၂၀၂၅ သြဂုတ်လ ၂၇ ရက်နေ့ မနက်ခင်း သတင်းလွှာ

 

၂၀၂၅ သြဂုတ်လ ၂၇ ရက်နေ့ မနက်ခင်း နောက်ဆုံးရပြည်တွင်းသတင်းများ

📌 ၁။ CRPH ဥပဒေရေးရာကော်မတီနှင့် မကွေးဖက်ဒရယ်ယူနစ် ကြားကာလ အစီအမံရေးဆွဲရေး ကြိုတင်ပြင်ဆင်မှုဆိုင်ရာကော်မရှင်တို့ တွေ့ဆုံဆွေးနွေး

📌 ၂။ သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန ဒုဝန်ကြီး ခွန်းစောဖူးနှင့် စစ်ကိုင်းတိုင်းအတွင်းရှိ တာဝန်ရှိသူများ တွေ့ဆုံဆွေးနွေး

📌 ၃။ စစ်ကော်မရှင်ရဲ့ ရွေးကောက်ပွဲမှာ ပါဝင်ပတ်သက် သူများအား သတိပေးခြင်း၊ ခေါ်ယူထိန်းသိမ်းခြင်း၊ နယ်နှင်ဒဏ် ပေးခြင်းဖြင့် အရေးယူမယ်လို့ KNU မူတရော်ခရိုင် သတိပေး

📌 ၄။ ကယန်းအမျိုးသားတက္ကသိုလ်၊ ပညာရေးမဟာဌာန၊ ပညာရေးဒီပလိုမာသင်တန်းအတွက် ဒုတိယအကြိမ် ဝင်ခွင့် လျှောက်လွှာခေါ်ယူ

========================

၂၀၂၅ ခုနှစ် သြဂုတ်လ ၂၇ ရက်နေ့ မနက်ပိုင်းမှာတင်ပြပေးမယ့် Radio NUG စစ်ရေးသတင်းကောက်နုတ်ချက်များ

🚩 ၁။ ရန်ကုန်တိုင်းပြည်သူ့ကာကွယ်ရေးအဖွဲ့၊ စစ်ဆင်ရေးလုပ်ငန်းဆိုင်ရာ အစည်းအဝေး ပြုလုပ်

🚩 ၂။ တောင်ပိုင်းတိုင်းစစ်ဌာနချုပ်နှင့် သံတောင်ကြီး ဘုရင့်နောင်တိုက်ခိုက်ရေးကျောင်းကို ရှော့တိုက်ဒုံးများဖြင့် တိုက်ခိုက်

🚩 ၃။ ဘုတ်ပြင်းမြို့မှ တက်လာတဲ့ အကြမ်းဖက်စစ်ကောင်စီယာဥ်တန်းအား စောင့်ကြိုတိုက်ခိုက်မိုင်းဆွဲခဲ့ရာ G2 အပါအဝင် စစ်ကောင်စီတပ်သား (၂၀) ဦးခန့် သေဆုံး

🚩 ၄။ တောပုပျူရွာကနေ မိုင်းရှင်းထွက်လာတဲ့ ပျူစောထီးများအား မိုင်းဆွဲ တိုက်ခိုက်ခဲ့ရာ ၄ ဦး ဒဏ်ရာရ

🚩 ၅။ ခလယ်လွီထူ ခရိုင်မှာ စစ်ကော်မရှင်ရဲ့ လုပ်ရပ်များကြောင့် ပြည်သူ ၂ ဦး ထိခိုက်ဒဏ်ရာရ

🚩 ၆။ ဘုတလင်မြို့နယ် သခွတ္တနယ်ကျေးရွာအနီးကို တိုက်ပွဲဖြစ်ပွားခြင်းမရှိဘဲ Jet fighterနှင့် Paramotorများဖြင့်  တိုက်ခိုက်ရာ ပြည်သူ ၃ဦးခန့် သေဆုံး

🚩 ၇။ မုံရွာနဲ့ ရေစကြိုမှာ စစ်ကောင်စီ တပ်သား ၃ ဦး လက်နက်နဲ့ အလင်းဝင်

ဤသတင်းများကို ရေဒီယိုအန်ယူဂျီသတင်းတာဝန်ခံများနှင့် ခိုင်လုံသော မိတ်ဖက်သတင်းရင်းမြစ်များဆီမှ အခြေခံတင်ပြထားခြင်း ဖြစ်ပါတယ်။

========================

📌📌 ၁။ CRPH ဥပဒေရေးရာကော်မတီနှင့် မကွေးဖက်ဒရယ်ယူနစ် ကြားကာလ အစီအမံရေးဆွဲရေး ကြိုတင်ပြင်ဆင်မှုဆိုင်ရာကော်မရှင်တို့ တွေ့ဆုံဆွေးနွေး

ဩဂုတ်လ ၂၆ရက် 

Radio NUG 

ပြည်ထောင်စုလွှတ်တော်ကိုယ်စားပြုကော်မတီ (CRPH) တွင် ဖွဲ့စည်းထားရှိသည့် ဥပဒေရေးရာကော်မတီသည် မကွေးဖက်ဒရယ်ယူနစ် ကြားကာလ အစီအမံရေးဆွဲရေး ကြိုတင်ပြင်ဆင်မှုဆိုင်ရာ ကော်မရှင်နှင့် ဩဂုတ်လ ၂၆ ရက်နေ့တွင် ZOOM Platform မှတစ်ဆင့် တွေ့ဆုံဆွေးနွေးခဲ့ကြောင်း သတင်းထုတ်ပြန်ပါတယ်။

