26 May 2025 - (Ethnic language program-Matupi) by The Matupi Times

📌 (ချင်း တိုင်းရင်းသား - Matupi ) ထုတ်လွှင့်မှု အစီအစဥ် ၂၀၂၅ မေလ ( ၂၆ ) ရက်နေ့ ရပြည်တွင်းသတင်းများ

📌📌 1/ ဗန်းမော်မှာ စစ်ကူလာတဲ့ စစ်ရဟတ်ယာဉ် ၂ စင်းကို ပစ်ခတ်နိုင်ခဲ့ကြောင်း KIA အတည်ပြု

The Matupi Times ၊ မေ ၂၀၊ ၂၀၂၅

မြို့သိမ်းတိုက်ပွဲ ပြင်းထန်နေတဲ့ ကချင်ပြည်နယ်၊ ဗန်းမော်မြို့မှာ စစ်ကူအင်အား လာပို့တဲ့ စစ်ရဟတ်ယာဉ် (၂) စင်းကို (KIA) က ပစ်ခတ်တိုက်ခိုက်နိုင်ခဲ့တယ်လို့ ကချင်လွတ်လပ်ရေးတပ်မတော် (KIA) ဘက်က ပြည်းတွင်းသတင်းဌာနတွေကို အတည်ပြုပါတယ်။

ဒီကနေ့ (မေလ ၂၀ ရက်) မွန်းလွဲပိုင်းမှာ စစ်ကူလာသည့် စစ်ရဟတ်ယာဉ် (၃) စင်းအနက် (၂) စင်းကို ပစ်ခတ်နိုင်ခဲ့တာဖြစ်ပြီး၊ ရဟတ်ယာဉ် (၁) စင်းဟာ ရွှေကူမြို့နဲ့ ၁၅ မိုင်အကွာ တောတွင်းတစ်နေရာမှာ ပျက်ကျခဲ့ပြီး၊ နောက် (၁) စင်းကတော့ ရွှေကူမြို့အနီးမှာ အရေးပေါ် ဆင်းသက်ခဲ့ရကြောင်း သိရသည်။ အဲဒီ ရဟတ်ယာဉ်ဟာ စက်ချို့ယွင်းမှုကြောင့် ပျက်ကျခဲ့တာလို့ စစ်ကောင်စီ ထုတ်ပြန်ချက်က ဆိုပါတယ်။

ရဟတ်ယာဉ် ပျက်ကျသွားသော နေရာကို KIA ပူးပေါင်းတပ်ဖွဲ့များက နယ်မြေရှင်းလင်းရေး ပြုလုပ်စဉ်၊ စစ်သားအလောင်း ၁၆ လောင်းနှင့် မီးလောင်ပျက်စီးသွားသော လက်နက် ၁၄ လက် သိမ်းဆည်းရရှိခဲ့ကြောင်း သိရပါတယ်။

========================

 

📌📌 2/ မတူပီ-မင်းတပ် လမ်းပိုင်းကို ပြုပြင်နေတာကြောင့် ယာဉ်များ ခေတ္တအသုံးပြုခွင့်ပိတ်မည်

The Matupi Times ၊ မေ ၂၂၊ ၂၀၂၅

ချင်းပြည်နယ်တောင်ပိုင်း၊ မတူပီ-မင်းတပ်လမ်းမ၊ မိုင်တိုင် (၉၁) လမ်းပိုင်းကို ပြန်လည်ပြုပြင်ဆောင်ရွက်နေတာကြောင့် ခေတ္တ အသုံးပြုခွင့် ပိတ်မည်ဖြစ်ကြောင်း သိရပါတယ်။

အဆိုပါ လမ်းပိုင်းသည် အများပြည်သူများ အဓိကထား အသုံးပြုနေရတဲ့ လမ်းပိုင်းဖြစ်ပြီး၊ လမ်းအောက်ဘက် မြေဆားများ ပြိုကျတာကြောင့် တာဝန်ရှိသူများမှ ယခုလအစောပိုင်းမှစ၍ လမ်းပြုပြင်ရေး လုပ်ငန်း ဆောင်ရွက်နေတာလည်း ဖြစ်ပါတယ်။

