17th SEP 2022 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၂ စက်တင်ဘာလ ( ၁၇ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ ရိဒ်ခေါဒါရ် တပ်စခန်းမှ စစ်ကောင်စီတပ်သားတစ်ဦး CDF ဟွားလ်ငိုးရမ်ထံ CDM ပြုလုပ်

ဖလမ်းမြို့နယ်၊ ရိဒ်ခေါဒါရ်အခြေစိုက် တပ်စခန်းကနေ ထွက်ပြေးလွတ်မြောက်တဲ့ စစ်ကောင်စီ တပ်သားတစ်ဦး CDM ပြုလုပ်လာတယ်လို့ CDF ဟွားလ်ငိုးရမ်က စက်တင်ဘာ ၁၆ ရက် ဒီကနေ့ အစောပိုင်းက သတင်းထုတ်ပြန်ပါတယ်။ 

CDM စစ်သားနဲ့အတူ MA သေနတ် တစ်လက်၊ ကျည်အိမ် လေးခု၊ ကျည်တောင့် ၂၅၀ လက်ခံရရှိထားသလို ဆုငွေ သိန်း ၆၀ ပေးအပ်ကာ MOD (NUG)၊ ပြည်သူ့ပန်းတိုင်အဖွဲ့အစည်းတို့နဲ့ ချိတ်ဆက်ပြီး လွတ်မြောက်နယ်မြေသို့ ပို့ဆောင်ပြီးဖြစ်တယ်လို့ အဲဒီထုတ်ပြန်ချက်ထဲမှာ ဖော်ပြထားပါတယ်။ 

CDF ဟွားလ်ငိုးရမ်ဟာ အမျိုးသားညီညွတ်ရေးအစိုးရ NUG ကာကွယ်ရေးဝန်ကြီးဌာန အသိမှတ်ပြုတဲ့ CJDC ၏ လမ်းညွှန်မှုနဲ့ အညီ ဟွားလ်ငိုးဒေသတွင်းမှာ အာဏာရှင် စစ်ကောင်စီတပ်ကို တော်လှန်နေတဲ့ လက်နက်ကိုင် အဖွဲ့အစည်း တစ်ခုလည်း ဖြစ်ပါတယ်။ 

 

📌📌 ၂။ မီဇိုရမ်ပြည်နယ် မြန်မာစစ်ဘေးရှောင်များအရေး အမေရိကန်အစိုးရတာဝန်ရှိသူများနှင့် ဆွေးနွေး

 

အမေရိကန်ပြည်ထောင်စုကို ရောက်ရှိသည့် မီဇိုရမ်ပြည်နယ်အစိုးရ ပညာရေးဝန်ကြီး ပူးလာလ်းချန့်ဒမ်မာ ရာလ်သဲသည် အမေရိကန်ပြည်ထောင်စု Washington DC, State department ကတာဝန်ရှိသူများနှင့် စက်တင်ဘာလ ၁၀ ရက်ကတွေ့ဆုံပြီး မီဇိုရမ်ပြည်နယ်အတွင်း ခိုလှုံနေသည့် မြန်မာစစ်ဘေးရှောင်ပြည်သူများအခြေအနေကို တင်ပြဆွေးနွေးခဲ့သည်ဟု Khonumhtung Burmese သတင်းဌာနက ရေးသားသည်။

၎င်းတွေ့ဆုံမှုတွင် ပညာရေးဝန်ကြီးက မီဇိုရမ်အစိုးရ၊ ဘာသာရေးအဖွဲ့အစည်းနှင့် အရပ်ဘက်အဖွဲ့အစည်းများမှ မီဇိုရမ် ပြည်နယ်သို့ ဝင်ရောက်သည့် မြန်မာစစ်ဘေးရှောင်ပြည်သူများအား လက်ခံကြည့်ရှုစောင့်ရှောက်မှုအခြေနေ၊ အိန္ဒိယနိုင်ငံ ဖွဲ့စည်းပုံအခြေခံဥပဒေ ကလေးသူငယ်များအခွင့်အရေး ပြဌာန်းချက်အရ စစ်ဘေးရှောင်ကလေးငယ်များအား ပညာသင် ကြားပေးသည့်အခြေအနေ၊ ကျောင်းသုံးစာအုပ်များနှင့် အကူအညီပေးသည့်အခြေအနေများကို တင်ပြဆွေးနွေး ခဲ့သည်ဟူ၍ မီဇိုရမ်ပြည်နယ်အစိုးရအဖွဲ့က ထုတ်ပြန်သည်။ 