ထိုသို့ တွေ့ဆုံဆွေးနွေးရာတွင် မကွေးဖက်ဒရယ်ယူနစ် ကြားကာလ အစီအမံရေးဆွဲရေး ကြိုတင်ပြင်ဆင်မှုဆိုင်ရာ ကော်မရှင်မှ တာဝန်ရှိသူများက ၂၀၂၅ ခုနှစ်၊ ဇူလိုင်လ ၁၇ ရက်နေ့တွင် ရေးဆွဲပြီးစီးခဲ့သော မကွေးဖက်ဒရယ်ယူနစ် ကြားကာလအစီအမံ (ပထမမူကြမ်း) ပေါ်ပေါက်လာပုံ၊ အစီအမံပါ အခန်းများ၊ ပုဒ်မများနှင့်စပ်လျဉ်း၍ အကျဉ်းချုပ်အား ကနဦး ရှင်းလင်းတင်ပြခဲ့ပြီး CRPH ဥပဒေရေးရာကော်မတီမှ တာဝန်ရှိသူများက ဥပဒေရေးရာ အကြံဉာဏ်များအား ရှင်းလင်းပြောကြားခဲ့တယ်လို့ ဖော်ပြထားပါတယ်။

ထို့နောက် နှစ်ဘက် အပြန်အလှန် မေးမြန်းခြင်း၊ အကြံပြုခြင်း၊ ဆွေးနွေးဖလှယ်ခြင်းများကို ရင်းရင်းနှီးနှီးပွင့်ပွင့်လင်းလင်း ဆောင်ရွက်ခဲ့ကြတယ်လို့ သိရပါတယ်။

တွေ့ဆုံဆွေးနွေးပွဲကို CRPH ဥပဒေရေးရာကော်မတီမှ ဥက္ကဋ္ဌ၊ အတွင်းရေးမှူး၊ ကော်မတီအဖွဲ့ဝင်များနှင့် မကွေးဖက်ဒရယ်ယူနစ် ကြားကာလ အစီအမံရေးဆွဲရေး ကြိုတင်ပြင်ဆင်မှုဆိုင်ရာ ကော်မရှင်ဘက်မှ ကော်မရှင် ဥက္ကဋ္ဌ၊ အတွင်းရေးမှူး၊ ကော်မရှင်အဖွဲ့ဝင်များ၊ ရုံးအဖွဲ့ဝင်များ တက်ရောက်ခဲ့ကြောင်း အသိပေးထားပါတယ်။

========================

📌📌 ၂။ သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန ဒုဝန်ကြီး ခွန်းစောဖူးနှင့် စစ်ကိုင်းတိုင်းအတွင်းရှိ တာဝန်ရှိသူများ တွေ့ဆုံဆွေးနွေး

ဩဂုတ်လ ၂၆ရက် 

RadioNUG 

သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန၊ ဒုတိယဝန်ကြီး ခွန်းစောဖူး ဦးဆောင်၍ သတ္တုနှင့် ကျောက်မျက်ကဏ္ဍမှ အတွင်းဝန်၊ သစ်တောနှင့်ပတ်ဝန်းကျင်ကဏ္ဍမှ ဒုတိယအတွင်းဝန်နှင့် အခြား ခရိုင်အဆင့် တာဝန်ရှိသူများသည် စစ်ကိုင်းတိုင်းအတွင်းရှိ တာဝန်ရှိသူများနှင့် တွေ့ဆုံဆွေးနွေးခြင်းများ ဆောင်ရွက်ခဲ့ကြောင်း သတင်းထုတ်ပြန်ထားပါတယ်။

တွေ့ဆုံဆွေးနွေးမှုများတွင် စစ်ကိုင်းတိုင်းအတွင်းရှိ ပအဖများ၊ သယံဇာတအဖွဲ့များ၊ တပ်ရင်းတပ်ဖွဲ့အချို့မှ တာဝန်ရှိသူများ၊ အခြား မြေပြင်တွင် ဆောင်ရွက်လျက်ရှိသည့် တာဝန်ရှိသူများနှင့် တွေ့ဆုံဆွေးနွေးခြင်းများ ဆောင်ရွက်ခဲ့တယ်လို့ သိရပါတယ်။

========================

📌📌 ၃။ စစ်ကော်မရှင်ရဲ့ ရွေးကောက်ပွဲမှာ ပါဝင်ပတ်သက် သူများအား သတိပေးခြင်း၊ ခေါ်ယူထိန်းသိမ်းခြင်း၊ နယ်နှင်ဒဏ် ပေးခြင်းဖြင့် အရေးယူမယ်လို့ KNU မူတရော်ခရိုင် သတိပေး

ဩဂုတ်လ ၂၆ ရက်၊ 

Radio NUG

အကြမ်းဖက် အာဏာသိမ်း စစ်ကော်မရှင်က ပြုလုပ်သွားမယ့် ရွေးကောက်ပွဲမှာ ပါဝင်ပတ်သက်သူ မည်သူမဆို သတိပေးခြင်း၊ ခေါ်ယူထိန်းသိမ်းခြင်း၊ နယ်နှင်ဒဏ်ပေးခြင်းများဖြင့် အရေးယူသွားမယ်လို့ KNU - မူတရော်ခရိုင်က ထုတ်ပြန်ထားပါတယ်။

