4th FEB 2023 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ ဖေဖော်ဝါရီလ ( ၄ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ ချင်းပြည်နယ် ၇ မြို့နယ်အပါအဝင် တစ်နိုင်ငံလုံးက ၃၇ မြို့နယ်မှာ စစ်အုပ်ချုပ်ရေးထပ်မံကြေညာ

 

ချင်းပြည်နယ် ဟားခါးမြို့နယ်၊ ဖလမ်းမြို့နယ်၊ တီးတိန်မြို့နယ်၊ ထန်တလန်မြို့နယ်၊ မတူပီမြို့နယ်၊ တွန်းဇံမြို့နယ်နဲ့ ကန်ပက်လက်မြို့နယ်တို့ကို စစ်ကောင်စီက ဖေဖော်ဝါရီ ၂ ရက်နေ့မှာ စစ်အုပ်ချုပ်ရေးအဖြစ် ကြေညာလာပါတယ်။

 

အာဏာသိမ်းပြီးတဲ့နောက် အစောဆုံးလက်နက်ကိုင်တော်လှန်တဲ့ မြို့တွေထဲက ချင်းပြည်နယ်တောင်ပိုင်း မင်းတပ်မြို့နယ် မှာ ၂၀၂၁ မေလ ၁၃ ရက်နေ့တည်းက စစ်အုပ်ချုပ်ရေးအဖြစ် စစ်ကောင်စီက ကြေညာထားပြီး ဖြစ်ပါတယ်။

 

စစ်အုပ်ချုပ်ရေး ကြေညာတဲ့ ချင်းပြည်နယ်က မြို့နယ်ထဲမှာ ပလက်ဝမြို့နယ်ကိုတော့ ထည့်သွင်းထားတာ မတွေ့ရသေး ပါဘူး။ စစ်ကောင်စီ အာဏာသိမ်း ၂ နှစ်ပြည့် ၂၀၂၃ ဖေဖော်ဝါရီ ၂ ရက်နေ့မှာ ကယား၊ ကရင်၊ ချင်းပြည်နယ်၊ မွန်၊ စစ်ကိုင်းတိုင်း၊ တနင်္သါရီတိုင်း၊ မကွေးတိုင်းနဲ့ ပဲခူးတိုင်းဒေသကြီးထဲက မြို့နယ်ပေါင်း ၃၇ မြို့နယ်ကို စစ်အုပ်ချုပ်ရေးအဖြစ် စစ်ကောင်စီက ထပ်မံကြေညာလာတာလည်း ဖြစ်ပါတယ်။

========================

 

📌📌 ၂။ စစ်ကောင်စီက ဦးမောင်းဟာကို ဗဟိုအကြံပေးအဖွဲ့ဝင်အဖြစ် ပြောင်းလဲခန့်အပ်

 

စစ်ကောင်စီက ဗဟိုအကြံပေးအဖွဲ့ကို ဖေဖော်ဝါရီ ၁ ရက်မှာ အမိန့်အမှတ် ၇/၂၀၂၄ နဲ့ စတင်ဖွဲ့စည်းလိုက်ပါတယ်။ စစ်ကောင်စီဖွဲ့စည်းလိုက်တဲ့ ဗဟိုအကြံပေးအဖွဲ့ဝင်မှာ ဦးမောင်းဟာကိုပြောင်းလဲ ခန့်အပ်လိုက်တာ ဖြစ်ပါတယ်။ စစ်ကောင်စီက အသစ်ဖွဲ့စည်းလိုက်တဲ့ ဗဟိုအကြံပေးအဖွဲ့မှာ အဖွဲ့ဝင် ၉ ဦးနဲ့ ဖွဲ့စည်းထားတာ ဖြစ်ပါတယ်။ ဖွဲ့စည်းပုံ အခြေခံ ဥပဒေပုဒ်မ ၄၁၉ အရ ယခုလို ဖွဲ့စည်းလိုက်တာ ဖြစ်တယ်လို့ စစ်ကောင်စီရဲ့ အမိန့်ထုတ်ပြန်စာမှာ ပါရှိပါတယ်။

 

