7th JAN 2023 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ ဇန်နဝါရီလ ( ၇ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ လွတ်လပ်ရေးနေ့မှာ CDF မတူပီက ခမရ ၃၀၄ ဂိတ်သွားရောက်ပစ်ခတ်၊ စစ်တပ်ဘက် ထိခိုက်သေဆုံးမှုရှိတယ်လို့ ထုတ်ပြန်

၇၅ နှစ်မြောက် စိန်ရတုလွတ်လပ်ရေးနေ့မှာ CDF မတူပီက ပလက်ဝ - မတူပီကားလမ်းမအနီးမှာရှိတဲ့ စစ်ကောင်စီရဲ့ ခမရ ၃၀၄ အထိုင်ဂိတ်စခန်းတခုကို ဝင်ရောက် ပစ်ခတ်ခဲ့တယ်လို့ သတင်းထုတ်ပြန်ပါတယ်။

 

အဲဒီနေ့ ညနေ ၃ နာရီ ၅ မိနစ်အချိန်မှာ ဝင်ရောက်ပစ်ခတ်ခဲ့တာဖြစ်ပြီး စစ်ကောင်စီတပ်သားတစ်ဦးသေဆုံးကြောင်းနဲ့ တစ်ဦး ဒဏ်ရာရတယ်လို့လည်း ထုတ်ပြန်ချက်ထဲမှာ ဖော်ပြထားပါတယ်။

 

စစ်ကောင်စီရဲ့ အထိုင်ဂိတ်ဝင်ရောက်ပစ်ခတ်မှုအပြီးမှာ CDF မတူပီ ကာကွယ်ရေးတပ်ဖွဲ့ဝင်တွေ အထိခိုက်မရှိဆုတ်ခွာ နိုင်ခဲ့ပေမယ့် စစ်ကောင်စီတပ်က ည ၈ နာရီဝန်းကျင်အထိ လက်နက်ကြီး ရမ်းသန်းပစ်ခတ်နေတယ်လို့ ဆိုပါတယ်။

========================

 

📌📌 ၂။ ၂၀၂၃ ခုနှစ်မှာ တော်လှန်ရေးအရှိန်မြှင့်သွားမယ်လို့ CDF မင်းတပ် ကြေညာ

 

တော်လှန်ရေးကာလ ၂ နှစ်နီးပါးအတွင်းမှာ အခက်ခဲတွေကို ကြံ့ကြံ့ခံဖြတ်ကျော်နိုင်ခဲ့ပြီး အခုလာမယ့် ၂၀၂၃ ခုနှစ်ဟာ တော်လှန်ရေးအရှိန် မြှင့်သွားရမယ့်အချိန်ဖြစ်တယ်လို့ CDF မင်းတပ်က ၂၀၂၃ ခုနှစ် ဇန်နဝါရီလ ၁ ရက်နေ့မှာ တရားဝင် ကြေညာလိုက်ပါတယ်။

 

လူမျိုးတမျိုး၊ ပြည်နယ်တခုတည်းလွတ်မြောက်ဖို့မဟုတ်ဘဲ တနိုင်ငံလုံး စစ်အာဏာရှင်လက်အောက်က လွတ်မြောက်ပြီး ဖက်ဒရယ်ဒီမိုကရေစီတည်ဆောက်ဖို့အတွက် နိုင်ငံရေးဦးတည်ချက် ခိုင်ခိုင်မာမာချမှတ်ရင်း အဆုံးထိတော်လှန်သွား မယ်လို့ ဆိုပါတယ်။

 

စစ်အာဏာရှင်စနစ် အမြစ်ပြတ်ချေမှုန်းရေးနဲ့ ဖက်ဒရယ်ဒီမိုကရေစီ တည်ဆောက်ရေးအတွက် တော်လှန်ရေးကာလမှာ ပြည်သူအားလုံး CDF မင်းတပ်နဲ့ ပူးပေါင်းဆောင်ရွက်ကြဖို့၊ ထောက်ပံ့ပေးကြဖို့ကိုလည်း တိုက်တွန်းထားပါတယ်။

 

၂၀၂၃ ခုနှစ်ဟာ တော်လှန်ပြည်သူတွေ မုချအောင်မြင်ရမယ့်နှစ်ဖြစ်ပြီး CDF မင်းတပ် တော်လှန်ရေးတပ်ဦးအနေနဲ့ အသက်စွန့်တိုက်ပွဲဝင်သွားမယ်လို့လည်း ဂတိသစ္စာပြုထားပါတယ်။