စစ်ကော်မရှင်က ပြုလုပ်မယ့် ရွေးကောက်ပွဲဟာ ဖက်ဒရယ် ဒီမိုကရေစီ ဖွဲ့စည်းပုံ အခြေခံ ဥပဒေနှင့်အညီ ကျင်းပ ပြုလုပ်မယ့် ရွေးကောက်ပွဲ မဟုတ်တာကြောင့် လက်ရှိ မြန်မာ့နိုင်ငံရေးပဋိပက္ခကို အဆုံးသတ်နိုင်မှာ မဟုတ်သလို ရေရည်တည်တံ့ ခိုင်မြဲတဲ့ ငြိမ်းချမ်းရေးကို ရရှိမှာ မဟုတ်ဘူးလို့ ဆိုပါတယ်။

ယခုရွေးကောက်ပွဲဟာ အာဏာသိမ်း စစ်ဗိုလ်ချုပ်များ အသိုင်းအဝိုင်းနဲ့ ၎င်းတို့ လက်ဝေခံ နိုင်ငံရေး ပါတီများသာ အကျိုးသက်ရောက်စေမှာဖြစ်ပြီး တိုင်းရင်းသား၊ ပြည်သူလူထု အားလုံးအတွက် မည်သည့်အကျိုးကျေးဇူးမှ ရရှိမှာ မဟုတ်ဘူးလို့ ဖော်ပြထားပါတယ်။

ထို့အပြင် ရွေးကောက်ပွဲမှာ ပါဝင်သင့်ပါဝင်ထိုက်တဲ့ အဖွဲ့အစည်းများနဲ့ ပြည်သူလူထု အားလုံး ပါဝင်ခြင်းမရှိဘဲ စစ်ကော်မရှင် အလိုကျ စစ်အာဏာရှင်စနစ် သက်ဆိုးရှည်စေရေးအတွက် ပြုလုပ်ကျင်းပမယ့် ရွေးကောက်ပွဲကို KNU မူတရော်ခရိုင်၊ တပ်မဟာ (၅) အနေဖြင့် လုံးဝ အသိမှတ်ပြု လက်ခံနိုင်စရာ မရှိဘူးလို့ ဆိုပါတယ်။

ထို့ကြောင့် မူတရော်ခရိုင်အတွင်းက ပြည်သူလူထု၊ လက်နက်ကိုင် တော်လှန်ရေး အဖွဲ့အစည်းများ၊ CSO/CBO များနဲ့ ဘာသာရေး ခေါင်းဆောင်များ အနေဖြင့် တိုက်ရိုက်သော်လည်းကောင်း၊ သွယ်ဝိုက်၍သော်လည်းကောင်း ပါဝင်ပူးပေါင်း ပံ့ပိုးခြင်းများ လုံးဝ မပြုလုပ်ကြဖို့ သတိပေးထားပါတယ်။

ထုတ်ပြန်ချက်နဲ့ ပတ်သက်ပြီး လိုက်နာမှုမရှိတဲ့ မည်သူ့ကိုမဆို (၁) ခေါ်ယူ အသိပညာပေးခြင်းနှင့် သတိပေးခြင်း၊ (၂) သင့်တော်တဲ့ နေရာမှာ ခေါ်ယူထိန်းသိမ်းထားခြင်း၊ (၃) မူတရော်ခရိုင်၊ အမှတ် (၅) တပ်မဟာဒေသ ပြင်ပသို့ နယ်နှင်ဒဏ် ပေးခြင်းများဖြင့် အရေးယူ ဆောင်ရွက်သွယ်မယ်လို့ အသိပေးထားပါတယ်။

========================

📌📌 ၄။ ကယန်းအမျိုးသားတက္ကသိုလ်၊ ပညာရေးမဟာဌာန၊ ပညာရေးဒီပလိုမာသင်တန်းအတွက် ဒုတိယအကြိမ် ဝင်ခွင့် လျှောက်လွှာခေါ်ယူ

ဩဂုတ်လ ၂၆ရက် 

Radio NUG 

၂၀၂၅-၂၀၂၆ ပညာသင်နှစ် ကယန်းအမျိုးသားတက္ကသိုလ် (စနိုက်)ရှိ ကယန်းအမျိုးသားပညာရေးမဟာဌာနမှ သင်တန်းများအား ခေါ်ယူသွားမည်ဖြစ်ပြီး သတ်မှတ်အရည်အချင်းရှိသူများ လျှောက်ထားနိုင်ကြောင်း သတင်းထုတ်ပြန်ထားပါတယ်။

ခေါ်ယူမည့် သင်တန်းအမျိုးအစားများမှာ လုပ်ငန်းခွင် ပညာရေးဒီပလိုမာသင်တန်း၊ ဘွဲ့ကြိုပညာရေးဒီပလိုမာသင်တန်းနှင့် ဘွဲ့လွန်ပညာရေး ဒီပလိုမာသင်တန်းများဖြစ်တယ်လို့ ဖော်ပြထားပါတယ်။

