6th AUG 2022 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၂ သြဂုတ်လ ( ၆ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ CDF များလက်နက်ချဖို့ပြောပေးရန် စစ်ကောင်စီက မင်းတပ် မြို့ပေါ်ပြည်သူများကိုစည်းရုံး

CDF များလက်နက်ချဖို့ပြောပေးရန် မင်းတပ်မြို့ပေါ်ရှိ ပြည်သူများကို စစ်ကောင်စီက နည်းမျိုးစုံအသုံးပြု၍ စည်းရုံးဟောပြောကြောင်း သိရသည်။ စစ်ကောင်စီအဖွဲ့များက မင်းတပ်မြို့ RC ဘုရားကျောင်းဝန်းအတွင်းရှိ အဆောက်အဦးတစ်ခုတွင် ပြည်သူများစည်းရုံးကာ သြဂုတ် ၂ ရက်နေ့က ဟောပြောပွဲတစ်ခုပြုလုပ်ခဲ့သည်ဟု ဒေသခံတစ်ဦးက The Mindat Post သို့ပြောသည်။ 

"CDF တွေ လက်နက်ချအလင်းဝင်ဖို့ ပြည်သူချင်းစည်းရုံးပေးကြဖို့ပြောတယ်တဲ့၊ ဟောပြောပွဲလာတဲ့သူကို ခြင်ထောင်တစ် ထည်စီ ဝေတယ်လို့ တော့ကြားတာဘဲ" ဟူ၍ သူကပြောသည်။ ထို့အပြင် မိမိနေအိမ်တွင် သူစိမ်းဧည့်သည်များလက်ခံထားပါက ဖမ်းဆီးခံရမည်ဟု စစ်ကောင်စီတပ်ကပြောဆိုခဲ့ကြောင်း ဆက်လက်၍ပြောသည်။

အလားတူ စစ်ကောင်စီက ပြီးခဲ့သည့် ဇူလိုင် ၃၁ ရက်တွင် ချင်း-မြန်မာနှစ်ဘာသာဖြင့် ရေးသားထားသည့် လက်ကမ်း စာစောင်များ လိုက်ဝေခဲ့ကြောင်း ဖေ့ဘုတ်လူမှုကွန်ရက် စာမျက်နှာပေါ်တွင် ပျံ့နှံ့လာသည့် စာစောင်များအရ သိရသည်။ အဆိုပါ လက်ကမ်းစာစောင်တွင်မူ NUG နှင့် CRPH အဖွဲ့ကို အကြမ်းဖက်များဟုသတ်မှတ်ထားပြီး လက်နက်အပ်နှံကာ ပြည်သူ့ဘဝကို ပြန်လည်ဝင်ရောက်မည်ဆိုပါက ကြိုဆိုလက်ခံသွားမည်ဖြစ်ကြောင်း ရေးသားထားသည်။

 

📌📌 ၂။ လူဝင်မှုကြီး ကြပ်ရေးနှင့် ပြည်သူ့အင်အားဝန်ကြီးဌာန (လဝက) က နိုင်ငံတကာအကြံပေး ပုဂ္ဂိုလ်ခေါ်မည်ဟုဆို

မြန်မာနိုင်ငံရဲ့ လူဦးရေနဲ့ သန်းခေါင်စာရင်း ကောက်ယူနိုင်ရေးအတွက် နိုင်ငံတကာအကြံပေးပုဂ္ဂိုလ် ခန့်အပ်သွားမယ်လို့ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနညွှန်ကြားရေးမှူးချုပ် ဦးဝင်းဇော်အောင်က ပြောတယ်လို့ One News ရဲ့သတင်းတစ်ပုဒ်မှာ ဖော်ပြထားပါတယ်။ အဲဒီ လုပ်ငန်းစဉ် ဆောင်ရွက်နိုင်ဖို့အတွက် မြေပုံရေးဆွဲတာနဲ့ စာရင်းကောက်ကွက် ဖွဲ့စည်းတာတွေကို GIS နည်းပညာ အသုံးပြုကာ အကောင်အထည်ဖော် ဆောင်ရွက်သွားမှာဖြစ်ပြီး နိုင်ငံတကာအကြံပေးပုဂ္ဂိုလ်က လုပ်ငန်းဆောင်ရွက်ရမယ့် အစီအမံရေးဆွဲပေးတာ၊ နည်းပညာပိုင်းဆိုင်ရာ အကြံဉာဏ်တွေ ပံ့ပိုးတာ၊ သင်တန်းပို့ချပေးတာနဲ့ စနစ်တည်ဆောက်ပေးတာတွေကို ဆောင်ရွက်ပေးရမှာဖြစ်တယ်လို့ ဆိုပါတယ်။ နိုင်ငံတကာအကြံပေးပုဂ္ဂိုလ်ခန့်အပ်ဖို့အတွက် GIS နည်းပညာကျွမ်းကျင်တဲ့ မြန်မာနိုင်ငံသားလည်း လျှောက်ထားနိုင်ပြီး လာမယ့် ၂၀၂၄ ခုနှစ်မှာ လူဦးရေနဲ့ သန်းခေါင်စာရင်း ကောက်ယူနိုင်ဖို့အတွက် ကြိုတင်ပြင်ဆင်ဆောင်ရွက်တာလို့လည်း ဆိုပါတယ်။ 