ယခုလက်ရှိတွင် စစ်ဘေးရှောင်ကလေးငယ်များလာသည်နှင့်အမျှ လိုအပ်ချက်မြင့်မားလာသည့်အတွက် ကူညီဖြေရှင်းပေး နိုင်မည့် နည်းလမ်းမလုံလောက်မှုကြောင့် အခက်အခဲကြုံနေသည့်ကိစ္စကို မီဇိုရမ်ပြည်နယ် ဝန်ကြီးချုပ်က အိန္ဒိယ ဗဟိုအစိုးရထံ တင်ပြတောင်းဆိုထားကြောင်း မီဇိုရမ် ပညာရေးဝန်ကြီးဌာနက ဆိုသည်။ 

အမေရိကန်ပြည်ထောင်စု အစိုးရတာဝန်ရှိသူများကလည်း မြန်မာစစ်ဘေးရှောင်များအား လက်ခံကြိုဆိုစောင့်ရှောင့်မှုအပေါ် မီဇိုရမ်အစိုးရ၊ ဘာသာရေးအဖွဲ့အစည်းနှင့် အရပ်ဘက်အဖွဲ့အစည်းနှင့် မီဇိုရမ်ပြည်သူလူထုအပေါ် ဝမ်းသာကြောင်း၊ စစ်ဘေးရှောင်အရေးကို အမေရိကန်အနေဖြင့် မီဇိုရမ်အစိုးရ၊ အိန္ဒိယအစိုးရတို့နှင့် ပူးပေါင်းဆောင်ရွက်နိုင်ကြောင်း ပြန်လည် အသိပေးခဲ့သည်ဟု Khonumthung Burmese သတင်းဌာနက ဖော်ပြထားသည်။

 

📌📌 ၃။ CDF မတူပီက စစ်ကောင်စီသတင်းပေး ၃ဦး အရှင်ဖမ်းမိထား  

 

CDF မတူပီ ထိန်းချုပ်နယ်မြေအတွင်းမှာ ဝင်ရောက်လာတဲ့ စစ်ကောင်စီသတင်းပေး အမျိုးသား ၃ဦးကို စက်တင်ဘာ ၁၂ ရက်က ဖမ်းမိတယ်လို့ သိရပါတယ်။ စစ်ဆေးရေးဂိတ်တစ်ခုမှာ မသင်္ကာတဲ့အတွက်ကြောင့် စစ်ဆေးရင်း ခုလိုဖမ်းမိတာ ဖြစ်တယ်လို့ CDF မတူပီ တာဝန်ရှိသူတစ်ဦးက ဒေသတွင်း သတင်းဌာနဖြစ်တဲ့ The Matupi Time ထံ အတည်ပြုပါတယ်။ 

အဲဒီစစ်ကောင်စီသတင်းပေး အမျိုးသား ၃ဦးဟာ ပြီးခဲ့တဲ့ စက်တင်ဘာလ ၇ရက်က CDF မရာ တပ်ရင်းတစ်ခုရဲ့ မော်တော်ဆိုင်ကယ် ၂ စီးနဲ့အတူ CDF မတူပီ ထိန်းချုပ်နယ်မြေအတွင်းကို ထွက်ပြေးလာသူတွေ ဖြစ်တဲ့ အကြောင်း CDF မရာရဲ့ စက်တင်ဘာ ၁၂ ရက် သတင်းထုတ်ပြန်ချက်မှာ တွေ့ရပါတယ်။ 

ဖမ်းဆီးထားတဲ့ အမျိုးသား ၃ ဦးလုံး စစ်ကောင်စီသတင်းပေးသူတွေ ခိုင်လုံနေတာကြောင့် လုံခြုံတဲ့တနေရာမှာ ထိန်းသိမ်း ထားတယ်လို့လည်း CDF မတူပီ ကာကွယ်ရေးတာဝန်ရှိသူက ပြောထားပါတယ်။

