1st APL 2023 - (Ethnic language program-CHO_DAAI) by Radio NUG

 

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ ဧပြီလ ( ၁ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ ထန်တလန်မှာ စစ်ကောင်စီတပ် ဗုံးကြဲလို့ ကလေး ၂ ဦးအပါအဝင် ၈ ဦးအသက်ဆုံးရှုံး၊ ၁၀ ဦးထက်မနည်း ပြင်းထန်ဒဏ်ရာရ

 

ထန်တလန်မြို့နယ် ခွာဖိုကျေးရွာ (Khuafo) ထဲကို စစ်ကောင်စီက လေကြောင်း ဗုံးကြဲတာကြောင့် အပြစ်မဲ့ပြည်သူ ၁၀ နှစ်အောက် ကလေးငယ် ၂ ဦးအပါအဝင် ပြည်သူ ၈ ဦးအသက်ဆုံးရှုံးပြီး ၁၀ နှစ်အောက်ကလေးငယ် ၂ ဦး အပါအဝင် ၁၀ ဦးထက်မနည်း ဒဏ်ရာရတယ်လို့ သိရပါတယ်။

 

Jet Fighter ၂ စင်း၊ Mi 35 ၁ စင်း စုစု ပေါင်း ၃ စင်းနဲ့ မတ်လ ၃၀ ရက် မနက် ၁၀ နာရီ ၁၆ မိနစ်ဝန်းကျင်မှာ စစ်ကောင်စီက ကျေးရွာလယ် ခေါင်ကို ဗုံးကြဲတာပါ။

 

စျေးဆိုင်ခန်း၊ နှစ်ခြင်းအသင်းတော်အပါအဝင် ဘာသာရေးအဆောက်အဦး ၂ လုံး၊ အများပြည်သူ နေအိမ် ၇ လုံးထက်မနည်း ပျက်စီးတယ်လို့လည်း အခင်းဖြစ်ပွားရာသွားရောက်ကူညီသူက သူ့ရဲ့ လူမှုကွန်ရက်ပေါ်ကနေ အသိပေးထားပါတယ်။

 

၂၀၂၃ နှစ်ဦးပိုင်းကစပြီး လက်ရှိချိန်ထိ ချင်းပြည်နယ်မှာ လေကြောင်းတိုက်ခိုက်မှုပေါင်း ၁၀၀ ကျော် ခံထားရပါတယ်။

 

========================

 

📌📌 ၂။ မတူပီနယ်မှာ တိုက်ပွဲဆက်တိုက်ပြင်းထန်နေ

 

မတူပီနယ်မှာ လူအင်အား၊ ရိက္ခာသယ်တဲ့ စစ်ကောင်စီနဲ့ CDF မတူပီ၊ CNA ပူးပေါင်းတပ်တို့အကြား အခုမတ်လအတွင်းမှာ တိုက်ပွဲတွေဆက်တိုက်ပြင်းထန်နေတယ်လို့ CDF မတူပီက သတင်းထုတ်ပြန်ပါတယ်။

 

မတူပီ - ပလက်ဝကားလမ်းပေါ်က ထယ်ဘွေးစခန်းကိုလာတဲ့ စစ်ကား ၃ စီး၊ အင်အား ၈၀ ကျော် စစ်ကောင်စီတပ်နဲ့ မတ်လ ၂၀ ရက်နေ့ကနေ မတ်လ ၂၆ ရက်အထိ တိုက်ပွဲဆက်တိုက်ဖြစ်နေတာပါ။

 

စစ်ကောင်စီယာဉ်တန်းကို မတူပီ - ပလက်ဝ မိုင်တိုင် (၁၄/၁၆) အကြားမှာ မိုင်း ၁ ကြိမ်၊ ကြားဖြတ်ပစ်ခတ်မှု ၃ ကြိမ်ပြု လုပ်နိုင်ခဲ့တာကြောင့် စစ်ကောင်စီတပ်ဖွဲ့ဝင် ၁၃ ဦးေသပြီး ထိခိုက်ဒဏ်ရာရသူများတယ်လို့ CDF မတူပီက ပြောပါတယ်။

 

