5th AUG 2022 - (Ethnic language program-CHO_KAANG) by Radio NUG

📌 (ချင်း တိုင်းရင်းသား - Kaang ကာဏ်း ဘာသာစကား) ထုတ်လွှင့်မှု အစီအစဥ် ၂၀၂၂ သြဂုတ်လ ( ၅ ) ရက်နေ့နောက်ဆုံးရပြည်တွင်းသတင်းများ 

📌📌 ၁။ တရုတ်အစိုးရက အကြိမ်ကြိမ် သတိ​ပေး​နေသည့်ကြား ယူအက်စ် အောက်လွှတ်​တော် ဥက္ကဌ နန်စီပလိုစီ ထိုင်ဝမ်ကျွန်းသို့ ​ရောက်ရှိ

၂၅ နှစ်အတွင်း ထိုင်ဝမ်ကို ရောက်လာတဲ့ အမေရိကန် နိုင်ငံရေးလောက သြဇာတိက္ကမ ကြီးတဲ့ သူတွေထဲမှာ အဆင့်အမြင့်ဆုံးလို့ ဆိုနိုင်တဲ့ အောက်လွှတ်တော် ဥက္ကဋ္ဌ နန်စီ ပလိုစီက အမေရိကန် ပြည်ထောင်စုဟာ ထိုင်ဝမ်ကို ဘယ်တော့မှ ပစ်ပယ်သွားမှာ မဟုတ်ဘူးလို့ ပြောလိုက်ပါတယ်။ အဲဒီ ခရီးစဉ်နဲ့ ပတ်သက်လို့ တရုတ်ဘက်ကတော့ ထိုင်ဝမ်ကို အခုလို လာရောက်တာဟာ သူတို့ အမျက်ထွက်စေဖို့ အကြီးအကျယ် လာစွပေးတာပဲလို့ ဆိုပါတယ်။  တရုတ်က ထိုင်ဝမ်ကို ခွဲထွက်ဒေသ တခုအဖြစ် ရှုမြင်ထားပြီး တနေ့မှာ ပြန်လည် သွပ်သွင်းဖို့ အတွက် ရည်မှန်းထားပါတယ်။ ဘေကျင်းမြို့မှာလည်း တရုတ်နိုင်ငံခြားရေး ဝန်ကြီးဌာနက အမေရိကန် သံအမတ်ကို ခေါ်ယူပြီး အခုကိစ္စကြောင့် အင်မတန် ကြီးမားတဲ့ အကျိုးဆက်တွေ ဖြစ်လာနိုင်တာကို သတိပေးခဲ့တယ်လို့ BBC Burmese သတင်းဌာန က ဖော်ပြထားပါတယ်။ 

📌📌 ၂။ R2P ဆက်လက်တောင်းဆိုသွားမယ်လို့ သံအမတ်ကြီး ဦးကျော်မိုးထွန်းပြော

R2P အကောင်အထည်ပေါ်ရေး နိုင်ငံတကာကို ဆက်လက်တောင်းဆိုသွားမယ်လို့ မြန်မာနိုင်ငံဆိုင်ရာ ကုလသမဂ္ဂအမြဲတမ်းကိုယ်စားလှယ် ဦးကျော်မိုးထွန်းက ပြောလိုက်ပါတယ်။ အမေရိကန်ပြည်ထောင်စု နယူးယောက်မြို့ ကုလသမဂ္ဂဌာနချုပ်ရှေ့က မြန်မာတွေ ဆန္ဒပြပွဲမှာ ဦးကျော်မိုးထွန်းကပြောခဲ့တာဖြစ်ပါတယ်။ နိုင်ငံတစ်နိုင်ငံမှာ လူအစုလိုက်အပြုံလိုက် သတ်ဖြတ်မှု၊ စစ်ရာဇဝတ်မှု၊ လူမျိုးတုံးသတ်ဖြတ်မှု၊ လူသားမျိုးနွယ်အပေါ် ကျူးလွန်တဲ့ ရာဇဝတ်မှုတွေနဲ့ ပတ်သက်ပြီး၊ နိုင်ငံကိုကာကွယ်ပေးရမယ့်သူတွေက မကာကွယ်နိုင်ဘူးဆိုရင် ဒါမှမဟုတ် တာဝန်ရှိသူတွေ ကိုယ်တိုင်က ချိုးဖောက်နေရင် Responsibility to Protect (R2P) ဆိုတာကို အကောင်အထည်ဖော် ကျင့်သုံးရမှာ ဖြစ်ပါတယ်။ 

