20 JUL 2024 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၄ ဇူလိုင်လ ( ၂၀ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ မတူပီ၊ ကန်ပက်လက်မြို့နယ် ကာကွယ်ရေးတပ်ဖွဲ့များမှ ဒိုင်ရ် (Dai/Daai) မျိုးနွယ်စုတပ်ရင်းများ အသီးသီး နုတ်ထွက်။

 

ချင်းလဲန်းကာကွယ်ရေးတပ်ဖွဲ့ မတူပီ၊ လီစန်းတပ်ရင်း (တပ်ရင်း-၄) က ချင်းလဲန်းကာကွယ်ရေးတပ်ဖွဲ့ မတူပီ အဖွဲ့ဝင်အဖြစ်ကနေ နုတ်ထွက်လိုက်ပြီ ဖြစ်တယ်လို့ ဇူလိုင်လ (၁၅) ရက်နေ့စွဲနဲ့ တပ်မဟာ (၂) တပ်မဟာမှူးကို လိပ်မူပေးပို့တဲ့ ပေးပို့စာ လူမှုကွန်ရက်မှာ ထွက်ပေါ်လာခဲ့ပါတယ်။

လီစန်းတပ်ရင်းအနေနဲ့ ချင်းအမျိုးသားတည်ဆောက်ရေးနှင့် ဖက်ဒရယ်ဒီမိုကရေစီ တည်ဆောက်ရေးတို့ကို မိမိတို့ဒိုင်ရ်ချင်းမျိုးနွယ်စု စုစည်းမှုမှတစ်ဆင့် ပူးပေါင်း ဆောင်ရွက်မည်ဖြစ်တာကြောင့် ချင်းလဲန်ကာကွယ်ရေးတပ် (မတူပီ) မှသော်လည်းကောင်း၊ တပ်မဟာ(၂) မှသော်လည်းကောင်း နုတ်ထွက်လိုက်တာလို့ အဲဒီပေးပို့စာမှာ ဖော်ပြထားပါတယ်။

အလားတူပဲ ချင်းကာကွယ်ရေးတပ်ဖွဲ့ ကန်ပက်လက် (CDF-Kanpetlet) ရဲ့ တပ်ရင်း တစ်ခု ဖြစ်တဲ့ (Kkei Sing) တပ်ရင်းကလည်း (CDF-Kanpetlet) ကနေ နှုတ်ထွက်ကြောင်း ဇူလိုင်လ (၁၅) ရက်နေ့စွဲနဲ့ ကန်ပက်လက်မြို့နယ် ကောင်စီ အလှည့်ကျဥက္ကဌထံ လိပ်မူပေးပို့ထားတဲ့ နုတ်ထွက်စာ ထပ်မံထွက် ပေါ်လာခဲ့တာ ဖြစ်ပါတယ်။ Kkei Sing တပ်ရင်းအနေနဲ့ ဒိုင်ရ်ဒေသန္တရကောင်စီ (DRC) ဦးဆောင်မှုအောက်မှာရှိတဲ့ CDF-Daai အဖြစ် ပူးပေါင်းရပ်တည်သွားမှာ ဖြစ်တာကြောင့် CDF-Kanpetlet တပ်ရင်းတစ်ခု အဖြစ်ကနေ တရားဝင်နုတ်ထွက်တာဖြစ်တယ်လို့ ဆိုပါတယ်။

ပလက်ဝမြို့နယ်ကို အခြေခံဖွဲ့စည်းထားတဲ့ ချင်းလဲန်းကာကွယ်ရေးတပ်ဖွဲ့ (CDF-Daai) အနေနဲ့လည်း ချင်းပြည်ကောင်စီ ဥက္ကဌထံ လိပ်မူပြီး၊ ဇူလိုင်လ (၁၂) နေ့စွဲနဲ့ ပေးပို့တဲ့ နှုတ်ထွက်စာ မကြာသေးမီက အစောဆုံးထွက်ပေါ်လာခဲ့တာ ဖြစ်ပါတယ်။

 

========================

 