စစ်ကောင်စီဟာ အာဏာသိမ်းပြီးနောက် ဖေဖော်ဝါရီ ၃ ရက်နေ့မှာ ဦးမောင်းဟာကို နိုင်ငံတော် ကောင်စီအဖွဲ့ဝင်အဖြစ် ခန့်အပ်ခဲ့တာဖြစ်ဖြစ်ပြီး ၂ နှစ်အကြာမှာ ဗဟိုအကြံပေးအဖွဲ့ဝင်အဖြစ် ‌တိုးမြှင့်ခန့်အပ်လိုက်တာပါ။

 

ချင်းအမျိုးသားခေါင်းဆောင်ကြီး ဦးဝမ္မသူးမောင်းရဲ့ သားဖြစ်သူ ဦးမောင်းဟာ ဟာ ၁၉၅၃ ဒီဇင်ဘာ ၁၃ ရက်နေ့မှာ မွေးဖွားခဲ့ပြီး ၁၉၇၆ ခုနှစ်မှာ မန္တလေးဝိဇာသိပ္ပံတက္ကသိုလ်ကနေ သိပ္ပံရှုပဗေဒဘွဲ့ရရှိခဲ့ပြီးနောက် မြန်မာ့စီးပွားရေးဘဏ်မှာ အစိုးရဝန်ထမ်းအဖြစ် ၃၇ နှစ်ကြာတာဝန်ထမ်းဆောင်ခဲ့သူလည်း ဖြစ်ပါတယ်။

========================

 

📌📌 ၃။ မင်းတပ်မြို့နယ် အုံကျေးရွာမှာ လက်နက်ကြီးကျည်ကျပြီး အမျိုးသမီး ၁ ဦးနဲ့ ကလေး ၃ ဦးဒဏ်ရာရ

 

မင်းတပ်မြို့နယ်၊ အုံကျေးရွာထဲကို လက်နက်ကြီးကျည်ကျရောက်ပေါက်ကွဲပြီး ဒဏ်ရာရသူ ၄ ဦးရှိတယ်လို့ သိရပါတယ်။ ခလရ ၂၇၄ တပ်ရင်းက ရမ်းသမ်းပစ်ခတ်တဲ့ လက်နက်ကြီးကျည်ဟာ ဇန်နဝါရီ ၃၁ ရက်နေ့ ညနေ ၃ နာရီ မိနစ် ၃ဝ ဝန်းကျင်က အုံကျေးရွာထဲ ကျရောက်ပေါက်ကွဲတာလို့ ဒေသခံတစ်ဦးက ပြောပါတယ်။

 

“ညနေက အသံအကျယ်ကြီး ကြားတယ်၊ မိုးချုပ်တော့မှ အုံရွာထဲကျတယ်လို့ သိရတာ၊ ဒဏ်ရာရတာ ၄ ယောက်တဲ့။ ကားတစ်စီးနဲ့ အိမ်ပါ ထိသွားတယ်လို့ ပြောတယ်” လို့ The Mindat Post ကို ပြောပါတယ်။

စစ်ကောင်စီရဲ့ လက်နက်ကြီးကျည်ကြောင့် ဒဏ်ရာရတဲ့ အမျိုးသမီးဟာ အသက် ၄၀ ဝန်းကျင်ဖြစ်ပြီး သူနဲ့အတူ အသက် ၁၅ နှစ်ကနေ ၂၀ အကြား မိန်းခလေး ၃ ဦးပါ ထိခိုက်ဒဏ်ရာရထားတာလို့ သူက ဆက်ပြောပါတယ်။ “ဒဏ်ရာရထားတဲ့သူတွေက အကုန်အမျိုးသမီးတွေချည်းပဲတဲ့၊ တချို့ကတော့ ဒဏ်ရာအရမ်းပြင်းတဲ့ပုံစံ ကြားတယ်” လို့ ဆိုပါတယ်။

 

၂၀၂၃ ဇန်နဝါရီလ တစ်လအတွင်း မင်းတပ်မြို့နယ်ထဲမှာ လေကြောင်းတိုက်ခိုက်မှု ၁၀ ကြိမ်ဝန်းကျင်နဲ့ လက်နက်ကြီး ရမ်းသမ်းပစ်ခတ်တာတွေကို စစ်ကောင်စီက နေ့စဥ်ရက်ဆက် ကျူးလွန်နေတာလည်း ဖြစ်ပါတယ်။

