29th JUL 2022 - (Ethnic language program-CHO_KAANG) by Radio NUG

📌 (ချင်း တိုင်းရင်းသား - Kaang ကာဏ်း ဘာသာစကား) ထုတ်လွှင့်မှု အစီအစဥ် ၂၀၂၂ ဇူလိုင်လ ( ၂၉ ) ရက်နေ့နောက်ဆုံးရပြည်တွင်းသတင်းများ 

📌📌 ၁။  ဦးဂျင်မီ၊ ဦးဖြိုးဇေယျာသော်၊ ဦးအောင်သူရဇော်နှင့် ဦးလှမျိုးအောင်တို့အတွက် တရားမျှတမှုရယူရန် CDF ကန်ပက်လက်မှ စစ်ဆင်ရေးဖော်ဆောင်ခဲ့ 

၂၀၂၂ ခုနှစ် ဇူလိုင်လ ( ၂၇ ) ရက်နေ့တွင် စစ်ကောင်စီက မတရားကြိုးပေးကွက်မျက်ခဲ့သည့် “ကိုဂျင်မီ၊ ကိုဖြိုးဇေယျာသော်၊ ကိုအောင်သူရဇော် နှင့်ကိုလှမျိုးအောင်” တို့အတွက် တရားမျှတမှု ပြန်လည်ရယူရန် စစ်ဆင်ရေးတစ်ရပ် ဖော်ဆောင်ခဲ့ကြောင်း CDF ကန်ပက်လက်က သတင်းထုတ်ပြန်လာသည်။

 

CDF ကန်ပက်လက်မှ စစ်ကြောင်း ၃ ​ကြောင်းခွဲ၍ ကန်ပက်လက်မြို့၊ အထွေထွေအုပ်ချုပ်ရေးဦးစီးဌာန၊ မြို့နယ်ပညာရေးရုံးနှင့် မြို့နယ်အခြေခံပညာအထက်တန်းကျောင်းတို့တွင် တပ်စွဲထား သော စစ်ကောင်စီတပ်သားများကို တိုက်ခိုက်ခဲ့ရာ ရဲ ၂ ဦး၊ စစ်သား၂ ဦး၊ စုစုပေါင်း ၄ ဦးသေဆုံး၍ စစ်သား ၁ ဦးဒဏ်ရာရရှိခဲ့​ကြောင်း သတင်းထုတ်ပြန်ချက်တွင်ပါရှိသည်။ 

စစ်ကောင်စီမှ ယခုကဲ့သို့ မတရားကြိုးမိန့်ပေးခြင်းအပါအဝင်၊ စစ်ရာဇဝတ်မှုများကို ဆက်လက်လုပ်ဆောင်နေပါက CDF ကန်ပက်လက်အနေဖြင့် အမျိုးသားညီညွတ်ရေးအစိုးရ (MOD)၊ CJDC တို့၏ လမ်းညွှန်ချက်များကိုလိုက်နာ၍ မြို့တွင်း စစ်ဆင်ရေးများကို အရှိန်မြှင့်တင်ဆောင်ရွက်သွားမည်ဖြစ်ကြောင်း သတင်းထုတ်ပြန်ချက်တွင်ပါရှိသည်။ 

📌📌 ၂။ CDF မတူပီနှင့် စစ်ကောင်စီတပ်ဖွဲ့ဝင်များ လည်မျိုချောင်းအနီးထပ်မံ ထိတွေ့ပစ်ခတ်မှုရှိ၊ စစ်ကောင်စီဘက် အထိခိုက်များသည်ဟု CDF မတူပီပြော 

၂၀၂၂ ခုနှစ်၊ ဇူလိုင် ၂၅ ရက်နေ့တွင် CDF မတူပီနှင့် စစ်ကောင်စီတပ်ဖွဲ့ဝင်များ လေမျိုချောင်းတံတားအနီးတစ်ဝိုက်၌ ပစ်ခတ်မှုဖြစ်ပွားခဲ့သည်ဟု CDF မတူပီ သတင်းနှင့် ပြန်ကြားရေးဌာနက ထုတ်ပြန်သည်။ ယင်းထိတွေ့ပစ်ခတ်မှုတွင် စစ်ကောင်စီတပ်ဖွဲ့ဝင် ၅ ဦးသေဆုံးပြီး ၄ ဦးခန့်ဒဏ်ရာရရှိသည်ဟု ၎င်းထုတ်ပြန်ချက်အရ သိရသည်။

