24th JUN 2023 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ ဇွန်လ ( ၂၄ ) ရက်နေ့ နောက်ဆုံးရပြည်တွင်းသတင်းများ

 📌📌 ၁။ မြို့တွင်းစစ်ကောင်စီဂိတ်နဲ့ နီးနီးကပ်ကပ်‌မနေဖို့ ပြည်သူတွေကို CDF-Mindatတောင်းဆို

 

မင်းတပ်မြို့တွင်း စစ်ကောင်စီရဲ့ အထိုင်ဂိတ်တွေအပါဝင် သူတို့တပ်စွဲထားတဲ့ အနီးအနားမှာ ပြည်သူတွေ ဝင်ထွက်သွားလာတာရှောင်ဖို့ မင်းတပ်ကာကွယ်ရေးတပ်ဖွဲ့ဝင်တွေက တောင်းဆိုပါတယ်။

 

ပြီးခဲ့တဲ့ ရက်သတ္တပတ်က မင်းတပ်မြို့တွင်း မစ်ရှင်တခုဖော်ဆောင်ခဲ့စဉ် စစ်ကောင်စီတပ်စွဲတဲ့နေရာမှာ သွားလာနေတဲ့ ပြည်သူတွေကြောင့် ဖျက်သိမ်းလိုက်ရတယ်လို့ အဲဒီမစ်ရှင်မှာ လိုက်ပါတဲ့ ချင်းကာကွယ်ရေးတပ်ဖွဲ့ (မင်းတပ်) ရဲဘော်တွေ က ပြောပါတယ်။

 

“ပြည်သူတွေအသွားအလာကြောင့် မြို့တွင်း စစ်ဆင်ရေးတခု ဖျက်လိုက်ရတယ်။ ကျနော်တို့က မြို့တွင်း မစ်ရှင်တခု လုပ်ဖို့ဆိုရင် လချီပြီး အချိန်ယူရတာလေ၊ အဆင်မပြေဘူး၊ အဲဒါကြောင့်ပါ။” လို့ သူက ရှင်းပြပါတယ်။

 

၂၀၂၃ ခုနှစ် ၆ လအတွင်းမှာ မင်းတပ်မြို့တွင်းစစ်ကောင်စီဂိတ်တွေ အကြိမ် ၂၀ ထက်မနည်း တိုက်ခိုက်ခံရနိုင်သလို ပြည်သူကြောင့် ဖျက်သိမ်းလိုက်ရတဲ့ မစ်ရှင်တွေလည်း ရှိနေတာပါ။

 

ဒီလိုမျိုး ချင်းကာကွယ်ရေးတပ်ဖွဲ့ (မင်းတပ်) ရဲ့ ပျောက်ကျား ပစ်ခတ်တိုက်ခိုက်မှုတွေကြောင့် ဂိတ်စောင့်စစ်ကောင် စီတပ်သား ထိခိုက်သေဆုံးတာတွေများပေမယ့် အရေအတွက်အတိအကျကိုတော့ သီးခြားအ တည်မပြုနိုင်သေးပါဘူး။

လတ်တလော ဇွန်လ ၁၁၊ ၁၃ ရက် ပစ်ခတ်မှုမှာတော့ စစ်ကောင်စီတပ်သား ၃ ဦးထိခိုက်သေ၊ဆုံးတယ်လို့ ချင်းကာကွယ် ရေးတပ်ဖွဲ့ (မင်းတပ်) က တရားဝင် သတင်းထုတ်ပြန်ထားပါတယ်။

 

စစ်ကောင်စီဘက် ထိခိုက်သေ၊ဆုံးတာရှိသလို စစ်ဆင်ရေးဖော်ဆောင်တဲ့ ကာကွယ်ရေးတပ်ဖွဲ့ဝင် ၂ ဦး ဇွန်လ ၁၉ ရက်နေ့ က ထိခိုက်ဒဏ်ရာရရှိထားကြောင်း ကာကွယ်ရေးတပ်ဖွဲ့ သတင်းရင်းမြစ်တွေက ဆိုပါတယ်။

 

တဖက်မှာတော့ တိုက်ခိုက်ခံရချိန်တိုင်း အနီးအနားမှာရှိတဲ့ အရပ်သားပြည်သူတွေကို စစ်ကောင်စီက စွပ်စွဲဖမ်းဆီးနေ တယ်လို့လည်း မျက်မြင်တွေထံကနေ သိရပါတယ်။

 

မင်းတပ်မြို့နယ်အတွင်း လူငယ်တွေကို ကာကွယ်ရေးတပ်ဖွဲ့မှာ ပူးပေါင်းပါဝင်ပေးဖို့နဲ့ နယ်မြေရပ်ခြားထွက်ခွာခွင့်ကို ကန့်သတ်ထားတယ်လို့ ချင်းကာကွယ်ရေးတပ်ဖွဲ့ (မင်းတပ်) ဗဟိုက ၂၀၂၃ ဇွန်လလယ်မှာ ကြေညာချက် တစ်စောင် ထုတ်ပြန်ထားပါတယ်။

 

========================

 

📌📌 ၂။ ကန်ပက်လက်မြို့ပေါ် စစ်ကောင်စီရဲစခန်း တိုက်ခိုက်ခံရ

 

