5th FEB 2022 - (Ethnic language program-CHO_DAAI) by Radio NUG

📌(ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၂ ဖေဖေါ်ဝါရီလ ၅ ရက်နေ့ ရပြည်တွင်းသတင်းများ

📌📌၁ ။ မတူပီမှ မင်းတပ်ဘက်သို့ ပြန်ဆင်းလာသည့် စစ်​ကောင်စီယာဉ်တန်း နှင့် CDF မင်းတပ်တို့ တိုက်ပွဲများ ဆက်ဖြစ်​နေ

မတူပီမှ မင်းတပ် ဘက်သို့ ပြန်ဆင်းလာသည့် စစ်​ကောင်စီ တပ်ကား ၈၀ ​ကျော်ပါ ယာဉ်တန်း နှင့် CDF မင်းတပ်တို့ မင်းတပ်-မတူပီ လမ်းတ​လျှောက် တိုက်ပွဲများ ဆက်တိုက်ဖြစ်​ပွား နေ​ကြောင်း ကနဦးသိရသည်။အဆိုပါ စစ်​ကောင်စီ ယာဉ်တန်းသည် မတူပီမှ မင်းတပ်သို့ ပြန်လည်ထွက်ခွာလာသည်မှာ ၁၀ ရက်ဝန်းကျင် ရှိ​နေပြီ ဖြစ်​ကြောင်း သိရသည်။CDF မင်းတပ်ဘက်မှ ကြားဖြတ်တိုက်ခိုက်လျက်ရှိ​ကြောင်း CDF မင်းတပ် တပ်ဖွဲ့ဝင်များထံမှ သိရသည်။ ပြီးခဲ့သည့် မိုးတွင်းကာလ ကလည်း မတူပီမှ မင်းတပ်သို့ ကူးလူးသွားလာသည့် ကားအစီး ၉၀ ​ကျော်ပါစစ်​ကောင်စီ ယာဉ်တန်း ကို CDF မင်းတပ်က ကြားဖြတ်တိုက်ခိုက်ခဲ့​ကြောင်းသိရသည်။ ထိုတိုက်ခိုက်မှု​ကြောင့် စစ်​ကောင်စီ တပ်သားများ ထိခိုက်​သေဆုံးမှု များစွာဖြင့် မင်းတပ်သို့ ရက်အတန်ကြာမှ ​ရောက်ရှိခဲ့​ကြောင်းသိရသည်။ ယခု ပွင့်လင်းရာသီကာလတွင်လည်း စစ်​ကောင်စီ တပ်သားများ မင်းတပ် မတူပီ ကြားတွင် ၁၀ ရက်​ကျော် ကြာသည့်တိုင် လိုရာခရီး မ​ရောက်နိုင်ဘဲ တ​ရွေ့​ရွေ့ ချီတက်​နေကြ​ကြောင်း သိရသည်။ အဆိုပါ မင်းတပ် မတူပီလမ်း သည် စစ်​ကောင်စီ အရာရှိ တပ်ရင်းမှူး (ဒုတိယ ဗိုလ်မှူးကြီး) အဆင့် ပုဂ္ဂိုလ်များပါ ​သေဆုံးခဲ့ရ​သည့် လမ်းဖြစ်ပြီး စစ်​ကောင်စီ တပ်သား အများအပြား ​သေဆုံး‌ကြောင်းသိရသည်။ ယခု မတူပီမှ ပြန်ဆင်းလာသော စစ်ကောင်စီယာဉ်တန်းမှာ မိုင် ၃၀အနီးနားသို့ရောက်ရှိနေပြီး မင်းတပ်ပြည်သူ့ကာကွယ်ရေးတပ်မှ ကြားဖြတ်တိုက်ခိုက်ရာ စစ်ကောင်စီဖက်အသေပျောက်နဲ့ အမ်အေ 3 သေနတ်တစ်လက် သိမ်းဆည်းရမိ‌ကြောင်း မင်းတပ်ပြည်သူဘအုပ်ချူပ်ရေးအဖွဲ့မှ ဖေဖော်ဝါရီ ၂ရက်နေ့က ထုတ်ပြန်ထားပါသည်။

📌📌၂။ မင်းတပ်-မတူပီ လမ်း​ပေါ်တွင် တိုက်ပွဲများ ဆက်ဖြစ်​နေ၊ စစ်​ကောင်စီ တပ်သား ၆ ဦး​သေ ၊ MA3 ​သေနတ်တစ်လက် သိမ်းဆည်းရမိ