၇ ရက်နီးပါးကြာတဲ့ ဒီတိုက်ပွဲမှာ CDF မတူပီ ရဲဘော် ၁ ဦး ဒဏ်ရာရတယ်လို့လည်း ထုတ်ပြန်ချက်မှာ ဖော်ပြထားပါတယ်။ 

 

မတူပီ - ပလက်ဝလမ်း မိုင်တိုင် ၁၆ အနီးအနားတွေမှာ စစ်ကောင်စီတပ်က နင်းမိုင်းတွေထောင်ထားတာကြောင့် မိုင်းရှင်း လင်းတာ လုပ်ဆောင်ပြီးမှ သွားလာကြဖို့နဲ့ CDF မတူပီရဲ့ သတင်းထုတ်ပြန်ချက်တွေ အလေးထားပေးကြဖို့ တိုက်တွန်း ထားပါတယ်။

 

========================

 

📌📌 ၃။ CNLD အပါအဝင် ပါတီပေါင်း ၄၀ ဖျက်သိမ်းတယ်လို့ စစ်ကောင်စီကြေညာ

 

CNLD, NLD အပါအဝင် နိုင်ငံရေးပါတီ ၄၀ ကို မှတ်ပုံပြန်မတင်ကြတဲ့အတွက် ဖျက်သိမ်းလိုက်တယ်လို့ စစ်ကောင်စီရဲ့ ရွေးကောက်ပွဲကော်မရှင်က ကြေညာပါတယ်။

ဖျက်သိမ်းလိုက်တဲ့ပါတီတွေထဲမှာ CNLD, SNLD, NLD တို့နဲ့အတူ ကချင်၊ ကယား၊ ချင်းပြည်နယ်နဲ့ ရခိုင်ပြည်နယ်အခြေစိုက် ပါတီတချို့ပါဝင်တာ တွေ့ရပါတယ်။

 

စစ်ကောင်စီပြဌာန်းထားတဲ့ နိုင်ငံရေးပါတီများမှတ်ပုံတင်ခြင်းဥပဒေသစ်အရ မတ်လ ၂၈ ရက်ဟာ နိုင်ငံရေးပါတီအဖြစ် လျှောက်ထားဖို့ နောက်ဆုံးရက်အဖြစ် သတ်မှတ်ထားတာပါ။

 

ဒါ့အပြင် ရွေးကောက်ပွဲကော်မရှင်ထံ မှတ်ပုံတင်ထားတဲ့ နိုင်ငံရေးပါတီ ၅၀ ရှိတယ်လို့ ဆိုပါတယ်။

 

အဲဒီထဲက ပါတီတွေကို စိစစ်နေဆဲကာလဖြစ်တယ်လို့လည်း စစ်ကောင်စီရဲ့ ရွေးကောက်ပွဲကော်မရှင်က ကြေညာထားပါတယ်။

 

========================

 

📌📌 ၄။ ရွေးကောက်ပွဲကျင်းပမယ့်ရက် အတိအကျ မပြောနိုင်သေးဟု စစ်ကောင်စီပြော

 

နိုင်ငံရဲ့လုံခြုံရေးအခြေအနေအရ ရွေးကောက်ပွဲ ကျင်းပမယ့် အချိန်အတိအကျကို ပြောဆိုနိုင်တာ မရှိသေးဘူးလို့ စစ်ကောင်စီ သတင်းထုတ်ပြန်ရေးအဖွဲ့ ခေါင်းဆောင် ဗိုလ်ချုပ် ဇော်မင်းထွန်းက ပြောပါတယ်။

 

မတ်လ ၂၇ ရက် နေပြည်တော်မှာပြုလုပ်တဲ့ ၇၈ နှစ်မြောက် တပ်မတော်နေ့မှာ မီဒီယာတွေရဲ့ မေးမြန်းမှုအပေါ် ခုလိုဖြေကြားခဲ့ တာ ဖြစ်ပါတယ်။

 