သင်တန်းလျှောက်လွှာများကို ကယန်းအမျိုးသား တက္ကသိုလ် (စနိုက်)၊ ကယန်းအမျိုးသား အခြေခံပညာအထက်တန်းကျောင်းများဖြစ်သည့် (၁) အ.ထ.က ဆီးဘူး၊ (၂) အ.ထ.က သိကျိတ်၊ (၃)အ.ထ.က လွယ်ယင်း၊ (၄) အ.ထ.က လတိန် (၅) အ.ထ.က တောင်မြင့်ရေပူ (၆) အ.ထ.က သောက်ရေခပ် (၇) အ.ထ.က ယာဒို (၈) အ.ထ.က စိန်မိုင်ကယ်မြို့သစ် ကျောင်းများ၊ Emailများနှင့် ထုတ်ယူတောင်းခံ ပေးပို့နိုင်တယ်လို့ သိရပါတယ်။

ကယန်းအမျိုးသား ပညာရေးဒီပလိုမာသင်တန်းကို ၂၀၂၅ခုနှစ်၊ နိုဝင်ဘာလအတွင်းတွင် စတင်ဖွင့်လှစ်မည်ဖြစ်ပြီး သင်တန်းလျှောက်လွှာကို ၂၀၂၅ခုနှစ်၊ အောက်တိုဘာလ (၂၀)ရက်နောက်ဆုံးထား ပေးပို့လျှောက်ထားရမှာဖြစ်ကာ ရွေးချယ်ခံရသူများထဲမှ အင်တာဗျူးဖြေဆိုမည့်ရက်အား ပြန်လည်အကြောင်းကြားပေးမယ်လို့ အသိပေးထားပါတယ်။

အခုတင်ပြခဲ့တဲ့ သတင်းတွေကို Radio NUG သတင်းထောက် ခါးရှဲလ်နဲ့ ပဒဲဖိုးက ပေးပို့ထားတာ ဖြစ်ပါတယ်။

========================

========================

🚩🚩 ၁။ ရန်ကုန်တိုင်းပြည်သူ့ကာကွယ်ရေးအဖွဲ့၊ စစ်ဆင်ရေးလုပ်ငန်းဆိုင်ရာ အစည်းအဝေး ပြုလုပ်

ဩဂုတ်လ ၂၆ရက် 

Radio NUG 

ရန်ကုန်တိုင်းပြည်သူ့ကာကွယ်ရေးအဖွဲ့၊ စစ်ဆင်ရေးလုပ်ငန်းဆိုင်ရာအစည်းအဝေးကို ဩဂုတ်လ ၂၆ ရက်တွင် လွတ်မြောက်နယ်မြေတစ်နေရာမှာ ပြုလုပ်ခဲ့ကြောင်း သတင်းထုတ်ပြန်ထားပါတယ်။

အဆိုပါ အစည်းအဝေးကို တိုင်းဒုတာဝန်ခံ (စစ်ဘက်ရေးရာ)၊ တိုင်းဒုတာဝန်ခံ (ပြည်သူ့ရေးရာ)၊ တိုင်းရေးတာဝန်ခံ၊ တိုင်းလေ့ကျင့်ရေးတာဝန်ခံ၊ တောင်ပိုင်းခရိုင် ဇုန် (၁) စစ်ဘက်ရေးရာတာဝန်ခံ၊ တောင်ပိုင်းခရိုင် ဇုန် (၂) စစ်ဘက်ရေးရာတာဝန်ခံ၊ အနောက်ပိုင်းခရိုင် စစ်ဘက် ရေးရာတာဝန်ခံနှင့် တိုက်ခိုက်ရေးတပ်ဖွဲ့ (၁၊ ၂၊ ၄) စစ်ဘက်ရေးရာတာဝန်ခံများ စုစုပေါင်း (၁၂)ဦး တက်ရောက်ခဲ့တယ်လို့ ဖော်ပြထားပါတယ်။

အစည်းအဝေးတွင် နယ်မြေနေရာချထားရေးကိစ္စရပ်များ၊ ရဲဘော်အင်အားများ ပြင်ဆင်ဖြည့်စွက်သည့် ကိစ္စရပ်များ၊ စစ်ဆင်ရေးဆိုင်ရာ ကိစ္စရပ်များအား ဆွေးနွေးတိုင်ပင်ခဲ့တယ်လို့ သိရပါတယ်။

========================

🚩🚩 ၂။ တောင်ပိုင်းတိုင်းစစ်ဌာနချုပ်နှင့် သံတောင်ကြီး ဘုရင့်နောင်တိုက်ခိုက်ရေးကျောင်းကို ရှော့တိုက်ဒုံးများဖြင့် တိုက်ခိုက်

ဩဂုတ်လ ၂၆ရက် 

Radio NUG 

Brave Warriors for Myanmar (BWM) ၏ ဦးဆောင်မှုဖြင့် Mountain Knight Civilian Defense Forces (MKCDF)၊ Anti-Coup People's Liberation Force (ACPLF) နှင့် သံတောင်မြောက်ပိုင်း အထူးဒေသဖိုက်တာဆားခဲတို့သည် ဩဂုတ်လ ၂၆ ရက်၊ မနက် ၁၀ နာရီ ၅၃ မိနစ်တွင် တောင်ပိုင်းတိုင်းစစ်ဌာနချုပ်ကို ရှော့တိုက်ဒုံး ၅ လုံးဖြင့် တိုက်ခိုက်ခဲ့ရာ ၄ လုံး အောင်မြင်စွာ ပစ်ခတ်နိုင်ခဲ့ကြောင်း BWM က သတင်းထုတ်ပြန်ပါတယ်။