မတူပီမှ မင်းတပ်ဘက်သို့ ပြန်ဆင်းလာသော စစ်​ကောင်စီယာဉ်တန်းကို CDF-MINDAT မှ မင်းတပ်-မတူပီ လမ်း‌ပေါ် တွင် ဆက်လက် ကြားဖြတ် တိုက်ခိုက်ခဲ့​ကြောင်းသိရသည်။ ယနေ့၊ နေ့လယ် ၂ နာရီ ဝန်းကျင်တွင်လည်း မင်းတပ်-မတူပီလမ်း မိုင်တိုင် (၂၈) ဝန်းကျင်၌ တိုက်ပွဲဖြစ်ခဲ့​ကြောင်းသိရသည်။ စစ်​ကောင်စီ ဘက်မှ ထိခိုက် ကျဆုံး မှုများရှိမည်ဟု ခန့်မှန်းရပြီး အ​ရေအတွက် အတိအကျ အတည်ပြုနိုင်ခြင်း မရှိ​သေး​ကြောင်းသိရသည်။ ယင်းတိုက်ပွဲတွင် CDF ရဲဘော်တစ်ဦး ဒဏ်ရာ (မစိုးရိမ်ရ) ရရှိခဲ့​ကြောင်းသိရသည်။ စစ်​ကောင်စီယာဉ်တန်းသည် လက်ရှိတွင် မင်းတပ်-မတူပီ (၂၃) မိုင်၌ ‌ရောက်နေပြီး ထိုနေရာတွင် ညအိပ်မည်ဟု ခန့်မှန်းရ ​ကြောင်း မင်းတပ်မြို့နယ် ပြည်သူ့အုပ်ချုပ်​​ရေးအဖွဲ့ (သတင်းနှင့် ပြန်ကြား​ရေးအဖွဲ့) ၏ ထုတ်ပြန်ချက်တွင် ပါရှိသည်။ ယမန်နေ့ ​ဖေ​ဖော်ဝါရီ ၂ ရက်​​နေ့ တွင်လည်း မိုင်တိုင်အမှတ် ၃၀ နှင့် ၃၂ တွင်လည်း စစ်​ကောင်စီ တပ်သား ၆ ဦးသေဆုံးပြီး ဒဏ်ရာရသူများလည်းရှိခဲ့ပြီး MA3 ​အမျိုးအစားသေနတ် တစ်လက် သိမ်းဆည်းရမခဲ့​ကြောင်း ပြည်သူ့အုပ်ချုပ်​​ရေးအဖွဲ့(သတင်းနှင့် ပြန်ကြား​ရေးအဖွဲ့) က ​ဖေ​ဖော်ဝါရီ ၃ ရက်​နေ့ ညဦးပိုင်းတွင် သတင်းထုတ်ပြန်ထားသည်။

📌📌၃။ အာဏာသိမ်း တစ်နှစ်ပြည့်နေ့၌ ထန်တလန်မြို့တွင် နေအိမ်ပေါင်း ၉၄ လုံးထပ်မံ မီးရှို့ခံရ

စစ်ကောင်စီ မီးရှိူ့၍ လောင်ကျွမ်းခဲ့သော နေအိမ်များကို ၂၀၂၁ စက်တင်ဘာလမှ စတင်၍ ရေတွက်လျှင် အိမ်ပေါင်း (၉၂၈) လုံးရှိပြီဖြစ်ကြောင်း ချင်း လူ့အခွင့်အရေးအဖွဲ့ (CHRO) က သတင်းထုတ်ပြန်ထားသည်။

📌📌၄ ။ ချင်းပြည်နယ်တွင် ဇန်နဝါရီလအတွင်း တိုက်ပွဲ​ပေါင်း ၇၀ ကျော်ဖြစ်ပွား၊ စစ်ကောင်စီတပ်သား ၂၀၀ နီးပါးသေ၊ ချင်းပြည်သူ့ကာကွယ်ရေးအဖွဲ့ဝင် ၁၈ ဦးကျဆုံး

