22 Mar 2025 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၅ မတ်လ ( ၂၂ ) ရက်နေ့နောက်ဆုံးရပြည်တွင်းသတင်းများ 

📌📌 ၁။ Chinland Council နဲ့ ကြားကာလ ချင်းအမျိုးသားအတိုင်ပင်ခံကောင်စီ - ICNCC ပေါင်းစည်းရေးကို ကြိုဆိုတယ်လို့ CNF ပြော။

 

Chinland Council နဲ့ ကြားကာလ ချင်းအမျိုးသားအတိုင်ပင်ခံကောင်စီ - ICNCC တို့အကြား ပေါင်းစည်းရေးကြိုးပမ်းဆောင်ရွက်မှုနဲ့ ရှေ့ဆက်လုပ်ဆောင်မယ့်အပေါ် ကြိုဆိုတယ်လို့ Chin National Front – CNFက မတ်လ ၁၅ရက်နေ့က ထုတ်ပြန်ပါတယ်။

ချင်းတော်လှန်ရေးအင်အားစုတွေ စည်းလုံးညီညွတ်ရေးအတွက် သက်ဆိုင်ရာအဖွဲ့အစည်း၊ အစုအဖွဲ့တွေနဲ့ ပူးပေါင်း လက်တွဲမယ်လို့လည်း CNFရဲ့ ထုတ်ပြန်ချက်မှာ တွေ့ရပါတယ်။

၂၀၂၅ ဖေဖော်ဝါရီ ၂၆ ရက်နေ့က မီဇိုရမ်ပြည်နယ်၊ အိုက်ဇောမြို့မှာ Chinland Council နဲ့ ကြားကာလချင်းအမျိုးသားအတိုင်ပင်ခံ ကောင်စီ - ICNCC တို့ တွေ့ဆုံဆွေးနွေးပြီး ‘ချင်းအမျိုးသားကောင်စီ’ တစ်ရပ် ပူးပေါင်းဖွဲ့စည်းကြဖို့ သဘောတူတယ်လို့ ကြေညာချက်ထွက်ပေါ်လာတာ ဖြစ်ပါတယ်။

ချင်းပြည်သူတွေအတွက် ကောင်စီနှစ်ရပ်ရှိနေတာမျိုး မဖြစ်သင့်တာကြောင့်  ‘ချင်းအမျိုးသားကောင်စီ’ အမြန်ဆုံးပေါ်ပေါက်ဖို့ ချင်းအမျိုးသားဖွဲ့စည်းပုံအခြေခံဥပဒေမူကြမ်း ရေးဆွဲမယ့်အဖွဲ့ ဖွဲ့စည်းသွားမယ်လို့လည်း ၂၀၂၅ ဖေဖော်ဝါရီ ၂၆ ရက်နေ့ ထုတ်ပြန်ကြေညာချက်မှာ ဖော်ပြထားပါတယ်။

 

========================

 

📌📌 ၂။ ဖလမ်းမှာ တိုက်ပွဲ ဆက်ပြင်းထန်၊ ရက်သတ္တပတ်အတွင်း စစ်ကောင်စီက အကြိမ်ပေါင်း ရာချီလေကြောင်းတိုက်ခိုက်။

 

တိုက်ပွဲအပြင်းအထန် ဖြစ်ပွားနေတဲ့ ချင်းပြည်၊ ဖလမ်းမြို့မှာ စစ်ကောင်စီလေတပ်က အကြိမ် ၄၀၀ ထက်မနည်း လေကြောင်းအသုံးပြု တိုက်ခိုက်နေတယ်လို့ ချင်းအမျိုးသားကာကွယ်ရေးတပ် - CNDF တာဝန်ရှိသူက ပြောတဲ့အကြောင်း Myanmar Now သတင်းဌာနက ရေးသားပါတယ်။

ပြီးခဲ့တဲ့ မတ်လ ၁၅ ရက်နေ့ တစ်ရက်တည်း တိုက်ခိုက်ရေးလေယာဉ်၊ သယ်ယူပို့ဆောင်ရေး Y 12 လေယာဉ်တွေနဲ့ အကြိမ်ရေ ၁၅၀ ကျော် ဗုံးကြဲတိုက်ခိုက်တယ်လို့ ဆိုပါတယ်။