တောင်ပိုင်းတိုင်းစစ်ဌာနချုပ်သည် ကရင်ပြည်နယ်၊ ကရင်နီပြည်နယ်နှင့် ရှမ်းတောင်ဒေသများရှိ တော်လှန်ရေးအင်အားစုများကို နှိမ်နင်းနေသည့် စစ်ကောင်စီ၏ အဓိကစစ်ဌာနချုပ်တစ်ခုဖြစ်ပြီး BWM ၏ Mission 45 အဖြစ် ဆောင်ရွက်ခဲ့ခြင်းဖြစ်ကာ စစ်ကောင်စီ၏ ကာကွယ်နိုင်စွမ်းမရှိမှုကိုလည်း ပေါ်လွင်စေတယ်လို့ ဖော်ပြထားပါတယ်။

အလားတူ ဩဂုတ်လ ၂၆ ရက်၊ မနက် ၁၀ နာရီ ၄၃ မိနစ်တွင် သံတောင်ကြီးရှိ ဘုရင့်နောင်တပ်မတော် (ကြည်း) တိုက်ခိုက်ရေးကျောင်းကို ၁၀၇ မမ ရှော့တိုက်ဒုံး ၉ လုံးဖြင့် BWM ၏ Mission 44 အဖြစ် တိုက်ခိုက်ခဲ့ရာ ဒုံးအားလုံးကို အောင်မြင်စွာ ပစ်ခတ်နိုင်ခဲ့တယ်လို့ သိရပါတယ်။

ဘုရင့်နောင် တိုက်ခိုက်ရေးကျောင်းသည် စစ်ကောင်စီ၏ တပ်စုမှူး၊ တပ်ခွဲမှူးနှင့် တပ်ရင်းမှူးများအတွက် သင်တန်းပေးသည့် အဓိက စစ်သင်တန်းကျောင်းတစ်ခုဖြစ်ပြီး ဩဂုတ်လ ၂၅ ရက်တွင် ပြန်လည်စတင်သည့် သင်တန်းတွင် စစ်အရာရှိ ၄၀၀ ကျော် တက်ရောက်နေတယ်လို့ အတွင်းသတင်းအရ သိရှိထားတာကြောင့် သင်တန်းချိန်အတွင်း တိုက်ခိုက်ခဲ့တာဖြစ်တယ်လို့ အသိပေးထားပါတယ်။

ထိုတိုက်ခိုက်မှုသည် ပြည်သူလူထုကို နှိပ်စက်သတ်ဖြတ်နေသည့် စစ်ကောင်စီ၏ အရာရှိများကို တန်ပြန်တိုက်ခိုက်ရန် ဖြစ်သည့်အပြင်၊ စစ်ကောင်စီ၏ နောက်လိုက်များအား အချိန်မရွေး၊ နေရာမရွေး တိုက်ခိုက်ခံရနိုင်သည့် စိတ်မလုံခြုံမှု ခံစားစေရန် ရည်ရွယ်တယ်လို့ ဖော်ပြထားပါတယ်။

စစ်ကောင်စီအရာရှိများ ထိခိုက်မှုရှိသည်ဟု ကနဦးသတင်းများအရ သိရှိရပြီး၊ နောက်ဆက်တွဲထိခိုက်ပျက်စီးမှုများကို ဆက်လက်ထုတ်ပြန်မှာဖြစ်တယ်လို့ သိရပါတယ်။

========================

🚩🚩 ၃။ ဘုတ်ပြင်းမြို့မှ တက်လာတဲ့ အကြမ်းဖက်စစ်ကောင်စီယာဥ်တန်းအား စောင့်ကြိုတိုက်ခိုက်မိုင်းဆွဲခဲ့ရာ G2 အပါအဝင် စစ်ကောင်စီတပ်သား (၂၀) ဦးခန့် သေဆုံး

‎ဩဂုတ်လ ၂၆ရက် 

Radio NUG 

ကေအဲန်ယူ-ကရင်အမျိုးသားအစည်းအရုံး၊ ကော်သူးလေအုပ်ချုပ်နယ်မြေ၊ မြိတ်-ထားဝယ်ခရိုင်၊ လယ်ကဆောမြို့နယ်အတွင်း ၂၀၂၅ခုနှစ် ဩဂုတ်လ (၂၅) ရက်နေ့ နေ့လယ် (၁၂း၁၅) မိနစ်အချိန်ခန့်တွင် ဘုတ်ပြင်းမြို့ဘက်မှ လေညာမြို့ဘက်သို့ ဦးတည်တက်လာသော အာဏာသိမ်းအကြမ်းဖက် စစ်ကောင်စီတပ်၏ ယာဉ်တန်း ကား (၃)စီးအား ကရင်အမျိုးသားလွတ်မြောက်ရေးတပ်မတော် (K.N.L.A) တပ်ရင်း(၂၀၃)၊ တပ်ခွဲ(၂)က ထောင်ယွန်းကျေးရွာအနီးတွင် စောင့်ကြိုတိုက်ခိုက်မိုင်းဆွဲခဲ့သောကြောင့် ၎င်းယာဥ်များ ဘုတ်ပြင်းဘက်သို့ ပြန်လည် ဆုတ်ခွာထွက်ပြေးသွားခဲ့ကြောင်း ကေအဲန်ယူ-ဗဟိုမှ သတင်းထုတ်ပြန်ပါတယ်။