ချင်းပြည်နယ် မြို့နယ် ၈ မြို့နယ်တွင် ပြီးခဲ့သည့်ဇန်နဝါရီလအတွင်း စစ်ကောင်စီတပ် နှင့် ချင်းအမျိူးသားတပ်မတော် CNA နှင့် အပါအဝင် ချင်းပြည်သူ့ကာကွယ်ရေးတပ်ဖွဲ့ CDF တို့ တိုက်ပွဲဖြစ်ပွားမှု ၇၁ ကြိမ်ရှိခဲ့ပြီး စစ်ကောင်စီတပ်သား ၁၉၇ ဦးသေဆုံးကာ ချင်းကာကွယ်ရေးတပ်ဖွဲ့ဘက်၌ ၁၈ ဦးကျဆုံးခဲ့သည်ဟု ချင်း​ဒေသပြည်သူ့ကာကွယ်​​ရေးတပ်​ပေါင်းစု​ကော်မတီ Chinland Joint Defense Committee (CJDC) က ယ​နေ့ ​ဖေ​ဖော်ဝါရီ ၃ ရက်​နေ့တွင် ထုတ်ပြန်သည်။ဇန်နဝါရီလအတွင်း စစ်ကောင်စီတပ်ဖွဲ့၏ သတ်ဖြတ်မှုကြောင့် အရပ်သားပြည်သူ ၁၃ ဦး သေဆုံးခဲ့ပြီးကြောင်း CJDC ၏ ထုတ်ပြန်ချက်တွင် ပါရှိသည်။ ထို့အပြင် နှစ်ဖက် ထိ​တွေ့တိုက်ပွဲကြောင့် ထိခိုက်ဒဏ်ရာရရှိသူ စစ်ကောင်ဘက်တွင် ၆၈ ဦး၊ CJDC အဖွဲ့ဝင် ၂၀ ဦးနှင့် ပြည်သူ ၁၅ ဦးရှိခဲ့သည်ဟု ဖော်ပြပါရှိသည်။

ချင်းပြည်နယ်တွင် ပြီးခဲ့သည့် ၂၀၂၁ ခုနှစ်ဧပြီလ ၂၄ ရက်နေ့မှ စ၍ မင်းတပ်မြို့တွင် စစ်ကောင်စီတပ်နှင့် ချင်းပြည်သူ့ ကာကွယ်ရေး တပ် CDF-Mindat တို့ အကြား ထိ​တွေ့တိုက်ပွဲစတင် ခဲ့ပြီး ၊ ၂၀၂၁ ခုနှစ် ဒီဇင်ဘာလ ၃၁ ရက်နေ့အထိ တိုက်ပွဲပေါင်း ၁၈၄ ကြိမ်ဖြစ်ပွားခဲ့​ကြောင်း သိရသည်။

📌📌၅။ မင်းတပ်မြို့​(ဂေါက်ကွင်း) တိုက်ပွဲတွင် စစ်​ကောင်စီ၏ ပျက်စီးဆုံးရှုံးမှုလျှို့ဝှက်စာရင်းပေါက်ကြား

​နွေဦး​တော်လှန်​ရေးကာလ ချင်းပြည်နယ်အတွင်း အပြင်းထန်​ဆုံး တိုက်ပွဲ စတင်ဖြစ်ပွားခဲ့ရာ မင်းတပ်မြို့ ​ဂေါက်ကွင်း တိုက်ပွဲ တွင် စစ်​ကောင်စီ၏ ဆုံးရှုံးမှု စာရင်း လူမှုကွန်ယက် ​ပေါက်ကြားလာ​ကြောင်း သိရသည်။ အဆိုပါ တိုက်ပွဲတွင် CDF မင်းတပ်ဘက်မှ တူမီး ​သေနတ်များဖြင့်သာ စတင်တိုက်ပွဲဝင်ခဲ့ခြင်း ဖြစ်သည်။ ထို တူမီးတိုက်ပွဲတွင် စစ်​ကောင်စီ လျှို့ဝှက်ထုတ်ပြန် သတင်းအရ စစ်​ကြောင်းမှူး အရာရှိ ၁ ဦး နှင့် တပ်ကြပ်ကြီး ၂ ဦးအပါအဝင် စစ်​ကောင်စီ တပ်သား ၉ ဦး ​​သေဆုံးခဲ့​ကြောင်း သိရသည်။ ဒဏ်ရာရရှိမှုတွင် အရာရှိ ဗိုလ်ကြီး ၄ ဦး အပါအဝင် စစ်​ကောင်စီ တပ်သား ၃၂ ဦး မစိုးရိမ်ရ ဒဏ်ရာ ရရှိခဲ့​ကြောင်း သိရသည်။ လက်နက် ဆုံးရှုံးမှုတွင် ၁၂ မျိုး ​၊ ခဲယမ်းဆုံးရှုံးမှုတွင် ၁၆ မျိုး ၊ ဆုံးရှုံးခဲ့သည်၊ ကြီးကြပ် ကန့်သတ် ပစ္စည်းဆုံးရှုံးမှုတွင် ၃၉ မျိုး ပျောက်ဆုံး​ခဲ့ ကြောင်း ၎င်း လျှို့ဝှက် စာရင်းတွင် ​ဖော်ပြထားသည်။ စစ်​ကောင်စီ တပ်ကားများ အ​ရေအတွက် ဆုံးရှုံးမှု ကိုမူထည့်သွင်း တွက်ချက်ထားခြင်းမရှိ​ကြောင်းသိရသည်။ ​ဂေါက်ကွင်းတိုက်ပွဲတွင် ကိုယ်တိုင်ကိုယ်ကျ ပါဝင်ခဲ့​သော CDF မင်းတပ် တပ်ဖွဲ့ဝင်များ၏ အဆိုအရ အဆိုပါ လျှို့ဝှက်စာရင်းသည် ​လျှော့​ပေါ့ တွက်ချက်ထားခြင်းများ ဖြစ်​နိုင်ကြောင်း သိရသည်။