မြန်မာနိုင်ငံထဲကို R2P ဝင်ဖို့နဲ့ ကုလလုံခြုံရေးကောင်စီအနေနဲ့ မြန်မာပြည်က စစ်အာဏာရှင်လက်နက်ကိုင်တော်လှန်ရေးအဖွဲ့တွေဆီကို စစ်သားအင်အား၊ လက်နက်အင်အားတွေ ချက်ချင်းထောက်ပံ့ပေးဖို့ အမျိုးသားညီညွတ်ရေးအစိုးရ NUG ရဲ့ နိုင်ငံခြားရေးဝန်ကြီး ဒေါ်ဇင်မာအောင်ကလည်း ပြီးခဲ့တဲ့ ဇူလိုင်လ ၃ဝ ရက်နေ့က နိုင်ငံတကာကို ပြောတဲ့မိန့်ခွန်းမှာ ထည့်သွင်းတောင်းဆိုခဲ့ပါတယ်။ 

📌📌 ၃။ အကျဥ်းသားများ ထပ်မံကွပ်မျက်မယ်ဆိုရင် အာဆီယံရဲ့ ချဉ်းကပ်ပုံ ပြောင်းလဲ လုပ်ဆောင်ရလိမ့်မယ်လို့ အာဆီယံဥက္ကဋ္ဌ ကမ္ဘောဒီးယား၀န်ကြီးချုပ် ဟွန်ဆန်က သတိပေး 

စစ်ကောင်စီက အကျဉ်းသားတွေကို ထပ်မံ ကွပ်မျက်မယ်ဆိုရင် မြန်မာနိုင်ငံအပေါ် အာဆီယံရဲ့ ချဉ်းကပ်ပုံ ပြောင်းလဲ လုပ်ဆောင်ရလိမ့်မယ်လို့ အာဆီယံဥက္ကဋ္ဌ ကမ္ဘောဒီးယား၀န်ကြီးချုပ် ဟွန်ဆန်က သတိပေး ပြောကြားလိုက်ပါတယ်။ အတိုက်အခံ နိုင်ငံရေးလှုပ်ရှားသူတွေကို မကွပ်မျက်ဘဲ ပြန်လည်စဉ်းစားသုံးသပ်ဖို့ စစ်ကောင်စီကို မေတ္တာရပ်ခံခဲ့ပေမယ့် သေဒဏ်စီရင်လိုက်တဲ့အတွက် ကမ္ဘောဒီးယားနဲ့ တခြားအာဆီယံအဖွဲ့ဝင်နိုင်ငံတွေက အထူးစိတ်ပျက်ရ၊ စိတ်အနှောင့်အယှက်ဖြစ်ရတယ်လို့လည်း အာဆီယံအလှည့်ကျဥက္ကဋ္ဌ ကမ္ဘောဒီးယားဝန်ကြီးချုပ် ဟွန်ဆင်က ပြောပါတယ်။ ဒီမိုကရေစီအရေးလှုပ်ရှားသူ ၄ ဦးကို သေဒဏ်စီရင်ခြင်းဖြင့် အာဆီယံကို ထင်ထင်ရှားရှား မလေးမစားလုပ်ခြင်းဖြစ်သည်ဟု အာဆီယံနိုင်ငံခြားရေးဝန်ကြီးများ အစည်းအဝေးတွင် ဆွေးနွေးကြကြောင်း စင်ကာပူနိုင်ငံခြားရေးဝန်ကြီး Vivian Balakrishnan က လူမှုကွန်ရက်မှတစ်ဆင့် သတင်းထုတ်ပြန်သည်။

