04 Oct 2025 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၅ အောက်တိုဘာလ ( ၄ ) ရက်နေ့နောက်ဆုံးရပြည်တွင်းသတင်းများ

📌📌 ၁။ ပလက်ဝမှာ ဗုံးကြဲခံရ၊ ပြည်သူ ၂ ဦး အသက်ဆုံးရှုံးပြီး ၁၉ဦး ပြင်းထန်ဒဏ်ရာရ။

 

ချင်းပြည်၊ ပလက်ဝမြို့ထဲမှာ စစ်အုပ်စု လေတပ်က စက်တင်ဘာ ၂၉ရက်‌နေ့မွန်းလွဲ ၁၂ နာရီ ၃၁ မိနစ်မှာ လေကြောင်းဗုံးကြဲလို့ အမျိုးသမီး ၂ ဦး သေဆုံးပြီး ၁၉ ဦး ထိခိုက်ဒဏ်ရာရတယ်လို့ သိရပါတယ်။

မြို့တွင်း ၂ နေရာကို ဦးတည်ပြီး ဂျက်ဖိုက်တာနဲ့ ၃ ကြိမ်တိုင်တိုင် ဗုံးကြဲတာလို့ Arakan Princess Mediaက မျက်မြင်သတင်းအရင်းမြစ်တွေကို ကိုးကားပြီး ဖော်ပြပါတယ်။

သေဆုံးသူအမျိုးသမီး ၂ ဦးဟာ အသက် ၁၉ နှစ်နဲ့ ၄၂ နှစ်အရွယ်တွေဖြစ်ပြီး ထိခိုဒဏ်ရာရတဲ့ ၁၉ ဦးထဲမှာ အရေးပေါ်ဆေးကုသမှုခံယူရမယ့်သူတွေရှိသလို အသက်အန္တရာယ်စိုးရိမ်ရတယ်လို့လည်း ဆိုပါတယ်။

ချင်းပြည်တောင်ပိုင်း ပလက်ဝမြို့ကို အာရက္ခတပ်တော် - AAက ၂၀၂၃ နိုဝင်ဘာ ၁၃ ရက်ကနေ ၂ လကြာ တိုက်ခိုက်ပြီးတဲ့နောက် ထိန်းချုပ်ခဲ့တာ ဖြစ်ပါတယ်။

 

========================

 

📌📌 ၂။ စစ်အုပ်စုရဲ့ လေကြောင်းနဲ့ လက်နက်ကြီးတိုက်ခိုက်မှုကြောင့် ၄နှစ်ကျော်အတွင်း ချင်းပြည်နယ်မှာ အရပ်သား ၁၀၁ ဦး သေဆုံးခဲ့။

 

၂၀၂၁ ခုနှစ် ကနေ ၂၀၂၅ ခုနှစ်၊ စက်တင်ဘာလ ၃၀ ရက်နေ့ထိစစ်အုပ်စုရဲ့ လေကြောင်းနဲ့ လက်နက်ကြီးတိုက်ခိုက်မှုကြောင့် ချင်းပြည်နယ်မှာ သေဆုံးသူလူဦးရေ ၁၀၁  ဦးအထိ ရှိခဲ့တယ်လို့  နိုင်ငံရေးအကျဉ်းသားများကူညီစောင့်ရှောက်ရေး အသင်း (AAPP) ရဲ့ အောက်တိုဘာလ ၁ ရက်နေ့ ထုတ်ပြန်ချက်အရ သိရပါတယ်။  

နိုင်ငံရေးအကျဉ်းသားများကူညီစောင့်ရှောက်ရေး အသင်း (AAPP) ရဲ့ ထုတ်ပြန်ချက်အရ ၂၀၂၁ ခုနှစ်ကနေ ၂၀၂၅ ၊  စက်တင်ဘာလ ၃၀ ရက်နေ့အထိ နိုင်ငံတဝန်း စစ်အုပ်စုရဲ့လေကြောင်း၊ လက်နက်ကြီး တိုက်မှုကြောင့်  သေဆုံးသူဦးရေ ၃၀၂၃ ဦး သေဆုံးခဲ့တာကို အမည်နဲ့တကွ အတည်ပြုနိုင်သလို အတည်ပြုရန် လိုအပ်နေတဲ့ သေဆုံးသူ အနည်းဆုံး ၂၆၉၀ ဦးဝန်းကျင်ခန့်ကိုလည်း သီးခြားကောက်ယူစုဆောင်းနေတယ်လို့ ထုတ်ပြန်ထားပါတယ်။

၄ နှစ်ကျော်အတွင်း စစ်အုပ်စုရဲ့ လေကြောင်းနဲ့ လက်နက်ကြီး တိုက်ခိုက်မှုကြောင့် သေဆုံးသူတွေထဲ အမျိုးသမီးက (၁၃၇၀) ဦးနဲ့ အမျိုးသား ၁၆၅၃ ဦး ဖြစ်ပြီး အသက် ၁၈ နှစ်အောက် ကလေးငယ် ၆၄၇ ဦး လည်း အသက်ဆုံးရှုံးခဲ့ရတယ်လို့ ထုတ်ပြန်ထားပါတယ်။