တိုက်ပွဲဖြစ်ပွားစဉ်အတွင်း အာဏာသိမ်းအကြမ်းဖက် စစ်ကောင်စီတပ်ဘက်မှ G2 အပါအဝင် စစ်ကောင်စီ တပ်သား (၂၀) ဦးထက်မနည်း သေဆုံးခဲ့ပြီး ကရင်အမျိုးသားလွတ်မြောက်ရေး တပ်မတော် တပ်ဖွဲ့ဝင်များမှ အထိအခိုက်မရှိ ပြန်လည်ဆုတ်ခွာနိုင်ခဲ့တယ်လို့ သိရပါတယ်။

========================

🚩🚩 ၄။ တောပုပျူရွာကနေ မိုင်းရှင်းထွက်လာတဲ့ ပျူစောထီးများအား မိုင်းဆွဲ တိုက်ခိုက်ခဲ့ရာ ၄ ဦး ဒဏ်ရာရ

ဩဂုတ်လ ၂၆ ရက်၊ 

Radio NUG

မန္တလေးတိုင်း၊ မြင်းခြံခရိုင်၊ မြင်းခြံမြို့နယ်၊ တောပု (ပျူ)ရွာ ကနေ မုံရွာ - မန္တလေး လမ်းမကြီးပေါ်မှာ မိုင်းရှင်းဖို့ ထွက်လာတဲ့ ပျူစောထီ တပ်ဖွဲ့ကို မိုင်းဆွဲတိုက်ခိုက်ခဲ့တယ်လို့ Monywa Dynamite - Special Task Force က ထုတ်ပြန်ထားပါတယ်။

ဩဂုတ်လ ၂၄ ရက်က မုံရွာ - မန္တလေး လမ်းမပေါ် မိုင်းရှင်းထွက်လာတဲ့ ပျူစောထီးများကို Monywa Dynamite - STF နဲ့ Chindwin Fighter Group တို့က ပဒေသာမိုင်း ၃ လုံးဖြင့် ဖောက်ခွဲတိုက်ခိုက်ခဲ့တယ်လို့ သိရပါတယ်။

တိုက်ခိုက်မှုအတွင်း ပျူစောထီး ၄ ဦး ထိခိုက်ဒဏ်ရာ ရရှိခဲ့ပြီး ၁ ဦးမှာ ဒဏ်ရာပြင်းထန်တယ်လို့ မျက်မြင်ပြည်သူတွေရဲ့ ပြောပြချက်အရ သိရတယ်လို့ ဆိုပါတယ်။

တပ်ဖွဲ့ အနေဖြင့် ပဒေသာမိုင်း ၂ ပွိုင့် ပြင်ဆင်ထားပေမယ့် မိဘပြည်သူများကို ငဲ့ညှာခဲ့ရတာကြောင့် မိုင်းပွိုင့် ၁ ခု ဟာ ပျူစောထီးတွေလက်ထဲကို ပါသွားခဲ့တယ်လို့ အသိပေးထားပါတယ်။

========================

🚩🚩 ၅။ ခလယ်လွီထူ ခရိုင်မှာ စစ်ကော်မရှင်ရဲ့ လုပ်ရပ်များကြောင့် ပြည်သူ ၂ ဦး ထိခိုက်ဒဏ်ရာရ

ဩဂုတ်လ ၂၆ ရက်၊ 

Radio NUG

ကရင့်အမျိုးသား အစည်းအရုံး၊ ကော်သူးလေ အုပ်ချုပ်နယ်မြေ၊ ခလယ်လွီထူခရိုင်မှာ စစ်ကော်မရှင်တပ်များက လက်နက်ကြီး၊ ဒရုန်းများဖြင့် ရည်ရွယ်ချက်ရှိရှိ ပစ်ခတ်ခဲ့တာကြောင့် ပြည်သူ (၂) ဦး ထိခိုက်ဒဏ်ရာ ရခဲ့တယ်လို့ KNU က ထုတ်ပြန်ထားပါတယ်။

ဩဂုတ်လ ၂၃ ရက်‌နေ့ ညနေ ၂ နာရီ ၁၀ မိနစ်ခန့်က လယ်ဒိုမြို့နယ်၊ အင်းပရစ် ကျေးရွာကို စစ်ကော်မရှင်ရဲ့ ခလရ - ၂၆၄ တပ်က ၈၁ မမ တစ်လုံး ပစ်ခတ်ခဲ့ရာ အသက် ၄၂ နှစ် အရွယ်ရှိ ဦးမျိုးဝင်းထွန်း ထိမှန်ဒဏ်ရာ ရခဲ့တယ်လို့ ဆိုပါတယ်။

ဆောထိ မြို့နယ်မှာလည်း ဩဂုတ်လ ၂၃ ရက် ညနေ ၂ နာရီ ၂ မိနစ် အချိန်မှာ ထောလူခို ရွာထဲကို ခမရ - ၂၀ တပ်ကနေ ၁၂၀ မမ လက်နက်ကြီး ၂ လုံး ပစ်ခတ်ခဲ့ရာ အသက် ၃၈ နှစ်အရွယ် နော်ဧပြီဝါး ထိမှန်ဒဏ်ရာရခဲ့တယ်လို့ သိရပါတယ်။

