15 Feb 2025 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၅ ဖေဖော်ဝါရီလ ( ၁၅ ) ရက်နေ့နောက်ဆုံးရပြည်တွင်းသတင်းများ 

📌📌 ၁။ မင်းတပ်မြို့ထဲ ပြည်သူတွေ ဝင်ခွင့်ပြုပြီ။

မင်းတပ်မြို့ထဲ ပြည်သူတွေ ဝင်ခွင့်ပြုပြီလို့ မင်းတပ်မြို့နယ် ပြည်သူ့အုပ်ချုပ်ရေးအဖွဲ့က ကြေညာထားပါတယ်။

“ကျနော်တို့ ထုတ်ပြန်ထားသလိုပါပဲ။ တစ်ပတ်မှာ ၂ ရက် ဝင်ခွင့်ပြုမယ်။ မြို့သိမ်းတိုက်ပွဲမှာ ပါဝင်ခဲ့တယ်ဆိုတဲ့ အထောက်အထားနဲ့ စနစ်တကျ ပြန်လက်ခံသွားဖို့ ရှိပါတယ်။” လို့ မင်းတပ်မြို့နယ် ပြည်သူ့အုပ်ချုပ်ရေးအဖွဲ့ တာဝန်ရှိသူက ပြောကြောင်း The Mindat Post မှာ ဖော်ပြပါတယ်။

မင်းတပ်မြို့နယ် ပြည်သူ့အုပ်ချုပ်ရေးအဖွဲ့ရဲ့ ထုတ်ပြန်ချက်ထဲမှာတော့ မြို့ထဲ ပြန်လည်ဝင်ရောက်မယ့် ပြည်သူတွေ လိုက်နာဖို့ အချက် ၁၂ ချက်နဲ့ ကုန်စည်တင်ဆောင်ပြီး မြို့ဖြတ်သန်းမယ့် ယာဉ်မောင်းတွေ လိုက်နာဖို့ အချက် ၉ ချက် ပါဝင်ပါတယ်။

========================

📌📌 ၂။ ချင်းစစ်ဘေးရှောင်တွေအတွက် စစ်ကောင်စီခန့်ဝန်ကြီး ငွေလက်ခံ။

မြန်မာနိုင်ငံအနှံ့ လေကြောင်းဗုံးကြဲဖို့ အမိန့်ပေးနေတဲ့ စစ်ကောင်စီက နေရပ်စွန့်ခွာ တိမ်းရှောင်နေသူတွေအတွက်ဆိုပြီး သူခန့်ထားတဲ့ တိုင်းဒေသကြီးနဲ့ ပြည်နယ်ဝန်ကြီးချုပ်တွေကို ငွေပေးခဲ့ပါတယ်။

ဖေဖော်ဝါရီ ၁၂ ရက်နေ့ နေပြည်တော်မှာ ပြုလုပ်တဲ့ အစည်းအဝေးအပြီးမှာ အခုလိုပေးတာပါ။

စစ်ကောင်စီထုတ်ပြန်ချက်ထဲမှာတော့ စစ်ဘေးတိမ်းရှောင်သူ တစ်ဦးကို တစ်လ ကျပ် ၂၀,၀၀၀ နှုန်း သတ်မှတ်ပြီး ၂၀၂၅ တစ်နှစ်လုံး ပေးသွားမယ်လို့ ထုတ်ပြန်ပါတယ်။

စစ်ကောင်စီပေးတဲ့ စစ်ဘေးရှောင်ထောက်ပံ့ငွေကို စစ်ကောင်စီခန့် ချင်းပြည်နယ်ဝန်ကြီး ဒေါက်တာ ဝုန်ဆုန်းထန် ကိုယ်တိုင် သွားရောက်လက်ခံတာ တွေ့ရပေမယ့် အမှန်တကယ် စစ်ဘေးရှောင်ဦးရေ ဘယ်လောက်အတွက်ဆိုပြီး မသိရပါဘူး။

