14th JAN 2023 - (Ethnic language program-CHO_DAAI) by Radio NUG ~ Newsletter by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ ဇန်နဝါရီလ ( ၁၄ ) ရက်နေ့ နောက်ဆုံးရပြည်တွင်းသတင်းများ

📌📌 ၁။ ချင်းပြည်နယ်အတွင်း တရားမဝင်ရွေးကောက်ပွဲမလုပ်ဖို့ CNDF တားမြစ်၊ အထမြောက်အောင်ပါဝင်တဲ့ ဘယ်ပုဂ္ဂိုလ်မျိုး မဆို အရေးယူမယ်

စစ်ကောင်စီရဲ့ တရားမဝင်ရွေးကောက်ပွဲကို ချင်းပြည်၊ ဖလမ်းမြို့နယ်နဲ့ အထက်ချင်းတွင်းဒေသတလျှောက် လုံးဝ (လုံး၀) မလုပ်ဖို့ CNO/CNDF က ဇန်နဝါရီ ၁၁ ရက်နေ့မှာ ထုတ်ပြန်တားမြစ်လိုက်ပါတယ်။

ဒီလိုတားမြစ်ထားတဲ့ကြားက ရွေးကောက်ပွဲ အထမြောက်အောင်ကူညီမယ့် ဘယ်ပုဂ္ဂိုလ်မျိုးကိုမဆို ပြင်းပြင်းထန်ထန် အရေးယူသွားမယ်လို့ ဆိုပါတယ်။ ဇန်နဝါရီ ၆ ရက်ကနေ ၉ ရက်နေ့အထိပြုလုပ်တဲ့ ချင်းအမျိုးသားကာကွယ်ရေးတပ်ဖွဲ့ရဲ့ ဒုတိယအကြိမ် ညီလာခံအစည်း အဝေးအပြီးမှာ CNO/CNDF က အခုလို ထုတ် ပြန်လိုက်တာပါ။

CNO/CNDF အနေနဲ့ အာဏာရှင်စနစ်အမြစ်ပြတ်ချေမှုန်းရေး၊ ချင်းအမျိုးသားတည်ဆောက်ရေးနဲ့ ဖက်ဒရယ်ဒီမိုကရေစီ ပြည်ထောင်စုပေါ်ပေါက်ရေးတို့အတွက် တော်လှန်ရေးအင်အားစုတွေနဲ့အတူ ဆုံးခန်းတိုင်အောင် တိုက်ပွဲဝင်သွားမယ်လို့ လည်း ထုတ်ပြန်ချက်ထဲ ဖော်ပြထားပါတယ်။

========================

📌📌 ၂။ CNA/CNF ဌာနချုပ် လေကြောင်းမှ တိုက်ခိုက်ခံရ၊ နောက်ကွယ်မှာ အိန္ဒိယအစိုးရ ပတ်သက်မှုရှိ နေနိုင်

ချင်းအမျိုးသားတပ်ဦး CNA/CNF ဌာနချုပ်တည်ရှိရာ Camp Victoriaကို စစ်ကောင်စီက ဂျက်တိုက်လေယာဥ် ၅ စင်းနဲ့ ဇန်နဝါရီ ၁၀ ရက် မြန်မာစံတော်ချိန် မွန်းလွဲ ၄ နာရီ မိနစ် ၃၀ ဝန်းကျင်မှာ တိုက်ခိုက်ခဲ့ပါတယ်။ အနည်းဆုံး ၅ ဦးသေဆုံးပြီး ၁၀ ဦးထက်မနည်း ဒဏ်ရာရရှိတယ်လို့ ချင်းပြည်ဒေသတွင်း သတင်းရင်းမြစ်တွေက ကနဦးဖော်ပြကြပါတယ်။

Camp Victoria ထဲက အဆောက်အဦး ပျက်စီးမှုတွေလည်း အများအပြားရှိတယ်လို့ သိရပါတယ်။ အိန္ဒိယနိုင်ငံပိုင် နက်ထဲမှာလည်း ကျရောက်ပေါက်ကွဲခဲ့ပြီး အိန္ဒိယနိုင်ငံသားတွေပိုင်ဆိုင်တဲ့ စက်ပစ္စည်းတချို့အပျက်အစီးရှိတယ်လို့ မြေပြင်သတင်းရင်းမြစ်တွေထံက သိရှိရပါတယ်။ လေကြောင်းကနေ စတင်တိုက်ခိုက်တာလည်း ဖြစ်ပါတယ်။ ဒီတိုက် ခိုက်မှုမှာ အိန္ဒိယအစိုးရအနေနဲ့ နောက်ကွယ်က ပတ်သက်မှုမျိုး ရှိနေနိုင်တယ်လို့ ချင်းနိုင်ငံရေးသုံးသပ်သူတွေက ပြောဆို နေကြပါတယ်။“ဒီနေ့ မနက်ကတည်းက Camp Victoria မှာ အိန္ဒိယဆမ်းကတ် တယ်လီဖုန်းလိုင်းတွေ အကုန်ပြတ်နေတာ၊ နောက်ပြီး ဒီလို လေကြောင်း တိုက်ခိုက်မှုမလုပ်ခင် နာရီပိုင်းအလိုမှာ လေကြောင်းတိုက်ခိုက်မှု ရှိနိုင်တယ်ဆိုတဲ့ သတင်းတွေ အိန္ဒိယ ဘက်က သတင်းတွေကြားရတာ ရှိတယ်၊ မြန်မာပြည်ဘက်က ကြားရတာ မဟုတ်ဘူးနော်။” လို့ ချင်းနိုင်ငံရေးသုံးသပ်သူ တစ်ဦးက ဆိုပါတယ်။