စစ်ကောင်စီသတင်းပေး ၃ဦးဖမ်းဆီးခံရမှုနဲ့ ပတ်သက်ပြီးတော့ The Mindat Post သတင်းဌာနအနေနဲ့ သီးခြားအတည်ပြုနိုင် ခြင်း မရှိသေးပါဘူး။ 

 

📌📌 ၄။ ကျောက်ထုမြို့တွင်း ကင်းလှည့်နေတဲ့ စစ်ကောင်စီတပ်ဖွဲ့ဝင် ၂ဦး ပစ်သတ်ခံရ

 

ကျောက်ထုမြို့ ဂုံဘိုရပ်ကွက်ဘက်ကို ဆိုင်ကယ်နဲ့ကင်းလှည့်လာတဲ့ စစ်ကောင်စီတပ်ဖွဲ့ဝင်တွေ ပစ်ခတ် ရှင်းလင်း ခံရတာကြောင့် သေဆုံးမှုရှိနိုင်တယ်လို့ သိရပါတယ်။

အဲဒီ ပစ်ခတ်မှုကို ကျောက်ထု ပြည်သူ့ကာကွယ်ရေးတပ် (YRPA) က အထူးစစ်ဆင်ရေး ပြုလုပ်ခဲ့တာဖြစ်ပြီး စစ်ကောင်စီ တပ်ဖွဲ့ဝင် ရဲတပ်သားတစ်ဦးနဲ့ စစ်သားတစ်ဦး ပွဲချင်းပြီးသေဆုံးတယ်လို့ ကျောက်ထု ပြည်သူ့ကာကွယ်ရေးတပ်ရဲ့ စက်တင်ဘာလ ၁၄ ရက် ဒီကနေ့အစောပိုင်း သတင်းထုတ်ပြန်ချက်မှာ တွေ့ရပါတယ်။

တိုက်ခိုက်မှုအပြီး ကာကွယ်ရေးတပ်ဖွဲ့ဝင်တွေ အန္တရာယ်ကင်းကင်း ဆုတ်ခွာနိုင်ခဲ့ပြီး ကျောက်ထုအမြောက်တပ် စစ်ကောင်စီတပ်ဖွဲ့ဝင်တွေက မြို့တွင်းပိတ်ဆို့ ရှာဖွေမှုတွေ ဆက်တိုက်ပြုလုပ်နေတယ်လို့လည်း ဒေသခံပြည်သူတွေက ပြောပါတယ်။ 

 

📌📌 ၅။ မင်းတပ်မြို့နယ်တွင် စားသုံးကုန်များ ဈေးနှုန်းချိုသာစွာဖြင့် MUSU က ရောင်းချပေးမည်

 

မင်းတပ်မြို့နယ်အတွင်းမှာ စားသုံးကုန်စျေးနှုန်း မြင့်တက်လာတာကြောင့် စစ်ဘေးရှောင်ပြည်သူတွေ အထောက်အကူ ဖြစ်စေဖို့ ရည်ရွယ်ပြီး ကုန်ပစ္စည်းတွေကို ဈေးနှုန်းချိုချိုသာသာနဲ့ ရောင်းချပေးနိုင်ဖို့ စတင်အကောင်အထည်ဖော်နေတယ်လို့ မင်းတပ် တက္ကသိုလ်ကျောင်းသားများ သမဂ္ဂ (MUSU) က စက်တင်ဘာလ ၁၃ ရက်နေ့မှာ ပြောပါတယ်။

မင်းတပ်မြို့နယ်က ကျေးရွာတိုင်းမှာ ကုန်စျေးနှုန်းတွေ နည်းနိုင်သမျှနည်းအောင် ဆက်လက် ရောင်းချနိုင်ဖို့ ဘယ်သူမဆို လာရောက်ပါဝင်နိုင်တယ်လို့လည်း မင်းတပ် တက္ကသိုလ်ကျောင်းသားများ သမဂ္ဂအဖွဲ့က တောင်းဆိုထားပါတယ်။ 

#RadioNUGLocalNews

#SpringRevolution