25th FEB 2023 - (Ethnic language program-CHO_DAAI) by Radio NUG ~ Newsletter by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ ဖေဖော်ဝါရီလ ( ၂၅ ) ရက်နေ့ နောက်ဆုံးရပြည်တွင်းသတင်းများ

📌📌 ၁။ စစ်ကောင်စီတပ်သား ၂ ဦး CDF ဟားခါးထံ အလင်းဝင်

စစ်ကောင်စီတပ်သား ၂ ဦး အလင်းဝင်ရောက်လာတယ်လို့ ဖေဖော်ဝါရီ ၂၀ ရက်နေ့ CDF ဟားခါးက သတင်းထုတ်ပြန်ပါတယ်။ အလင်းဝင်လာတဲ့ စစ်ကောင်စီတပ်သားတွေဟာ ထန်တလန် အမှတ် ၂၆၄ စစ်ကောင်စီတပ်ရင်းက တာဝန်ထမ်းဆောင်နေတဲ့ စစ်ကောင်စီတပ်သား ၂ ဦးဖြစ်တယ်လို့ ဆိုပါတယ်။

စစ်ကောင်စီတပ်သား ၂ ဦးကို ဆုကြေးငွေပေးအပ်ကာ လုံခြုံတဲ့နေရာရောက်ရှိသည်အထိ တာဝန်ယူထားတယ်လို့လည်း CDF ဟားခါးရဲ့ သတင်းထုတ်ပြန်ချက်မှာ ဖော်ပြထားပါတယ်။

အလင်းဝင်ရောက်လာတဲ့ စစ်ကောင်စီတပ်သား ၂ ဦးနဲ့အတူ MA-3၊ MA-1၊ ကျည် ၆၇၄ တောင့်၊ ကျည်ကဒ် ၉ ခု၊ ၆၀ မမ ၃ လုံး၊ အခြားပစ္စည်းတွေပါတယ်လို့ CDF ဟားခါးက ဆိုပါတယ်။

ပြီးခဲ့တဲ့ ဖေဖော်ဝါရီလ ၁၆ ရက်နေ့ကလည်း ဟားခါးမြို့အခြေစိုက် ခမရ ၂၆၆ စစ်ကောင်စီတပ်ရင်းက တပ်သား ၂ ဦး CDF-Senthang ထံ အလင်းဝင်ခဲ့သလို ခမရ ၃၀၄ တပ်ရင်းက စစ်ကောင်စီတပ်သား တစ်ဦး အလင်းဝင်လာတာကြောင့် ဆုကြေးငွေနဲ့ လွတ်မြောက်နယ်မြေသို့ ပို့ဆောင်ပေးခဲ့တယ်လို့ CDF ကန်ပက်လက်က ဖေဖော်ဝါရီ ၁၂ ရက်နေ့မှာ သတင်းထုတ်ပြန်ထား ပါတယ်။

========================

📌📌 ၂။ စစ်ကောင်စီ စီမံအုပ်ချုပ် ရေးအဖွဲ့ဝင်အဖြစ် ပူဂင့်ကမ်းလျန်ကို ဒေါက်တာမှုထန်နဲ့ အစားထိုး

နိုင်ငံတော်စီမံအုပ်ချုပ် ရေးအဖွဲ့ဝင်အဖြစ် ပူဂင့်ကမ်းလျန်နဲ့ ဒေါက်တာမှုထန်ကို အစားထိုးခန့်အပ်တယ်လို့ စစ်ကောင်စီက ကြေညာချက် ထုတ်ပြန်လာပါတယ်။ နိုင်ငံတော် စီမံအုပ်ချုပ် ရေးအဖွဲ့ဝင်အဖြစ် ပူဂင့်ကမ်းလျန်ကို ၂၀၂၃ ဖေဖော်ဝါရီ ၁ ရက်နေ့ ခန့်အပ်ပြီး ၁၅ ရက်ဝန်းကျင် အကြာမှာ ပြန်လည်လူစားထိုးခံရတာလည်း ဖြစ်ပါတယ်။

ခုလက်ရှိ နိုင်ငံတော် စီမံအုပ်ချုပ် ရေးအဖွဲ့ဝင်ဖြစ်လာသူ ချင်းပြည်နယ်၊ ကြံ့ခိုင်ရေးနှင့် ဖွံ့ဖြိုးရေးပါတီ ဥက္ကဌ ဒေါက်တာ မှုထန်ဟာ ၂၀၂၀ ပါတီစုံဒီမိုကရေစီ ရွေးကောက်ပွဲမှာ ထန်တလန်မြို့နယ် ပြည်နယ်လွှတ်တော် မဲဆန္ဒနယ် အမှတ် (၂)မှာ ဝင်ရောက်ယှဥ်ပြိုင်ပြီး မဲရှုံးနိမ့်ခဲ့ပါတယ်။