အဆိုပါပစ်ခတ်မှုတွင် CDF မတူပီတပ်ဖွဲ့ဝင်များ အထိအခိုက်မရှိပြန်လည်ဆုတ်ခွါနိုင်ကြောင်းနှင့် မတူပီမြို့နယ်အတွင်း စစ်ကောင်စီ၏ ထိုးစစ်ဆင်မှုကြောင့် ပစ်ခတ်တိုက်ခိုက်မှုများ ဆက်လက်ဖြစ်ပွားလာနိုင်ကြောင်း CDF မတူပီ သတင်းနှင့် ပြန်ကြားရေးဌာနက ထုတ်ပြန်ချက်တွင် ဖော်ပြထားသည်။

📌📌 ၃။ စစ်ကောင်စီကို တရုတ်၊ ရုရှားအပါအဝင် လုံခြုံရေးကောင်စီအဖွဲ့ဝင် ၁၅ နိုင်ငံက ပြစ်တင်ရှုတ်ချ

ဒီမိုကရေစီလှုပ်ရှားသူလေးဦးကို သေဒဏ်ပေးကွပ်မျက်လိုက်တဲ့အပေါ် တရုတ်၊ ရုရှား အပါအဝင် လုံခြုံရေးအဖွဲ့ဝင် ၁၅ နိုင်ငံက ကန့်ကွက်မယ့်သူမရှိ တညီတညွတ်တည်း ပြစ်တင်ရှုတ်ချလိုက်တယ်လို့ ဝါရှင်တန်ပို့စ်သတင်းစာမှာ ဖော်ပြလိုက်ပါတယ်။

အဲဒီအပြင် အကြမ်းဖက်မှုအားလုံး ချက်ချင်းရပ်ဖို့၊ လူ့အခွင့်အရေးနဲ့ တရားဥပဒေစိုးမိုးရေးကို အပြည့် အဝ လိုက်နာဖို့ကိုလည်း စစ်ကောင်စီကို တောင်းဆိုလိုက်ပါတယ်။သေဒဏ်ချမှတ်ခံထားရတဲ့သူတွေကို မကွပ်မျက်ဘဲ ပြန်စဉ်းစားဖို့ အာဆီယံအသင်း ပန်ကြားနေတဲ့ကြားကပဲ အခုလိုဆောင်ရွက်လိုက်တယ်ဆိုတာ မှတ်သားထားတယ်လို့လည်း လုံခြုံရေးကောင်စီရဲ့ ကြေညာချက်မှာ ဖော်ပြထားပါတယ်။

ကုလသမဂ္ဂလုံခြုံရေးကောင်စီအနေဖြင့် အကြမ်းဖက် စစ်ကောင်စီ၏ ဒီမိုကရေစီအရေးလှုပ်ရှားသူ ၄ ဦးကို သေဒဏ်ပေး ကွပ်မျက်မှုကို ပြင်းပြင်းထန်ထန်ရှုတ်ချကြောင်းနှင့် သမ္မတဦးဝင်းမြင့်နှင့်ဒေါ်အောင်ဆန်းစုကြည် အပါအဝင် နိုင်ငံရေးအကျဉ်းသားအားလုံး လွှတ်ပေးရန် တောင်းဆိုကြောင်းတရားဝင်သတင်းထုတ်ပြန်ထားပါတယ်။ 

 

📌📌 ၄ ။ CDF မင်းတပ်ရဲ​ဘော်များက မင်းတပ်​မြို့နယ်အတွင်းရှိ ကျေးရွာချင်းဆက်လမ်းနှင့် တံတားများ ပြည်သူနှင့်အတူလုပ်အား​ပေးတည်​ဆောက်​နေ

၂၀၂၂ ခုနှစ်၊ ဇူလိုင်လ ( ၂၅ ) ရက်နေ့တွင် CDF မင်းတပ် သိန်းငှက်တပ်ရင်း-၁ က မင်းတပ်မြို့နယ်အတွင်း ကျေးရွာချင်းဆက်လမ်းနှင့် တံတားကို လုပ်အား​ပေးတည်​ဆောက်​နေတယ်လို့ ထုတ်ပြန်​ဖော်ပြလာပါတယ်။