 

📌📌 ၃။ တူမီးထီ အပတ်စဉ် ၃ ကံထူးရှင်များထွက်‌ပေါ်လာ၊ ကိုရီးယားနိုင်ငံမှ တူမီးထီအား ပေးသူတစ်ဦး ပထမဆု ကံထူး

တူမီးထီ အပတ်စဉ် ၃ ကံထူးရှင်များ ထွက်‌ပေါ်လာပြီ ဖြစ်ပြီး ပထမဆု USD 700 ကို တောင်ကိုးရီးယားနိုင်ငံမှ တူမီးထီ ပရိတ်သတ်တစ်ဦးက ဆွတ်ခူးရရှိသွားကြောင်း CRFP က ကြေညာပါတယ်။ ပေါက်မဲ ဆုကြေးငွေနဲ့ ပတ်သက်ပြီး မိမိထည့်သွင်းထားတဲ့ငွေ သို့မဟုတ် ဆုကြေးများကို အကောင့် Menu Panel က တဆင့် စစ်ဆေးနိုင်သလို ပြန်လည်ထုတ်ယူလိုပါက Menu Panel က တဆင့် Withdraw (ငွေထုတ်ရန်) ခလုတ် ဆက်နှိပ်ရပါမယ်၊ နောက် လိုအပ်တဲ့ အချက်အလက်တွေဖြည့်ပြီးတာနဲ့ ပြန်လည်ထုတ်ယူလို့ရ ကြောင်းလည်း CRFP က အသိ ပေးထားပါတယ်။

တူမီးထီ အပတ်စဉ် ၃ ကံထူးရှင် တွေက တော့

(၁) South Korea- ၁ ဦး (ပထမ ဆု)

(၂) USA - ၁ ဦး (ဒုတိယဆု + တတိယဆု)

(၃) South Korea - ၁ ဦး (စတုတ်ထဆု)

(၄) Thailand- ၁ ဦး (ပဉ္စမဆု) အသီးသီး ဆွတ်ခူးရရှိသွားကြတာဖြစ်ပါတယ်။

တူမီးထီ အပတ်စဉ် ၁ က ရရှိတဲ့ ရောင်းရ ငွေ (အမြတ် ငွေ) တွေကို CRFP အ နေနဲ့ ချင်း တော်လှန် ရေးတပ် ပေါင်းစု CJDC နဲ့ အရှိုချင်းကာကွယ် ရေးတပ်ဖွဲ့ ACDF ကို ကူညီပံ့ပိုးနိုင်ခဲ့ပြီး အပတ်စဉ် ၂ က ရရှိတဲ့ အမြတ် ငွေ ကြေး တွေကို တော့ မင်းတပ်နဲ့ ကန်ပက်လက် က စစ် ဘေး ရှောင်ပြည်သူ တွေအတွက် ကူညီပံ့ပိုး ပေးခဲ့ကြောင်း သိရပါတယ်။ အပတ်စဉ် ၃ က ရရှိတဲ့ အမြတ် ငွေ တွေကိုလည်း ချင်း တော်လှန် ရေး အင်အားစု တွေအတွက် ဆက်လက်ကူညီပံ့ပိုးသွားဖို့ ရှိတဲ့အ ကြောင်း CRFP အဖွဲ့က ဆိုပါတယ်။

 

📌📌 ၄။ သြစတြေးလျနိုင်ငံရဲ့အင်အားကြီးပါတီ The Australian Greens ပါတီက အမျိုးသားညီညွတ်ရေးအစိုးရအား မြန်မာနိုင်ငံ၏ တရားဝင်အစိုးရအဖြစ် သတ်မှတ်ကြောင်း ကြေညာ

သြစတြေးလျနိုင်ငံရဲ့အင်အားကြီးပါတီ The Australian Greens ပါတီက အမျိုးသားညီညွတ်ရေးအစိုးရအား မြန်မာနိုင်ငံ၏ တရားဝင်အစိုးရအဖြစ် သတ်မှတ်ကြောင်း ကြေညာလိုက်ပါတယ်။ ဒီလိုတရားဝင်ကြေညာချက်ကိုသြဂုတ်လ၃ရက် ကျင်းပတဲ့အမျိုးသားညီညွတ်ရေးအစိုးရ၊ သြစတြေးလျနိုင်ငံဆိုင်ရာ ကိုယ်စားလှယ်ရုံး ဖွင့်ပွဲအခမ်းအနားမှာ ကြေညာ ခဲ့တာလို့ သတင်းရရှိပါတယ်။

