18th MAR 2024 - (Ethnic language program-Matupi) by The Matupi Times

📌 (ချင်း တိုင်းရင်းသား - Matupi ) ထုတ်လွှင့်မှု အစီအစဥ် ၂၀၂၄ မတ်လ ( ၁၈ ) ရက်နေ့ ရပြည်တွင်းသတင်းများ

========================

📌📌 ၁။ မတူပီမြို့တွင် ဒေသခံတစ်ဦး မြုပ်မိုင်းနင်းမိပြီး ခြေထောက်ဒဏ်ရာအပြင်းထန်ရရှိ

 

The Matupi Times     မတ် ၉/၂၀၂၄

ချင်းပြည်တောင်ပိုင်း ၊ မတူပီမြို့ပေါ်နေ ဒေသခံတစ်ဦးသည် ပြီးခဲ့တဲ့ မတ် ၇/၂၀၂၄ ရက်နေ့ညနေပိုင်းတွင် တောင်ယာသွားသည့်လမ်းတစ်နေရာ၌ မြုပ်မိုင်းနင်းမိတာကြောင့် ခြေထောက်တဖက်ဒဏ်ရာအပြင်းအထန် ရရှိခဲ့တယ်လို့သိရပါတယ်။ မိုင်းနင်းမိသူသည် မတူပီမြို့၊ အရှေိ့ခိုဘွေရပ်ကွက် တွင်နေထိုင်သည့် ၊ ကြုတ်ရွာသား တစ်ဦးဖြစ်တယ်လို့သိရပါတယ်။

 

အဆိုပါမိုင်းနင်းမိသူ မတူပီမြို့၊ အရှေ့လောင်ဗန်းရပ်ကွက်အောက်ဘက်ရှိ လည်မျိုချောင်းသွားသည့်ဖြတ်လမ်း၊ တောင်ယာသွားလမ်း တစ်နေရာတွင် မြေမြုပ်မိုင်းနင်းမိခဲ့တာဖြစ်ပြီး မတ် ၈၊ ၂၀၂၄ ရက်နေ့ တွင် မတူပီမြို့မှ ပခုက္ကူဘက်သို့ ဆေးကုသမှုခံယူရန် ပို့ဆောင်ပေးခဲ့တယ်လို့သိရပါတယ်။

 

မြေမြုပ်မိုင်းနင်းမိသည့် နေရာသည် စစ်ကောင်စီတပ်မှ မြို့ပေါ်နေဒေသခံပြည်သူများအနေဖြင့်် ဖြတ်သန်းသွားလာခြင်းများမပြုလုပ်ရန် သတိပေးတားမြစ်ထားသည့် နေရာဖြစ်တယ်လို့သိရပါတယ်။

 

========================

 

📌📌 ၂။ ဟားခါးမြို့မှ ရဲတပ်ဖွဲ့ဝင်တစ်ဦး CDF-Hakha ထံလက်နက်နဲ့အတူ ထပ်မံအလင်းဝင်

 

The Matupi Times         မတ် ၁၀၊၂၀၂၄

ချင်းပြည်နယ်၊ ဟားခါးမြို့မှရဲတပ်ဖွဲ့ဝင်တစ်ဦးသည် CDF-Hakha ထံ လက်နက်နဲ့အတူထပ်မံအလင်းဝင်ရောက်လာတယ်လို့ မတ်လ ၁၀ ရက်နေ့ညပိုင်းမှသတင်းထုတ်ပြန်ပါတယ်။

 

အဆိုပါရဲတပ်ဖွဲ့ဝင်သည် စစ်ကောင်စီလက်အောက်တွင် ဆက်လက်တာဝန်ထမ်းဆောင်လိုခြင်းမရှိတော့တာကြောင့် လက်နက်နှင့်ကျည်ဆံများယူဆောင်လာပြီး အလင်းဝင်ခဲ့တာလို့ဆိုပါတယ္။

 

ယခုအလင်းဝင်ရောက်လာသည့် ရဲတပ်ဖွဲ့ဝင်ကိုလည်း CDF-Hakha မှ ကျပ်သိန်း(၅၀) ချီးမြှင့်ခဲ့ပြီး နောက်ထပ်အလင်းဝင်လိုသော စစ်ကောင်စီလက်အောက်ခံတပ်ဖွဲ့ဝင်များကို လက်ခံ ကြိုဆိုလျက်ရှိကြောင်း သတင်းထုတ်ပြန်ပါတယ်။

 

========================

 

📌📌 ၃။ မြန်မာနယ်ခြားစောင့် တပ်ဖွဲ့ဝင် ၃၀ နီးပါး ဘင်္ဂလားဒေ့ရှ်နိုင်ငံထဲ ထပ်မံထွက်ပြေး

 

The Matupi Times    မတ် ၁၁၊၂၀၂၄

ရခိုင်ပြည်နယ်အတွင်း လတ်တလော ဖြစ်ပေါ်နေတဲ့ တိုက်ပွဲတွေကြောင့် မြန်မာ နယ်ခြားစောင့်တပ်ဖွဲ့ဝင် ၂၉ ဦးဟာ Banchari နယ်စပ်ဒေသကို ဖြတ်ကျော်ပြီး ဘင်္ဂလားဒေ့ရှ်ဘက်ကို မတ်လ ၁၁ ရက်နေ့မှာ ထပ်မံထွက်ပြေးလာတယ်လို့သိရပါတယ်။