အရပ်သားပြည်သူတွေကို ဦးတည်တိုက်ခိုက်နေတဲ့ အကြမ်းဖက်မှုတွေကို ရပ်တန့်ရေးနဲ့ အပြည်ပြည်ဆိုင်ရာ ဥပဒေစံချိန်စံညွှန်းတွေနဲ့အညီ တာဝန်ခံမှုစေရှိစေရေးအတွက် စစ်အုပ်စုရဲ့ အကြမ်းဖက်ကျူးလွန်မှုတွေကို စုံစမ်းစစ်ဆေးပြီး ပြစ်ဒဏ်ကင်းလွတ်ခွင့်ရနေမှုတွေကို အဆုံးသတ်ရန်နဲ့ ထိခိုက်ခံစားခဲ့ရတဲ့ ပြည်သူတွေအတွက် တရားမျှတမှု၊ ပြန်လည်ကုစားပေးလျော်မှု၊ စိတ်ပိုင်းဆိုင်ရာပံ့ပိုးမှုနဲ့ ရုပ်ပိုင်းဆိုင်ရာပံ့ပိုးမှုတွေဖြစ်တဲ့ သူတို့ရဲ့ လုံခြံမှု၊ နေအိမ် နဲ့ အခြေခံလိုအပ်ချက်တွေရရှိရေး အထောက်အပံ့ပေးရန် တာဝန်ရှိပုဂ္ဂိုလ်၊ အစုအဖွဲ့အသီးသီး နဲ့ နိုင်ငံတကာက အလေးအနက်ထားပြီး အမြန်ဆုံး အကောင်အထည်ဖော်ဆောင်ရွက်ဖို့ လိုအပ်နေတယ်လို့ နိုင်ငံရေးအကျဉ်းသားများကူညီစောင့်ရှောက်ရေး အသင်း AAPP ကဆိုပါတယ်။

 

========================

 

📌📌 ၃။ ဖိလစ်ပိုင်နိုင်ငံတွင် လှုပ်ခဲ့တဲ့ အင်အားပြင်းငလျင်ကြောင့် သေဆုံးသူ ၇၂ ဦးအထိရှိလာ။

 

ဖိလစ်ပိုင်အလယ်ပိုင်းတွင် လှုပ်ခဲ့တဲ့ အင်အားပြင်းမြေငလျင်ကြောင့်အောက်တိုဘာ ၂ ရက်ထိ သေဆုံးသူ စုစုပေါင်း ၇၂ ဦးရှိလာခဲ့တယ်လို့  တာဝန်ရှိသူများက ပြောကြပါတယ်။

ပြင်းအား ၆ ဒသမ ၉ ရှိတဲ့ငလျင်ကြောင့် `စီဘူး (Cebu)´ မြို့ မြောက်ပိုင်းက လူပေါင်း (၂၀,၀၀၀) ကျော် ဘေးလွတ်ရာသို့ ရွှေ့ပြောင်းခဲ့ရပြီး လူပေါင်း (၃၀၀) ခန့် ဒဏ်ရာရရှိခဲ့တယ်လို့ သိရပါတယ်။

ဖိလစ်ပိုင်သမ္မတ ဖာဒီနန်မားကို့စ်ဂျူနီယာဟာ ကြာသပတေးနေ့က ဘိုဂိုမြို့သို့ သွားရောက်ခဲ့ပြီး ပျက်စီးသွားသော နေအိမ်များနှင့် အဆောက်အအုံများကို စစ်ဆေးကာ ကျန်ရစ်သူတွေနှင့်သေဆုံးသူမိသားစုဝင်တွေကို ငွေသားနှင့် ဆေးဘက်ဆိုင်ရာ အကူအညီများ ထောက်ပံ့ပေးအပ်ခဲ့တယ်လို့ သိရပါတယ်။

လက်ရှိမှာ နောက်ထပ် ပျောက်ဆုံးနေသူများနဲ့ပတ်သက်ပြီး အကြောင်းကြားခြင်းမရှိတော့တာကြောင့် ရှာဖွေရေးနှင့် ကယ်ဆယ်ရေးလုပ်ငန်းများကို ရပ်ဆိုင်းထားကြောင်း သဘာဝဘေးအရာရှိများက ပြောကြပါတယ်။ ငလျင်လှုပ်ခတ်မှုကြောင့် စီဘူး၊ဘိုဂိုမြို့က အဆောက်အအုံ ၈၇ လုံး နှင့် အိမ်ခြေ ၆၀၀ နီးပါး  ပျက်စီးခဲ့တယ်လို့ သိရပါတယ်။

#RadioNUGLocalNews

#SpringRevolution