လမ်းပြုပြင်မှု ဆောင်ရွက်နေစဉ်ကာလအတွင်း ယာဉ်ကြီးများ၏ အလေးချိန်နှင့် တုန်ခါမှုများကြောင့် လမ်းပြုပြင်ရေးတွင် အခက်အခဲများ ကြုံတွေ့နေရတာကြောင့် ယာဉ်များအားလုံး ဒီကနေ့ မေ (၂၅) ရက်နေ့မှ ဇွန်လ (၅) ရက်နေ့အထိ (လုံးဝ) ဖြတ်သန်းသွားလာခြင်း မပြုလုပ်ကြဖို့ MRO/CDF-Matupi က သတင်းထုတ်ပြန်ပါတယ်။

========================

 

📌📌 3/ အာရက္ခတပ်တော် (AA) က စစ်မှုထမ်း မိန့်ပြဋ္ဌာန်း၊ စစ်မှုထမ်း အသက်အကျုံးဝင်သူတွေကို ပြည်နယ်ထွက်ခွာခွင့် ပိတ်

The Matupi Times ၊ မေ ၂၃၊ ၂၀၂၅

အာရက္ခတပ်တော် (AA) က ရခိုင်ပြည်နယ်အတွင်း စစ်မှုထမ်းအမိန့် ပါဝင်သော အမျိုးသားကာကွယ်ရေးဆိုင်ရာ အရေးပေါ် ပြဋ္ဌာန်းချက် (NDEP) ကို ကြေညာပြီး၊ အရေးပေါ် ပြဋ္ဌာန်းချက် (NDEP) အရ စစ်မှုထမ်း အသက်အကျုံးဝင်သူတွေကို ရခိုင်ပြည်နယ်ထဲကနေ ပြည်နယ်ပြင်ပသို့ ထွက်ခွင့်မပြုကြောင်း မေ ၂၂ ရက်စွဲဖြင့် ထုတ်ပြန်ပါတယ်။

ဒီတားမြစ်ချက်ဟာ အသက် ၁၈ နှစ်ကနေ ၂၅ နှစ်အထိ အမျိုးသမီးတွေနဲ့ အသက် ၁၈ နှစ်ကနေ ၄၅ နှစ်အထိ အမျိုးသားတွေ အပေါ် သက်ရောက်မှာ ဖြစ်ပါတယ်။

AA ကျန်းမာရေးဌာနမှ ကုသမပေးနိုင်သည့် ပြင်းထန်ရောဂါရှိ လူနာများ၊ အသက်အန္တရာယ် စိုးရိမ်ရသော လူနာများမှလွဲ၍ ကျန်တဲ့သူတွေကို လက်ရှိ တိုက်ပွဲများကြောင့် ဖြစ်ပေါ်နေသော အရေးပေါ်ကာလ ပြီးဆုံးချိန်အထိ ပြည်နယ်ပြင်ပ ထွက်ခွင့်မရှိကြောင်း ဖော်ပြထားသည်။

ပြည်နယ်တွင်း စစ်ရေးတည်ငြိမ်တဲ့ အခြေအနေတစ်ခုအထိ တားမြစ်တယ်လို့ ဆိုထားပြီး၊ ကာလအပိုင်းအခြား အတိအကျ မဖော်ပြထားပါဘူး။

ပြည်နယ်က ထွက်ခွာခွင့် ပိတ်ထားတဲ့သူတွေကို သယ်ယူပို့ဆောင်ပေးတဲ့သူတွေကိုလည်း တည်ဆဲဥပဒေအရ အရေးယူမယ်လို့ AA ထုတ်ပြန်ချက်မှာ ဖော်ပြပါတယ်။