" ကျ​နော်တို့ စစ်ကား ၆ စီး တိတိ မီးရှို့ ဖျက်ဆီးနိုင်ခဲ့တယ်၊ ကျန်တဲ့ ၂ စီးကို ပစ္စည်းသယ်ဖို့ ​မောင်းသွားကြတယ်၊ စုစု​ပေါင်း ၈ စီး ဖြစ်မယ်" ဟူ၍ CDF မင်းတပ် အဖွဲ့ဝင်တစ်ဦးက ဆိုသည်။ CDF မင်းတပ်က ​ဂေါက်ကွင်းတိုက်ပွဲတွင် သိမ်းဆည်း ရမိခဲ့သည့် စစ်ကား ၆ စီးကို မီးရှို့ဖျက်ဆီးခဲ့ပြီး ကျန် ၂ စီးကို ပစ္စည်းသယ် ဆောင်ရာတွင် ​ခေတ္တအသုံးပြုခဲ့​ကြောင်း သိရသည်။ " ​သေဆုံး စာရင်းနဲ့ ဒဏ်ရာ ရစာရင်းက​တော့ မှန်​ကောင်း မှန်နိုင်ပါတယ်။ ဗက အဆင့် အရာရှိ​တော်​တော်များများ ပါ​နေတာ ခုမှပဲ ကျ​နော်တို့လည်း သိရတယ် " ဟူ၍ CDF မင်းတပ် တပ်ဖွဲ့ဝင်များက ဆိုသည်။ ထိုစဉ်က စစ်​ကြောင်းမှူး အရာရှိ ဗိုလ်ကြီး တစ်ဦး ​သေဆုံး ခဲ့သဖြင့် စစ်​ကောင်စီ တပ်သားများ ဖရိုဖရဲ ထွက်​ပြေးခဲ့ကြ ​ကြောင်းသိရသည်။ "တကယ်တမ်း ကျ​နော် မှတ်မိသ​လောက် ​ပြောရရင် စာရင်းထဲက ပမာဏ နဲ့ ကျ​နော်တို့ မျက်မြင်ကိုယ်​တွေ့ ကိုင်တွယ်ခဲ့တဲ့ လက်နက်နဲ့ ဆက်စပ်ပစ္စည်း​ ပမာဏက အရမ်းကွာတယ်၊ စာရင်းထဲမှာ ​တော်​တော်ကို နည်း​နေတာ" ဟူ၍ CDF မင်းတပ် တပ်ဖွဲ့ဝင်တစ်ဦးက ဆိုသည်။

The Mindat Post ၏ သီးသန့် ရရှိသည့် သတင်းများအရ မင်းတပ် CDF အသာစီးရ၍ စစ်လက်နက် ပစ္စည်းများ အများအပြား သိမ်းဆည်းနိုင်ခဲ့သဖြင့် နှစ်ဘက် ကျေအေးရန် စစ်​ကောင်စီဘက် မှစတင်၍ ​​ ညှိနှိုင်းမှုများရှိခဲ့ပြီး ၊ လက်နက်များ ပြန်လည် အပ်နှံရန် စစ်​ကောင်စီဘက်က လျှို့ဝှက် ဆက်သွယ် ညှိနှိုင်းမှုများလည်း ရှိခဲ့​ကြောင်း သိရသည်။

#RadioNUGLocalNews

#SpringRevolution