ဒီဖြစ်စဥ်နဲ့ ပတ်သက်ပြီး မဲမသမာမှုရှိတာကြောင့် ကော်မရှင်ကို တိုင်ကြားထားတာမျိုးရှိတယ်လို့ ချင်းဝေါမီဒီယာနဲ့ ၂၀၂၀ ဒီဇင်ဘာလဆန်းပိုင်း အင်တာဗျူးတစ်ခုမှာ ဒေါက်တာမှုထန်က ဖြေကြားထားပါတယ်။

စစ်ကောင်စီခန့်အပ်တဲ့ ရာထူးနဲ့ပတ်သက်ပြီး ဒေါက်တာမှုထန်အနေနဲ့ လက်ခံထားခြင်းရှိ၊ မရှိကိုတော့ The Mindat Post အနေနဲ့ သီးခြားအတည်မပြုနိုင်ပါဘူး။ စစ်ကောင်စီအာဏာသိမ်းပြီးတဲ့နောက် နိုင်ငံတော်စီမံအုပ်ချုပ်ရေးကောင်စီအဖွဲ့ဝင်အဖြစ် ခန့်အပ်ခံရတဲ့ ဦးမောင်းဟာကိုလည်း အာဏာသိမ်း ၂ နှစ်ပြည့်မှာ ဗဟိုအကြံပေးကောင်စီအဖွဲ့ဝင်အဖြစ် စစ်ကောင်စီက တိုးမြှင့်ခန့်ထားတာ မြင်တွေ့ရပါတယ်။

========================

📌📌 ၃။ ပြည်သူလူထုပံ့ပိုးတဲ့ ငွေသားတစ်ချို့နဲ့ နွားနောက်အကောင်ရေ ၆၀ ကျော် လက်ခံထားတယ်လို့ CDF ကန်ပက်လက်ကြေညာ

CDF ကန်ပက်လက် တပ်ရင်း၊ တပ်ဖွဲ့တွေရဲ့ ဘဏ္ဍာရေးအခက်အခဲဖြေရှင်းဖို့ ပြည်သူလူထုပံ့ပိုးတဲ့ ငွေသားနဲ့ အ မြတ်တနိုး မွေးမြူထားကြတဲ့ နွားနောက်တွေ လက်ခံရရှိတယ်လို့ CDF ကန်ပက်လက်က ဖေဖော်ဝါရီ ၁၇ ရက်နေ့ ထုတ်ပြန်ပါတယ်။ လက်ခံရရှိတဲ့ ပံ့ပိုးအရာတွေထဲ ငွေသားတစ်ချို့နဲ့ နွားနောက် အကောင်ရေ ၆၀ ကျော် ပါဝင်တယ်လို့ ဆိုပါတယ်။

ပြီးခဲ့တဲ့နေ့တွေအတွင်း ကန်ပက်လက်မြို့နယ် ပြည်သူ့အုပ်ချုပ်ရေးအဖွဲ့က ကာကွယ်ရေးတပ်ရဲ့ ကြုံတွေ့နေရတဲ့အခက်ခဲတွေကို ကွင်းဆင်းပြီး ရှင်းလင်းတင်ပြရာကနေ ခုလိုပါဝင်လာကြတာလို့ ထုတ်ပြန်ချက်မှာ ဖော်ပြထားပါတယ်။

ပြည်သူလူထုတစ်ရပ်လုံးက ညီညီညွတ်ညွတ်နဲ့ ခုလိုပါဝင်လာကြတဲ့အပေါ် အတိုင်းမသိဝမ်းသာတဲ့အကြောင်းနဲ့ ပြည်တွင်း၊ ပြည်ပက တော်လှန်ရေးညီအစ်ကိုအားလုံး အရေးတော်အောင်သည်အထိ အတူ ပံ့ပိုးပါဝင်ပေးကြဖို့ CDF ကန်ပက်လက်က နှိုးဆော်ထားပါတယ်။

ချင်းပြည်နယ်မှာ နွားနောက်ကို ရှေးဘိုးဘွားဘီဘင်လက်ထက်တည်းက အမြတ်တနိုးမွေးမြူလာကြတာဖြစ်ပြီး နွားနောက်ထီး တစ်ကောင်ကို အနည်းဆုံး ကာလတန်ဖိုး ကျပ် ၁၅ သိန်းကနေ ကျပ် ၁၈ သိန်းဝန်းကျင်အထိ ပေါက်ဈေးရှိနေပါတယ်။