ပါတီစုံဒီမိုကရေစီစနစ်ကို အာမခံထားတဲ့အတွက် အထွေထွေရွေးကောက်ပွဲကို မဖြစ်မနေ လုပ်သွားမှာဖြစ်ပြီး လက်ရှိ အခြေအနေတွေအရ ရွေးကောက်ပွဲကို ဘယ်အချိန်မှာ လုပ်မလဲဆိုတာ အတိအကျ ပြောနိုင်တာ မရှိသေးဘူးလို့ ဆိုပါတယ်။ 

 

အစောပိုင်းကာလတွေက ရွေးကောက်ပွဲကို ၂၀၂၃ ဩဂုတ်လတွင်းမှာ ပြုလုပ်မယ်လို့ သတင်းတွေထွက်ပေါ်နေပေမယ့် ရွေးကောက်ပွဲနောက်ဆုတ်နိုင်တယ်လို့ တွက်ဆတာမျိုးလည်း ရှိနေပါတယ်။

 

၂၀၂၃ မတ် ၂၈ ရက်နေ့ကို မှတ်ပုံတင်ခွင့် နောက်ဆုံးရက်အဖြစ်သတ်မှတ်ထားပြီး လက်ရှိမှာ မှတ်ပုံတင်ခွင့်လျှောက်ထားတဲ့ နိုင်ငံရေး ပါတီ ၅၀ ကျော်ရှိနေပြီလို့ စစ်ကောင်စီရဲ့ ရွေးကောက်ပွဲကော်မရှင်က မတ်လ ၂၄ ရက်နေ့ကြေညာထားပါတယ်။

 

အာဏာသိမ်း ၂ နှစ်ပြည့်မှာ နိုင်ငံတဝန်းက မြို့နယ်ပေါင်း ၄၀ ကျော်ကို စစ်အုပ်ချုပ်ရေးနဲ့ ညမထွက်ရအမိန့် ထုတ်ပြန် ကြေညာထားပြီး လာမယ့် ၂၀၂၄ အောက်တိုဘာလထဲမှာ ပြည်လုံးကျွတ် သန်းခေါင်စာရင်းကောက်ယူဖို့လည်း စစ်ကောင်စီက ပြင်ဆင်နေပါတယ်။

 

========================

 

📌📌 ၅။ ကွေးတိုင်းမှာ NUG လက်နက်တပ်ဆင်ပေး

 

ပြည်သူ့ကာကွယ်ရေးတပ်မတော် (PDF) အမှတ် (၁) စစ်ဒေသ၊ မကွေးတိုင်း လက်နက်တပ်ဆင်မှုသင်တန်း အပတ်စဉ် (၄) သင်တန်းဆင်းပွဲနဲ့ လက်နက်ပေးအပ်ပွဲ အခမ်းအနား ပြုလုပ်ခဲ့တယ်လို့ MOD NUG က မတ်လ ၂၉ ရက်မှာ ထုတ်ပြန်ပါတယ်။

 

မတ်လအတွင်း ပြုလုပ်တဲ့ ဒီသင်တန်းမှာ လက်နက်ငယ်၊ လက်နက်ကြီးကျွမ်းကျင်မှုဘာသာရပ်၊ ဒရုန်း (Drone) နဲ့ စနိုက်ပါ (Sniper) သင်တန်းကိုပါ ထည့်သွင်းသင်ကြားခဲ့တယ်လို့ ပြောပါတယ်။

 

NUG ကာကွယ်ရေးဝန်ကြီးဌာနအနေနဲ့ ၂၀၂၂ နှစ်ကုန်ပိုင်းကစပြီး တောင်ပိုင်းတိုင်း စစ်ဒေသတွေဖြစ်တဲ့ Cobra စစ်ကြောင်း၊ ဒေါနစစ်ကြောင်း၊ ကျားသစ်နက်စစ်ကြောင်း၊ နဂါးဖြူစစ်ကြောင်း၊ နဂါးနီစစ်ကြောင်း၊ ကျားဖြူစစ်ကြောင်းနဲ့ တောင်ညို စစ်ကြောင်းတွေကို လက်နက်တပ်ဆင်ပေးခဲ့တယ်လို့ ထုတ်ပြန်ခဲ့ဖူးပါတယ်။

#RadioNUGLocalNews

#SpringRevolution