29th JUN 2024 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၄ ဇွန်လ ( ၂၉ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ မတူပီရှိ လက်ကျန် ခလရ ၁၄၀ နဲ့ ဗျူဟာကုန်း ကာကင်းတွေ ထပ်မံ သိမ်းပိုက်။

 

ချင်းပြည်၊ မတူပီမြို့အခြေစိုက် ခလရ-၁၄၀နဲ့ ဗျူဟာကုန်း ရှေ့ကာကင်းစခန်းတွေကို ထပ်မံသိမ်းပိုက်ထားပြီလို့ ‘ချင်းညီနောင်’က ကြေညာပါတယ်။

‘ချင်းညီနောင်’ စစ်ဆင်ရေးအဖြစ် ဇွန်လ ၉ ရက်အစောပိုင်းမှာ မဟာမိတ်တွေနဲ့အတူ မတူပီမြို့ကို တိုက်ခိုက်တာဖြစ်ပြီး ၁၉ ရက်အကြာ ဇွန်လ ၁၇ ရက်နေ့မှာ စစ်ကောင်စီ ခြေမြန်တပ်ရင်း အမှတ် ၃၀၄ ကို သိမ်းပိုက်ခဲ့ပါတယ်။

ကျန်နေတဲ့ ခြေလျင်တပ်ရင်းအမှတ် ၁၄၀ နဲ့ ဗျူဟာကုန်း ကာကင်းတချို့ကို အပြီးသိမ်းနိုင်ပြီး မတူပီမြို့နယ်တစ်ခုလုံး စစ်ကောင်စီကင်းစင်ရေး ဆက်ကြိုးပမ်းမယ်လို့ ‘ချင်းညီနောင်’ က ဆိုပါတယ်။

‘ချင်းညီနောင်’ မှာ ချင်းအမျိုးသားကောင်စီ (မင်းတပ်)၊ ချင်းအမျိုးသားအဖွဲ့ချုပ် (CNO)၊ ဇိုမီးဖက်ဒရယ်အစည်းအရုံး (ZFU)၊ ချင်းကာကွယ်ရေးတပ် (ကန်ပက်လက်)၊ ချင်းလဲန်းကာကွယ်ရေးတပ် (မတူပီ) တပ်မဟာ (၁) နဲ့ မရာနယ်မြေအုပ်ချုပ်ရေးကောင်စီ (MTC) အဖွဲ့ ၆ ဖွဲ့ ပါဝင်ပါတယ်။

‘ချင်းညီနောင်’ စစ်ဆင်ရေးအဖြစ် ကြေညာထားတဲ့ မတူပီမှာ ချင်းတော်လှန်ရေးအဖွဲ့နှစ်ခုအကြား ထိပ်တိုက်ပစ်ခတ်မှုတွေအထိရှိခဲ့ပြီး နှစ်ဖက် ရဲဘော်တွေ အသက်ဆုံးရှုံးခဲ့ရပါတယ်။

 

========================

 

📌📌 ၂။ ရှမ်းမြောက်တစ်ကျော့ပြန် နှစ်ဖက်တိုက်ပွဲမှာ စစ်ကောင်စီတပ်သားဆယ်ချီ TNLA ထံ အညံ့ခံ။

 

ရှမ်းမြောက်၊ ကျောက်မဲမြို့တိုက်ပွဲအတွင်းမှာ စစ်ကောင်စီရဲ့ လက်နက်တချို့ကို သိမ်းဆည်းရမိထားပြီး စစ်ကောင်စီလက်အောက်ခံ ၁၇ ဦး တိုက်ပွဲဖြစ်တဲ့နေ့ ညနေ ၄ နာရီမှာ လက်နက်ချအညံ့ခံတယ်လို့ PSLF/TNLA သတင်းနှင့်ပြန်ကြားရေးရဲ့ ဖော်ပြချက်အရ သိရပါတယ်။