========================

📌📌 ၄။ မင်းတပ်မြို့နယ်တချို့မှာ ဆန်၊ ရိက္ခာဈေးအဆမတန်မြင့်တက်ပြီး အကန့်အသတ်ဖြင့်သာ ဝယ်နေရ

မင်းတပ်မြို့နယ်တချို့မှာ ဆန်၊ ဆီ စားနပ်ရိက္ခာတချို့ ဈေးအဆမတန်မြင့်တက်နေပြီး အကန့်အသတ်နဲ့သာဝယ်ယူနေရတယ်လို့ ဒေသခံတွေက ပြောပါတယ်။ ၂၀၂၃ ဖေဖော်ဝါရီလအတွင်းမှာ ဆန်အပါအဝင် ရိက္ခာတစ်ချို့ရှားပါးလာပြီး ဝယ်ယူမရတဲ့အခြေနေတွေနဲ့ ရင်ဆိုင်ရတာလို့ ဆိုကြပါတယ်။

“တချို့နယ်ဘက်တွေက ကားလမ်းမပေါက်တဲ့နေရာမှာ ဆန်၊ ဆီ၊ ရိက္ခာက အရမ်းရှားလာပြီ၊ ငွေရှိရင်တောင် ဝယ်မရတဲ့ အခြေနေမျိုးပေါ့” လို့ ကျေးရွာနေပြည်သူတွေက ပြောကြပါတယ်။

မင်းတပ်မြို့နယ်အတွင်း ဖေဖော်ဝါရီလထဲမှာ အောက်ဆန်တစ်အိတ်ကို ငွေကျပ် လေးသောင်း ငါးထောင်ကနေ ကျပ်ငါးသောင်းအကြားအထိ ဈေးပေးဝယ်ယူနေရတဲ့အခြေနေမျိုး ရှိနေတယ်လို့ သိရပါတယ်။

ဒါပေမယ့် ယာစပါးထွက်တဲ့ ရပ်ကျေးဒေသတွေမှာတော့ ဆန်ရိက္ခာလုံလောက်တဲ့အနေအထားမျိုးရှိနေတယ်လို့လည်း တောင်ယာစပါးစိုက်ပျိုးသူတွေက The Mindat Post ကို ပြောပါတယ်။

“တချို့နေရာဘက် စပါးတွေရိတ်နေကြပြီဆိုတော့ ဆန်အတွက်က အရမ်းစိတ်မပူရဘူးပေါ့၊ တခြားအရာတွေပိုလိုအပ်နေတယ်၊ ဥပမာ စက်သုံးဆီ၊ စားဆီနဲ့ တခြားတွေလိုအပ်တဲ့ဟာမျိုးပေါ့၊ ဘာဖြစ်ဖြစ် ခက်ခဲတယ်လို့တော့ ပြောရမှာပဲ” လို့ သူတို့က ပြောပါတယ်။

စားနပ်ရိက္ခာအပြင် ဆက်သွယ်ရေးဖုန်းလိုင်းတွေ ဖြတ်တောက်ခံထားရဆဲဖြစ်တာကြောင့် သတင်းအချက်အလက် စီးဆင်းမှုပါ ပိတ်ပင်ခံထားရတာလို့ သူတို့က ဆိုပါတယ်။

မင်းတပ်မြို့နယ်ကနေ ဝယ်ယူတဲ့ မကွေးတိုင်း၊ ကျောက်ထုတိုက်နယ်အတွင်းက ဆန်၊ စပါး၊ ဆန်ကွဲရောင်းချမှုကိုပါ ကန့်သတ်ထားပြီး လိုအပ်လာရင် တိုက်နယ်တာဝန်ရှိအဖွဲ့အစည်းထံ အကြောင်းကြားရမယ်လို့ ကျောက်ထုတိုက်နယ် ကျေးရွာပြည်သူ့အုပ်ချုပ်ရေးက ယခုနှစ် ဖေဖော်ဝါရီ ၁၀ ရက်နေ့ ထုတ်ပြန်ထားပါတယ်။

မင်းတပ်မြို့ပေါ်မှာတော့ ရိက္ခာလုံလောက်မှုတွေ ရှိတယ်လို့ဆိုနိုင်ပေမယ့် စစ်ကောင်စီရဲ့ အဘက်ဘက်က လမ်းကြောင်း ပိတ်ဆို့ခံနေရတဲ့ ကျေးရွာတွေမှာ အရင်ထက်ခက်ခဲကြပ်တည်းတဲ့ အနေအထားဖြစ်နေပါတယ်။