စစ်ကောင်စီ လေကြောင်းရန်ကို အနီးကပ်စောင့်ကြည့်နေတဲ့ WaiHin (ဝေဟင်) ချန်နယ်မှာလည်း ပြီးခဲ့တဲ့ ရက်သတ္တပတ်အတွင်း ချင်းပြည်၊ ဖလမ်းမြို့နယ်အတွင်း လေကြောင်းတိုက်ခိုက်ခံရမှုနဲ့ စစ်ကောင်စီ လေယာဉ်ပျံသန်းမှု အကြိမ်ရေ ၂၀၀ ကျော်ရှိတယ်လို့ ဖော်ပြထားတာ တွေ့ရပါတယ်။

ဖလမ်းမြို့နယ်မှာ နေပြည်တော်လေတပ်၊ မကွေးလေတပ်၊ တံတားဦးလေတပ်၊ မိတ္ထီလာလေတပ်ရှိ MIG-29 Fighter Jet၊ Y – 12 တွေက တိုက်ခိုက်နေတာလို့ WaiHin (ဝေဟင်) ချန်နယ်က ဆိုပါတယ်။

ဖလမ်းမြို့ကို ‘ချင်းညီနောင်’ စစ်ဆင်ရေးအဖြစ် ၂၀၂၄ နိုဝင်ဘာ ၉ ရက်နေ့က စတင်ဖော်ဆောင်တာဖြစ်ပြီး ၄ လကျော်ဝန်းကျင် လက်ရှိအချိန်ထိ နှစ်ဖက်တိုက်ပွဲ ပြင်းထန်နေဆဲဖြစ်ပါတယ်။

 

========================

 

📌📌 ၃။ မင်းတပ်မြို့နယ်မှာ မွေးမြူထားတဲ့ နွားနောက်တွေကို ဒေါင့်သန်းရောဂါ ကာကွယ်ဆေး အခမဲ့ ထိုးနှံပေးသွားမယ်။

 

မင်းတပ်မြို့နယ်အတွင်း မွေးမြူထားတဲ့ နွားနောက်တွေကို ဒေါင့်သန်းရောဂါ ကာကွယ်ဆေး (Anthrax Vaccine) အခမဲ့ ထိုးနှံပေးမယ်လို့ မြို့နယ်ပြည်သူ့အုပ်ချုပ်ရေးအဖွဲ့က မတ်လ ၁၉ရက်က ကြေညာပါတယ်။

မင်းတပ်မြို့သိမ်းတိုက်ပွဲအတွင်း ပြည်သူတွေက မိမိမွေးမြူထားတဲ့ (နွားနောက်၊ နွား၊ ကျွဲ၊ ဆိတ်၊ ဝက်၊ ကြက်)ကို လှူဒါန်းပါဝင်ကြတာကြောင့် အခုလို ရောဂါကာကွယ်ဆေး အခမဲ့ပေးတာလို့ ဆိုပါတယ်။

ဒေါင့်သန်းရောဂါနဲ့ ပတ်သက်လို့ “သူက ကူးစက်နှုန်းတော့နှေးတယ်၊ ကူးပြီးရင် သေပြီးမှ တွေ့ရတာပိုများတယ်၊ ဒါကလည်း တောင်ပေါ်ဒေသရဲ့ တောထဲလွှတ်ကျောင်းတဲ့စနစ်ကြောင့် ဖြစ်တယ်။ ကုသဖို့အချိန်မမီရင် အဆုံးအရှုံးများ တတ်ပါတယ်။” လို့ မြို့နယ်မွေးမြူရေးနှင့် ကုသရေးဌာန ဒေါက်တာဟုန်းမနားက ပြောပါတယ်။

ဒါကြောင့် ကျေးရွာအုပ်စု/ရပ်ကွက် အုပ်ချုပ်မှုနယ်မြေအတွင်းရှိ ကျွဲ၊ နွား၊ နွားနောက် အကောင်ရေစာရင်းပြုစုပြီး မြို့နယ်မွေးမြူရေးနှင့် ကုသရေးဌာနထံ ကာကွယ်ဆေး ချိတ်ဆက်ထုတ်ယူကြဖို့ အသိပေးကြေညာချက်မှာ ဖော်ပြထားပါတယ်။

၂၀၂၅ ဖေဖော်ဝါရီလနှောင်းပိုင်းကလည်း မင်းတပ်မြို့နယ်မွေးမြူရေးနှင့် ကုသရေးဌာနက အိမ်မွေးခွေးနဲ့ ကြောင်တွေကို ကာကွယ်ဆေး ထိုးနှံပေးခဲ့ပါတယ်။

#RadioNUGLocalNews

#SpringRevolution