AA အနေဖြင့် မပြီးပြတ်သေးသော မြို့သိမ်းတိုက်ပွဲများအား အကန့်အသတ်နှင့် ဆင်နွှဲရင်း ရခိုင်ဒေသတစ်ခုလုံး ရခိုင်ပြည်သူ့လက်ထဲ ရောက်ရှိရေး ဆိုသည့် ရည်မှန်းချက်ကို အကောင်အထည်ဖော်လျက် ရှိကြောင်းလည်း အသိပေးထားသည်။

========================

 

📌📌 4/ ချင်းတောင်ကို စစ်ကြောင်းထိုးလာတဲ့ စစ်တပ်နှင့် CDFs တို့ (၃) ရက်ဆက်တိုက် တိုက်ပွဲဖြစ်ပွား၊ ချင်းကာကွယ်ရေးတပ်ဖွဲ့ဝင် ၁ ဦး ကျဆုံး

The Matupi Times၊ မေလ ၂၃၊ ၂၀၂၅
တီးတိန်မြို့နယ်မှာ စစ်ကိုင်းတိုင်း၊ ကလေးမြို့မှ စစ်ကြောင်းထိုးလာသည့် စစ်ကောင်စီစစ်ကြောင်းနှင့် ချင်းတော်လှန်ရေးတပ်ဖွဲ့တို့သည် ပြီးခဲ့တဲ့ မေလ ၂၀ ရက်နေ့ကစပြီး ဒီကနေ့အထိ ၃ ရက်ဆက်တိုက် တိုက်ပွဲ ဖြစ်ပွားနေတယ်လို့ သိရပါတယ်။

တိုက်ပွဲများကြောင့် ကလေး-သိုင်းငင်းကားလမ်းပိုင်းရှိ ကျေးရွာက ပြည်သူ ၁၀၀၀ ကျော် စစ်ဘေးတိမ်းရှောင်နေကြရတယ်လို့ သိရပါတယ်။
အဆိုပါ စစ်ကောင်စီစစ်ကြောင်းကို ချင်းတော်လှန်ရေးတပ်များက ဖြတ်တောက်တိုက်ခိုက်ခဲ့စဉ်၊ CDF-CDM Siyin မှ အသက် ၁၉ နှစ်အရွယ် ရဲဘော် ဆွင့်ဗန်းမုန် (နားမုန်) (ခ) ကျော်ကြီး သည် တိုက်ပွဲအတွင်း မြင့်မြတ်စွာ ကျဆုံးခဲ့ကြောင်း ဒေသခံသတင်းထံက သိရပါတယ်။

မေလ ၁၉ ရက် နံနက်ပိုင်းတွင် အင်အား ၂၀၀ ခန့်ပါ စစ်ကောင်စီတပ်စစ်ကြောင်းသည် စစ်ကား ၁၅ စီးဖြင့် ချင်းတောင်ဘက်သို့ စစ်ကြောင်းထိုးလာတာဖြစ်ပြီး၊ CDF-CDM Siyin က မေလ ၂၀ ရက်နေ့တွင် ကလေး-သိုင်းငင်းကားလမ်းအား အတက်အဆင်းအားလုံးကို ယာယီပိတ်ထားပြီး ပြန်မဖွင့်မချင်း အသုံးမပြုကြရန် အသိပေးထုတ်ပြန်ထားပါတယ်။

စစ်ကြောင်းထိုးလာတဲ့ စစ်တပ်ကို CDF-CDM/Siyin၊ PDF Zoland နှင့် CDF-KKG တို့ ပူးပေါင်းပြီး မေလ ၂၁ ရက် နံနက် ၈ နာရီအချိန်မှ အခုအချိန်အထိ ဆက်လက် ခုခံကာကွယ် တိုက်ခိုက်နေလို့ CDF-CDM Siyin က သတင်းထုတ်ပြန်ထားပါတယ်။

========================

 

