ်။

တောင်ပိုင်းစစ်ဒေသ၊ စစ်ဒေသခွဲ အမှတ် (၃) အတွက် ကာကွယ်ရေးဝန်ကြီးဌာန တပ်ဆင်ပေးတဲ့လက်နက် ပေးအပ်ခဲ့ပြီး ပြည်ထောင်စုဝန်ကြီးချုပ်ပေးပို့တဲ့ ဂုဏ်ပြုငွေ (၁၀) သိန်းကျပ်ကိုလည်း သင်တန်းဆင်းရဲဘော် တွေကို ပေးအပ်ခဲ့တယ်လို့ ထုတ် ပြန်ချက်မှာ ဖော်ပြပါတယ်။ အမျိုးသားညီညွတ်ရေးအစိုးရ (NUG) ဟာ တောင်ပိုင်းစစ်ဒေသမှာရှိတဲ့ ကော်ဘရာစစ်ကြောင်းနှင့် ဒေါနစစ်ကြောင်းရဲ့ ပြီးခဲ့တဲ့စစ်သင်တန်းဆင်းပွဲမှာတွေမှာလည်း ရဲဘော်တွေအတွက် လက်နက်တပ်ဆင်မှုတွေ ပြုလုပ်ပေးခဲ့ပါတယ်။