22nd OCT 2022 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၂ အောက်တိုဘာလ ( ၂၂ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ ကန်ပက်လက်နယ်အတွင်း စစ်ကောင်စီတပ်သား ၄ဦးထပ်မံသေ၊ ပြည်သူများ ဗုံးခိုကျင်းကြိုတင်တူးထားရန် CDF ကန်ပက်လက် ကြေညာ

ကန်ပက်လက်မြို့နယ် တနေရာတွင် ကင်းပုန်းနေရာယူသည့် CDF ကန်ပက်လက်ရဲဘော်များနှင့် စစ်ကောင်စီတို့အကြား အောက်တိုဘာ ၂၀ နံနက်အစောပိုင်းတည်းက ထိပ်တိုက်ထိတွေ့တိုက်ပွဲဖြစ်ပွားခဲ့သည်ဟု သိရသည်။

 

နံနက် ၈ နာရီဝန်းကျင်မှ မွန်းတည့် ၁၂ နာရီ ကျော်အထိ ပစ်ခတ်သည့် ၎င်းတိုက်ပွဲအတွင်း စစ်ကောင်စီက ၄ ဦးသေဆုံးပြီး အများအပြားဒဏ်ရာရမည်ဟု ခန့်မှန်းရကြောင်းလည်း CDF ကန်ပက်လက်က တရားဝင်ထုတ်ပြန်သည်။

 

ထို့အ ပြင် အထိနာသော အကြမ်းဖက်စစ်ကောင်စီတပ်သည်လက်နက်ကြီးဖြင့် ကန်ပက်လက်မြို့တွင်းသာမက အနီးအနားရှိ ကျေးရွာများကိုတရစပ်ပစ်ခတ်မှုကြောင့် လူနေအိမ်များထိခိုက်မှုရှိပြီးထိခိုက်မှုအခြေနေကိုစုံစမ်းနေဆဲ ဖြစ်သည်ဟုလည်း ဆိုသည်။ 

 

စစ်ကောင်စီက ကန်ပက်လက်နှင့် ကျင်ဒွေးမြို့ကို လေကြောင်းဖြင့် လက်နက်အင်အား၊ လူအင်အားများ ဖြည့်တင်းလျက် ရှိနေသည့်အတွက် CDF ကန်ပက်လက်နှင့် တိုက်ပွဲ ဆက်လက်ပြင်းထန်လာမည်ဟုခန့်မှန်းရကြောင်းနှင့် ကန်ပက်လက်မြို့ အနီးအနားရှိကျေးရွာများအနေဖြင့် ပုန်းခိုကျင်းကြိုတင်တူးဖော်ကြရန် CDF ကန်ပက်လက်က လေးလေးနက်နက် တိုက်တွန်းထားသည်။

 

📌📌 ၂။ ချင်းကာကွယ်ရေး ပူးပေါင်းတပ်နှင့် စစ်ကောင်စီအကြားတိုက်ပွဲဆက်လက်ပြင်းထန်ပြီး စစ်ကောင်စီတပ် ၂၅ဦးထက်မနည်းသေ၊ ချင်းပူးပေါင်းတပ်ဖွဲ့မှ ရဲဘော်လေးဦး ကျဆုံး

ချင်းအမျိုးသားတပ်ဦး (CNF/CNA) အပါအဝင် ချင်းကာကွယ်ရေးတပ်ဖွဲ့များ၏ တိုက်ခိုက်မှုကြောင့် အောက်တိုဘာ ၁၃ရက်မှ ၁၈ရက်အတွင်း စစ်ကောင်စီတပ်မှ ၂၅ဦးထက်မနည်းသေဆုံးပြီး ထိခိုက်ဒဏ်ရာရသူများရှိခဲ့ကြောင်း CNF က အောက်တိုဘာ ၁၉တွင်ထုတ်ပြန်သည်။

 

ဟားခါး - ထန်တလန်ကြားသို့ စစ်ကြောင်းထိုးလာသည့် စစ်ကောင်စီတပ်နှင့် ချင်းကာကွယ်ရေး ပူးပေါင်းတပ်ဖွဲ့တို့ အောက်တိုဘာ ၁၃ ရက်မှ အောက်တိုဘာ ၁၉အထိ တိုက်ပွဲဖြစ်ပွားခဲ့ခြင်းဖြစ်သည်။

 

တိုက်ပွဲများအတွင်း စစ်ကောင်စီတပ်သား ၂၅ဦး ထက်မနည်း သုတ်သင်ရှင်းလင်းနိုင်ခဲ့ပြီး ၂၀ဦးထက်မနည်း ဒဏ်ရာရကြောင်း၊ ပူးပေါင်းတပ်ဖွဲ့မှ CNA ရဲဘော် သုံးဦး၊ CDF ဟားခါး ရဲဘော်တစ်ဦးကျဆုံးခဲ့ကာ တစ်ဦး (မစိုးရိမ်) ဒဏ်ရာရခဲ့ကြောင်းလည်း အသိပေးထုတ်ပြန်ထားသည်။

 

တိုက်ပွဲအတွင်း စစ်ကောင်စီက လေကြောင်းမှတဆင့် တိုက်ခိုက်မှုပါ အသုံးပြုနေကြောင်း စစ်မြေပြင်နှင့်နီးစပ်သည့် ဒေသတွင်းသတင်းဌာနများက ရေးသားသည်။ 