 

စစ်ကောင်စီက အာဏာသိမ်းပြီးတဲ့နောက် အစောဆုံး တူမီးကိုင်တော်လှန်လာတဲ့ CDF မင်းတပ်မှာ ရဲဘော် ၅၇ ဦးက အသက်ပေးထားပြီး စစ်ကောင်စီရဲ့ရာချီအင်အားနဲ့ စစ်အသုံးဆောင်များစွာ ရှင်းလင်း သိမ်းဆည်းနိုင်ခဲ့ပါတယ်။

========================

 

📌📌 ၃။ တစ်နှစ်တာ အပစ်ခတ်ရပ်စဲထားတယ်လို့ စစ်ကောင်စီကြေညာ

 

အာဏာသိမ်း စစ်ကောင်စီက (NCA) လက်မှတ်ရေးထိုးထားတဲ့ တိုင်းရင်းသားလက်နက်ကိုင်အဖွဲ့အစည်းတွေနဲ့ အပစ်ခတ်ရပ်စဲလိုက်တယ်လို့ ဒီဇင်ဘာလ ၃၁ ရက်နေ့ ရက်စွဲနဲ့ ထုတ်ပြန်ပါတယ်။

၂၀၂၃ ဇန်နဝါရီ ၁ ရက်ကနေ ၂၀၂၃ ဒီဇင်ဘာ ၃၁ ရက်နေ့အထိ DKBA၊ KNU-KNLA/PC၊ NMSP၊ PNLO၊ ALP၊ RCSS (SSA)၊ LDU စတဲ့ ၇ ဖွဲ့၊ NCA လက်မှတ်မရေးထိုးသေးတဲ့ UWSA၊ NDAA၊ SSPP (SSA) စုစုပေါင်း ၁၀ ဖွဲ့နဲ့ အပစ်ခတ် ရပ်စဲလိုက်တာပါ။

 

နိုင်ငံတော် အုပ်ချုပ်ရေးတည်ငြိမ်အေးချမ်းနေတာကို ထိပါးနှောက်ယှက်တာကလွဲပြီး တစ်နှစ်တာ ပစ်ခတ်မှုရပ်စဲ လိုက်တာဖြစ်တယ်လို့ ဆိုပါတယ်။

 

ပြီးခဲ့တဲ့ ၂၀၁၈ ဒီဇင်ဘာ ၂၁ ရက်ကနေ ၂၀၂၂ ဒီဇင်ဘာ ၃၁ ရက်အထိ ၄ နှစ်ကျော်ကာလအတွင်းမှာ ပစ်ခတ်တိုက်ခိုက်မှု ရပ်စဲရေး ထုတ်ပြန်ချက်ပေါင်း ၂၁ ကြိမ်ထိထုတ်ပြန်ပြီး စစ်ရေးလှုပ်ရှားမှုတွေ စစ်တပ်က ရပ်စဲပေးထားတယ်လို့ ပြောပါတယ်။

 

ဒီလိုထုတ်ပြန်ထားပေမယ့် စစ်အာဏာရှင်ကို တော်လှန်နေကြတဲ့ နေရာဒေသတွေကို လေကြောင်းကနေ ဗုံးကြဲတာ၊ ကျေးရွာတွေ မီးရှို့ဖျက်ဆီးတာ၊ ငြိမ်းချမ်းစွာဆန္ဒပြ တောင်းဆိုသူတွေပေါ် အကြမ်းဖက် ဖမ်းဆီးနှိပ်စက်သတ်ဖြတ်တာမျိုး မြန်မာစစ်တပ်က နေ့မနား ညမအား ကျူးလွန်နေဆဲ ဖြစ်ပါတယ်။

========================

 

📌📌 ၄။ မြန်မာ့ဒီမိုကရေစီရေးအတွက် ဒေါ်လာ ၁၃၆ သန်းထက်မနည်း ကူညီဖို့ သမ္မတဂျိုးဘိုင်ဒန် လက်မှတ်ထိုး

 