စစ်ခေါင်းဆောင်ကတော့ အဲဒီနေ့ တွေ့ဆုံပေးအပ်ပွဲမှာ “အခုကောက်ယူရရှိတဲ့စာရင်းမှာ မပါလို့ မရသေးသူတွေအတွက်လည်း တင်ပြလာရင် ထပ်ပေးမယ်” လို့ ပြောပါတယ်။

လူ့အခွင့်အရေးအကြောင်း ရေးသားဖော်ပြနေကြတဲ့ သတင်းတွေမှာတော့ အာဏာသိမ်းကာလအတွင်း ချင်းပြည်မှာ စစ်ဘေးဒဏ်သင့် ပြည်သူဦးရေ ၂ သိန်းကျော်အထိ ရှိတယ်လို့ ၂၀၂၄ ဒီဇင်ဘာလက ဖော်ပြကြပါတယ်။

========================

📌📌 ၃။ ၂၀၂၅ မှာ ချင်းပြည်အတွင်း စစ်ကောင်စီကင်းစင်ရေး ပထမဦးစားပေးလို့ ချင်းလဲန်းကောင်စီ ပြော။

၂၀၂၅ ခုနှစ်ဟာ မြန်မာတစ်နိုင်ငံလုံး မဟုတ်ရင်တောင် ချင်းပြည်မှာ စစ်ကောင်စီကင်းစင်ဖို့ အဓိက ရည်မှန်းချက်လို့ ချင်းလဲန်းကောင်စီ အတွင်းရေးမှူး - ၁ ဆလိုင်းထက်နီ က ပြောပါတယ်။

၂၀၂၅ ဖေဖော်ဝါရီ ၆ ရက်နေ့ ပြုလုပ်တဲ့ ချင်းလဲန်းကောင်စီရဲ့ သတင်းစာရှင်းလင်းပွဲမှာ အခုလို ပြောတာပါ။

“၂၀၂၅ ဟာ တစ်နိုင်ငံလုံး မဟုတ်တောင် ကျနော်တို့ ချင်းပြည်မှာ စစ်ကောင်စီကင်းစင်ဖို့ မဟာဗျူဟာ နည်းပညာ ကျကျ လုပ်နေပါတယ်” လို့ ဆလိုင်းထက်နီက ပြောသွားတာပါ။

ချင်းပြည်မှာ မြို့ပေါင်း ၂၀ ဝန်းကျင်ရှိတဲ့ထဲက ၇ မြို့ သိမ်းပိုက်ထားတယ်လို့လည်း ချင်းလဲန်းကောင်စီရဲ့ ၂၀၂၅ ဖေဖော်ဝါရီ ၂ ရက်နေ့ ထုတ်ပြန်ချက်မှာ ဖော်ပြပါတယ်။

တဖက်မှာ ‘ချင်းညီနောင်’ ကလည်း ခရိုင်အဆင့် မင်းတပ်၊ မတူပီ အပါအဝင် ကျင်ဒွေးမြို့၊ ကန်ပက်လက်မြို့ နဲ့ မကွီအိမ်နူးမြို့တွေကို စစ်ဆင်ရေး ဖော်ဆောင်ပြီး သိမ်းပိုက်ထားပါတယ်။

ဒါကြောင့် ချင်းပြည်မှာ တော်လှန်ရေး အင်အားစုတွေက တိုက်ခိုက် သိမ်းပိုက်ဖို့ ဟားခါး၊ ထန်တလန်၊ တီးတိန် နဲ့ လက်ရှိ ‘ချင်းညီနောင်’ မြို့သိမ်းစစ်ဆင်ရေး ဖော်ဆောင် ဖလမ်းမြို့ တွေပဲ ကျန်ရှိတော့မှာပါ။

ဟားခါးမှာ စစ်ဗျူဟာ၊ ခလရ ၂၆၆,
ဖလမ်းမှာ ခလရ ၂၆၈,
တီးတိန်မှာ ခလရ ၂၆၉,
ထန်တလန်မှာ ခလရ ၂၆၈၊ ၂၆၉ ကွပ်ကဲမှုအောက်မှာရှိတဲ့ စစ်ကောင်စီတပ်ဖွဲ့ဝင်တွေ ရှိနေပါတယ်။

#RadioNUGLocalNews

#SpringRevolution