📌📌 5/ ချင်းအမျိုးသားကာကွယ်ရေးတပ်ဖွဲ့ (CNDF) မှ စနိုက်ပါ သင်တန်းဖွင့်မည်

The Matupi Times၊ မေလ ၂၁၊ ၂၀၂၅
ချင်းအမျိုးသားကာကွယ်ရေးတပ်ဖွဲ့ (CNDF) က ၂၀၂၅ ခုနှစ် ဇွန်လ (၉) ရက်နေ့ စတင်ပြီး စနိုက်ပါ သင်တန်းဖွင့်လှစ်သွားမယ်လို့ သိရပါတယ်။

အဆိုပါ စနိုက်ပါ သင်တန်းကို ချင်းအမျိုးသားအဖွဲ့ချုပ် / ချင်းအမျိုးသားကာကွယ်ရေးတပ်ဖွဲ့၏ စိုးမိုးနယ်မြေတစ်နေရာတွင် လာမယ့် ဇွန်လ (၉) ရက်နေ့မှ စပြီး သြဂုတ်လ (၉) ရက်နေ့အထိ (၂) လကြာ ဖွင့်လှစ်သွားမှာဖြစ်ပြီး၊ သင်တန်းတက်ရောက်လိုသူတွေ အနေနဲ့ ဆက်သွယ်ပေးကြဖို့ ဖိတ်ခေါ်ထားပါတယ်။
သင်တန်းတက်ရောက်လိုသူများအနေဖြင့် (+91 8798798312 Signal) နံပါတ်သို့ ဆက်သွယ်မေးမြန်းနိုင်တယ်လို့ ဖော်ပြထားပါတယ်

 

========================

 

📌📌 6/ မလေးရှားနိုင်ငံမှာ မနေ့က အထောက်ထားမရှိတဲ့ ချင်းလူမျိုး ၁၀၀ ကျော်အပါအဝင် နိုင်ငံခြားသား ၅၉၇ ဦးကို မလေးရှားအာဏာပိုင်တွေက ဖမ်းဆီး

မေလ ၂၃ ရက်။
မလေးရှားနိုင်ငံ၊ ဆလန်ဂေါပြည်နယ်၊ ဆန်းဝေးမန်တရီကောအရပ်မှာ မနေ့ မေလ ၂၂ ရက်နေ့ ည ၁၁ နာရီဝန်းကျင်မှာ အထောက်ထားမရှိတဲ့ နိုင်ငံခြားသား ၅၉၇ ဦးကို မလေးရှားအာဏာပိုင်တွေက ဖမ်းဆီးသွားပြီး၊ ဖမ်းဆီးခံရသူတွေထဲမှာ မြန်မာနိုင်ငံသား ချင်းလူမျိုးအယောက် ၁၀၀ ကျော်လည်း ပါဝင်တယ်လို့ သိရပါတယ်။

မေလ ၂၂ ရက်နေ့က မလေးရှားနိုင်ငံ၊ ဆလန်ဂေါပြည်နယ်၊ ဆန်းဝေးမန်တရီကောအရပ်မှာ နိုင်ငံခြားသား ၁၅၉၇ ဦးကို မလေးရှားအာဏာပိုင်တွေက စစ်ဆေးခဲ့ပြီး အထောက်ထားမရှိသူ ၅၉၇ ဦးကို ဖမ်းဆီးထားတဲ့အကြောင်း မလေးရှား လူဝင်မှုကြီးကြပ်ရေးဌာနက ဒီကနေ့ မေလ ၂၃ ရက်နေ့မှာ ထုတ်ပြန်ပါတယ်။

အထောက်ထားမရှိ ဖမ်းဆီးခံရသူတွေထဲမှာ မြန်မာနိုင်ငံသား ၂၂၆ ဦး၊ အင်ဒိုနီးရှား (၂၀၁) ဦး၊ ဘင်္ဂလားဒေ့ရှ် (၇၁) ဦး၊ ပါကစ္စတန် (၄၆) ဦး၊ နီပေါ (၄၄) ဦး၊ အိန္ဒိယနိုင်ငံသား (၈) ဦးနဲ့ ထိုင်းလူမျိုး ၁ ဦးတို့ ပါဝင်တယ်လို့ သိရပါတယ်။

#RadioNUGLocalNews

#SpringRevolution