စစ်ကောင်စီတပ်ကို ချင်းအမျိုးသားတပ် (CNA)၊ ချင်းပူးပေါင်းကာကွယ်ရေးကော်မတီ (CJDC) အထူးတပ်ဖွဲ့၊ CDF-Thantlang၊ CDF-Zophei၊ CDF-Lautu၊ CDF-Mara နှင့် CDF-Hakha တို့က ပူးပေါင်းတိုက်ခိုက်ခဲ့ခြင်းဖြစ်သည်။

 

📌📌 ၃။ Non CDM မတူပီမြို့နယ်ပညာရေးမှူးကို သတိပေးပြီးတဲ့နောက် ရှင်းလင်းခဲ့တယ်လို့ CDF မတူပီ ထုတ်ပြန်

 

Non CDM မတူပီမြို့နယ်ပညာရေးမှူး ဦးတင်လွေးကို စစ်ကောင်စီနဲ့ မပူးပေါင်းဖို့ အကြိမ်ကြိမ်သတိပေးပြီးတဲ့နောက် အောက်တိုဘာလ ၁၆ရက် ရှင်းလင်းခဲ့တယ်လို့ CDF မတူပီက တရားဝင်ထုတ်ပြန်လာပါတယ်။ မြို့နယ်ပညာရေးမှူး ဦးတင်လွေးဟာ CDM တွေကို ခြိမ်းခြောက်ဖိအားပေးတာ၊ စစ်ကောင်စီကို CDM စာရင်းပေးတာ၊ CDM တွေရဲ့လစာ စစ်တပ်အငြိမ်းစား ဗိုလ်မှုးဝင်းနိုင်နဲ့ပေါင်းပြီး ထုတ်ယူတာ စတဲ့စစ်ဆေးတွေ့ရှိချက်တွေကြောင့် ခုလိုရှင်းလင်း ရတာဖြစ်တဲ့အကြောင်း CDF မတူပီရဲ့ ဒီကနေ့ထုတ်ပြန်ချက်မှာ ဖော်ပြထားပါတယ်။

 

ဒါ့အပြင် မြို့နယ်ပညာရေးမှူး ဦးတင်လွေးကို ယခင်အသိပေးစာ ၃ကြိမ်အပြင် နှုတ်နဲ့ပါအကြိမ်ကြိမ်သတိပေးခဲ့ပေမယ့် လိုက်နာမှုမရှိဘဲ ပြန်လည်ခြိမ်းခြောက်တာတွေကြောင့် ပြည်သူ့သစ္စာဖောက်အဖြစ်သတ်မှတ်ပြီး ရှင်းလင်းခဲ့တာလို့လည်း CDF မတူပီက ဆိုပါတယ်။

 

📌📌 ၄။ ပြည်ထောင်စုဝန်ကြီး ဒေါက်တာလျန်မှုန်းဆာခေါင်း တောင်ကိုရီးယားနိုင်ငံသို့ ပထမဆုံးအကြိမ် ရောက်ရှိ

 

အမျိုးသားညီညွတ်ရေး အစိုးရ NUG ၏ ဖက်ဒရယ် ပြည်ထောင်စုရေးရာဝန်ကြီးဌာန၊ ပြည်ထောင်စုဝန်ကြီး ဒေါက်တာလျန်မှုန်းဆာခေါင်းသည် တောင်ကိုရီးယားနိုင်ငံသို့ အောက်တိုဘာ ၁၈ရက်တွင် ရောက်ရှိနေကြောင်း သိရသည်။ 

ပြည်ထောင်စုဝန်ကြီးသည် တောင်ကိုရီးယားနိုင်ငံ Asia Center - Seoul National University တွင် ၂၀၂၂ ခုနှစ်၊ အောက်တိုဘာ ၂၁ ရက်၊ သောကြာနေ့တွင် ကျင်းပပြုလုပ်မည့် နိုင်ငံတကာနှင့် မြန်မာ့ဖက်ဒရယ် ဒီမိုကရေစီရေးရာ ဆွေးနွေးပွဲသို့ တက်ရောက်ရန် အထူးဖိတ်ကြားခံရ၍ ရောက်ရှိနေခြင်းဖြစ်သည်။

 

“ပြည်ထောင်စုဝန်ကြီးက တောင်ကိုရီးယားနိုင်ငံမှာ တစ်ပတ်ကြာနေထိုင်ပြီး ကိုရီးယားသမ္မတနိုင်ငံအစိုးရ အာဏာပိုင်အဖွဲ့အစည်းတွေ၊ ကိုရီးယားအစိုးရမဟုတ်သော လူမှုအဖွဲ့အစည်းတွေနဲ့ တွေ့ဆုံသွားဖို့ရှိပါတယ်” ဟု NUG ၏ တောင်ကိုရီးယားကိုယ်စားလှယ် ဦးရန်နိုင်ထွန်းက MPA သို့ ရှင်းပြထားကြောင်း ဆိုသည်။

 

NUG ပြည်ထောင်စုဝန်ကြီး ဒေါက်တာလျန်မှုန်းဆာခေါင်းသည် အမျိုးသားညီညွတ်ရေးအစိုးရ NUG ဖွဲ့စည်းပြီးနောက် တောင်ကိုရီးယားနိုင်ငံသို့ ပထမဆုံးအကြိမ်ရောက်ရှိလာသည့် ပြည်ထောင်စုဝန်ကြီးတစ်ဦးလည်းဖြစ်သည်။

#RadioNUGLocalNews

#SpringRevolution