ကန်ပက်လက်မြို့ပေါ် အထိုင်ရဲစခန်းမှာ နေရာယူတဲ့ စစ်ကောင်စီတပ်ဖွဲ့ဝင်တွေကို ရှော့တိုက်ဒုံးနဲ့ တိုက်ခိုက်ခဲ့တယ်လို့ ချင်းကာကွယ်‌ရေးတပ်ဖွဲ့ (ကန်ပက်လက်) က ဇွန်လ ၁၇ ရက်နေ့က သတင်းထုတ်ပြန်ပါတယ်။

 

ချင်းကာကွယ်‌ရေးတပ်ဖွဲ့ (ကန်ပက်လက်) နဲ့ ‌ညောင်ရမ်းတပ်ရင်းတို့ ပူးပေါင်းတပ်က ဇွန်လ ၁၆ ရက်နေ့ တိုက်ခိုက်ခဲ့တာလို့ ဆိုပါတယ်။ တစ်နာရီကြာ တိုက်ခိုက်ခံရတဲ့ မြို့မရဲစခန်းက စစ်ကောင်စီတပ်ရဲ့ ထိခိုက်မှုအခြေနေကိုတော့ အတည်မပြုနိုင်သေးသလို ချင်းကာကွယ်‌ရေးတပ်ဖွဲ့ (ကန်ပက်လက်)ကလည်း တရားဝင်ထုတ်ပြန်တာ မရှိသေးပါဘူး။

 

ကန်ပက်လက်မြို့ပေါ်အခြေချ စစ်ကောင်စီဘက်ကလည်း လက်နက်ကြီး ၁၀ ကြိမ်ထက်မနည်း ပြန်လည်ပစ်ခတ်တယ်လို့ ပြောပါတယ်။ပြီးခဲ့တဲ့ မေလကုန်ပိုင်းကတည်းက ချင်းကာကွယ်ရေးတပ်ဖွဲ့(ကန်ပက်လက်)အနေနဲ့ မင်းတပ် - မကွေးနယ် တွေမှာ ဒေသကာကွယ်ရေးတပ်ဖွဲ့တွေဖြစ်တဲ့ ချင်းကာကွယ်‌ရေးတပ်ဖွဲ့ (မင်းတပ်)၊ ချင်းကာကွယ်‌ရေးတပ်ဖွဲ့ (မတူပီ)၊ ဂန့်ဂေါခရိုင် တပ်ရင်း (၁၃)၊ ဂန့်ဂေါခရိုင် တပ်ရင်း (၈) တို့နဲ့အတူ တိုက်ပွဲဝင်ခဲ့ပြီး စစ်ကောင်စီဘက် ထိခိုက်သေ၊ဆုံးမှု များခဲ့ပါတယ်။

 

========================

 

📌📌 ၃။ အ မေရိကန်အစိုးရက အကြမ်းဖက်စစ်အုပ်စုလက်အောက် (MFTB)ဘဏ်နဲ့(MICB)ဘဏ်တို့ကိုကန့်သတ်ပိတ်ဆို့ အရေးယူ

အမေရိကန်အစိုးရမှ ဒဏ်ခတ်ပိတ်ဆို့လိုက်တဲ့ အကြမ်းဖက်စစ်အုပ်စု၏လက်အောက်ခံဘဏ်နှစ်ခုဖြစ်သည့် မြန်မာ့နိုင်ငံ ခြားကုန်သွယ်မှုဘဏ်(MFTB)နှင့် မြန်မာ့ ရင်းနှီးမြှပ်နှံမှုနှင့် ကူးသန်း ရောင်းဝယ် ရေးဘဏ် (MICB) တို့သည် ဇွန်လ၂၀ရက်နေ့မှစတင်ကာ သက်ရောက်မှုရှိမှာဖြစ်တယ်လို့ အမေရိကန်အစိုးရက တရားဝင်အသိပေး ကြေညာခဲ့ပါ တယ်။

 

"အကြမ်းဖက်စစ်တပ်နဲ့ သူရဲ့ထိန်းချုပ်မှုအောက်မှာရှိပြီး အကြမ်းဖက်မှုအတွက် အားပေးအားမြှောက်ဖြစ်စေတဲ့ ဘဏ် ၂ ခုကို အမေရိကန်အစိုးရက ကန့်သတ်ပိတ်ဆို့မှုပြုလိုက်ပါတယ်"လို့အမေရိကန်ပြည်ထောင်စုကိုရောက်ရှိနေတဲ့ ပြည်ထောင်စုဝန်ကြီး ဦးထင်လင်းအောင်ကအသိပေးဆိုထားပါတယ်။

 

အမေရိကန်အစိုးရ၏ ထုတ်ပြန်လိုက်တဲ့ကြေညာချက်ဟာ အမေရိကန် ဥပဒေအရ အဆိုပါ ဒဏ်ခတ်ပိတ်ဆို့မှု ရလဒ် ကြောင့် အမေရိကန် စီးပွားရေးနှင့် သက်ဆိုင်သည့် အဆိုပါ ဘဏ်နှစ်ခု၏ အရောင်းအဝယ် အားလုံးကို ပိတ်ဆို့ ထားသည်ဟုဆိုလိုရင်းဖြစ်ပါတယ်။

 

#RadioNUGLocalNews

#SpringRevolution