"ကိုယ့်ဒေသ ကိုယ့်နယ်မြေရဲ့အခက်အခဲတွေဟာ ကျွန်တော်တို့ရဲဘော်တွေရဲ့အခက်အခဲပါပဲ။ နွေဦးတော်လှန်ရေးကာလမှာ ကျွန်တော်တို့ရဲဘော်များဟာ တော်လှန်ရေးတပ်သားတွေအဖြစ်ရှိနေရုံမက လမ်းပြင်၊ တံတား ဆောက်စတဲ့ ဆောက်လုပ်ရေးတပ်သားတွေအဖြစ်ပါ တာဝန်သိစိတ်နဲ့ ပါဝင်နေကြရတာဖြစ်ပါတယ်" လို့ တပ်ရင်းဘက်က ပြောပါတယ်။

CDF မင်းတပ် ရဲဘော်တွေဟာ ခုလိုမိုးတွင်းကာလမှာ နားရက်ဆိုတာမရှိသလောက်ပါပဲ။ တချို့ကတိုက်ပွဲတွေအတွက်ပြင်ဆင်နေရသလို တစ်ချို့က ပြည်သူတွေအတွက်အလုပ်လုပ်နေရပါတယ်။ ပြည်သူချစ်ပြီးအားကိုးရတဲ့ တပ်ရင်းအဖြစ် ဆက်လက်ကြိုးစားသွားကြမှာပါလို့ ဆက်လက်ပြောပါတယ်။ 

📌📌 ၅။ မြန်မာနိုင်ငံတွင် စစ်ဘေးရှောင်ပြည်သူဦးရေ တစ်သန်းကျော်အထိရှိလာသည်ဟု UNOCHA ထုတ်ပြန်

စစ်ကောင်စီက အာဏာသိမ်းပြီးနောက် မြန်မာနိုင်ငံအတွင်း စစ်တပ်နှင့် ဒေသခံကာကွယ်ရေးတပ်၊ တိုင်းရင်းသားလက်နက်ကိုင်တို့ကြားတိုက်ပွဲများကြောင့် စစ်ဘေးရှောင်ရသူဦးရေ ၁ ဒသမ ၂ သန်းအထိ ရှိလာကြောင်း ကုလသမဂ္ဂလူသားချင်းစာနာမှုဆိုင်ရာ ညှိနှိုင်း‌ရေးရုံး (UNOCHA) က ဇူလိုင် ၂၇ တွင် ထုတ်ပြန်သည်။ 

ပြီးခဲ့သည့်ရက်သတ္တပတ်အတွင်း ပြည်နယ်နှင့် တိုင်းဒေသကြီးအများအပြားတွင် စစ်ကောင်စီနှင့် တိုင်းရင်းသားလက်နက်ကိုင်အဖွဲ့များကြား တိုက်ပွဲဆက်လက်ဖြစ်ပွားလျက်ရှိပြီး လုံခြုံရေးအခြေအနေ တင်းမာကာ လူသားချင်းစာနာမှုလိုအပ်ချက် ဆက်လက်မြင့်တက်လာသည်ဟူ၍လည်း (UNOCHA) ၏ ထုတ်ပြန်ချက်တွင် ဖော်ပြသည်။ 

BNI–Myanmar Peace Monitor ၏ ငြိမ်းချမ်းရေးနှင့် ပဋိပက္ခဆိုင်ရာ အချက်အလက်တွင် ဖော်ပြထားချက်အရ ၂၀၂၂ ခုနှစ‌် မေလ ၃၁ အထိ စစ်အာဏာသိမ်းကာလအတွင်း မြို့နယ်အလိုက် ချင်းဒေသကာကွယ်ရေးတပ်ဖွဲ့များနှင့် စစ်ကောင်စီတပ်အကြား တိုက်ပွဲဖြစ်ပွားသည့် ရက်ပေါင်း ၁၁၈ ရက်အထိရှိခဲ့ပြီး အကြိမ်ရေအားဖြင့်မူ ယခုထက်များပြားနိုင်သည်ဟု ဖော်ပြထားသည်။ 

ချင်းပြည်နယ်အတွင်း စစ်ကောင်စီတပ်နှင့် တိုက်ပွဲဖြစ်ပွားရာမြို့နယ်များ၌ မင်းတပ်မြို့နယ်သည် တိုက်ပွဲဖြစ်ပွားမှု အမြင့်ဆုံးဒေသဖြစ်ခဲ့ပြီး နေရပ်စွန့်ခွာ စစ်ဘေးရှောင်ပြည်သူ ၂၅၀၀၀ ဝန်းကျင်ရှိကြောင်း မင်းတပ်မြို့နယ်စစ်ဘေးရှောင်များ စီမံခန့်ခွဲရေးကော်မတီ၏ စာရင်းများအရသိရသည်။

#RadioNUGLocalNews

#SpringRevolution