 

ဒီတစ်လထဲမှာပဲ စစ်ကောင်စီရဲ့ လေကြောင်းတိုက်ခိုက်မှုနဲ့ လက်နက်ကြီးရမ်းသမ်းပစ်ခတ်မှု တွေကြောင့် ဗုံးစထိမှန်တဲ့ ဒဏ်ရာရပြည်သူ ၉ ဦးအထိရှိလာပြီး နေအိမ်နဲ့ ဘာသာရေးအဆောက်အဦး ၁၀ လုံးထက်မနည်းအပါအဝင် မော်တော်ယာဥ် ၂ စီးပါ ပျက်စီးဆုံးရှုံးမှုရှိတယ်လို့ သိရပါတယ်။

========================

 

📌📌 ၄။ တော်လှန်ရေးကာလအလွန်မှာ CDMer တွေကို တစ်လုံးတစ်ခဲတည်း ဂုဏ်ပြုချီးမြှင့်သွားမယ်လို့ NUG ထုတ်ပြန် ကြေညာ

စစ်ကောင်စီက နိုင်ငံတော်အာဏာကို မတရားသိမ်းယူတဲ့နေ့က စတင်ပြီးအမှန်တရားအတွက် ရဲရဲဝံ့ဝံ့ ရွပ်ရွပ်ချွံချွံ အကြမ်း မဖက် အာဏာဖီဆန်ရေး CDM လှုပ်ရှားမှုတော်လှန်ရေးမှာ ပါဝင်လျက်ရှိတဲ့ ပြည်သူ့သူရဲကောင်း၊ နိုင်ငံ့သူရဲကောင်း CDM ဝန်ထမ်းတွေကို ဂုဏ်ပြုချီးမြှင့်သွားမယ်လို့ NUG က ဖေဖော်ဝါရီ ၁ ရက်နေ့မှာ ထုတ်ပြန်ကြေညာလာပါတယ်။

 

ထုတ်ပြန်ချက်ထဲမှာ ပြည်သူ့ဝန်ထမ်းကောင်း CDM တွေကို တော်လှန်ရေးကာလအလွန် နိုင်ငံတော်အဆင့်ဂုဏ်ထူး ဆောင်ဘွဲ့တံဆိပ် ချီးမြှင့်သွားမယ်လို့ ဆိုပါတယ်။ နိုင်ငံ့ဝန်ထမ်းကောင်း CDM တွေကို စစ်ကောင်စီက အာဏာသိမ်းချိန်မတိုင်ခင်ထိ ထမ်းဆောင်တဲ့ ရာထူးကနေ ရာထူး တစ်ဆင့်တိုး ချီးမြှင့်သွားမယ့်အကြောင်းနဲ့ ဒီလိုရာထူးတိုးမြှင့်တာဟာ ၂၀၂၃ ဖေဖော်ဝါရီ ၁ ရက်နေ့ကစပြီး အကျုံးဝင်သွား မယ်လို့ NUG ရဲ့ ကြေညာချက်မှာ ဖော်ပြထားပါတယ်။

 

ယနေ့ချိန်ထိ CDM မှာပါဝင်တဲ့ အချိန်ပိုင်းဝန်ထမ်းတွေ၊ နေ့စားဝန်ထမ်းတွေနဲ့ သရုပ်ပြတွေကိုလည်း ၂၀၂၃ ဖေဖော်ဝါရီ ၁ ရက်နေ့ကစပြီး အမြဲတမ်းဝန်ထမ်းအဖြစ်အတည်ပြုခန့်အပ်လိုက်တယ်လို့ ဆိုပါတယ်။ စစ်ကောင်စီက အာဏာသိမ်းဖို့ကြံစည်နေတဲ့အချိန်ကနေစပြီး နိုင်ငံ့ဝန်ထမ်း CDM တွေ မထုတ်ယူသေးတဲ့ လစာငွေနဲ့ ချီးမြှင့်ငွေတွေက်ု တစ်လုံးတစ်ခဲတည်း ပြန်လည်ပေးအပ်သွားမယ်လို့ NUG က ထုတ်ပြန်ကြေညာထားပါတယ်။

#RadioNUGLocalNews

#SpringRevolution