အခမ်းအနားမှာ သြစတြေးလျ၏ အင်အားကြီးပါတီတခုဖြစ်သည့် The Australian Greens ပါတီက အမျိုးသား ညီညွတ်ရေးအစိုးရအား မြန်မာနိုင်ငံ၏ တရားဝင်အစိုးရအဖြစ် သတ်မှတ်ကြောင်း ကြေညာခဲ့သည့်အပြင် သြစတြေးလျ၏ အခြားနိုင်ငံရေးပါတီများကလည်း အလားတူ အသိမှတ်ပြုကြောင်း ကြေညာကြရန် တိုက်တွန်းခဲ့ ပါတယ်။ အခမ်းအနားသို့ သြစတြေးလျ နိုင်ငံခြားရေးဝန်ကြီးဌာန၏ ထိပ်တန်းအရာရှိကြီးများအပြင် နယူးဇီလန်နိုင်ငံ၏ သြစတြေးလျနိုင်ငံဆိုင်ရာ ဒုတိယမဟာမင်းကြီးလည်း တက်ရောက်ခဲ့ပါတယ်။

 

📌📌 ၅။ မြန်မာစစ်တပ်ကို လက်တွေ့အရေးယူဖို့ မစ်ချ် မက်ကော်နယ် ဆော်ဩ

ပြည်သူလူထုကို ညှင်းပမ်းနှိပ်စက် သတ်ဖြတ်နေတဲ့ မြန်မာစစ်ကောင်စီကို နိုင်ငံတကာက အပြောတွေလျှော့ပြီး လက်တွေ့ အရေးယူဖို့ အမေရိကန် အထက်လွှတ်တော် ရီပတ်ဘလစ်ကန် ခေါင်းဆောင် မစ်ချ် မက်ကော်နယ် (Mitch McConnell) က ဆော်ဩလိုက်ပါတယ်။ ကမ္ဘောဒီးယားနိုင်ငံမှာ အမေရိကန်-အာဆီယံ နိုင်ငံခြားရေးဝန်ကြီး အစည်းအဝေးတက်ဖို့ရောက်နေတဲ့ ကန်နိုင်ငံခြားရေး ဝန်ကြီး Blinken ရဲ့ ခရီးစဉ်အတွင်း မြန်မာ့အရေး အလေးပေးပြောဆိုဖို့ မစ်ချ် မက်ကော်နယ်က ကြေညာချက်ထုတ် တိုက်တွန်းလိုက်တာပါ။

"အာဆီယံ အပါအဝင် မြန်မာအိမ်နီးချင်း နိုင်ငံတွေအနေနဲ့ ရက်စက်ကြမ်းကြုတ်ပြီး၊ တရားမဝင်အာဏာယူထားတဲ့ စစ်အုပ်စုအောက်မှာ ဒုက္ခရောက်နေတဲ့ အပြစ်မဲ့ ပြည်သူတွေကို ကူညီပေးဖို့ ပျက်ကွက်နေဦးမယ်ဆိုရင် အမေရိကန် အစိုးရအနေနဲ့ ကွန်ကရက်က ပေးထားပြီးဖြစ်တဲ့ အခွင့်အာဏာကိုသုံးပြီး မြန်မာစစ်တပ်ကို အရေးယူရပါမယ်။ စစ်တပ်ရဲ့ ငွေဝင်ပေါက်ဖြစ်တဲ့ မြန်မာ့ရေနံနဲ့ သဘာဝဓာတ်ငွေ့လုပ်ငန်း (MOGE) ကိုအရေးယူရမယ်" လို့ မစ်ချ် မက်ကော်နယ်က ပြောပါတယ်။စစ်တပ်ရဲ့ ငွေဝင်ပေါက်ဖြစ်တဲ့ မြန်မာ့ရေနံနဲ့ သဘာဝဓာတ်ငွေ့လုပ်ငန်း (MOGE) ကိုအဓိကထား အရေးယူရမယ်လို့ ဆိုပါတယ်။ကန်နိုင်ငံခြားရေးဝန်ကြီး Antony Blinken အနေနဲ့ အမေရိကန်ရဲ့ ခိုင်မာတဲ့ရပ်တည်ချက်ကို အာဆီယံအစည်းအဝေးကနေ သတင်းစကားပေးနိုင်လိမ့်မယ်လို့ ယုံကြည်ကြောင်းလည်း ပြောပါတယ်။ မြန်မာနိုင်ငံကို ရောက်လာတဲ့ ရုရှားနိုင်ငံခြားရေးဝန်ကြီးကို စစ်ကောင်စီက ကြိုဆိုနေတာကို ကြည့်ရင် မြန်မာစစ်တပ်ဟာ အာဏာရှင် အချင်းချင်း အုပ်စုဖွဲ့ဖို့ ပြင်ဆင်နေတာကို မြင်ရတယ်လို့ မစ်ချ် မက်ကော်နယ်က ဝေဖန်ပါတယ်။ 

#RadioNUGLocalNews

#SpringRevolution