မြန်မာနိုင်ငံ၏ ဆိုးရွားသည့် အခြေအနေများ အပါအဝင် အာဆီယံဘုံသဘောတူညီချက် ၅ ရပ်ကို အကောင် အထည်ဖော်ရာမှာ တိုးတက်မှု မရှိခြင်း နှင့် အဓိက ကိစ္စရပ်များကို ဆွေးနွေးခဲ့ကြောင်း၊ မကြာသေးမီက အတိုက်အခံ တက်ကြွလှုပ်ရှားသူ လေးဦးကို ကွပ်မျက်ခြင်းသည် မြန်မာနိုင်ငံတွင် ငြိမ်းချမ်းသော ဖြေရှင်းမှုနှင့် အမျိုးသားပြန်လည်သင့်မြတ်ရေး လွယ်ကူချောမွေ့စေရေးအတွက် အာဆီယံ၏ ကြိုးပမ်းမှုများအတွက် ကြီးမားသော ဆုတ်ယုတ်မှုတစ်ခုဖြစ်ကြောင်း၊ အာဆီယံအပေါ် မြန်မာစစ်အာဏာပိုင်များ၏ ပြတ်ပြတ်သားသား မလေးစားမှုကို ထင်ဟပ်စေကြောင်း အာဆီယံနိုင်ငံခြားရေးဝန်ကြီးများအစည်းအဝေးတွင် အကြိတ်အနယ် ဆွေးနွေးကြသည်ဟု သိရှိရသည်။ 

📌📌 ၄။ မြန်မာ့အရေးကို အာဆီယံက ဝင်ရောက်မဖြေရှင်းရင် အမေရိကန်အစိုးရက ဝင်ရောက်ဖြေရှင်းမယ်လို့ အထက်လွှတ် တော်အမတ် မတ်ကော်နယ် ပြောကြား

မြန်မာ့အရေးကို အာဆီယံက ဝင်ရောက် မဖြေရှင်းနိုင်ဘူးဆိုရင် အမေရိကန်အစိုးရက ဝင်ရောက်ဖြေရှင်းမယ်လို့ အမေရိကန်လွှတ်တော်ရဲ့ အထက်လွှတ်တော်အမတ်ဖြစ်သူ မတ်ကော်နယ်က ပြောကြားလိုက်ပါတယ်။ အမေရိကန်နိုင်ငံခြားရေးဝန်ကြီး အန်တိုနီ ဘလင်ကင်ရဲ့ အာရှခရီးစဉ် မစတင်ခင်မှာ ဘလင်ကင်အနေနဲ့ အရှေ့တောင် အာရှဒေသတွင်းနိုင်ငံတွေဖြစ်တဲ့ အာဆီယံကို ခိုင်မာတဲ့သတင်းစကားတွေပေးခဲ့ဖို့ ဩဂုတ် ၃ ရက်စွဲနဲ့ ကြေညာချက်ထုတ် ပြန်ခဲ့တာပါ။

အကြမ်းဖက်စစ်ကောင်စီရဲ့ တရားမဝင် အုပ်ချုပ်မှုအောက်မှာ ဒုက္ခရောက်နေတဲ့ မြန်မာပြည်သူတွေကို အိမ်နီးချင်းနိုင်ငံ တွေနဲ့ အာဆီယံက အကူအညီပေးဖို့ ဆန္ဒမရှိဘူးဆိုရင် အမေရိကန်အစိုးရကို လွှတ်တော်ကပေးအပ်ထားတဲ့ အခွင့်အာဏာနဲ့ အကြမ်းဖက်စစ်ကောင်စီကို အရေးယူမှုတွေ ပြုလုပ်သွားမှာဖြစ်တယ်လို့ မတ်ကော်နယ်က ပြောကြား လိုက်တာပါ။ အဲဒီလို ပိတ်ဆို့မှုတွေ လုပ်ဆောင်ရာမှာ အကြမ်းဖက်စစ်တပ်ကို အရှိန်မြှင့်တင်ရာရောက်စေတဲ့ ငွေကြေးပံ့ပိုးမှု အရင်းအ မြစ်တွေ၊ မြန်မာ့ရေနံနဲ့ သဘာဝဓာတ်ငွေ့လုပ်ငန်းကို ပိတ်ဆို့အရေးယူမှုတွေပါဝင်တယ်လို့ ဖော်ပြထားပါတယ်။ ဒါအပြင် နိုင်ငံခြားရေးဝန်ကြီးဖြစ်သူ ဘလင်ကင်အနေနဲ့ မြန်မာ့အရေးကို လုပ်ဆောင်ရာမှာ စကားနည်းနည်းပြောပြီး တော့ အလုပ်များများ လုပ်ရမယ့် အချိန်ကို ရောက်နေပြီဆိုပြီးတော့လည်း မတ်ကော်နယ်က ထုတ်ပြန်ချက်ထဲမှာ သတိ ပေးထားတာ တွေ့ရပါတယ်။

#RadioNUGLocalNews

#SpringRevolution