မြန်မာနိုင်ငံ၊ ရခိုင်ပြည်နယ်အတွင်း ရက္ခိုင့်တပ်တော် AA နဲ့ မြန်မာစစ်တပ်အကြားဖြစ်ပွားနေတဲ့ တိုက်ပွဲတွေမှာ စစ်ကောင်စီလက်အောက်ခံ စစ်တပ်နဲ့၊ရဲတပ်ဖွဲ့ဝင်တွေဟာ AA ထံမှာ လက်နက်ချ အညံ့ခံသူတွေရှိသလို တဘက် ဘင်္ဂလားဒေ့ရှ်နိုင်ငံဘက်ကိုလည်း ထွက်ပြေးခိုလှုံသူတွေ ရှိနေတာပါ။

အခုနှစ် ဖေဖော်ဝါရီလ အစောပိုင်းတုန်းကလည်း စစ်သား၊ လူဝင်မှုကြီးကြပ်ရေးဝန်ထမ်းတွေနဲ့ သူတို့ မိသားစုဝင် စုစုပေါင်း ၃၃၀ လောက် ဘင်္ဂလားဒေ့ရှ်ဘက် ထွက်ပြေးသွားခဲ့ကြပြီး သူတို့ကို ဖေဖော်ဝါရီ ၁၅ ရက်နေ့မှာ ရေကြောင်းကတဆင့် မြန်မာနိုင်ငံကို ပြန်ပို့ခဲ့ပါတယ်။

 

========================

 

📌📌 ၄။ မတူပီမြို့တွင် တက္ကသိုလ်ဝင်တန်းစာမေးပွဲဖြေဆိုနေ

 

The Matupi Times မတ် ၁၃ ၊ ၂၀၂၄ ။

ချင်းပြည်နယ်တောင်ပိုင်း ၊ မတူပီမြို့ ၊စန်ဘောင်ရပ်ကွက် ၊ မတူပီ-ဟားခါးလမ်းဘက်ရှိ အထက(၂)ကျောင်းတွင် ယခုရက်ပိုင်းကစ၍ စစ်ကောင်စီကကျင်းပတဲ့ တက္ကသိုလ်ဝင်တန်းစာမေးပွဲ စတင်ဖြေဆိုနေကြပြီလို့ ဒေသခံတစ်ဦး၏ ပြောပြချက်အရသိရပါတယ်။

"စာမေးပွဲဖြေနေကြတာ(၂)ရက်ရှိပြီ ။ ကျောင်းသားတွေကို အထက(၁)မှာမဖြေခိုင်းကြဘူး အထက(၂)မှာဘဲအကုန်ဖြေခို်င်းတယ် ။ မတူပီမြို့ပေါ်မှာကျောင်း တက်တဲ့သူတွေဘဲဖြေကြတယ်။ ကျောင်းသားဘယ်နှစ်ယောက်ဖြေကြလဲတော့မသိဘူး။ " လို့ဒေသခံတစ်ဦးက Matupi Times ကိုပြောပါတယ်။

၂၀၂၃- ၂၀၂၄ ခုနှစ် ပညာသင်နှစ် တက္ကသိုလ်ဝင်တန်းစာမေးပွဲကို မတ်လ ၁၁ ရက်နေ့မှာစတင်ကျင်းပမယ်လို့ ပညာရေးဝန်ကြီးဌာနက မတ်လ ၅ ရက်နေ့မှာ တက္ကသိုလ်ဝင်တန်းစာမေးပွဲ အချိန်စာရင်းနဲ့ ထုတ်ပြန်ထားတာဖြစ်ပါတယ်။

 

========================

 

📌📌 ၅။ ကလေးမြို့နယ် တိုက်ပွဲတစ်နေရာတွင် CDF-KKG တပ်ဖွဲ့ဝင် တစ်ဦး ကျဆုံး

 

The Matupi Times     မတ် ၁၂/၂၀၂၄

Chinland Defense Force, Kalay-Kabaw-Gangaw တပ်ရင်း(၄)တပ်ဖွဲ့ဝင်တစ်ဦးဖြစ်သည့် ရဲဘော်မောင်ကျော်ဇင်ဦး သည် ကလေးမြို့နယ်အတွင်းတွင် တာဝန်ထမ်းဆောင်စဉ် ပြီးခဲ့သည့် မတ်လ ၉ ၊ ၂၀၂၄ ရက်နေ့၌ ရှေ့တန်းတစ်နေရာတွင် ကျဆုံးခဲ့ကြောင်း သိရပါတယ်။

 

အဆိုပါ ကျဆုံးရဲဘော် မောင်ကျော်ဇင်ဦး( အသက်-၂၂နှစ် )၏ နောက်ဆုံးနှုတ်ဆက်သင်္ဂြုဟ််ခြင်း အစီအစဉ်ကို ၎င်း၏ကျန်ရစ်သူမိသားစုဝင်များ၊ ကျေးရွာနေပြည်သူများနှင့် CDF-KKG တပ်ဖွဲ့ဝင်များက ပြုလုပ်ပေးခဲ့တယ်လို့သိရပါတယ်။

#RadioNUGLocalNews

#SpringRevolution