09 Aug 2025 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၅ သြဂုတ်လ ( ၉ ) ရက်နေ့နောက်ဆုံးရပြည်တွင်းသတင်းများ

📌📌 ၁။ မင်းတပ်မှာ လေကြောင်းဗုံးကြဲခံရ။

 

မင်းတပ်မြို့ပေါ်မှာ ဩဂုတ်လ ၃ရက် မနက် ၈ နာရီ မိနစ် ၅၀ ကျော်မှာ လေကြောင်းဗုံးကြဲခံရတယ်လို့ မင်းတပ်မြို့နယ် ပြည်သူ့အုပ်ချုပ်ရေးအဖွဲ့က ထုတ်ပြန်ပါတယ်။

လေကြောင်းတိုက်ခိုက်မှု ၂ ကြိမ်ခံရတာကြောင့် အရပ်သားထိခိုက်မှုမရှိပေမယ့်၊ အစိုးရအဆောက်အအုံ ၂ လုံး၊ ပြည်သူ့နေအိမ် ၈ လုံးခန့် စုစုပေါင်း ၁၀ လုံးထိခိုက်ပျက်စီးတယ်လို့ ပြောပါတယ်။

စစ်ခေါင်းဆောင်ဟာ အာဏာသိမ်းပြီး လေးနှစ်ခွဲအကြာမှာ ရွေးကောက်ပွဲလုပ်ဖို့ ‘နိုင်ငံတော်စီမံအုပ်ချုပ်ရေးကောင်စီ’ (စစ်ကောင်စီ) ဥက္ကဌ ဆိုတဲ့နာမည်ကနေ 'နိုင်ငံတော်လုံခြုံရေးနဲ့ အေးချမ်းသာယာရေးကော်မရှင်' စစ်ကော်မရှင် ဥက္ကဌအဖြစ် ၂၀၂၅ ဇူလိုင် ၃၁ ရက်နေ့က ပြောင်းလဲယူလိုက်ပါတယ်။

ဒါ့အပြင် ချင်းပြည်အပါအဝင် မြို့နယ် ၆၃ ခုကို စစ်အုပ်ချုပ်ရေး ထပ်မံကြေညာခဲ့ပြီး ဆုံးရှုံးနယ်မြေတွေ ပြန်ယူဖို့ ပြင်းထန်တဲ့စစ်ဆင်ရေးလုပ်မယ်လို့ ပြောထားပါတယ်။ 

 

========================

 

📌📌 ၂။ ဟားခါးမြို့ပေါ်မှာ ဘုရားကျောင်းဆင်းလာတဲ့ လူငယ်အများအပြား စစ်ကောင်စီက ဖမ်းဆီးထား။

 

ချင်းပြည်၊ ဟားခါးမြို့ပေါ်မှာ စစ်ကောင်စီတပ်က လူငယ်အများအပြားကို ဖမ်းဆီးလိုက်တယ်လို့ Chin Human Rights Organization က ထုတ်ပြန်ပါတယ်။

ဩဂုတ်လ ၃ ရက် တနင်္ဂနွေနေ့ ဘုရားရှိခိုးကျောင်းကနေ ပြန်လာတဲ့ လူငယ်တွေအဖမ်းခံရတာလို့ သိရပြီး ဩဂုတ်လ ၄ ရက်နေ့ညပိုင်းအထိ ဖမ်းဆီးခံထားရဆဲလို့ ဖော်ပြထားပါတယ်။

ဟားခါးနဲ့နီးစပ်တဲ့ သတင်းဌာနတွေကတော့ ဖမ်းဆီးခံရတဲ့လူငယ်ဦးရေ ၃၀ ကျော် ၄၀ ဝန်းကျင်လို့ ဖော်ပြထားကြပေမယ့် အတိအကျမသိရပါဘူး။

ဩဂုတ်လ ၃ ရက်နေ့ ညသန်းခေါင်မှာလည်း စစ်ကောင်စီက ဟားခါးမြို့ဟောင်းဘက်ကို လက်နက်ကြီးပစ်ခတ်လို့ အမျိုးသမီး ၂ ဦးနဲ့ အမျိုးသား ၁ ဦး ထိခိုက်ဒဏ်ရာရတယ်လို့ သိရပါတယ်။

စစ်ခေါင်းဆောင်ဟာ အာဏာသိမ်းပြီး လေးနှစ်ခွဲအကြာမှာ ရွေးကောက်ပွဲလုပ်ဖို့ ‘နိုင်ငံတော်စီမံအုပ်ချုပ်ရေးကောင်စီ’ (စစ်ကောင်စီ) ဥက္ကဌ ဆိုတဲ့နာမည်ကနေ 'နိုင်ငံတော်လုံခြုံရေးနဲ့ အေးချမ်းသာယာရေးကော်မရှင်' စစ်ကော်မရှင် ဥက္ကဌအဖြစ် ဇူလိုင် ၃၁ ရက်နေ့က ပြောင်းလဲယူလိုက်ပြီး ချင်းပြည်က ဟားခါး၊ တီးတိန်မြို့နယ်ကလွဲလို့ ကျန်တဲ့ ၇ မြို့နယ်ကို စစ်အုပ်ချုပ်ရေး ထပ်မံကြေညာခဲ့ပါတယ်။ 

 

========================

 

📌📌 ၃။ CDF-Matupi တွင် တာဝန်ထမ်းဆောင်ရန် သင်တန်းသားသစ် စတင်ခေါ်ယူ။

 

ချင်းကာကွယ်ရေးတပ်ဖွဲ့-မတူပီ CDF-MATUPIမှ တာဝန်ထမ်းဆောင်ရန်အတွက် သင်တန်းသားသစ်များစတင်ခေါ်ယူနေကြောင်း သိရပါတယ်။

၂၀၂၅ ခုနှစ်အတွက် အခြေခံ စစ်ပညာသင်တန်း (အပတ်စဉ်-၂/၂၀၂၅) ကိုဖွင့်လှစ်မည်ဖြစ်ပါ၍ MRO/CDF-MATUPI တွင် တာဝန်ထမ်းဆောင်ရန် မျိုးချစ်လူငယ် သင်တန်းသား အသစ်များအား စတင်ခေါ်ယူနေပြီး မြန်မာနိုင်ငံစစ်အာဏာရှင် အမြစ်ပြတ်ချေမှုန်းရေးနှင့် ဖက်ဒရယ်ပြည်ထောင်စု တည်ဆောက်ရေးအတွက် ပါဝင်လိုသည့် လူငယ် (ကျား/မ) မရွေး လာရောက် လျှောက်ထားနိုင်တယ်လို့ ဆိုပါတယ်။

သင်တန်းတက်ရောက်လိုသူများအနေဖြင့် အသက် ၁၈ နှစ်မှ ၃၅ နှစ်အတွင်းဖြစ်ရမည် ဖြစ်ပြီး ကိုယ်လက် အင်္ဂါပြည့်စုံသူဖြစ်ရမည်၊ ကျန်းမာရေး ကောင်းမွန်သူဖြစ်ရမည် ၊ တပ်စည်းကမ်း လိုက်နာနိုင်သူဖြစ်ရမည်ဟု CDF-Matupi ၏ ပြန်ချက်မှာ ဖော်ပြထားပါတယ်။

#RadioNUGLocalNews

#SpringRevolution