📌📌 ၂။ စစ်ကောင်စီ ဒုတပ်ကြပ်တစ်ဦး လက်နက် ခဲယမ်းနဲ့အတူ CNDF ထံ အလင်းဝင်။

 

ချင်းပြည်၊ ဖလမ်းမြို့ ခလရ (၂၆၈) တပ်ရင်းမှ ဒုတပ်ကြပ်တစ်ဦး လက်နက် ခဲယမ်းနဲ့အတူ ၂၀၂၄ ဇူလိုင် ၃ ရက်နေ့က အလင်းဝင်လာတယ်လို့ CNO/CNDFက ထုတ်ပြန်လာပါတယ်။

အလင်းဝင်ရောက်လာတဲ့ ဒုတပ်ကြပ်က MA - 4 (၁) လက်၊ ကျည်ဘောက် (၄)ခု၊ ကျည်ဆန်အတောင့် (၁၂၀) နဲ့ 40 MM ဗုံးသီး (၁၄) လုံး ယူလာလို့ ဆုကြေးငွေ ကျပ်သိန်း (၈၀) ချီးမြှင့်ပြီး လွတ်မြောက်နယ်မြေ ပို့ဆောင်ပေးပြီးဖြစ်တယ်လို့ CNO/CNDF က ထုတ်ပြန်ထားပါတယ်။

========================

 

📌📌 ၃။ ‘ချင်း’ အချင်းချင်း စစ်ရေးတင်းမာမှုတွေ အဖြေရှာဖို့ တွေ့ဆုံညှိနှိုင်းမယ်လို့ ချင်းလဲန်းကောင်စီ ထုတ်ပြန်။

 

လက်ရှိ ချင်းပြည်အတွင်း ဖြစ်ပွားနေတဲ့ ချင်းတော်လှန်ရေးလက်နက်ကိုင်အချင်းချင်းကြား စစ်ရေးတင်းမာမှုတွေ အဖြေရှာဖို့ အဖွဲ့အစည်းချင်း အမြန်ဆုံးတွေ့ဆုံပြီး ညှိနှိုင်းမယ်လို့ ချင်းလဲန်းကောင်စီက ကြေညာလာပါတယ်။

၂၀၂၄ ခုနှစ် ဇူလိုင်လလယ်က ပြုလုပ်တဲ့ ချင်းပြည်ကောင်စီ ဦးဆောင်ကော်မတီ ဆဌမအကြိမ်အစည်းအဝေးမှာ ခုလိုဆုံးဖြတ်တာလို့ ဇူလိုင် ၁၇ရက်‌က ထုတ်ပြန်တဲ့ အချက် ၅ ချက်ပါ ထုတ်ပြန်ချက်မှာ ဖော်ပြပါတယ်။

၂၀၂၄ ခုနှစ် ဇွန်လအတွင်း ‘ချင်းညီနောင်’ နဲ့ မဟာမိတ်အဖွဲ့ ဖော်ဆောင်တဲ့ မတူပီစစ်ဆင်ရေးနဲ့ ပတ်သက်လို့ ချင်းညီနောင်နဲ့ ချင်းလဲန်းကောင်စီတို့အကြား ပစ်ခတ်မှုဖြစ်ခဲ့သလို နှစ်ဖက်တပ်ဖွဲ့ဝင်တွေ ထိခိုက်သေဆုံးတာမျိုးအထိ ဖြစ်ပွားခဲ့တာပါ။

ချင်းလဲန်းကောင်စီရဲ့ ထုတ်ပြန်ချက်ထဲ ချင်းလဲန်းကောင်စီမှာ ပါဝင်ခြင်းမရှိသေးတဲ့ အဖွဲ့တွေပါဝင်လာဖို့နဲ့ ချင်းပြည်အတွင်း ကျန်ရှိနေတဲ့ စစ်ကောင်စီတပ်စခန်းတွေကို ချင်းပြည်အစိုးရတပ်ဖွဲ့အနေနဲ့ အမြန်ဆုံး သိမ်းပိုက်နိုင်ရေးဆိုတဲ့အချက်တွေလည်း တွေ့ရပါတယ်။

#RadioNUGLocalNews

#SpringRevolution