ထို့အပြင် မူးမြို့နယ်မှာလည်း ဩဂုတ်လ ၂၁ ရက် မနက် ၈ နာရီ အချိန်မှာ စစ်ကော်မရှင်ရဲ့ ခလရ - ၆၀ တပ်ကနေ ဒရုန်းများဖြင့် ပရဲစီရွာကို ပစ်ခတ်တိုက်ခိုက် ခဲ့တာကြောင့် စာသင်ကျောင်း တစ်ကျောင်း ထိမှန်ပျက်စီးခဲ့တယ်လို့ ဆိုပါတယ်။

ထိုနေ့ ညနေ ၂ နာရီခွဲ အချိန်မှာပဲ စစ်ကော်မရှင် တပ်ဖွဲ့က (မုန်း)သံတံတားကနေ ညောင်ပင်သာ ရွာထဲကို ၁၂၀ မမ လက်နက်ကြီး ၃ လုံး ပစ်ခတ်ခဲ့ရာ နေအိမ် ၅ လုံးနဲ့ ဘုန်းကြီးကျောင်း ထိမှန်ပျက်စီးခဲ့ရပြီး နွားတစ်ကောင်လည်း ထိခိုက်ဒဏ်ရာ ရခဲ့တယ်လို့ သိရပါတယ်။

ထို့အပြင် ဩဂုတ်လ ၂၂ ရက်နေ့ မနက် ၉ နာရီ ၂၀ မိနစ်ခန့်မှာ ကွင်းချောင်းတွင် ရှိနေတဲ့ စစ်ကော်မရှင်တပ်ဖွဲ့က ဟောင်ဝှစ်ဇာ ၅ လုံးဖြင့် ပစ်ခတ်ခဲ့ရာ ပရဲစီရွာထဲကို ကျရောက်ပေါက်ကွဲခဲ့ ပါသေးတယ်။

========================

🚩🚩 ၆။ ဘုတလင်မြို့နယ် သခွတ္တနယ်ကျေးရွာအနီးကို တိုက်ပွဲဖြစ်ပွားခြင်းမရှိဘဲ Jet fighterနှင့် Paramotorများဖြင့်  တိုက်ခိုက်ရာ ပြည်သူ ၃ဦးခန့် သေဆုံး

ဩဂုတ်လ ၂၆ရက် 

Radio NUG 

ဩဂုတ်လ ၂၆ရက်နေ့တွင် ဘုတလင်မြို့နယ် အနောက်ခြမ်းရှိ သခွတ္တနယ်ကျေးရွာအနီးအား တိုက်ပွဲဖြစ်ပွားခြင်းမရှိဘဲ  Jet fighter (၃)စီးဖြင့် (၈)ကြိမ် လေကြောင်းတိုက်ခိုက်မှုပြုလုပ်ခဲ့ကြောင်း Budalin Mobile Team - BMT မှ သတင်းထုတ်ပြန်ပါတယ်။

အဆိုပါတိုက်ခိုက်မှုများကြောင့် သခွတ္တနယ်ရွာဦးရှိ ဆီဆိုင်ထိမှန်ကာ မီးလောင်ခဲ့ပြီး ပြည်သူ ၂ဦးသေဆုံးခဲ့ကာ ထိခိုက်ဒဏ်ရာရရှိသူများလည်း ရှိတယ်လို့ သိရပါတယ်။

ထို့အပြင် ဩဂုတ် ၂၆ ရက် မွန်းလွဲ ၃ နာရီ ၃၅ မိနစ်ခန့်တွင် ဘုတလင်မြို့နယ် မြောက်ခြမ်းရှိ တောင်ကလပ် အောက်ကျောင်းအနီး ပြည်သူများ စစ်ရှောင်နေသည့် နေရာသို့ မုံရွာ အနောက်မြောက်တိုင်း စစ်ဌာနချုပ် (နမခ)မှ တက်လာသော စက်တပ်လေထီး ၁ စင်းဖြင့် ဗုံးကြဲတိုက်ခိုက်ခဲ့ရာ ပဲပြစ်တော အရှေ့ရွာမှ စစ်ရှောင် မိန်းကလေးငယ် G-12‌ကျောင်းသူ ၁ ဦးသေဆုံးခဲ့တယ်လို့ ဘုတလင်မြို့နယ် ပြည်သူ့အုပ်ချုပ်ရေးအဖွဲ့ထံမှ သိရပါတယ်။

ဗုံးကြဲချခဲ့သည့် နေရာအနီးတွင် စစ်တပ်က အင်အား ၁၀၀ ခန့်ဖြင့် စစ်ကြောင်းထိုးနေပြီး ဘုတလင်မြို့ပေါ် ရပ်ကွက် ၃ ခုအပါအဝင် မြောက်ကျီကျေးရွာ၊ ထတန်းရွာ ၊ မြောက်တောရွာ၊ ရှမ်းတဲရွာ၊ တလှိုင်းရွာ၊ ပဲပြစ်တောနောက်ရွာ၊ ပဲပြစ်တောရှေ့ရွာ ၊ ဆိတ်သာကန်ရွာ ၊ ကြို့ကုန်းရွာ၊ နတ်ရွာ၊ မြင်သာရွာ ၊ ရွာသာလေးရွာ ၊ အုတ်ဖိုကျေးရွာတို့မှ ပြည်သူ ၇၀၀၀ နီးပါးသည် ဘေးလွတ်ရာ ထွက်ပြေး တိမ်းရှောင်နေရတယ်လို့ ဒေါင်းရာဇာပင်မသပိတ်စစ်ကြောင်းမှ ဖော်ပြထားပါတယ်။