“သူတို့ Airspaceကို သုံးဖို့ အသိပေးပြီး ဖြစ်လောက်တယ်၊ အောက်ခြေက မသိရင်တောင် အထက်ပိုင်းမှာ အသိပေး ပြီးသားလို ဖြစ်နေတယ်။ ထိုင်းမှာတုန်းကလည်း အတူတူပဲ၊ ဒီလိုလေကြောင်းတိုက်ခိုက် ခံရတာမျိုးဆိုရင် တရုတ်နယ် စပ်တွေ သက်သာလောက်တယ်၊ တရုတ်ကတော့ အဲဒီလောက်ထိ လက်ခံမယ် မထင်ဘူး။” လို့ ဩစတေးလျအခြေစိုက် မြန်မာ့အရေးနဲ့ ပြည်တွင်းစစ်ရေးရာ လေ့လာနေတဲ့ ချင်းတိုင်းရင်းသား သုတေသီတစ်ဦး ကလည်း သုံးသပ်ပါတယ်။

ပြီးခဲ့တဲ့ ၂၀၂၂ နိုဝင်ဘာလ ၇ ရက်နေ့မှာ စစ်ကောင်စီဘက်က Camp Victoria ကို တိုက်ခိုက်နိုင်တယ်ဆိုတဲ့အကြောင်း သတင်းတွေ ပျံ့နှံ့လာခဲ့ပြီးနောက် စစ်ကောင်စီရဲ့လေကြောင်းတိုက်ခိုက်မှုတွေ ပိုလုပ်လာနိုင်ကြောင်း၊ ဒီလေကြောင်းတိုက် ခိုက်မှုအတွက် ကြိုတင်ပြင်ဆင်ထားကြောင်း၊ ချင်းတောင်တန်းရဲ့ သဘာဝ မြေပြင်အနေအထားကလည်း ကာကွယ်ပေး နေတာမျိုးရှိတယ်လို့ ချင်းအမျိုးသားတပ်ဦး ပြောရေးဆိုခွင့်ရှိသူ ဆလိုင်းထက်နီက BNI သတင်းဌာနကို ဖြေကြားခဲ့ဖူးပါတယ်။ စစ် ကောင်စီဟာ ဇန်နဝါရီ ၁၁ ရက်နေ့ မွန်းလွဲ ၄ နာရီဝန်းကျင်မှာလည်း ဒုတိယအကြိမ် ထပ်မံ ဗုံးကြဲတိုက်ခိုက်ခဲ့ပါတယ်။

========================

📌📌 ၃။ CNF အပါအဝင် နိုင်ငံအနှံ့က တော်လှန်ရေးအင်အားစုတွေနဲ့ ပိုမိုပူးပေါင်းသွားမယ်လို့ CDF မင်းတပ်ထုတ်ပြန်

စစ်ကောင်စီရဲ့ ဇန်နဝါရီ ၁၀ ရက်နေ့ ဂျက်ဖိုက်တာ ၅ စင်းနဲ့အကြမ်းဖက်တိုက်ခိုက်မှုကြောင့် ကျဆုံးရဲဘော်ရဲမေ ၅ ဦး အပါအဝင် ဒဏ်ရာရ ရဲဘော်တွေရဲ့ ဝမ်းနည်းဖွယ်သတင်းကြားသိရတာကြောင့် ချင်းအမျိုးသားတပ်ဦး (CNF) နဲ့ထပ်တူ ကြေကွဲဝမ်းနည်းရတယ်လို့ CDF မင်းတပ်က ဇန်နဝါရီ ၁၁ ရက်နေ့က ထုတ်ပြန်ပါတယ်။