၂၀၂၃ အောက်တိုဘာ ၂၇ ရက်နေ့ စတင်ခဲ့တဲ့ မြောက်ပိုင်းညီနောင်သုံးဖွဲ့ရဲ့ ရှမ်းမြောက်စစ်ဆင်ရေးဟာ ၂၀၂၄ ဇန်နဝါရီလမှာ တရုတ်နိုင်ငံရဲ့ ကြားဝင်မှုနဲ့ ဟိုင်ဂင်အပစ်ရပ်သဘောတူညီချက်ကို ရခဲ့ကြပေမယ့် ၅ လဝန်းကျင်အကြာမှာ တကျော့ပြန်တိုက်ပွဲတွေ ပြန်ဖြစ်ပွားလာတာပါ။

၁၀၂၇ စစ်ဆင်ရေးအဆက်အနေနဲ့ တစ်ကျောရှမ်းမြောက်ပြည် မိုးမိတ်၊ မိုးကုတ်၊ နောင်ချိုနဲ့ ကျောက်မဲစတဲ့ မြို့နယ်လေးခုမှာ တိုက်ပွဲပြင်းထန်ဖြစ်ပွားနေပြီး အရပ်သားပြည်သူများတချို့ ဘေးလွတ်ရာ ထွက်ပြေးတိမ်းနေရတယ်လို့လည်း ဆိုပါတယ်။

 

========================

 

📌📌 ၃။ စစ်ကောင်စီက ပြန်လည်သိမ်းယူထားတဲ့ တီးတိန်မြို့နယ်၊ ကနေဒီတောင်စခန်းကို ချင်းပြည်ကောင်စီနှင့် ပူးပေါင်းတပ်ဖွဲ့က ပြန်လည်သိမ်းပိုက်။

 

ချင်းပြည်၊ တီးတိန်မြို့နယ်၊ စစ်ကောင်စီက ပြန်လည်သိမ်းယူထားတဲ့ ကနေဒီတောင်စခန်းကို ချင်းပြည်ကောင်စီနှင့် ပူးပေါင်းတပ်ဖွဲ့မှ ပြန်လည်သိမ်းပိုက်ရယူနိုင်ပြီလို့ People Defence Army – PDAက ဇွန်လ ၂၂ ရက်နေ့မှာ ထုတ်ပြန်ထားပါတယ်။

PDF - Zolandသိမ်းပိုက်ထားတဲ့ ကနေဒီတောင် စခန်းကို စစ်ကောင်စီက အင်အားအများအပြားနဲ့ ပြန်လည်ထိုးစစ်ဆင်ခဲ့ပြီး ဇွန်လ ၂၀  ရက်နေ့မှာ စစ်ကောင်စီတပ်က ပြန်လည်သိမ်းပိုက်ခဲ့တာပဲ ဖြစ်ပါတယ်။

ကနေဒီတောင်နဲ့ မိုင်အနည်းငယ်အကွာမှာ တည်ရှိသည့် သိုင်းငင်းရွာ စစ်ကောင်စီစခန်းကိုလည်း  ချင်းပြည်ကောင်စီတပ်ဖွဲ့တွေက ထိန်းချုပ်ထားဆဲဖြစ်ကြောင်း CDF-Hualngoram စစ်ဦးစီးချုပ် ပူပွီးသဲ ကပြောပါတယ်။

ကနေဒီတောင်စခန်းကို PDF Zoland က ပြီးခဲ့တဲ့နှစ် ၂၀၂၃ ခုနှစ် နိုဝင်ဘာလ ၂၃ ရက်နေ့မှာ သိမ်းယူခဲ့ပြီး သိုင်းငင်းစခန်းကိုလည်း ၂၀၂၄ ခုနှစ် ဇန်နဝါရီလ ၁၆ ရက်နေ့မှာ ချင်းတော်လှန်ရေး ပူးပေါင်းတွေက သိမ်းယူခဲ့ပါတယ်။

#RadioNUGLocalNews

#SpringRevolution