မြန်မာပြည် ဒီမိုကရေစီနဲ့ ဖက်ဒရယ်အရေးအတွက် အမေရိကန် ဒေါ်လာ ၁၃၆ သန်းထက် မနည်းသုံးစွဲနိုင်ဖို့ ၂ဝ၂၃ ခုနှစ် အမေရိကန် အစိုးရဘဏ္ဍာငွေ ခွဲဝေသုံးစွဲမှု ဥပဒေ Consolidated Appropriations Act of 2023 ကို အမေရိကန် သမ္မတ‌ ဂျိုးဘိုင်ဒန်က ဒီဇင်ဘာ ၂၉ ရက်နေ့မှာ လက်မှတ်ထိုး အတည်ပြုလိုက်တယ်လို့ RFA Burmese ရဲ့ ရေးသားချက်အရ သိရပါတယ်။ 

 

ဒီလိုအတည်ပြုလိုက်တဲ့အပေါ် ဝါရှင်တန်ဒီစီအခြေစိုက် Chin Association of Maryland က ကြိုဆိုထောက်ခံတဲ့အကြောင်း သောကြာနေ့က ထုတ်ပြန်ပါတယ်။ ဒေါ်လာ ၁၃၆ သန်းဟာ လူသားချင်းစာနာမှုဆိုင်ရာ ကူညီထောက်ပံ့ရေး၊ အချက်အလက်စုဆောင်းရေး၊ လူ့အခွင့်အရေး၊ စစ်အာဏာရှင်ပြုတ်ကျရေးတို့အတွက် သီးသန့်ငွေကြေးထောက်ပံ့မှု တစ်စုံတစ်ရာဖြစ်တယ်လို့ သိရပါတယ်။

 

ဒီလိုကူညီပေးတာကို ကျေးဇူးတင်ကြောင်း ဒါပေမဲ့ မြန်မာ့ဒီမိုကရေစီအရေးအတွက် လုံလောက်တဲ့ ငွေပမာဏာတော့ မဟုတ်သေးဘူးလို့ ဆိုထားပါတယ်။ 

 

အမေရိကန် အစိုးရဘဏ္ဍာငွေ ခွဲဝေသုံးစွဲမှုဥပဒေကို ဒီဇင်ဘာ ၂၂ ရက်နေ့မှာ အထက်လွှတ်တော်က အတည်ပြုပေး လိုက်ပြီး ၂၃ ရက်နေ့မှာ အောက်လွှတ်တော်က ထပ်မံအတည်ပြုခဲ့တာပါ။ ဒီထဲမှာ မြန်မာနိုင်ငံမှာကြုံနေရတဲ့ လူသားချင်းစာနာမှု အကျပ်အတည်းအတွက် ထိုင်းနိုင်ငံကနေတစ်ဆင့် နယ်စပ်ဖြတ် ကျော်အကူအညီတွေ ပေးအပ်ရာမှာ သုံးစွဲမယ့်အကြောင်း ဖော်ပြပါတယ်။

 

ဒါ့အပြင် အမျိုးသားညီညွတ်ရေးအစိုးရ NUG၊ ပြည်ထောင်စုလွှတ်တော်ကိုယ်စားပြု ကော်မတီ CRPH နဲ့ တိုင်းရင်းသားအဖွဲ့အစည်းတွေ၊ လူထုအခြေပြု အဖွဲ့အစည်းတွေကလုပ်နေတဲ့ လုပ်ငန်းအချို့အတွက် အသုံးပြုသွား မယ်လို့ ဖော်ပြထားတယ်။ 

အကြမ်းမဖက်တဲ့ CDM လှုပ်ရှားမှုမှာ ပါဝင်နေသူတွေအတွက်လည်း အသုံးပြုမယ်လို့ ပါပါတယ်။ ဒါပေမဲ့ ဒီရန်ပုံငွေတွေကို လက်နက်ကိုင် တော်လှန်ရေးလုပ်နေတဲ့ အစိတ်အပိုင်းတွေဆီကိုတော့ ပေးအပ်မှာ မဟုတ်တဲ့အကြောင်းလည်း ဖော်ပြထားပါတယ်။

 

မြန်မာနိုင်ငံက ဒီမိုကရေစီအရေး တိုက်ပွဲဝင်နေသူတွေကို ကူညီထောက်ပံ့မယ့် အချက်တွေပါတဲ့ အမေရိကန် အမျိုးသားကာကွယ်ရေးလုပ်ပိုင်ခွင့် အက်ဥပဒေ (NDAA) ကိုလည်း သမ္မတ ဂျိုးဘိုင်ဒန်က ပြီးခဲ့တဲ့ ဒီဇင်ဘာ ၂၃ ရက်နေ့က လက်မှတ်ရေးထိုးခဲ့ပါတယ်။

#RadioNUGLocalNews

#SpringRevolution