အလားတူ ည ၇:၁၅ အချိန်ခန့်က ရွာဈေးတန်းအနီးအား နမခမှ တက်လာတဲ့ Paramotor စက်တပ်လေထီး နှစ်စီးဖြင့် ဗုန်းသီးချ တိုက်ခိုက်ခဲ့တယ်လို့ သိရပါတယ်။

========================

🚩🚩 ၇။ မုံရွာနဲ့ ရေစကြိုမှာ စစ်ကောင်စီ တပ်သား ၃ ဦး လက်နက်နဲ့ အလင်းဝင်

ဩဂုတ်လ ၂၆ ရက်၊ 

Radio NUG

စစ်ကိုင်းတိုင်း၊ မုံရွာမြို့နယ်နဲ့ မကွေးတိုင်း၊ ရေစကြို မြို့နယ်တို့မှာ အတင်းအဓမ္မ စုဆောင်း ခံထားရတဲ့ တပ်သား ၃ ဦး လက်နက်နဲ့ အလင်းဝင်လာတယ်လို့ သိရပါတယ်။

ဩဂုတ်လ လဆန်းပိုင်းက စတင်ပြီး မုံရွာမြို့နယ်၊ ကျောက္ကာဘက်ကို စစ်ကြောင်းထိုးနေတဲ့ စစ်ကော်မရှင်တပ်က စစ်မှုထမ်း တပ်သား ၂ ဦး မုံရွာခရိုင်၊ တပ်ရင်း (၂) တပ်ခွဲ (၃) ထံ ဆက်သွယ်အလင်းဝင်လာတယ်လို့ ဆိုပါတယ်။

အလင်းဝင်လာသူ ကိုကျော်ဦးဟာ သာမန်ပြည်သူ ဘဝက အဓမ္မစစ်မှုထမ်း စုဆောင်းခံရသူဖြစ်ပြီး ကိုသီဟဟာ ၂၀၁၁ ထဲက ထောင်ကျခံကာ တပ်ထဲမှထွက်ခဲ့တဲ့ တပ်ကြပ်အဆင့် တပ်သားဟောင်းဖြစ်ပြီး မတရား ဖမ်းဆီးကာ ထပ်မံ စစ်မှုထမ်းစေခဲ့တာလို့ သိရပါတယ်။

၎င်းတို့ ၂ ဦးဟာ MA1 သေနတ် တစ်လက်၊ ခဲယမ်းနဲ့ ဗုံးသီး တချို့ကို ယူဆောင်လာခဲ့ပြီး တော်လှန်ရေး တပ်ဖွဲ့များနဲ့ ပူးပေါင်းခဲ့တာ ဖြစ်ပါတယ်။

အလားတူ ရေစကြို မြို့နယ်၊ ခလရ-၂၅၇ တပ်ရင်းမှ တပ်သား စိုးမင်းနိုင် ဆိုသူဟာ မြေလတ်ဒေသ ပြောက်ကျား တပ်ဖွဲ့ - MRG ထံ ဆက်သွယ် အလင်းဝင်ခဲ့တယ်လို့ ဆိုပါတယ်။

အသက် ၂၅ နှစ် အရွယ် ကိုစိုးမင်းနိုင်ဟာ ဩဂုတ်လ ၂၁ ရက်နေ့က ၅.၅၆ ကျည် ၁၁၃ တောင့်၊ လက်ပစ်ဗုံး ၂ လုံး ကို တပါတည်း ယူဆောင်လာခဲ့တာကြောင့် ဂုဏ်ပြု ချီးမြှင့်ငွေ ပေးအပ်ခဲ့ပြီး မိသားစုထံ ကောင်းမွန်စွာ အပ်နှံပေးခဲ့တယ်လို့ သိရပါတယ်။

၎င်းဟာ ကျောက်ပန်းတောင်းမြို့နယ်၊ လက်ပံပျားရဲစခန်းက အတင်းအဓမ္မ စစ်မှုထမ်းဖို့ ခေါ်ဆောင်ခြင်း ခံခဲ့ရတာ ဖြစ်ပြီး ဗထူးလေ့ကျင့်ရေးတပ်မှာ စစ်သင်တန်း တက်ရောက်ခဲ့ရကာ ခလရ - ၂၅၇ တပ်ရင်းကို ပို့ဆောင်ခံခဲ့ရတာ ဖြစ်ပါတယ်။

အခုတင်ပြခဲ့တဲ့ စစ်ရေးသတင်းကောက်နုတ်ချက်တွေကိုတော့ Radio NUG သတင်းထောက် ခါးရှဲလ်နဲ့ ပဒဲဖိုးတို့က ပေးပို့ထားတာဖြစ်ပါတယ်။

#RadioNUGLocalNews

#SpringRevolution