စစ်ကောင်စီရဲ့ ဒီလိုအကြမ်းဖက်တိုက်ခိုက်မှုအပေါ် ပြင်းပြင်းထန်ထန်ကန့်ကွက်ရှုပ်ချတယ်လို့လည်း ထုတ်ပြန်ကြေညာ ထားပါတယ်။ ချင်းတော်လှန်ရေးအဖွဲ့အစည်းတခုရဲ့ ရုံးစိုက်ရာနေရာကို ခုလိုပစ်မှတ်ထားတိုက်ခိုက်တာဟာ ချင်းပြည်သူလူထုတစ် ရပ်လုံးကို မထီမဲ့မြင်ပြုတာဖြစ်ပြီး စစ်ကောင်စီအပေါ် နာကြည်းမုန်းတီးတဲ့ ချင်းလူမျိုးတွေရဲ့ တော်လှန်ရေးစိတ်ထက် သန်မှုကို ပိုမိုခိုင်မာလာစေတဲ့ လုပ်ရပ်ဖြစ်တယ်လို့ ဆိုပါတယ်။

စစ်ကောင်စီဟာ ချင်းပြည်နယ်နေရာအနှံ့မှာ ဝေဟင်၊ မြေပြင်စစ်ကြောင်းတွေနဲ့ ထိုးစစ်ဆင်တိုက်ခိုက်နေတာကြောင့် CDF မင်းတပ်အနေနဲ့ CNF/ CNA အပါအဝင် ချင်းတော်လှန်ရေးအင်အားစုတွေ၊ နိုင်ငံအနှံ့က ဘုံရန်သူတူညီတဲ့ တော်လှန်ရေး အင်အားစုတွေနဲ့ ပိုမိုပူးပေါင်းဆောင်ရွက်သွားမယ်လို့ ဆိုပါတယ်။

အာဏာရှင် စစ်ကောင်စီကို အမြစ်ပြတ်ဖြုတ်ချရေး၊ ဖက်ဒရယ်ဒီမိုကရေစီတည်ဆောက်ရေးတို့အတွက် အားသွန်ခွန်စိုက် ဆောင်ရွက်သွားမယ်လို့လည်း CDF မင်းတပ်က ထုတ်ပြန်ကြေညာထားပါတယ်။

========================

📌📌 ၄။ စစ်ကောင်စီရဲ့ ရွေးကောက်ပွဲကို ကန့်ကွက်ကြောင်း၊ ဝင် ရောက်အ ရွေးခံမယ့်ပါတီနဲ့ လူပုဂ္ဂိုလ်တွေရဲ့ လုံခြုံရေးတာဝန် မယူကြောင်း CDF ဟားခါးကောင်စီထုတ်ပြန်

လာမယ့် သြဂုတ်လမှာ စစ်ကောင်စီကကျင်းပဖို့လုပ်နေတဲ့ ရွေးကောက်ပွဲကို အပြင်းအထန်ကန့်ကွက်တဲ့အကြောင်းနဲ့ ပါဝင်ပတ်သက်တဲ့သူတွေရဲ့ လုံခြုံရေးကိုတာဝန်မယူဘူးလို့ CDF ဟားခါးကောင်စီက ဇန်နဝါရီလ ၉ ရက်နေ့ ထုတ်ပြန်ချက် အမှတ် (၁/၂၀၂၃) နဲ့ ထုတ်ပြန်ပါတယ်။ အကြမ်းဖက်စစ်တပ် ခေါင်းဆောင် မင်းအောင်လှိုင် ဦးဆောင်ပြီး အာဏာရယူဖို့ ရွေးကောက်ပွဲပြုလုပ်တာကို CDF ဟားခါးကောင်စီက အပြင်းအထန်ကန့်ကွက်တယ်လို့ ဆိုပါတယ်။

ဒီရွေးကောက်ပွဲမှာ ပါဝင်ပတ်သက်တဲ့ပါတီနဲ့ လူပုဂ္ဂိုလ်တွေကို စစ်တပ်နဲ့တတန်းတည်းသတ်မှတ်ပြီး သူတို့လုံခြုံရေး အတွက် တာဝန်ယူမှာမဟုတ်ဘူးလို့လည်း အဲဒီထုတ်ပြန်ချက်မှာ ဖော်ပြထားပါတယ်။

ဇန်နဝါရီ ၈ ရက်နေ့က ဟားခါးမြို့ထဲမှာ ရွေးကောက်ပွဲတွက် မှတ်ပုံတင်၊ အိမ်ထောင်စုစာရင်းတွေကောက်မယ်လို့ လိုက်အော်တဲ့ နောက်တနေ့မှာ CDF ဟားခါးကောင်စီက ခုလိုပြတ်ပြတ်သားသား ထုတ်ပြန်လိုက်တာပါ။ အမျိုးသားညီညွတ်ရေးအစိုးရ (NUG) ကတော့ စစ်ကောင်စီက လူဦးရေစာရင်းကောက်ယူလာခဲ့ရင် ပြည်သူတွေအနေနဲ့ ငြင်းဆန်ပြီး မပူးပေါင်းကြဖို့ ဇန်နဝါရီ ၅ ရက်နေ့ကတည်းက အသိပေးထားပါတယ်။